E mvovo miami mia buka kia asatuludi a diambu dia nsobani za nsungi. Avo okwikilanga vo vena ye Mvangi ona ovuanga wantu o mfunu, e mvovo mia akwa ngangu awaya nanga mikusungamesa lekwa yayingi ina Nzambi kakubika kimana o ntoto wavangulukanga.

Kansi, wau vo e mpila wantu befwasilanga e nza iviokele tezo, mayingi mevavuanga muna vuluza yo, ke vanguluka kaka ko. Ekuma tulenda kadila ye vuvu vo Nzambi osinga vanga diambu muna vuluza o ntoto?

Tala e sono ina vana babu eyi isonganga e ziku vo o ntoto uvuluzwa yo vuatumuka nkutu.

• Nzambi wavanga o ntoto. “Kuna lubantiku, Nzambi wasema e zulu yo ntoto.”—Tuku 1:1

• Nzambi i mfumu a ntoto. “O ntoto ye yawonso ina mo ya Yave.” a —Nkunga 24:1

• Nzambi wakubika o ntoto kimana wakala yakwele mvu. “Wasikidisa o ntoto muna nkubilwa zandi; ke ukatulwa ko vana fulu kiandi yakwele mvu.”—Nkunga 104:5.

• Nzambi osianga nsilu vo e zingu ova ntoto kivuatumuka yakwele mvu. “Nzambi aludi, Ndiona wasema o ntoto . . . kasema wo nkatu ko, kansi wasema wo kimana wazingilwa kwa wantu.”—Yesaya 45:18

• Nzambi osianga nsilu vo wantu bekala ova ntoto yakwele mvu. “Ansongi bevua nza, bezingila vo yakwele mvu.”—Nkunga 37:29

Nzambi wakubika e nza kimana wantu bazingila vo yo lembi yo fwasa. E Bibila kiasakula vo Yave wa Nzambi muna ntangw’andi, ofwasa mvimba akwa loko ana befwasanga e nza.—Lusengomono 11:18.

E Bibila kisianga nsilu vo Nzambi okitula ntoto se paradiso yambote yo ziula o koko kwandi muna “lungisa e zolela ya awonso bena o moyo.”—Nkunga 145:16