NgoNombangi daJehova, ose kurugana unene tu nkondopeke mapata getu ntani naga govakwetu. Ose kufumadeka Karunga ogu ga tulisa po epata. (Genesis 2:21-24; Vaefeso 3:14, 15) Kupitira moBibeli, age kugava nompangera edi adi vatere vantu wovanzi mouzuni mudima va kare nononkwara dokupama ntani doruhafo.

 Ose kukondja paapa twa hulira mokukwama nompango domoBibeli, morwa eyi kutuvatera tu kare vanturagumbo, vagolikadi ntani vakondi wovawa. (Yisewe 31:10-31; Vaefeso 5:22–6:4; 1 Timoteusa 5:8) Unongo womoBibeli kuvatera mapata yi ga tompoke, nampili mapata aga ga kara asi vemepata kuza komaukarelikarunga gokulisiga. (1 Peturusa 3:1, 2) Tara eyi va uyunga ko vamwe ava valikwali vawo va ya kara Nombangi daJehova:

•   “Ose ngatu litangwisa unene monomvhura ntazimwe dokuhova mononkwara. Konyima zapa Ivete ga kere Mbangi zaJehova, age kwa ya kere neharo ntani nelididimiko. Malitjindjo aga ga tulire po kwa poperere nonkwara detu.”​—Clauir, gomoBrazil.

•   “Kapi ya hafesere nge apa mugara ngwange Chansa ga tamekere kulironga Bibeli noNombangi daJehova, morwa ame kwa gazarere asi awo kugaununa mapata. Nye ame na ya dimbwilire asi Bibeli za vaterere nonkwara detu.”​—Agness, gomoZambia.

 Moyirugana yokuzuvhisa, ose kulikida wopeke omu kutura pasirugana nompango domoBibeli nadi va vatera va

•   Horowore mulikwali

•   Pite momvhura zokuhova mononkwara

•   Lizuvhe novamukwarero vawo

•   Ruganese nawa yimaliwa

•   Hageke kulitangwisa

•   Lironge kuligusira po

•   Ronge vana vawo

 Nhi, pamwe kuhoroka. Pasihonena, erapoto za geve kampani zaSofres mo-1998 kwalikida asi mwankenye nonkwara 20, limwe po kukara nomaudigu gomanzi apa gumwe a kara Mbangi zaJehova.

 Jesus kwa tente asi ava ava mu limburukwa ngava ligwanekera nomaudigu momapata gawo morwa kulisiga moukarelikarunga. (Mateusa 10:32-36). Mulirongi geHistoli Will Durant kwa tjenge asi mepangero lyoVaroma “Ukarelikarunga ngava upe usima asi awo kugaununa mapata” a ntani neina vamwe woNombangi daJehova nawo kuva pa usima wokulifana. Eyi kutanta asi Nombangi kuretesa po maudigu ndi?

 Apa mpanguro za pangwire kuhamena nsene asi Nombangi daJehova kugaununa mapata, mpanguro zaEuropa zeyi yountu womuntu kwa tente asi ekoro lyoNombangi ava va kara asi kapisi nombangi, nkenye apa kuretesa po ediro kulizuvha pokudira “kutambura nokufumadeka untu womuntu wokuhorowora ukarelikarunga wanyamwendi.” Mpanguro kwa gwederere ko hena asi: “Ukaro ou kuhoroka mononkwara omu vantu va kara momaukarelikarunga gokulisiga, ano Nombangi daJehova nado ngosikwawo.” b Apa ava ligwanekere nerwaneso morwa ukarelikarunga wawo, Nombangi daJehova kuhetekera ko paapa va hulira kutura pasirugana mpango ezi zomoBibeli: “Mwa ha tengwida kuwoko. . . . Kondjeni paapa mwa hulira mu tulise po mbili novantu navenye.”​—Varoma 12:17, 18.

 Nombangi kulimburukwa evyukiso eli asi “kukwara mwaHompa,” eyi kutanta asi kukwara muntu ogu ga kara nepuro lyokulifana. (1 Vakolinte 7:39) Evyukiso eli mulyo momaukaro nagenye. Pasihonena, buke Journal of Marriage and Family kwauyunga asi “valikwali ava va kara moukarelikarunga nepuro lyokulifana nokurugana yininke eyi ava hafere navenye” awo kukara nelikwatakano lyokupama. c

 Nye nampili ngoso, Nombangi kapi adi korangeda ava vakwara vantu womaukareli gapeke va teze po nonkwara dawo. Bibeli kutanta asi: “Nsene pweli mupuli ogu ga kwara mukadi ogu ga dira kupura mwaHompa gwetu nye age ga mu hara, ga ha mu siga, ano nsene pweli mukadi ogu ga kwara mugara ogu ga dira kupura mwaHompa gwetu nye age ga mu hara, ga ha mu siga.” (1 Vakolinte 7:12, 13) Nombangi daJehova kulimburukwa evyukiso eli.