Nhi. Nombangi daJehova da pura asi Bibeli nazinye kwa zi ‘retesa po mpepo zaKarunga, ntani kwa kara nomulyo.’ (2 Timoteusa 3:16) Eyi kwa kwatera mo etestamende lyepe neli lyekurukuru. Nombangi daJehova kutumbura maruha aga goBibeli asi Matjangwa goRuhebeli ntani Matjangwa goRugereka. Monkedi zangesi, ose kapi atu ninkisa vantu va gazare asi maruha gamwe gomoBibeli kwato mulyo.

Kupitira mompepo zokupongoka, mupositoli Paurusa kwa tjenge asi: “Nkenye eyi va tjangera momatjangwa, kwa yi tjangera asi yi tu ronge.” (Varoma 15:4) Eyi kulikida asi moMatjangwa goRuhebeli kwa kara mo mauzera aga twa hepa. Koyininke yimwe, ago kugava mauzera kuhamena ehistoli nomapukururo goparugano.

• Mauzera gehistoli. Matjangwa goRuhebeli kwa kara mo mauzera kuhamena esito nomu va ya zonene vantu. Pwa hana mauzera gangoso, ngano kapi twa gwana malimbururo komapuro ngwendi: Kupi twa tundilira? Morwasinke ava fire vantu? (Genesis 2:7, 17) Mokugwederera ko, Matjangwa goRuhebeli kutulikida omu Jehova Karunga ga ruganenene kumwe novantu ava va kere noruhafo ntani nomaudigu gwendi getu.—Jakopo 5:17.

• Mapukururo goparugano. Buke zoYisewe ntani Muudisi, edi da kara ruha roMatjangwa goRuhebeli, kwa kara nounongo wanarunye. Ado kugava mapukururo omu natu kara nepata lyoruhafo (Yisewe 15:17), nomu natu kara nomutaro gomuwa kuhamena yirugana (Yisewe 10:4; Muudisi 4:6), ntani nomu vadinkantu nava ruganesa nawa udinkantu wawo (Muudisi 11:9–12:1).

Ntani hena, kuvhura tu gwanene mo uwa mokulironga noVeta daMosesa edi va tjanga monobuke 5 dokuhova moBibeli. Nampili ngomu Vakriste ava dili kukwama noveta odo, ado kwa kara nonompango edi nadi tu vatera tu kare noruhafo.—Levitikus 19:18; Deuteronomium 6:5-7.