Nombangi daJehova kwafumadeka mapangero noyidiviso yoyirongo. Ose kapi atu rwanesa vantu ava ava lyatere ndi fumadeke erembe nava ava dimbi rusumo rosirongo.

 Nye Nombangi daJehova kapi adi lihameke moyilika oyo morwa ose twa yi pura asi ayo kulirwanesa neyi azi rongo Bibeli. Ose kupandura apa vantu ava fumadeke eyi twa pura ngamoomu tupu nose atu fumadeke etokoro lyawo lyokulihameka moyilika oyo.

Eyi ya hamene mosirongwa esi

•  Nompango musinke domoBibeli da yi uyunga?

•  Ngapi nsene va tura po veta asi tu li hameke mo?

•  Nombangi daJehova kuna kuheteka kuhama mbinga ndi?

 Nompango edi mbali kukundama etokoro lyetu:

•   Karunga gelike natu karera. Bibeli kuuyunga asi: “O tongamene Jehova Karunga goge oku to mu karere gelike makura.” (Rukasa 4:8) Nonkango domorusumo rosirongo kwa kara mo mugano ndi etumbwidiro asi ngo kwatesa ko nokuhara sirongo soge kupitakana nkenye eyi. Yipo nye, Nombangi daJehova kulizuvha asi ayo epuko kwawo kulihameka moyilika oyo.

   Nombangi daJehova kulizuvha hena asi, kulyatera ndi kufumadeka erembe kuna kara rupe rokukarera. Bibeli za silika kukarera mafano. (1 Vakolinte 10:14) Vanahistoli vamwe va yi dimburura asi marembe gosirongo kuna kara sidiviso soukareli. Munahistoli Carlton J. H. Hayes a kwa tanta asi: “Epangero ndi sirongo kuna kara tupu ngwendi ukarelikarunga ou wa kara asi sidiviso saso kuna kara erembe. Kuhamena Vakriste womosiruwo sanare, mutjangi Daniel P Mannix kwa tjanga asi: “Vakriste ngava nyoka . . . kuzambera kosikarunga saRoma, ayo ya lifana tupu ngwendi kunyoka kulyatera erembe.” b

  Nye nampili ngomu Nombangi daJehova adi dili kufumadeka erembe, ose kapi a tu hetekere ko kulizonagura ndi kulihwika ndi kurwanesa nkenye sidiviso sosirongo.

•   Vantu navenye va hetakana kwaKarunga. (Yirugana 10:34, 35) Bibeli kuuyunga asi Karunga “kwa panga asi momuntu gumwe mu tunde nomuhoko nadinye.” (Yirugana 17:26) Morwa oyo, Nombangi daJehova dayi pura asi ayo epuko kufumadeka po unene sirongo ndi muhoko gumwe kupitakana nomuhoko dapeke. Ose kufumadeka vantu navenye yikare asi kupi va tundilira ndi kupi va tunga.—1 Peturusa 2:17.

 Nombangi daJehova kapi adi rwanesa mapangero. Ose twa yi pura asi mapangero kuna kara “ewapaiko lyaKarunga” eli ga pulisira likare po. (Varoma 13:1-7) Ose hena twa yi pura asi Vakriste va hepa kulimburukwa ava ava va pangere.—Rukasa 20:25.

 Nye ngapi nsene veta zosirongo kuna kulirwanesa noveta zaKarunga? Momaukaro gamwe, kuvhura kutura mo ehundiro lyopaveta yipo va tjindje veta ozo. c Nsene kapi yina kutompoka ku zi tjindja, Nombangi daJehova kuhorowora “kulimburukwa po Karunga ngomupangeli, nye kapisi vantu.”—Yirugana 5:29.

 Hawe. Nombangi daJehova kapi adi hama mbinga. Apa a tu nyoka kufumadeka erembe nokudimba rusumo rosirongo kapi a yi tanta asi ose ngoso kuna kuhama mbinga ndi kuna tura po kambunga koupolitika. Nye ose ku yi rugana oyo morwa kukwama nompango domoBibeli kuhamena yilika oyo.