Hawe. Nye mokulisiga, apa twa ya mwene asi epuliro lyetu kapi lya lizire nawa-nawa noBibeli, yiyo twa rundurura epuliro lyetu li lize noBibeli.

 Ose kwa konakonene Bibeli komeho zokuyapwagesa Bibeli New World Translation of the Holy Scriptures mo-1950. Ose kwa ruganesere nkenye etoroko lyoBibeli nokurundurura epuliro lyetu li lize noBibeli. Konanakona yihonena yongandi yepuliro lyoNombangi daJehova kutunda kwanare, makura o tokore nyamoge nsene eyi kwa liza neyi azi rongo Bibeli sili.

1.   Eyi twa pura: Karunga kapisi Mutatu-gumwe. MwaPembankuru 1882, sifo Zion’s Watch Tower kwa tente asi: “Varesi vetu va yi diva asi ose twa pura mwaJehova naJesus ntani nomompepo zokupongoka, nye ose kunyokera po erongo eli lya dira kukara moMatjangwa asi Karunga mutatu gumwe.”

     Eyi azi uyunga ko Bibeli: ‘Karunga gwetu Jehova, a huru yige gelike HOMPA.’ (Deuteronomium 6:4) “Karunga gumwe tupu twa paka, Guhyetu, ogu ga sita nayinye. Age yige twa karera po. Ano hena Hompa gumwe tupu twa paka, Jesus Kristusa, mogu ga sitilire Karunga yininke nayinye, age mwarwendi twa karera po.” (1 Vakolinte 8:6) Jesus mwene kwa uyungire asi: “Tate kwa pita nge.”​—Johanesa 14:28.

2.   Eyi twa pura: Kwato mundiro gwanarunye. MwaPembankuru 1882, sifo Zion’s Watch Tower kwa kere nosiparatjangwa asi: “Mfeto zononzo nomfa,” esi va gusa moVaroma 6:​23 nokufaturura asi “Nonkango edi kwa vyuka ntani ureru kudikwata egano. Ayo kutetukisa asi sinzi sovantu ava ava uyunga asi va tambura Bibeli ngoNonkango daKarunga kutwikira kupatanesa nonkango odo, ntani kunkondopeka asi Bibeli kuronga asi mfeto zononzo ehepeko momundiro gwanarunye.”

     Eyi azi uyunga ko Bibeli: “Muntu ogu a zono yige a fu.” (Hesekiyeli 18:4, 20) Ava ava rwanesa Karunga ngava va pangwira “mezonauko lyanarunye.”​—2 Vatesaronika 1:9.

3.   Eyi twa pura: Uhompa waKarunga kapisi sininke somomutjima, nye epangero lyousili. Kuhamena Uhompa waKarunga, sifo Zion’s Watch Tower somwaSindimba 1881 kwa tente asi: “Etulisopo lyoUhompa waKarunga, ngamu hamena ezonaguro lyomauhompa nagenye gepevhu.”

     Eyi azi uyunga ko Bibeli: “Posiruwo sohompa owo Karunga gemeguru nga dika sirongo esi ngasi kererera narunye. Aso kapi ngava si funda nampili kanunu, nye ngasi hanagura yirongo oyo nayinye, makura tasi kara dogoro narunye.”​—Ndaniyera 2:​44.

 Hawe, morwa ose kutwikira kuruganesa matoroko goNobibeli dokulisiga-siga moyirugana yetu yokuzuvhisa. Nampili ngomu atu hanesa Bibeli zoNew World Translation mawoko-woko ngoruha rwelikwamo lyetu lyokuronga vantu Bibeli, ose simpe kuyihafera kulironga novantu ava vana hara kuruganesa matoroko nagopeke.