NGA O NTOTO ULENDA VULUZWA?
Mupepe
MUPEPE mfunu kikilu tuvuidi wo. Ukutusadisanga muna fulumuna yo tanina mpe o ntoto kimana walembi fwaswa kwa nsemo mia vonza. Kondwa kwa mupepe, e nza yawonso yadi zizama.
MUPEPE MU VONZA WINA
E vangwa ya moyo yawonso ilenda fwa ova nza mu kuma kia mupepe usafulwanga. Mun’owu wa kimvuka kitalanga o vimpi wa nza yawonso, wantu akete kaka ova nza befulumunanga mupepe wavelela.
O mupepe wasafulwa ulenda twasa kimbevo kia nswengeti, cancer ya lufulu ye kimbevo kia ntima. Konso mvu tezo kia 7.000.000 za wantu befwanga kuna kinsalukisa mu kuma kia mupepe wasafulwa.
Ntoto Wakubikwa Kimana Wakala Yakwele Mvu
O ntoto wakubikwa ye lendo kia vana mupepe wavelela kwa vangwa yawonso ya moyo. Kansi, ediadi dilenda vangama kaka una ufwene kele vo wantu bayambwidi safula e kalu kieto. Tala nona yakete.
-
Ditomene zayakana vo e mfinda zivuidi lendo kiafwasa mvindu yampondi ikalanga muna mupepe. Kansi, vena ye fulu yayingi muna nlambu mia mbu imenanga nti miayingi milenda sala e salu kiaki una ufwene. E nti miami mimenanga muna nlambu mia mbu, miluta fwasanga e mvindu yampondi muna mupepe ke mu nti mia mfinda zampwena ko.
-
O lufimpu lwavangamene ke kolo ko lusonganga vo e matiti mankaka memenanga muna kalunga, musungula matiti mampwena, mefwasanga e mvindu ya mupepe yo zika yo nkutu. E makaya ma titi yayi mavuidi e nkutu zazala yo mupepe. Muna lusadisu lwa nkutu zazi, e titi yayi ilenda diata tini kianda vana ntandu a maza. Avo e titi yayi ivavukidi e kumu dia kalunga, e nkutu za mupepe zibukanga. I bosi, e titi yazala ye mvindu a mupepe idimukanga muna sina dia kalunga. Muna diadi, izikamanga muna sina dia kalunga mu mvu miayingi.
-
E ngambwila ivuidi lendo kia velelesa mvindu. E ziku kia diambu diadi kiatoma moneka ekolo ke twavaikanga diaka ko mu kuma kia vuku kia COVID-19. Muna mvu wa 2020, vava makompani mampwena mevaikisanga o mwisi mayambula sala ye makalu mayingi ke makangalanga diaka ko, o mupepe wavelela mu nzaki. E nsangu za mvu wa 2020 za nkubika italanga e diambu dia mupepe wavelela, zasonga vo muna nkam’a nsi zavanga lufimpu lwalu, vioka 80 lwa nsi zavova vo vava wantu babindikilwa muna zinzo, ke vavioka kolo ko o mupepe watoma velela.
Dina Wantu Bevanganga
Okangalela mu mvelo dilenda kulula safu muna mupepe
Ayadi bekwamanananga vovesa mfumu za makompani mampwena bakulula e salu isafulanga mupepe. Akwa ngangu za nza mpe bakinu sengomona e mpila zampa za velelesa usafu muna mupepe. Muna bonga e nona, besadilanga micróbios kimana bakatula lekwa yampondi muna mvindu a mupepe. Vana ntandu, akwa ngangu bekasakesanga o nkangu kimana bakangalelanga kia malu yovo mu mvelo yo lembi sadilanga e kura yayingi muna zinzo zau.
Ayadi ankaka muna kulula o safu muna mupepe, bekayilanga nkangu fogão zakete za lambila, kansi yamu wau wantu ayingi ke balendanga zo tambula ko
Kansi, mambu mayingi diaka mevavuanga, nze una usonganga e nsangu za mvu wa 2022 za yimvuka ya nz’amvimba kumosi ye kimvuka Kitalanga o Vimpi wa Nz’amvimba ye Lundilu dia Nzimbu dia Nz’amvimba.
E nsangu zazi zasonga vo muna mvu wa 2020, wantu ayingi omu nza yawonso basadila fogão zampwena zisafulanga mupepe muna lamba madia. Muna fulu yayingi, wantu akete kaka balenda sumba fogão zampa yovo lekwa yankaka ya lambila, nze makala ye nkuni.
E Bibila Nkia Vuvu Kikutuvananga?
“I wau wuwu kavovele o Yave wa Nzambi aludi, o Nsemi a zulu, . . . Ndiona wayalumuna o ntoto ye ina ivaikanga mo, Ndiona ovananga e fulumwinu kwa nkangu uzingilanga vo.”—Yesaya 42:5.
O Nzambi ona wavanga mupepe tufulumunanga, wavanga wo ye lendo kia kuyivelelesa. Nzambi ovuidi nkuma wakondwa tezo ye ozolanga wantu. Muna diadi, dia ngangu mu kwikila vo Nzambi ofokola mvimba e vangu dia wantu dia safula mupepe. Tala e longi, “Nzambi Wasia Nsilu vo Ntoto Uvuluzwa.”
