1. Nkia nzengo bafwete baka aleke? Adieyi dilenda kubasadisa muna lembi tokana kwayingi? (Tala fwaniswa va ntandu.)

ALEKE bazeye wo vo vitila muntu kavanga o nkangalu, diangangu mu sikidisa ntete kuna kazolele kwenda. E zingu kieto kina nze nkangalu. E ntangwa yambote ofwete sikidisa kuna ozolele kwenda i wau wakinu nleke. Kansi, o vanga wo ke diambu diakete ko. Dumbelele kimosi una ye nkumbu a Heather wavova vo: “O sola dina ozolele vanga muna zingu, dilenda muesa o wonga.” Avo i wau omonanga, sungamena dina Yave kavova: ‘Kutokani ko, kadi omono i Nzambi aku; ikuvamisa; elo, ikusadisa.’—Yesaya 41:10.

2. Aweyi ozayidi wo vo Yave ozolele vo wabaka nzengo zambote muna mpila osadila zingu kiaku?

² Yave okukasakesanga mu kala ye ngangu vava osikidisanga dina ozolele vanga muna zingu kiaku. (Kimpovi 12:1; Matai 6:20) Yave ozolele vo wakala ye kiese. Ediadi dimonekanga vava otalanga, wá yo dia e lekwa ina kavanga. Yave okutulunga-lunganga mpe mu mpila zankaka. Okutuvananga tuludiku yo kutulonga e mpila yambote tufwete zingila. Muna kuma  kiaki, Yave okendalalanga vava wantu bekolamenanga malongi mandi mangangu. Ovovesanga awana ke bazolele landa nzila zandi ko vo: “Nusolele edi ke dingyangidikidi ko. . . . E ntaudi zame bemona kiese, oyeno nufusuka nsoni: E ntaudi zame beyimbila muna wete wa ntima.” (Yesaya 65:12-14) Vava tubakanga nzengo zambote muna zingu, nkembo tutwasanga kwa Yave.—Ngana 27:11.

3. Adieyi Yave kazolele mu kuma kiaku?

³ Nkia makani Yave kazolele vo wasikidisa? Muna kala ye kiese, ofwete zaya Yave yo kunsadila. Kiaki i kuma Yave kavangila wantu. (Nkunga 128:1; Matai 5:3) Kuna kwa bulu, e salu kiau kaka dia, nua yo wuta wana. Kansi, Yave ozolele vo wabaka e nzengo zilenda kutwasila kiese muna zingu. O Mvangi aku “Nzambi a zola,” “Nzambi a kiese,” ona wavangila wantu “muna mpw’andi.” (2 Korinto 13:11; 1 Timoteo 1:11; Etuku 1:27) Avo otanginini Nzambi anzodi, kiese kiayingi dikutwasila. Nkand’a Nzambi uvovanga vo: “Edi disundidi e kiese dia vana, ke mu tambula ko.” (Mavangu 20:35) Nga ke wau ko omonanga? Ediadi diambu diamfunu kikilu muna zingu. Muna kuma kiaki, Yave ozolele vo e nzengo obaka muna zingu kiaku zasonga vo zola una kwau muna wantu ye muna yandi.—Tanga Matai 22:36-39.

4, 5. Adieyi diatwasilanga Yesu e kiese?

⁴ Yesu Kristu mbandu ambote kasisa kwa aleke. Vava kakala kingiana-ngiana, wavaulanga e ntangwa ya sakana. Muna Diambu dia Nzambi tutanganga vo vena ye “ntangw’a seva” ye “ntangw’a kina.” (Kimpovi 3:4) Yesu walongokanga mpe Nkand’a Nzambi mu siamisa kikundi kiandi yo Yave. Vava kakala ye kimbuta kia mvu 12, alongi muna tempelo basivika mu kuma kia “zayi wandi ye mvutu zandi.”—Luka 2:42, 46, 47.

⁵ Vava kakituka se mbuta, wayangalelanga vanga luzolo lwa Nzambi. Kasikil’owu, Nzambi wazola vo Yesu “kateleka nsangu zambote kw’asukami” yo ‘twasa luvevoko kwa mpofo.’ (Luka 4:18) E sono kia Nkunga 40:8 kivovanga mu kuma kia Yesu vo: “O vanga luzolo luaku, e Nzambi ame, kwau nyangalelele.” Yesu watoma zolanga longa wantu e ludi mu kuma kia Se diandi. (Tanga Luka 10:21.) Lumbu kimosi, vava Yesu kamanisa mokena yo nkento mosi mu kuma kia nsambil’aludi, wavovesa alongoki andi vo: “O madia mame i vanga luzolo lwa ndiona wantuma, yamanisa mpe salu kiandi.” (Yoane 4:31-34) Yesu kiese kiayingi kamonanga kadi zola kakala kwau muna Nzambi ye wantu. Avo ovangidi diau dimosi, ongeye mpe kiese okala kiau.

