1, 2. Ekuma dinina diamfunu mu badika una tulenda fiaulwisila awana bena ye ntantu? (Tala fwaniswa va ntandu.)

MPANGI Susi wavova vo: “Vioka mvu mosi vava mwan’eto wa yakala kafwa, ntantu zayingi twamonanga.” Vava mpangi mosi kafwila nkento kuna kinsalukisa, wavova vo: “Diampasi mu sasila una imonanga.” Diankenda vo wantu ayingi bebwilwanga e mpasi zazi. Muna nkutakani ya Akristu o unu, ndonga muna mpangi zeto z’akala ye z’akento ke bevingilanga ko vo awana bezolanga bafwa vitila Armangedo. Dilenda kala vo muntu otoma zolanga ofwidi yovo ozeye muntu ona wafwidilu. Avo i wau, nanga olenda kiyuvula: ‘Aweyi muntu ofwidilu kalenda sololwela lufiaulwisu?’

² Akaka bevovanga vo ekolo ntangwa iviokanga, e ntantu zilenda fokoka. Nga ediadi dialudi kwa wantu awonso? Nkento mosi ansona wavova vo: “Kuna kwa mono, e mpila ina muntu kesadilanga e ntangwa i yau isadisanga mu kulula e ntantu.” E mputa muna sasuka, ntangwa divavanga yo toma yo lunga-lunga. Diau dimosi mpe, ntangwa divavanga muna  kulula e ntantu. Adieyi dilenda sadisa awana bafwilwa mu kulula e ntantu bemonanga?

3, 4. Ekuma tulenda kadila ye ziku vo Yave obakulanga e ntantu tumonanga?

³ Yave wa Se dieto diankenda, okutuvananga lufiaulwisu tuvuidi o mfunu. (Tanga 2 Korinto 1:3, 4.) Yandi i mbandu isundidi ya wantu besonganga ngemba. Osianga nsilu kwa nkangu andi vo: “Omono, mono i ndion’okufiaulwisa.”—Yesaya 51:12; Nkunga 119:50, 52, 76.

⁴ Se dieto dianzodi wamona mpe mpasi za fwilwa ana kazolanga, nze Abarayama, Isaki, Yakobo, Mose yo Ntinu Davidi. (Ntalu 12:6-8; Matai 22:31, 32; Mavangu 13:22) Nkand’a Nzambi ukutusonganga vo Yave osutilanga e lumbu kina kesinga fula akwa kwikizi awaya. (Yobi 14:14, 15) Muna kolo kiakina, bekala ye kiese yo vimpi walunga. Yave wamona mpe mpasi za fwilwa Mwan’andi antete. Nkand’a Nzambi uvovanga vo Yesu wakala mosi mun’awana katoma zolanga o Nzambi. (Ngana 8:22, 30) Ka tulendi yindula nkutu ko e ntantu kamona o Yave vava kamona lufwa lwampasi lwa Mwan’andi.—Yoane 5:20; 10:17.

5, 6. Aweyi Yave kekutufiaulwisilanga?

⁵ Tulenda kala kikilu ye vuvu vo Yave okutusadisa. Muna kuma kiaki, tufwete sambanga ntangwa zawonso yo zayisa e mpasi ye ntantu zeto kwa yandi. Dia lufiaulwisu kikilu mu zaya vo Yave obakulanga e mpasi zeto yo kutuvana lufiaulwisu tuvuidi o mfunu! Kansi, aweyi Yave kevangilanga wo?

⁶ Imosi muna mpila zina Yave kekutufiaulwisilanga i muna mwand’andi avelela. (Mavangu 9:31) Yesu wasia nsilu vo Se dieto ovana mwand’andi avelela kw’awonso belomba wo. (Luka 11:13) Mpangi Susi tuyikidi kuna lubantiku wavova vo: “Nkumbu miayingi twafukamanga yo dodokela Yave kimana katufiaulwisa. Konso ntangwa twavanganga wo, o luvuvamu lwa Nzambi lwayingilanga e ngindu ye ntima mieto.”—Tanga Filipi 4:6, 7.

