Yimpempa: Nombangi daJehova kapisi Vakriste, ano ozo yizo konda ava dilire kudana mavhumbukiro.

 Usili: Ose kwa pura asi Jesus Kristusa yige muzowoli gwetu ntani ose kukondja mo kukwama “sihonena” sendi.—1 Peturusa 2:21; Rukasa 2:11.

 Yimpempa: Nombangi kapi da pura asi Jesus kwa mu vhumbwire koufe.

 Usili: Ose kwa pura mevhumbuko lyaJesus morwa eyi yiyo va hepa kupura Vakriste navenye ntani ose kuyitantera wopeke mosirugana setu sokuzuvhisa.—1 Vakolinte 15:3, 4, 12-15.

 Yimpempa: One kapi mwa kara nosinka sovana veni, morwa awo kapi ava gwana ruhafo ropomavhumbukiro.

 Usili: Ose kwa hara vana vetu, ose kukondja mokuvadeura nokuvavatera va gwane ruhafo.—Titusa 2:4

•   Sipito somavhumbukiro kapi sa tunda moBibeli.

•   Jesus kwa pangera asi twa hepa kudiworoka nomfa dendi, nye kapisi evhumbuko lyendi. Ose kudiworoka nomfa daJesus nkenye mvhura kuliza nosiruwo somoBibeli.—Rukasa 22:19, 20

•   Ose kwa pura asi sipito somavhumbukiro kwa tundilira monompo dovapagani ano eyi yiyo asi dilire kuhafesa Karunga sipito esi. Karunga kwa hara asi tu mu karere gelike ntani age kapi a hafere maukarelikarunga aga aga rugana yininke eyi ga nyenga. —Exodus 20:5; 1 Vahompa 18:21.

 Ose kwa pura asi etokoro lyetu lyokudira kudana sipito somavhumbukiro kwa liza neyi atu lirongo moBibeli, ezi azi tu korangeda tu ‘kwaterere kounongo nokomayere getu’ mevango lyokukwama nompo dovantu. (Yisewe 3:21; Mateusa 15:3) Apa atu tantere ko wopeke eyi twa pura kuhamena sipito somavhumbukiro, ose kufumadeka matokoro gawo kuhamena kudana sipito esi.—1 Peturusa 3:15.