Bibeli kuna kara buke zomulyo koNombangi daJehova. Awo kuzilironga nkenye apa ntani kuziruganesa mokuronga wopeke mbudi zongwa kuhamena Uhompa waKarunga. (Mateusa 24:14) Eyi kuninkisa Nobibeli dawo di kurupe usimbu. Yipo nye, Nombangi kwa rugene unene yipo Bibeli zEtoroko lyouzuni woupe lyoMatjangwa goRugereka goSikriste ezi va pwagese mo-2013, zi moneke nawa ntani zi kare zokukarerea.

Bibeli zompe za hepere kukara zononkondo. Apa Nombangi dimwe edi adi rugana mokundurukira koWallkill, New York, U.S.A, da zogerere nomukurona goKampani ezi azi rugana nobuke eyi vana hara kurugana, age kwa va tanterere asi: “Kwato gokuvhura kurugana Bibeli ezi muna hara.” Age ta tanta hena asi: “Sinzi soNobibeli kwa di rugana yipo di moneke tupu nawa positafura ndi mosikopa nye kapisi di kare dononkondo.”

Nobibeli dEtoroko lyouzuni woupe doMatjangwa goRugereka goSikriste, edi va hovere kupwagesa kapi da kere nononkondo. Komavega gamwe goupyu, poyiruwo yimwe ado nga di tavauka. Nombangi edi adi rugana mokundurukira kwa konakonene yininke yokulisiga-siga eyi nava ruganesa yipo va rugane Bibeli ezi ngazi dira kuzonauka momaukaro gokulisiga-siga. Kuliza neyi va gwene, awo kwa ndurukire Nobibeli edi va tumine koNombangi moyirongo yokulisiga-siga, yipo va heteke kudiruganesa komavango goupyu unene ntani naga goutenda.

Konyima zomakwedi ntazimwe, awo kwa ka tengwidire Nobibeli odo yipo va ya di konakone. Awo kwa rugene marunduruko koNobibeli odo nokutuma hena dimwe donompe va ka di heteke. Nobibeli dokusika po-1 697 kwa di tumine va ka di heteke. Nobibeli dimwe odo, pasihonena kwa di sigire momvhura masiku mudima va hana kuyidivira, ano dimwe kwa di pitwilire ruhanzo. Yitundwamo eyi va gwene kwa va vaterere va dive nsene asi ado da kara nononkondo ndi hawe.

Momvhura 2011 posiruwo esi va hetekere Nobibeli komavango gokulisiga-siga, Nombangi kwa rende ehina lyepe lyokupandeka nobuke eli va tumine koWallkill ntani koEbina, moJapan. Awo kapi tupu va here va nduruke Nobibeli dokugwanena po edi nga va pwagesa pepongo lyankenye mvhura, nye awo hena kwa here va nduruke Nobibeli dokulifana.

Momvhura 2012, mavango ogo gavali gokundurukira kwa tamekere kupwagesa Nobibeli dEtoroko lyouzuni woupe donongeha nedi dononsovagani pokuruganesa ntunda zoureru. Nye mahina ogo gomape kwa ruganesere raima ezi va dilire kukaheteka koyirongo, ano eyi kwa ninkisire Nobibeli di tameke kuligonya konyima zosiruwo. Awo kapi va vhulire kukohonona po udigu ou, makura yipo va hagekere kunduruka.

Kampani zimwe ezi za rugana yininke eyi da ruganesere Nombangi kwa tente asi kuligonya kuna kara udigu ou wa divikwa ou ava ligwanekere nawo ava ava ruganesa ntunda zoureru ntani awo udigu kuukohonona po. Mevango lyokuruganesa ntunda zoudigu, Nombangi kwa tokomenene kupwagesa Bibeli zontunda zoureru ezi ngazi twikira kumoneka nawa. Konyima zokuheteka raima nayimwe makwedi gane, awo kwa gwene nkedi zimwe ezi za va vaterere va twikire kunduruka Nobibeli edi ngadi dira kuligonya.

MwaSitarara 2012, Nombangi edi ngadi nduruka Nobibeli odo, kwa di tanterere di hageke kunduruka nokugavera Nobibeli nadinye edi va ndurukire ntani va ndindire yipo va nduruke Bibeli zEtoroko lyouzuni woupe ezi va wapukurura. Bibeli ozo kwa tokwere kuzipwagesa mo-5 Sikukutu 2013 pepongo lyankenye mvhura lyoWatch Tower Bible and Tract Society of Pennsylvania.

Nombangi edi adi rugana mokundurukira kwa gwene Bibeli ozo moUtano momazuva 9 Siwogedi 2013, makura ezuva lyokukwama ko, awo kwa tamekere kuzinduruka. Awo kwa pwagesere Bibeli zokuhova mo-15 Siwogedi. Moyivike ntambali eyi ya kweme ko, Nombangi domoWallkill ntani moEbina kwa rugene unene yipo va pwagese nokutuma Nobibeli dokupitakana po-1 600 000 yipo vantu navenye ava va kere pepongo lyankenye mvhura va vhure kuzigwana.

Nampili ngomu Nobibeli adi moneka nawa ntani kapi adi kurupa usimbu, nye mbudi zamo kwa kara nomulyo unene. Konyima zokugwana Bibeli zendi zompe, mukadi gumwe gomoAmerika kwa tjenge asi: “Bibeli ezi zompe kuna kuvatera nge ni kwate nawa egano Bibeli.”