7, 8. Ekuma tulenda kadila ye ziku vo Yesu olenda kutufiaulwisa?

⁷ Vava kakala ova ntoto, Yesu watanginina fu ya Se diandi mu mpila yalunga muna mvovo ye mavangu. (Yoane 5:19) Yave watuma Yesu ova ntoto mu fiaulwisa awana “babudikw’e ntima” ye ‘awonso bedilanga.’ (Yesaya 61:1, 2; Luka 4:17-21) Wantu bazaya wo vo Yesu wabakulanga e mpasi zau ye wakala ye luzolo lwa kubasadisa.—Ayibere 2:17.

⁸ Vava Yesu kakala nleke, wafwilwa mpe akundi ye yitu. Kasikil’owu, vava Yosefe wa se diandi diansansi kafwa, Yesu nanga  nleke kakala. * (Tala mvovo vana yand’a lukaya.) Yindula e mpasi kamona nleke ndioyo mu zizidila ntantu za yandi kibeni, za ngudi andi ye za abunzi andi!

9. Aweyi Yesu kasongela zola ye ngemba vava Lazaro kafwa?

⁹ Vava kakala ova ntoto, Yesu wasonga vo wabakulanga e mpasi za wantu yo kubasonga e ngemba. Kasikil’owu, vava nkundi andi Lazaro kafwa, Yesu wabakula e ntantu bamona Mareta yo Maria. Wau vo zola kikilu kabazolanga, Yesu wadila kana una vo wazaya wo vo ofula Lazaro.—Yoane 11:33-36.

10. Ekuma tulenda kadila ye ziku vo Yesu obakulanga e ntantu tumonanga o unu?

¹⁰ Aweyi e mvovo mialufiaulwisu mia Yesu milenda kutusadisila o unu? Nkand’a Nzambi usonganga vo Yesu kasoba ko. Uvovanga vo: “Yesu Kristu yandi mosi kaka, o zono, o unu, yakwele mvu.” (Ayibere 13:8) Oyikilwanga vo “Mfumu a moyo” kadi muna nzil’andi tuvuila moyo a mvu ya mvu. Wau vo Yesu ozeye mpe ntantu za fwilwa, “wafwana mu sadisa awana betontwanga.” (Mavangu 3:15; Ayibere 2:10, 18) Muna kuma kiaki, tulenda kala ye ziku vo Yesu okendalalanga vava akaka bemonanga e mpasi. Yesu obakulanga e mpasi zau, olenda kubafiaulwisa “muna ntangwa ifwene.”—Tanga Ayibere 4:15, 16. 

11. Nkia sono omonanga vo ya lufiaulwisu kwa ngeye?

¹¹ E sono kiyikanga ntantu kamona o Yesu vava Lazaro kafwa, kimosi muna sono yayingi ya lufiaulwisu ina muna Diambu dia Nzambi. E diadi ke dikutusivikisanga ko kadi “mawonso mateka sonekwa, masonekwa muna kutulonga, kimana muna luzindalalu lweto ye muna lufiaulwisu lwa Sono, twakala ye vuvu.” (Roma 15:4) Avo ntantu za fwilwa omonanga, e sono ilende ilenda mpe kufiaulwiswa:

• “O Yave ofinamene awana babudik’e ntima, Ovuluzang’awana bakendalala.”—Nkunga 34:18, 19.

• “Muna ulolo wa ngindu zame za mbundu. O fiauzi waku [e Yave] uyangidika moyo ame.”—Nkunga 94:19.

• “Yambula yandi kibeni Mfumu eto Yesu Kristu yo Nzambi wa Se dieto ona watuzola yo kutuvana lufiaulwisu lwa mvu ya mvu ye vuvu kiasikila muna nsambu zandi, kafiaulwisa e ntima mieno yo kunusikidisa muna mavangu ye mambu mawonso mambote.”—2 Tesalonika 2:16, 17. *—Tala mvovo vana yand’a lukaya.

