Akristu nsiku mia Nkand’a Nzambi belandanga vava bebakanga e nzengo muna mpila balenda kuyitanina. E nkanikinu miami misonganga vo Akristu ke bafwete sadila nkele ko yovo nuaninua kiankaka mu kuyitanina. Badika e mambu malende:

O moyo a muntu wavauka kuna kwa Yave. Davidi wa ntozi a nkunga wasoneka mu kuma kia Yave vo: “E nto a moyo in’oko wina.” (Nkunga. 36:9) Muna kuma kiaki, avo Nkristu ozolele kuyitanina yovo tanina mavua mandi, kafwete vanga mawonso mu venga nkanu a menga, i sia vo, kala nkwa kuma muna lufwa lwa muntu ankaka.—Nsiku 22:8; Nku. 51:14.

Dialudi vo konso lekwa kina muntu kesadila mu kuyitanina kilenda kuntwasila nkanu a menga. O kala yo nkele dilenda dio kitula diasazu mu vonda muntu, kiakala mu lukanu yovo lembi wo kana. * (Tala mvovo vana yand’a lukaya.) O mwivi yovo kimpumbulu ku makasi kekalanga. Muna kuma kiaki, avo omwene nkele, dilenda wokesa makasi yo lwaka yamu tezo kia vonda muntu.

Vava Yesu kavovesa alandi andi vo banata nsosolo muna fuku wavitila lufwa lwandi, ke diakala mu kuma kia sia ko vo bayitanina. (Luka 22:36, 38) Yesu diambu diamfunu kazola kubalonga: Alongoki andi ke bafwete nwana ko yovo kota wantu nsoki, kana nkutu vo bawananene yo wantu bena ye nkele. (Luka 22:52) Vava Petelo kasadila o nsosolo andi mu nuanisa ntaudi a ngang’ambuta, Yesu wavovesa Petelo vo: “Vutula nsosolo aku vana fulu kiandi.” I bosi, Yesu wayika nkanikinu una Akristu belemvokelanga yamu unu. Wavova vo: “Awonso bebonga nsosolo, muna nsosolo befwila.”—Matai 26:51, 52.

Nze una diasakulwa muna Mika 4:3, nkangu a Nzambi ‘befula nsosolo miau kimana miakituka se nsengo, e madionga mau se nkanku.’ Akristu akieleka bazayakene vo akwa luvuvamu. Belandanga nkanikinu mina Nzambi kavana muna nzil’a Paulu wa ntumwa vo “ke nuvutula muntu mbi muna mbi ko” ye “nukadila kuna luvuvamu yo wantu awonso.” (Roma 12:17, 18) Kana una vo Paulu wawanana ye mambu ma mpasi kumosi ye “vonza ya mivi.” Kakolamenanga nsiku mia Nkand’a Nzambi ko mu vava kuyitanina. (2 Korinto 11:26) Wabundanga e vuvu muna Nzambi, wazayanga wo vo luludiku lwa ngangu lwa Nkand’a Nzambi ‘lusundidi nuaninua ya mvita.’—Kimpovi 9:18.

Kuna kwa Akristu, o moyo usundidi o mfunu ke mu mavua ko. Tuzeye wo vo moyo a muntu “ke una muna mavua mandi ko.” (Luka 12:15) Muna kuma kiaki, avo tuvovesele mwivi una yo nkele kuna malembe, kansi ke dikulwidi makasi mandi ko, diambote twalanda luludiku lwa Yesu vo: “Kutelamena muntu ambi ko.” Diadi disongele vo tufwete yambula vo kabaka konso  kina kazolele. (Matai 5:39, 40; Luka 6:29) * (Tala mvovo vana yand’a lukaya.) Kansi, diambote twavenganga mambu malenda fila yimpumbulu mu kutumwesa mpasi. Avo tulende luludiku lwa Nkand’a Nzambi yo venga “lusanu mu kuma kia mavua,” diampasi dikala mu siwa o meso kwa yimpumbulu. (1 Yoane 2:16) Dikututanina mpe avo tuzayakene kuna belo vo tu Mbangi za Yave ana bezolanga luvuvamu.—Ngana 18:10.

Akristu bezitisanga e ntona za wantu ankaka. (Roma 14:21) Mpangi zankaka balenda kendalala yovo tá e sakuba avo bawidi vo mpangi una vo Nkristu nkele kekalanga wau mu vava kuyitanina mu lembi vangwa mbi kw’akaka. Dilenda kala vo tuna yo nswa wa sumba e nkele, kansi, wau vo tuzolanga mpangi zeto, ke tuzolele vanga konso diambu ko dina tuzeye vo dilenda kubatesesa e sakuba.—1 Korinto 10:32, 33; 13:4, 5.

Akristu bafwete songanga mbandu ambote kw’akaka. (2 Korinto 4:2; 1 Petelo 5:2, 3) Avo Nkristu una yo nkele mu kuyitanina, akuluntu bafwete kumvana longi dibongelo muna Nkand’a Nzambi. Avo obakidi nzengo za kwamanana kala yo nkele, mpangi ndioyo ke mbandu ambote ko. Muna kuma kiaki, kafwana ko mu tambula konso mbebe yovo lau dia salu muna nkutakani. Diau dimosi mpe yo Nkristu osalanga e salu kivavanga vo kasadila nkele. Diambote mu vava salu kiankaka. *—Tala e mvovo vana yand’a lukaya.

O Nkristu kafwete baka nzengo yandi kibeni mu mpila ina kekuyitanina kumosi ye esi nzo andi, mavua mandi ye salu kalenda sala. Kansi, vitila kabaka e nzengo zazi, kafwete landa nkanikinu mia Nkand’a Nzambi. Se dieto diangangu watuvana nkanikinu miami kadi zola kekutuzolanga. Ekiaki i kuma Akristu ana bena ye ngwizani ambote yo Yave bebakilanga e nzengo za lembi kala ye nkele mu kuyitanina. Bazeye wo vo avo babundidi e vuvu muna Nzambi yo landa nkanikinu mia Nkand’a Nzambi, besinga taninwa yakwele mvu.—Nkunga 97:10; Ngana 1:33; 2:6, 7.