Nombangi daJehova do kusika po 1,500 kwafire posiruwo sedipago lyenene, Nombangi dimwe dokusika po 35,000 edi da tungire moNdovesiranda ntani no yirongo eyi va pangerere vaNazi. Moyihorokwa nayinye oyo kapi va divire eyi yaretesere po nomfa odo. Mokumona asi kuna kurugana epaparo, sivaro ntani mauzera gamwe ngava ga wapukurura mwaza siruwo.

•  Ngapi omu va fire?

•  Morwasinke vava hepekerere?

•  Kupi va filiire?

•  Vamwe ava va dipagere

•   Madipago: Hambara Nombangi dokusika po 400 kwa va dipagere mo Ndovesiranda ntani yirongo yimwe eyi eyi va pangerere vaNazi. Sinzi sawo kwa va twere kompanguro nokuvatokwera nomfa ntani kwa va dipagere. Vamwe kwa va royere noku va mangerera pwa hana epulisiro lyokutunda kompanguro.

•   Etengeko lyonyanya: Nombangi dokupitakana po 1,000 kwa fire mokamba zo vaNazi nomonodorongo. Awo kwa fire morwa mahepeko, nzara, mufu, mauvera ntani kwato epakerombili. Ngoyitundwamo morwa kwa va tenkwire momudona, vamwe kwa fire konyima zemanguruko lyawo apa yahege yita yauvali youzuni mudima.

•   Maudigu gamwe hena: Nombangi dimwe kwa didipagere apa va va ruganesere mokuheteka nomutji ntani nongendeseso dimwe douhaku ndi po kuvavendwa novendwa douhungu.

 Nombangi daJehova kwadi hepekere morwa ado kwa limburukwire komarongo gomoBibeli. Apa Vanazi va pulire Nombangi va rugene eyi yalilimba noBibeli, Nombangi kwa nyokere kuyirugana. Awo kwa horowere “kulimburukwa po Karunga ngomupangeli, nye kapisi vantu.” (Yirugana 5:29) Koneka nonkedi mbali omu va tulire po etokoro olyo.

1.   Kudira kulihameka moupolitika. Ngwendi Nombangi nadinye uzuni mudima, Nombangi daJehova edi dakere mepangero lyaNazi kapi va lihamekere moupolitika. (Johanesa 18:36)Yipo nye, awo kwanyokere

   •   Kurwa yita ndi kulihameka moyirugana youkwayita.​—Jesaya 2:4; Mateusa 26:52.

   •   Kulihameka momahoroworo ndi kuhama kombunga zaNazi.​—Johanesa 17:16.

   •   Kufumadeka erembe lyaSwastika ndi va tante asi “fumadekeni Hitler!”​—Mateusa 23:10; 1 Vakolinte 10:14.

2.   Kulikida epuro lyawo. Nampili ngomu vava nyokesere kusikisa mo eyi va pura, Nombangi daJehova kwa twikilire

   •   Kuponga kumwe moukareli ntani kukanderera.​—Vahebeli 10:24, 25.

   •   Kuzuvhisa mbudi zomoBibeli nokugavera yimbapiratjangwa.​—Mateusa 28:19, 20.

   •   Kulikida nkenda kovakwawo, kukwatera mo Vajuda.​—Marukusa 12:31.

   •   Kwa kwaterere kepuro lyawo, ntani kwa nyokere kusaina mbapira zokusiga epuliro lyawo.​—Marukusa 12:30.

 Profesora Robert Gerwarth kwa uyungire asi Nombangi daJehova “yiwo welike ukareli va hepekere morwa epuliro lyawo.” a Vanakamba vakwawo kwa tamekere kuhafera Nombangi daJehova morwa ulimburukwi wawo wokupama. Munadorongo gumwe gomuAustria kwa nomenene asi: “Awo kapi ava zi koyita. Hansa va va dipage mevango lyokudipaga vantu vapeke.”

•   Monokamba dounkwate: Sinzi soNombangi daJehova kwa fililire monokamba dounkwate. Awo kwa kere nonkwate monokamba edi, Auschwitz, Buchenwald, Dachau, Flossenbürg, Mauthausen, Neuengamme, Niederhagen, Ravensbrück, ntani Sachsenhausen. MoSachsenhausen, Nombangi daJehova dokusika po 200 kwa fire.

•   Monodorongo: Nombangi dimwe edi da kere modorongo kwa di hepekere dogoro konomfa. Ano vamwe kwa fire koyironda vava sopwere posiruwo so mapuragero.

•   Mavango gedipagero: Nombangi daJehova kwa di dipagere unene po monodorongo domoBerlin Plötzensee, Brandenburg, ntani Halle/Saale. Mokukugwedrera ko, kwa kara ko mavango gamwe hena 70 aga va dipagerere Nombangi.

•  Edina: Helene Gotthold

   Evango eli va mudipagerere: Plötzensee (Berlin)

   Helene, age kwakere mukadi gokukwara ntani zinya govana vavali, age kwa mukwete yikando yoyinzi. Mo 1937, age kwa mutwekwire momudona pepuragero limwe dogoro kwa zumbanesere mo mukeke ngwendi gakere mezimo. Mo 8 Sindimba, 1944, kwa mudipagere pokumeteta mutwe modorongo zomoPlötzensee Berlin.

•  Edina: Gerhard Liebold

   Evango eli va mudipagerere: Brandenburg

   Mo 6 Kudumonkuru 1943, Gerhard kwa mu dipagere apa gakere nonomvhura 20, konyima zonomvhura mbali apa Oguhwe vava dipagere modorongo zokulifana. Mombilive zendi zokuhulilira gatjenge kozina namubyendi gomukadona ntani mbandeki zendi age kwa tjenge asi “Pwa hana nonkondo daHompa, ame ngano kapi na genda monzira ezi.”

•  Edina: Rudolf Auschner

   Evango eli va mu dipagerere: Halle/Saale

   Rudolf kwa mudipagere apa ga kere nonovhura 17 mo 22 Sitarara , 1944. Mombilive zendi zokuhulilira ga tjangerere ozina, age kwa tjenge asi: “Vanavazinyetu wovanzi vageda nzira ezi, name yizo nani genda.”