Ava va gwene ekuho ngoNombangi daJehova nye kapi vana kuzuvhisa hena, ndi kapi vana kuponga hena novapuli vakwawo, kapi atu va nyoka. Ose kuvakorangeda yipo va tengwidire po elikwatakano lyawo naJehova.

 Kapi atu gusa mo mbunga poopo muntu ogu ana tura nzo zonene. Nye nsene Mbangi ogu ga gwana ekuho a dira kulitezurura a sige nkareso ezi va silika moBibeli, age kumunyoka ndi kumugusa mo mombungakriste. Bibeli za vyukilira kuuyunga asi: “Muntu gomudona kumugusa mo mombunga zeni.”—1 Vakolinte 5:13.

 Nye ngapi nsene mugara va mu gusa mo mombungakriste nye mukadendi novana vendi simpe Nombangi daJehova? Age simpe kuhamena kepata nye kapi ta lihameke mo melirongo lyepata. Simpe ta kara namukadendi nokulikida eharo kepata lyendi nokuruganena kumwe nawo.

 Ava ava gusa mo mombungakriste kuvhura simpe va wize komapongo. Ano nsene vana hara, vakuronambunga kuvhura va va pe makorangedo gomoBibeli. Sitambo kuna kara mokuvatera muntu a kare hena gumwe goNombangi daJehova. Muntu ogu va gusa mo mombungakriste nsene a siga nkareso zendi zondona nokulikida eharo lyokuparuka kuliza nonompango domoBibeli, age kumutambura hena mombungakriste.