6. Ekuma dinina diambote mu zayisa makani maku kwa akaka?

⁶ Akristu ayingi bayantika e salu kia kimviti a nzila vava bakala aleke. Ediadi kiese kiayingi dikubatwasilanga. Nga olenda mokena ye akaka muna yau yo kubazayisa makani maku? “Vana valembi vangwa mfulu, tukanu twafunga: Mun’aludiki engi i tusikidila.” (Ngana 15:22) E mpangi zazi z’akala ye z’akento bekuzayisa vo e salu kia kimviti a nzila  mambu mayingi kilenda kulonga mekusadisa muna zingu kiaku kiawonso. Yesu mayingi kalongoka kwa Se diandi vava kakala kuna zulu. I bosi, vava kakala ova ntoto, wakwamanana longoka. Kiese kiayingi kamonanga vava kasamunanga e nsangu zambote kwa akaka ye vava kasonga kwikizi kiandi muna ntangw’a mpasi. (Tanga Yesaya 50:4; Ayibere 5:8; 12:2) Yambula twazaya e kuma e salu kia ntangwa ke ntangwa kilenda kutwasila e kiese.

7. Ekuma aleke ayingi bezolelanga e salu kia kitula wantu se alongoki?

⁷ Yesu watutuma twenda ‘kitula wantu se alongoki’ yo toma kubalonga. (Matai 28:19, 20) Avo osolele salu kiaki muna zingu kiaku, kiese kiayingi okala kiau muna zingu yo twasa nkembo kwa Nzambi. Nze una uvangamanga muna konso salu, ntangwa divava muna kituka mviti a nzila wazikuka. Mpangi mosi una ye nkumbu a Timothy, ona wayantika e salu kia kimviti a nzila muna kileke, wavova vo: “Izolanga sadila Yave muna salu kia ntangwa ke ntangwa kadi i mpila yambote isongelanga zola kwame muna yandi. Kuna lubantiku, diampasi diakala mu yantila longoka Nkand’a Nzambi yo wantu. Kansi vava yayenda sadila ku zunga kiankaka, yayantika longoka yo wantu ayingi muna ngonde yantete. Mosi muna alongoki wayantika kwiza muna Seka dia Kintinu. Vava yakota e Sikola ya Nkand’a Nzambi mu Kuma kia Mpangi z’Akala Ampumpa mu ngonde zole, yafilwa ku zunga kiankaka. Yayantika longoka Nkand’a Nzambi yo wantu yá. O longa wantu kiese kiayingi dikumpananga, musungula vava imonanga una mwand’avelela ukubasadisilanga mu soba mpil’a zingu kiau.” * (Tala mvovo vana yand’a lukaya.)—1 Tesalonika 2:19.

8. Adieyi aleke ankaka bevanganga muna sila umbangi kwa wantu ayingi?

⁸ Aleke ankaka belongokanga ndinga ya kinzenza. Kasikil’owu, Jacob ozingilanga kuna América do Norte wasoneka vo: “Vava yakala ye kimbuta kia mvu nsambwadi, ayingi muna akwame a sikola esi Vietname. Wau vo yakala ye luzolo lwa kubalonga oma ma Yave, yalongoka e nding’au. Nkumbu miayingi, yalongoka ndinga yayi muna tezanesa Eyingidilu dia Kingelezo ye dia ndinga Vietnamita. Yavanga mpe kikundi ye mpangi za nkutakani ya ndinga Vietnamita. Vava yalungisa kimbuta kia mvu 18, yakota muna salu kia kimviti a nzila. Kuna kwalanda, yakota Sikola ya Nkand’a Nzambi mu Kuma kia Mpangi z’Akala Ampumpa. Ediadi dikunsadisanga muna salu kiame kia kimviti a nzila. Mono mosi kaka i nkuluntu muna buka twina kia ndinga Vietnamita. Ayingi muna esi Vietname besivikanga wau yalongoka vova e nding’au. Nkumbu miayingi bekumbokelanga mu longoka yau Nkand’a Nzambi. Akaka benungunukanga muna mwanda yo vubwa.”—Tezanesa ye Mavangu 2:7, 8.

