Bibeli zEtoroko lyouzuni woupe zoRuestonia kwa zi horowere posilika sokugavera nonzapo moEstonia mo-2014. Momaraka 18 aga va horowere, Bibeli zEtoroko lyouzuni woupe kwa kere zautatu.

Kristiina Ross, mulirongi geraka gokosure zaInstitute of the Estonian Language, yige ga horowere Bibeli ezi va pwagesere mo-8 Siwogedi 2014. Age kwa tente asi: “Azo ureru ntani uwaawa kuziresa. Elituromo lyava va zi toroka kwa wapeka sirugana setoroko lyeraka lyoRuestonia.” Rein Veidemann, profesora geraka nompo zoVaestonia, kwa tente asi Bibeli zEtoroko lyouzuni woupe kuna kara “sininke sosiwa sili.”

Bibeli zokuhova zomoRuestonia kwa zi pwagesere mo-1739 ntani kutunda opo, Nobibeli dononzi kwa di toroka moRuestonia. Morwasinke nye Bibeli zEtoroko lyouzuni woupe za karera “sininke sosiwa sili”?

Kwa vyuka. Bibeli za divikwa ezi va pwagesere mo-1988 kwa toroka edina lyaKarunga asi “Jehoova” (Jehova) yikando yokupitakana po-6 800 moMatjangwa goRuhebeli (Etestamende lyekurukuru). * Bibeli zEtoroko lyouzuni woupe nazo kwa rugana yokulifana ntani nayimwe hena. Bibeli zEtoroko lyouzuni woupe kwa tengwidira hena edina Jehova apa lya moneka moMatjangwa goRugereka (Etestamende lyepe).

Kwa zera. Yosili Bibeli zEtoroko lyouzuni woupe kwa zera ntani ureru kuziresa ndi? Mutoroki goBibeli gedina Toomas Paul, kwa tjenge mosayitunga Eesti Kirik (Ngereka zaEstonia) asi Bibeli zEtoroko lyouzuni woupe “kwa ruganesa eraka eli ava uyunga Vaestonia. Esi yiso sikando sokuhova va yi rugana moEstonia.”

Vantu womoEstonia kwa tambura Bibeli zEtoroko lyouzuni woupe. Kelikwamo limwe lyoradio kwa ruganesere nominute 40 yipo va zogere Bibeli ozo zompe. Vapitisili womaukarelikarunga ntani nava ava zi kongereka kwa hundira Bibeli ezi koNombangi daJehova. Sure zimwe zomoTallinn kwa hundilire Nobibeli dEtoroko lyouzuni woupe dokusika ko 20 yipo va ka di ruganese monkondwarongero. Vantu womoEstonia kwa hara nobuke, ano Nombangi daJehova dina hafa mokugava buke zongwa po ezi za kara netoroko lyokuzera ntani lyokuvyuka.