Mulirongi gedina Alan S. Duthie kwa tente mobuke zendi asi: “Nsene wa yi pura asi Bibeli kuna kara Nonkango daKarunga edi ga gava kovantu, eyi kulikida asi Karunga kuuyunga nose. . . . Nsene ove kukwama nawa-nawa eyi wa pura, eyi kulikida asi eraka eli va tjanga moBibeli yilyo o uyunga.”​—Translations and How to Choose Between Them.

Vantu ava va hara Nonkango daKarunga nawo kuyikwatesa ko. Awo kwa yi pura nawa-nawa asi: “Nayinye eyi va tjanga moMatjangwa gokupongoka kwa tunda kwaKarunga, ago kuronga vantu nokuvalikida asi yipi yepuko ntani kuvapukurura nokuvyukisa magazaro gawo kuliza nonompango daKarunga.” (2 Timoteusa 3:16, NW) Bibeli kapisi buke tupu zanare. Azo “kwa kara nomwenyo nononkondo,” ntani kutuvatera tu kohonone po maudigu nkenye ezuva. (Vahebeli 4:12) Nye mokuninka asi vantu va kwate egano buke ozo zokupongoka nokuzikwama, azo za hepa kukara meraka eli ava uyunga vantu nkenye ezuva yipo va vhure kuziresa nokuzikwata egano vantu navenye.

Yipo nye, vantu ava va hara Nonkango daKarunga, vana hafere epwageso lyoBibeli zEtoroko lyouzuni woupe lyoMatjangwa goRugereka goSikriste moRukwangali. Nombangi daJehova kwa divisire epwageso lyoBibeli ezi momazuva 7 Nsinano 2021. Etoroko lyazo kwa zera ntani kwa vyuka, eyi kuninkisa mbudi zaKarunga va zi kwate egano moRukwangali kupitakana pwanare. Nye nampo kuna kulipura asi yilye ga zi toroka?

Nampili ngomu Bibeli zEtoroko lyouzuni woupe lyoMatjangwa goRugereka goSikriste zina kara mpe kovantu ava ava uyunga Rukwangali, nye azo kwa tameka kuzipwagesa kutundilira mo-1950. Posiruwo sina, Watch Tower Bible and Tract Society kwa pwagesere Bibeli ozo moRuingilisa. Mbunga ozo kwa pwagesa Nobibeli dononzi. Ruhungu romo-15 Sitarara 1950, kwa tente asi: “Vantu ava vana hamene moKomitiye zetoroko, kapi vana hara kuvadivisa ndi va va dive siruwo esi vana kuparuka ndi konyima zonomfa dawo. Sitambo setoroko lyawo kuna kara sokuyererepeka edina lyaKarunga gosili.”

Bibeli nazinye zEtoroko lyouzuni woupe lyoMatjangwa goKupongoka, kwa zi pwagesere mo-1961. Nampili ngomu twa dira kudiva madina govatoroki, awo kwa litulire mo ntani kwa ligeve. Etwaromo lyomoBibeli zomo-2013, kwa tanta asi: “Morwa ose twa dimburura asi mbudi zomoBibeli mulyo, ose kwa wapukurura etoroko eli twa hana kutjindja mbudi zomoBibeli. Ose twa yi diva asi aso situmbukira sosinene mokutoroka mbudi zamo moomu za kara. . . . Ose kwa here kupwagesa etoroko lyokuzera ntani lyoureru kuresa twa hana kutjindja mbudi zamo.”

Nobibeli dEtoroko lyouzuni woupe dokupitakana pomamiliyona 240 kwa di pwagesa momaraka 195. Yisinke va dimburura sinzi sovantu ava ava zi resa?

Jesus kwa rongere varongwa vendi va kanderere asi: “Guhyetu gemeguru. Edina lyoge ava li pongore.” (Mateusa 6:9) Bibeli kwa tumbura edina lyaKarunga, Jehova, yikando yokusika koyiha 7 000. (Exodus 3:15; Episarome 83:18, NW) Konyima zapa va fire vapositoli, Vakriste kwa tamekere kukara nomagano gepuko aga va kere nago Vajuda wovanzi kuhamena kuruganesa edina lyaKarunga. (Yirugana 20:29, 30; 1 Timoteusa 4:1) Vantu ava va tjangwilire Matjangwa goRugereka kwa gusire po edina Jehova nokutura po “Karunga” ntani “Hompa.”

Komitiye zoBibeli zEtoroko lyouzuni woupe kwa tengwidira mo edina Jehova moMatjangwa goRugereka. * Alyo kwa moneka mo yikando 237. Vatoroki kapi va tokwere kutengwidira po edina olyo morwa yimo va yi harere, nye awo kwa rugene ekonakono lyenene. Pasihonena, mwaRukasa 4:​18 kwa temwinina nonkango da kara mwaJesaya 61:1. MoMatjangwa gokuhova goRuhebeli, edina Jehova kwa monekere movelise ozo zaJesaya. Yipo nye, Bibeli zEtoroko lyouzuni woupe, etjangwa lyaRukasa 4:​18 kwa li toroka asi: “Mpepo zaJehova pozili pwange, morwa age kwa gwaveka nge ni divise mbudi zongwa kovahepwe.”

