“Azo kukuninkisa o liture mosihorokwa, o gazare ntani za lisiga.”

“Kukuninkisa o mone momagano yihorokwa yomoBibeli.”

“Kukuninka o liture mo unene mokupurakena nampili yihorokwa eyi wa diva.”

Sinzi sava va purakena ekwateko lyobuke zaMateusa zomoRuingilisa ezi za kara ko-jw.org yimo va uyunga ngorooro.

Nombangi daJehova kwa tamekere kupwagesa ekwateko lyoBibeli lyokupurakena mo-1978. Konyima, awo kwa kwatekere momaraka 20 Bibeli nazinye ndi momaruha.

Konyima zokupwagesa ewapukururo lyoBibeli zEtoroko lyouzuni woupe mo-2013, va hepere kurugana ekwateko lyapeke. Mekwateko lyanare, kwa ruganesere varesi vatatu, nye mekwateko lyepe kwa ruganesa mazwi gokulisiga govantu ava va tumbura moBibeli wokupitakana po-1 000.

Kuruganesa varesi wokulisiga-siga kuvatera vapurakeni va mone momagano gawo eyi va tjanga moBibeli. Nayo kuvatera nampili ngomu va dira kuyikwateka morupe rosidanauka omu mwa hamena musika nayimwe.

Ekwateko lyovaresi wovanzi ngoso lya hepa ewapaiko lyenene. Pomuhowo, vakonakoni va hepere kudiva ogu ana kuuyunga movelise neyi zina kutanta ntani nomalizuvho aga va hepa kupwagesa. Pasihonena, nsene velise kwa temwinina eyi ga uyunga mupositoli ogu va dira kutumbura kedina, ezwi lyalye nava ruganesa? Nsene velise ozo kuna kusinganyeka, awo kwa ruganesa ezwi lyaTomasa ano nsene nouradi, awo kuruganesa Peturusa.

Awo kwa gazadarere ko hena nomvhura domuntu ogu ga uyunga nonkango dongandi. Pasihonena, nsene kuna kutemwinina nonkango lyomupositoli Johanesa gomudinkantu, awo kwa ruganesere mudinkantu, ano nsene nonkango lyomupositoli Johanesa gomukurupe, awo kwa ruganesere mukurupe.

Ntani hena, awo kwa paparere varesi wovawa. Sinzi sovaresi ava va ruganesere kurugana koMberewa zomutayi zoNombangi daJehova moAmerika. Awo kwa pulire varesi ava va horowere va liwapaikire ntani nokuresa noparagarafu domoAwake! yipo va va heteke. Awo kwa resere novelise edi da pwagesa malizuvho ngwendi ehandu, ruguwo, ruhafo ndi kudompa mutjima. Eyi kwa vaterere va dive varesi nokutokora asi yipi eyi yina wapere muresi.

Konyima zokupa varesi maruha gawo, awo ngava zi va ka va kwateke koBrooklyn ndi Patterson. Awo kwa ruganesere muntu ogu na vatera varesi va ruganese ezwi lyokuwapera. Muntu ogo novaresi kwa ruganesere yipepa eyi ya kara nomavyukiso apa nava pwizumukira napa nava nkondopeka. Age hena kwa ruganesere ekwateko lyanare lyEtoroko lyouzuni woupe li va vatere.

Ezwi lyomuresi ngava liwapeke posiruwo sekwateko. Poyiruwo yimwe, mokuninka asi va gwane ekwateko lyewa, mukwateki nga gusa yininke yokulisiga-siga eyi vana kwateke nare nokuyitura kumwe.

Kapi tuna diva siruwo esi ngayi gusa mokumana kukwateka ewapukururo lyoBibeli nazinye zEtoroko lyouzuni woupe zo-2013. Nye ngomu nga zi pwa kukwateka nkenye buke zomoBibeli, ngava zi tura ko-jw.org ntani sidiviso sekwateko lyokupurakena ngasi moneka kedina lyobuke zomoBibeli koruha “Nobuke domoBibeli,” ko-jw.org.