9. E salu kia kitula wantu se alongoki nkia mambu kilenda kutulonga?

⁹ E salu kia kitula wantu se alongoki kilenda kulonga fu yambote ya salu, zaya mokena yo vova ye sikididi kiawonso ye kuna ndekwa. (Ngana 21:5; 2 Timoteo 2:24) Kansi, edi ditoma twasanga kiese muna salu kiaki i longoka una tulenda sadila sono ya Nkand’a Nzambi mu zayisa kwa akaka  mana tukwikilanga. Tulongokanga mpe una tulenda sadila entwadi yo Yave.—1 Korinto 3:9.

10. Aweyi olenda kadila ye kiese muna salu kia kitula wantu se alongoki kana nkutu vo mu zunga kieno diampasi dikalanga?

¹⁰ Olenda mona kiese muna salu kia kitula wantu se alongoki kana nkutu vo muna zunga kieno wantu akete kaka betambulwilanga longoka Nkand’a Nzambi. Muna kitula wantu se alongoki, awonso muna nkutakani bafwete salanga entwadi. Kana una vo mpangi mosi kaka olenda solola nlongoki, yeto awonso tuyangalalanga kadi tuvananga moko muna salu kia vava wantu. Kasikil’owu, Brandon ona wasala e salu kia kimviti a nzila mu mvu vua ku zunga kina vo akete kaka batambulwila longoka Nkand’a Nzambi, wavova vo: “Iyangalelanga e salu kia samuna e nsangu zambote kadi i salu katuvana o Yave. Yakota mu salu kia kimviti a nzila vava yafokola tanga sikola. Izolanga kasakesa aleke muna nkutakani eto. Diakiese mu mona lunungunuku lwau lwa mwanda. Vava yakota Sikola ya Nkand’a Nzambi mu Kuma kia Mpangi z’Akala Ampumpa, yafilwa ku zunga kiankaka. Dialudi vo mu zunga kiaki, kialongokele kana yo muntu mosi ko ona wanungunuka muna mwanda yo vubwa, kansi e mpangi zankaka bevuanga lau diadi. Ngina ye kiese wau yabak’e nzengo za kuyivana muna salu kia kitula wantu se alongoki.”—Kimpovi 11:6.

11. Mu nkia salu aleke ayingi bekuyivananga?

¹¹ Vena ye salu yayingi tulenda sala muna salu kia Yave. Kasikil’owu, aleke ayingi bevananga moko muna salu kia tunga maseka mayingi ma Kintinu mavuilu o mfunu. Wau vo e fulu yayi nkembo itwasanga kwa Yave, o vana moko muna salu kiaki dilenda kutwasila kiese kiayingi. O sala entwadi ye mpangi zaku dilenda kutwasila mpe kiese kiayingi. Vana ntandu, olenda longoka mambu mayingi, nze sala mu mpila yambote lembi kuyisia mu vonza ye una olenda sadila entwadi ye awana bevitanga o ntu.

12. E salu kia kimviti a nzila nkia malau mankaka kilenda kututwasila?

¹² Mpangi mosi una ye nkumbu a Kevin wavova vo: “Tuka muna kileke, yakala ye kani dia sadila Yave muna salu kia ntangwa ke ntangwa. Vava yalungisa kimbuta kia mvu 19, yakota muna salu kia kimviti a nzila. Muna kuyilunga-lunganga, yasalanga ndambu a lumbu yo mpangi mosi wakala vo ntungi a nzo. Yalongoka sia nludi, zianela ye yelo ya nzo. I bosi, mvu miole yasala entwadi ye mpangi basadisanga awana babwilwa sumbula. Twatungulula Maseka ma Kintinu ye nzo z’ampangi. Vava yawá e nsangu vo asadi bavavuanga kuna África do Sul, yalomba kimana ngienda. Kwaku África, tumingu twakete kaka tuviokanga mu yantika tunga Seka diankaka dia Kintinu. Tuna nze esi nzo mosi ye ampangi isalanga yau. Vamosi tuzingilanga, ntwadi tulongokanga Nkand’a Nzambi, ntwadi tusalanga. Izolanga mpe  sala ntwadi ye mpangi za zunga muna salu kia umbangi konso lumingu. E nzengo yabaka muna kileke nsambu zayingi zikuntwasilanga zina kiayindulanga nkutu ko.”

