Nombangi daJehova kapi adi lihameke moupolitika morwa epuliro lyawo kuliza neyi azi rongo Bibeli. Ose kapi atu horowora muntu ndi mbungapolitika, ndi tu kare vahameni mo mwava vana kuhorowora ndi tu mashe yipo epangero li rundurure ngendeseso zalyo. Ose twa pura asi Bibeli kwa gava nokonda domulyo deyi atu yiruganene eyi:

•   Ose kukwama sihonena saJesus, ogu ga nyokere kulihameka moupolitika. (Johanesa 6:15) Age kwa rongere varongwa vendi va dire kukara “wouzuni” ntani kwa yizeresere asi kapisi va lihameke mo moyininke youpolitika.​—Johanesa 17:14, 16; 18:36; Marukusa 12:13-17.

•   Ose kulimburukwi koUhompa waKarunga, ou ga uyungire Jesus asi: “Mbudi zoNgwa ezi zoUntungi waKarunga tanko ngava zi divisa mwa za uzuni mudima.” (Mateusa 24:14) Ngovakarelipo woUhompa waKarunga, ose kudivisa ewizo lyawo, yiyo atu dilire kulihameka momaupolitika gouzuni kukwatera mo nosirongo omu twa tunga.​—2 Vakolinte 5:20; Vaefeso 6:20.

•   Mokudira nye kulihameka mo momaupolitika ose kuzuvhisira noumanguruki vantu womaupolitika gokulisiga-siga kuhamena mbudi zongwa zoUhompa waKarunga. Ose kuhetera ko kuyilikida kupitira mononkango nomoyirugana yetu asi ose kwa pura asi Uhompa waKarunga yiwo ngau kohonona po maudigu gouzuni ou.​—Episarome 56:11.

•   Morwa ose kunyokera po eligaunuko lyomaupolitika, yiyo twa karera mouumwe novapuli vakwetetu uzuni mudima. (Vakorosi 3:14; 1 Peturusa 2:17) Mokulisiga, maukarelikarunga aga aga lihameke moupolitika kugaununa vantu vawo.​—1 Vakolinte 1:10.

 Efumadeko komapangero. Nampili ngomu atu dili kulihameka momaupolitika, ose kufumadeka epangero lyomosirongo esi twa kara. Eyi ya liza nompangera zomoBibeli ezi asi: “Nkenye muntu a limburukwe kepangero eli ali mu pangere.” (Varoma 13:1) Ose kulimburukwa koveta pokufuta mutero nokukwama nongendeseso depangero omu ava vhuru kupakera mbili vanamvharerwa vawo. Mevango lyokuhetekera ko kurwanesa matokoro gepangero, ose kukwama epukururo lyomoBibeli ‘mokukanderera po vahompa nava va kara momapangero,’ unene po nsene kuna kutura vana kutura po matokoro aga naga vhura kukundama ukareli wetu.​—1 Timoteusa 2:1, 2.

 Ose hena kufumadeka matokoro gava wopeke kuhamena upolitika. Pasihonena, kapi atu donganesa ehoroworo ndi tu nyokese ava vana hara kuhorowora.

 Kupira kulihameka moupolitika, aso sininke sosipe ndi? Hawe. Vapositoli ntani noVakriste womosiruwo sanare, nawo kapi va lihamekere moupolitika. Buke Beyond Good Intentions kwa tanta asi: “Nampili ngomu va yi diva asi va fira kufumadeka epangero, Vakriste vanare kapi va lihamekere moupolitika.” Mokulifana, buke On the Road to Civilization kwa uyunga asi Vakriste vanare “kapi ngava tambura yipundi yemepangero.”

 Kudira kulihameka kwetu moupolitika kuvhura yi tjilise epangero ndi? Hawe. Ose vantu wombili ntani kapisi hepero epangero li tu tjire. Konakona erapoto lyomo-2001 eli za geve mbunga zoNational Academy of Sciences moUkraine. Pokukumburura ko kokudira kulihameka kwetu moupolitika, erapoto olyo kwa tente asi: “Naina sinzi sovantu kapi va hara Nombangi daJehova morwa kudira kulihameka kwawo moupolitika; ezi yizo konda za ninkisire epangero lyaNazi ntani nomapangero gamwe ganare ga hepeke Nombangi daJehova.” Nampili ngomu va di hepekere Nombangi mepangero lyaRusia awo simpe kwa kere “vanamvharerwa wovalimburukwi. Awo ngava hungike nokurugana unene monofarama ntani nomonongesefa dononene va hana kurugana nkenye udona kepangero.” Mokulifana, erapoto kwa hagekesere asi mapuliro nomparukiso zoNombangi daJehova, kapi ayi “lirwanesa nonoveta depangero ndi dosirongo.”