VANGARARENI!
Yita yomoUkraine kuna kugwanesa nomvhura mbali—Ehuguvaro musinke a zi gava Bibeli?
MoUtano, 24 Murongankuru 2023, yita yomoUkraine nga yi gwanesa mvhura zimwe. Kuliza nomarapoto, vakwayita wokusika po 300 000 womoUkraine naRussia kwa fa ndi kwa va remeka ntani vantu wokusika hambara ko 30 000 kwa fa. Nye sivaro oso kuvhura si kare sosinzi kupitakana esi tuna tumbura.
Nye yokuguvisa yeeyi asi, kwa kumoneka asi yita eyi kapi na yi haga usimbu.
“Hambara ngesi mvhura kutunda apa Varusia va homokera Vaukraine, nye kuna kumoneka asi yita eyi kapi na yi haga po usimbu. Kapi tuna diva nawa-nawa asi yilye nga funda moyita eyi ntani kapi tuna diva nsene ngava vhura kugwana ekohonono yipo va hageke kulirwanesa.”—NPR (National Public Radio), 19 Murongankuru 2023.
Vantu wovanzi kuna kuvaguvisa pokumona omu vantu mouzuni mudima vana kuhepa morwa yita eyi. Ehuguvaro musinke a zi gava Bibeli? Yita nga yi haga po ndi?
Yita eyi ngayi hagekesa po yita
Bibeli za uyunga kuhamena yita eyi ngayi parura vantu. Yita oyo kwa yi diva asi yita yaHarumagedoni ntani ayo kwa yi faturura asi ayo yita ‘yaKarunga Munankondo nadinye.’ (Ehororo 16:14, 16) Kupitira moyita oyo, Karunga nga zonagura po mapangero govantu aga aga retesa po yita. Mokudiva ko yoyinzi omu yita yaHarumagedoni nga yi reta mbili, resa yirongwa eyi: