Yimpempa: Nombangi daJehova kapi da pura mwaJesus yiyo adi dilire kudana sipito soKrismesa.

 Usili: Ose Vakriste. Ose kwa pura asi eparu kuligwana tupu kupitira mwaJesus Kristusa.—Yirugana 4:12.

 Yimpempa: One kugaununa mapata pokuronga vantu veni asi va ha dana sipito soKrismesa.

 Usili: Ose kwa kara nosinka sosinene komapata, ntani ose kuruganesa Bibeli mokuvatera vantu va kare nomapata goruhafo.

 Yimpempa: One kapi omu kara nompepo zougavi noruhafo nombili zopoKrismesa.

 Usili: Ose kuhetekera ko kukara nougavi noruhafo nombili nkenye ezuva. (Yisewe 11:25; Varoma 12:18) Pasihonena, nkedi omu atu rugana mapongo getu nomu atu zuvhisa kwa liza nepukururo lyaJesus eli asi: “Mawoko-woko muna yi gwana, none ka yi gaveni mawoko-woko.” (Mateusa 10:8) Kugwederera ko, ose kudemenena koUhompa waKarunga morwa yiwo welike wokuvhura kuretesa po mbili zosili pevhu.—Mateusa 10:7.

•   Jesus kwa pangerere asi twa hepa kudiworoka nomfa dendi, nye kapisi ehampuruko lyendi.—Rukasa 22:19, 20.

•   Vapositoli novarongwa vaJesus womouye wokuhova kapi ngava dana sipito soKrismesa. The New Catholic Encyclopedia kwa tanta asi “sipito sehampuruko lyaJesus kwa si tamekere koyiha yomvhura 243,” konyima zapa va ya fire vapositoli.

•   Kwato umbangi au likida asi Jesus kwa mu hampurukire mo-25 Sindimba ntani ezuva lyehampuruko lyendi kapi va li tjanga mo moBibeli.

•   Ose kwa pura asi Krismesa kapi azi hafesa Karunga, morwa aso sipito esi sa tunda mompo zovapagani.—2 Vakolinte 6:17.

 Vantu wovanzi simpe kudana sipito soKrismesa nampili ngomu va yi diva asi aso sipito esi sa tundilira monompo dovapagani ntani Bibeli kapi azi si kwatesa ko. Vantu vangoso nampo kulipura asi: Morwasinke Vakriste ava gusire ntambo ezi zokudira kugwana efumano? Morwasinke nava mu nyengera vantu morwa kudira kudana Krismesa?

 Bibeli kutukorangeda tu ‘gave marutu getu ga kare nzambo zongwa zokupongoka.’ (Varoma 12:1, 2) Azo kuturonga hena tu tare usili asi yiso sininke somulyo po meparu lyetu. (Johanesa 4:23, 24) Yipo nye nampili ngomu twa kara nosinka omu ava tu tara wopeke, ose kukwama nompango doBibeli nampili wopeke va tu nyenge.

 Nampili ngomu atu dili kudana Krismesa, ose kufumadeka matokoro gava wopeke moukaro wangesi. Ose kapi atu donganesa wopeke apa ava dana sipito soKrismesa.