13. Ekuma aleke ayingi beyangalelanga sadila Yave kuna Betele?

¹³ Akaka mun’awana bakala aviti a nzila owau ku Betele besadilanga. E salu kia Betele kiese kikilu kitwasanga kadi e salu yawonso isalwanga ko i mu kuma kia Yave. Ampangi besadilanga ku Betele bevananga moko muna salu kia sekola yo kayanesa Bibila ye nkanda kimana wantu balongoka e ludi. Mpangi Dustin osadilanga kuna Betele wavova vo: “Yayantika kuyisila e kani dia kota muna salu kia ntangwa ke ntangwa vava yakala ye kimbuta kia mvu vua. Yayantika e salu kia kimviti a nzila vava yafokola tanga sikola. Vioka mvu mosi ye ndambu, yabokelwa kuna Betele, kuna yalongokela sadila muna masini ma nietekena nkanda, i bosi yalongoka salu kia komputadore. Kwaku Betele, ngina ye lau dia wá e nsangu za lunungunuku lwa salu kia kitula wantu se alongoki kisalwanga mu nza yawonso. Iyangalelanga sadila ku Betele kadi e salu tusalanga kisadisanga wantu mu finama Yave.”

14. Aweyi olenda kubamena vitila wakota muna salu kia ntangwa ke ntangwa?

¹⁴ Avo tima dia kota mu salu kia ntangwa  ke ntangwa una diau, aweyi olenda kubamena? Muna sadila Yave una ufwene, ofwete yima fu ivavuanga kwa Akristu. Longokanga diambu dia Nzambi lumbu yawonso, badika mana olongokanga yo vananga e nkomena muna tukutakanu mu songa lukwikilu lwaku. Ekolo wakinu mwan’a sikola, olenda tomesa ndekwa zaku za mokena ye wantu yo kubasamunwina e nsangu zambote. Longoka songa zola muna wantu muna kubayuvulanga kuna ndekwa e ngindu zau yo tamba o matu muna mvutu zau. Vana ntandu, olenda vana moko muna salu ya nkutakani, nze velelesa yo vangulula Seka dia Kintinu. Yave ozolanga sadila alembami ye awana besonganga e tima dia sala. (Tanga Nkunga 110:3; Mavangu 6:1-3) Paulu wa ntumwa wabokela Timoteo kimana basala entwadi muna salu kia kimisionario kadi “wakala ye nkumbu ambote vana vena wana-ngudi.”—Mavangu 16:1-5.

15. Adieyi olenda vanga mu solola e salu kilenda kusadisa muna salu kia kimviti a nzila?

¹⁵ Kwa akaka mun’awana bena muna salu kia ntangwa ke ntangwa, divavanga vo bakala ye salu kilenda kubadisa mu kuyilunga-lunga. (Mavangu 18:2, 3) Muna kuma kiaki, diambote mu longoka salu ke idianga ntangwa yayingi ko ina ilenda kusadisa mu solola salu kia ndambu a lumbu. Mokena yo nkengi a zunga ye aviti a nzila akaka mu kuma kia makani una mau yo kubalomba lusadisu. I bosi, vanga dina Nkand’a Nzambi uvovanga: “Yekeka mavangu maku kwa Yave, o makani maku masikila.”—Ngana 16:3; 20:18.

16. Aweyi e salu kia ntangwa ke ntangwa kilenda kusadisila mu lungisa mbebe zankaka kuna sentu?

¹⁶ Yave ozolele vo ‘wasimbinina’ e zingu kiakiese kia kusentu. (Tanga 1 Timoteo 6:18, 19.) E salu kia ntangwa ke ntangwa kikusadisa mu kala Nkristu wazikuka ekolo osalanga entwadi ye selo yankaka ya ntangwa ke ntangwa. Vana ntandu, ayingi bemonanga vo o sala e salu kia ntangwa ke ntangwa muna kileke diabasadisa vava basompa. Nkumbu miayingi, awana basala e salu kia kimviti a nzila vitila basompa bekwamanananga muna salu kiaki kumosi ye akazi au.—Roma 16:3, 4. 

17, 18. E makani ma kusentu tukuyisilanga muna zingu aweyi mesongelanga zolela ya ntim’eto?

¹⁷ E sono kia Nkunga 20:4 kivovanga mu kuma kia Yave vo: “Kàvan’owu uzolele o ntima, yo lungisa lukanu luaku luawonso.” Ekolo osikidisanga makani maku ma kuna sentu, toma yindula una ozolele sadila e zingu kiaku. Yindula mpe mana Yave kevanganga mu lumbu yeto ye dina olenda vanga muna salu kiandi. I bosi, baka e nzengo zina zikunyangidika.

¹⁸ Avo osadidi Yave yo kunkembelela muna zingu kiaku, kiese kiayingi dikutwasila. ‘Omwena wete muna Yave; oyandi okuvana zolela ya ntim’aku.’—Nkunga 37:4.