Novelise dangoso kuvatera varesi va dimburure elisigo pokatji kaJehova Karunga namunwendi, Jesus Kristusa. Pasihonena, sinzi soNobibeli kwa toroka Mateusa 22:44 asi: “Hompa kwa tanterere Hompa gwange asi.” Nye yilye ana kuuyungisa po mukwawo? Velise ozo kwa temwinina ruha rumwe rwEpisarome 110:1 omu mwa moneka edina lyaKarunga moMatjangwa goRuhebeli. Yipo nye, Bibeli zEtoroko lyouzuni woupe, kwa toroka Mateusa 22:44 asi: “Jehova kwa tanterere Hompa gwange asi.” Ayo kapisi udigu kukwata egano asi Jehova Karunga naMunwendi va lisiga. (Marukusa 13:32; Johanesa 8:17, 18; 14:28) Mokuninka asi tu ka gwane mwenyo gwanarunye, twa hepa kukwata egano elisigo eli. Yirugana 2:21 NW, kwa tanta asi: “Nkenye ogu a kugu edina Jehova ngava mu parura.”

Vatoroki kwa kondjere unene va toroke Matjangwa goRugereka monkedi zokuvyuka zouhunga mononkango doureru meraka eli vana kuuyunga vantu. Bibeli zEtoroko lyouzuni woupe kwa hetekera ko kutoroka etanto lyononkangorugano doRugereka. Sinzi somaraka gantaantani, kwa kara nononkangorugano edi adi likida siruwo esi vana rugana yuma yongandi ngwendi nare, naina ndi komeho. Nye nonkangorugano domoRugereka kulikida hena omu vana rugana sirugana songandi ngwendi siruwogona, sa pu nare ndi kwa kutwikira kusirugana. Koneka nonkango daJesus da kara mwaMateusa 6:33. Nkango zomoRugereka “tura,” kwa likida asi kuna kutwikira kuyirugana. Yipo nye, mokulikida eyi ga tembe Jesus, velise ozo kwa zi toroka asi: “Hoveni tanko kutura Uhompa waKarunga nonompango dendi douhungami muhowo meparu lyeni, makura age nga mu pe yininke eyi yokuhupa ko.” Mokulifana, Mateusa 7:7 kwa zi toroka asi: “Omu hundire ngava mu pe, omu papare ngomu gwane, omu ngongore, makura ngava mu zegwilire.”​—Varoma 1:32; 6:2; Vagarata 5:15.

Epwageso lyoMatjangwa goRugereka goSikriste moRukwangali kuna kara tupu etameko. Vana tura po mawapaiko yipo ngava toroke Bibeli nazinye komeho. Varesi kuvhura va kare nehuguvaro asi etoroko lyoRukwangali kwa vyuka ntani kwa zera ngwendi lyoRuingilisa ndi?

Yimo, morwa Mbungagendesi zoNombangi daJehova kwa tarera sirugana setoroko eli. Awo kwa tokwere asi Bibeli va hepa kuzitoroka mokambunga. (Yisewe 11:14) Yipo nye, awo kwa tulisa po nombunga detoroko mouzuni mudima. Awo hena kwa tulisa po departemende komberewa zonene zoNombangi daJehova zi vatere vatoroki owo, pokulimburura mapuro gawo ntani nokuvavatera va toroke yininke yokulifana momaraka gokulisiga-siga goBibeli zEtoroko lyouzuni woupe. Awo hena kwa tulisa po elikwamo lyomokompiuta yipo li vhure kuvatera vatoroki woBibeli. Elikwamo olyo, kulikida omu nonkango domoRuhebeli noRugereka va di toroka moRuingilisa, eyi kuvatera unene vatoroki va dive nonkango edi nava vhura kuruganesa. Nampili ngomu sirugana esi sa hepa nonkondo dovantu, nye nokompiuta kwa rerupika unene sirugana sovatoroki woBibeli yipo va toroke Bibeli zEtoroko lyouzuni woupe zi zere nokuvyuka ngwendi zoRuingilisa.

Kuna kukukorangeda o konakone Bibeli zEtoroko lyouzuni woupe lyoMatjangwa goRugereka goSikriste. Kuvhura o zi rese kointaneta ndi ko-JW Library app ndi kuvhura o zi gwane kombungakriste zoNombangi daJehova. Ove ngo hafera monkedi omu va zi toroka: azo ureru kuziresa; kwa kara mo yikaramo eyi ayi gava mauzera gankenye buke zomoBibeli ntani ayo kuvatera o gwane novelise edi wa diva usimbu. Nye somulyo po, kuvhura o kare nehuguvaro asi nonkango daKarunga kwa di toroka mouhunga meraka eli atu uyunga moBibeli ezi.

Mauzera: Kwa faturura pausupi nonkango dononzi edi va ruganesa moBibeli