12. Aweyi tulenda fiaulwisila akaka?

¹² Awana bemonanga ntantu za fwilwa, balenda mpe vua lufiaulwisu muna nkutakani ya Akristu. (Tanga 1 Tesalonika 5:11.) Aweyi olenda kumikina yo fiaulwisa  awana bena yo ‘ntim’akosomoka’? (Ngana 17:22) Sungamena vo vena ye “ntangw’a butama ye ntangw’a vova.” (Kimpovi 3:7) Nkento mosi ansona una ye nkumbu a Dalene wavova vo awana bemonanga ntantu za fwilwa bafwete zayisanga kw’akaka e ngindu zau ye una bemonanga. Muna kuma kiaki, e diambu diamfunu olenda vanga i kubatamba o matu lembi kubazenga e mvovo. Junia una vo e mpangi andi ayakala wakivonda, wavova vo: “Kana una vo ke tulendi zaya kikilu ko e ntantu kemonanga o muntu, e diambu disundidi o mfunu tulenda vanga i vava bakula una kemonanga.”

13. Adieyi tufwete sungamena mu kuma kia ntantu za fwilwa?

¹³ Tufwete sungamena vo e mpila ina konso muntu kemonanga yo songela e ntantu yaswaswana kikilu. Ezak’e ntangwa diampasi kikilu dikalanga mu sasila kwa muntu e ntantu zeto. Diambu dia Nzambi divovanga vo: “O ntima uzeye eyandi ndudi; o nzenza kena ya untwadi mu kiese kiandi ko.” (Ngana 14:10) Kana nkutu vava muntu kevovelanga e ntantu zandi, ezak’e ntangwa diampasi dikalanga kw’akaka mu bakula mana kazolele vova.

14. Adieyi tulenda vova muna fiaulwisa awana bafwidilu?

¹⁴ Dilenda kala diampasi mu zaya dina tuvova kwa muntu ona ofwidilu. Kansi, Nkand’a Nzambi uvovanga vo: “O lubini lu’akwa ngangu, wuka luwukanga.” (Ngana 12:18) Ayingi besololanga mvovo mia lufiaulwisu mina balenda zayisa kw’akaka muna finkanda Quando Morre Alguém Que Amamos. * (Tala mvovo vana yand’a lukaya.) Nkumbu miayingi, e diambu diamfunu olenda vanga, i ‘didisa awana bedilanga.’ (Roma 12:15) Gaby ona wafwilwa yakala, wavova vo, ezak’e ntangwa e mpila yambote kemonanga ya songela e nkenda, i dila. Wakudikila vo: “I wau ibakilanga lufiaulwisu vava akundi bedilanga yame. Muna ntangwa yayina, imonanga vo ke mono mosi kaka ko ngina mu kinsona.”

15. Aweyi tulenda fiaulwisila akaka avo diampasi dikalanga kwa yeto? (Tala mpe e babu, “Mvovo mia Lufiaulwisu.”)

¹⁵ Avo diampasi dikalanga kwa ngeye mu fiaulwisa muntu, olenda kunsonekena finkanda, email yovo kuntwikila mensagem. Olenda yika sono kimosi kia lufiaulwisu, yika fu kiambote osungamenanga kakala kiau muntu wafwidi yovo yika diambu dimosi diambote nwavanga kumosi yo muntu wafwidi. Junia wavova vo: “O tambula mensagem za lufiaulwisu yovo bokelwa kwa mpangi mu viokesa yandi e ntangwa ditoma kunsadisanga. E mambu mama mesonganga vo ampangi betoma kunzolanga yo kumvua o mfunu.”

