Mouzuni mudima, vantu wovanzi kwa hara kulya tupu yikwa ehidi.

•   “Vantu ava ava li tupu yikwa ehidi kuhetekera ko paapa va hulira yipo va dire kutura mosiponga yikorama ndi va yi lye, va yi ruganese mokuninka mudwaro ndi sitambo sa peke.”—The Vegan Society.

 Vantu vamwe kapi tupu ava tameke kulya yikwa ehidi morwa asi va kara nosinka koyikorama nye hena morwa vana hara kuwapeka nkarapamwe, va kare noukanguki wouwa ndi morwa ukarelikarunga wawo.

•   “Vantu ava ava li tupu yikwa ehidi kwa lisiga novantu ava ava dili kulya nondya dononzi, morwa rorunzi vantu kuyitara ngepuliro, etokoro lyokukuhuka eli ga hepa kutura po muntu ntani nkedi ezi nkenye muntu na vhura kuwapeka uzuni.”—Britannica Academic.

 Ngoso vantu ava ava li yikwa ehidi kuna kara ekohonono po komaudigu gomouzuni ndi? Yisinke azi uyunga ko Bibeli?

 Bibeli kulikida asi Musiti gwetu, Jehova Karunga, a kutara vantu asi mulyo unene kupitakana yikorama ntani age kwa pa vantu nonkondo dokuyipangera. (Genesis 1:27, 28) Mwaza siruwo, Karunga kwa pulisilire vantu va lye yikorama. (Genesis 9:3) Nye nampili ngoso, kapi ga hara yikorama va yi tekure momudona.—Yisewe 12:10.

 Kuliza noBibeli, twa hepa kutokora nyamwetu nsene asi tatu li nyama ndi hawe. b Etokoro lyetu kapi a li tu ninkisa tu kare vantu wovahungami kosipara saKarunga. (1 Vakolinte 8:8) Kwato ogu na pangura mukwawo ketokoro eli na tura po kuhamena eyi na horowora kulya.—Varoma 14:3.

 Bibeli kuuyunga asi nkedi ezi atu tokora omu na tu paruka kapi tazi vhura kukohonona po maudigu mouzuni. Maudigu gomanzi kuga retesa po maupolitika, vantu womonkarapamwe ntani ekonomi, yininke eyi na dira kukohona na po muntu. Bibeli kuuyunga asi:

•   “Kapi to vhuru kuvyura esi sa penga.”—Muudisi 1:15.

 Musiti gwetu nga kohonona po maudigu aga tuna kuligwanekera nago. Bibeli kwa faturura pasifanekeso eyi nga ka rugana.

•   “Makura tani mono eguru lyepe nevhu lyepe, yeeyi eguru lyanare nevhu lyanare ya dongonoka po ntani efuta nalyo lya dongonoka po.”—Ehororo 21:1.

 Karunga nga pinganesera po mapangero ndi “eguru lyanare,” ‘neguru lyepe,’ epangero lyoUhompa wendi wemeguru. Uhompa wendi ngau gusa po ‘evhu lyanare’ ndi vantu wovadona ntani ngau pangera ‘evhu lyepe’ ndi vantu ava ava kwatesa ko upangeli wendi.

 Mepangero lyoUhompa waKarunga yimo mwelike tupu vantu ngava ka paruka mombili kumwe noyikorama ntani nokuka fumadeka nkarapamwe.—Jesaya 11:6-9.