16. Nkia mpila tulenda fiaulwisila akaka?

 ¹⁶ E sambu yeto ilenda sadisa mpangi zeto ana bafwidilu. Tulenda samba mu kuma kiau yovo samba yau entwadi. Kana una vo dilenda kala diampasi mu vanga wo kadi dilenda kufila mu dila, e sambu kiaku kilenda kubafiaulwisa. Dalene osungamenanga vo: “Vava mpangi z’akento bekwizanga kumfiaulwisa, ezak’e ntangwa ikubalombanga vo basamba. Kuna lubantiku lwa sambu, diampasi dikalanga muna vova, kansi malembe-malembe betumbulanga e ndinga yo yika mana mena muna ntima. O lukwikilu lwau lwasikila kumosi yo zola ye mpila betokanenanga wete diame, dikumikanga kikilu lukwikilu lwame.”

17-19. Ekuma tufwete kwamanena fiaulwisa akaka?

¹⁷ Ke tulendi zaya ko kana kolo kwa konso muntu ofwidilu kevanga muna fokola e ntantu. Avo muntu tuzolanga ofwidi, kuna lubantiku, akundi eto, yitu ye akaka bekwizanga kutufiaulwisa. Kansi, avo bavutukidi kwau muna salu yau ya lumbu ke lumbu, awana bafwidilu bekwamanana vava lufiaulwisu. Muna kuma kiaki, kala wakubama mu vana lusadisu. “O nkundi ozolanga ntangwa zawonso, o mpangi muna mpasi kawutukila.” (Ngana 17:17) Tufwete kwamanana fiaulwisa awana bafwidilu yavana e ntantu zikuluka.—Tanga 1 Tesalonika 3:7.

¹⁸ Sungamena vo muntu wafwilwa olenda kendalala konso ntangwa. Ediadi dilenda vangama mu kuma kia yindula e ntangwa zambote baviokesanga vamosi, nkunga, mafoto, salu, nsung’a lekwa, zú dia ndinga  yovo nsungi. Avo yakala yovo nkento ansona ovangidi diambu yandi mosi kaka muna nkumbu antete, nze kwenda kuna lukutakanu lwampwena yovo Luyindulu, dilenda kuntwasila ntantu zayingi. Mpangi mosi wavova vo: “O nkumbu antete yaviokesa e lumbu kia lukazalu lweto mono mosi kaka, diampasi kikilu diakala. Kansi, ampangi bavanga nkubika kimana yaviokesa e ntangwa yayi ye akundi kimana yalembi mona kinsona kiasaka.”

¹⁹ Sungamena vo awana bafwilwa ke bevavanga kaka lufiaulwisu ko vava kifwananga e lumbu ina ikubasungamesanga diambu. Junia wavova vo: “Nkumbu miayingi, diambote kikilu dikalanga vava akaka bekwizanga kunsadisa yo kala yame vamosi muna lumbu yankaka. O lusadisu lwalu lwa kinsalukisa fiaulwisa kikilu lufiaulwisanga.” Dialudi vo, ke tulendi fokola mvimba ko e ntantu ye kinsona bemonanga, kansi tulenda fiaulwisa awana bakendalala vava tukubasadisanga. (1 Yoane 3:18) Gaby wavova vo: “Ivutulanga kikilu matondo kwa Yave mu kuma kia akuluntu ana bansadisa kuna zola kwawonso mu zizidila e mpasi yawanana zau. Bansadisa kikilu mu mona vo Yave zola kikilu kekunzolanga.”

20. Ekuma nsilu mia Yave mikutufiaulwisilanga?

²⁰ Dia lufiaulwisu mu zaya vo Yave wa Nzambi a fiauzi wawonso osinga fokola e ntantu zawonso vava wantu ana bafwa befuluka. (Yoane 5:28, 29) Nzambi wasia nsilu vo ‘ofokola lufwa yakwele mvu; o Mfumu Yave okunguna mansanga muna ndose zawonso.’ (Yesaya 25:8) I bosi, vana fulu kia ‘didisa awana bedilanga,’ wantu awonso ova ntoto, beyangalala vamosi y’awana bena mu kiese.—Roma 12:15.