1, 2. Ekuma mase mankaka betokanenanga vava wan’au besonganga luzolo lwa kukiyekola kwa Yave yo vubwa?

ALONGOKI ayingi a Nkand’a Nzambi bekukiyekolanga kwa Yave yo vubwa. Ayingi muna yau, aleke ana basansukila muna ludi yo sola e mpil’a zingu kisundidi o wete. (Nkunga 1:1-3) Avo u se, nanga ovingilanga e lumbu kina mwan’aku kevubwa.​—Tezanesa ye 3 Yoane 4.

² Kana una vo i wau, nanga otokananga mpe. Vena ye aleke ayingi bavubwa, kansi kuna kwalanda bayantika katikisa kana vo diambote mu zingila e ngwizani ye nkanikinu mia Nzambi. Akaka nkutu beyambulanga e ludi. Muna kuma kiaki, olenda tokana kana vo mwan’aku oyantika sadila Yave, kansi kuna kulanda o zola kwandi muna ludi kulenda kuluka. Dilenda kala vo o mwan’aku ovanga diambu nze dina Akristu a tandu kiantete kuna Efeso bavanga. Yesu wabavovesa vo: ‘Nuayambwidi o zola nuakala kwau kuna lubantiku.’ (Lusengomono 2:4)  Aweyi olenda sadisila wan’aku mu kwamanana wokesa o zola kwau yo “nungunuka yamuna luvuluzu”? (1 Petelo 2:2) Tulenda longoka diambu muna mbandu ya Timoteo.

3. (a) Aweyi Timoteo kakitukila Nkristu? Adieyi kavanga mu kuma kia mana kalongoka? (b) Nkia mambu tatu Paulu kayika masadisa Timoteo?

³ Paulu wa ntumwa wakingula e mbanz’a Luseta mu nkumbu antete muna mvu wa 47. Nanga mu ntangwa yayina Timoteo toko kakala,ona walongoka mayingi mu kuma kia Yesu. Wasadilanga mana kalongokanga. Vioka mvu miole wayantika sala ntwadi yo Paulu. Vava vavioka mvu 16, Paulu wasonekena Timoteo vo: “Kala kaka muna mambu walongwa yo kwikidiswa, wau ozeye awana balonga mo, tuka muna kinsedia ozeye sono yavelela, ina ilenda kuvana ngangu yamuna luvuluku muna lukwikilu muna Kristu Yesu.” (2 Timoteo 3:14, 15) Omwene dina Paulu kavova mu kuma kia Timoteo: (1) wazaya e sono yavelela, (2) wakwikidiswa mu mana kalongwa yo (3) vua e ngangu yamuna luvuluku wau vo wakwikila muna Kristu Yesu.

4. Nki osadilanga muna longa o wan’aku akete? (Tala e fwaniswa kuna lubantiku lwa longi.)

⁴ Wau vo u se, ozolele vo wan’aku bazaya e sono yavelela, i sia vo, Sono ya Kiyibere ye Sono ya Kingerekia ya Kikristu. Kana nkutu wan’akete, balenda longoka oma ma wantu ye tusansu tuna muna Nkand’a Nzambi. E nkubik’a Yave ivaikisanga nkanda miayingi, yinkanda-nkanda ye vídeo zina mase balenda sadila muna longa wan’au. Nkia sadilwa ina muna nding’eno? Muna kala ye ngwizani ambote yo Yave, o wan’aku bafwete zaya mana masonama muna Nkand’a Nzambi.

5. (a) Ayeyi i nsas’a mvovo “kwikidiswa”? (b) Aweyi tuzayidi wo vo Timoteo wakwikidiswa muna nsangu zambote mu kuma kia Yesu?

⁵ O longa o wana oma ma wantu ye mambu masonama muna Nkand’a Nzambi ke diau kaka ko divavuanga. Sungamena vo Timoteo ‘wakwikidiswa.’ O mvovo wa Kingerekia kasadila o Paulu vo “kwikidiswa” una ye nsasa vo “kala ye ziku vo e diambu kingandi dialudi.” Timoteo wazaya e sono ya Kiyibere “tuka muna kinsedia”, i sia vo, vava kakala kingiana-ngiana. Kuna kwalanda, kakala diaka yo lukatikisu ko vo Yesu i Masia. Wau vo lukwikilu lwandi lwakumama kikilu, Timoteo wabaka e nzengo za vubwa yo sala kumosi yo Paulu muna salu kia kimisionario.

6. Aweyi olenda sadisila wan’aku mu kumika lukwikilu lwau muna Diambu dia Nzambi?

⁶ Aweyi olenda sadisila wan’aku mu kala ye lukwikilu lwasikila nze lwa Timoteo yo kala ye ‘ziku kia mana bekwikilanga’? Diantete, kala ye luzindalalu. Ntangwa divavanga mu kala yo lukwikilu lwasikila. E diambu dia sia vo ongeye okwikilanga mu diambu kingandi ke disongele ko vo wan’aku mpe bekwikila dio vana vau. Konso mwana kafwete sadila umbakuzi wandi  muna kumika lukwikilu lwandi muna Nkand’a Nzambi. (Tanga Roma 12:1.) Mase bafwete vanganga e ngolo za sadisa wan’au mu kumika lukwikilu lwau, musungula vava wana bekubayuvulanga e yuvu. Yambula twabadika dina tulenda longoka muna mbandu a se dimosi.

7, 8. (a) Aweyi se dimosi kesongelanga luzindalalu vava kelonganga mwan’andi? (b) Nkia ntangwa diavava vo wasonga luzindalalu kwa mwan’aku?

⁷ Thomas, una yo mwan’ankento wa mvu 11, wavova vo ezak’e ntangwa o mwan’andi okunyuvulanga e yuvu nze: “Nga Yave lunungunuku kasadila mu vanga e lekwa yamoyo ova ntoto?” “Ekuma tulembi kuyisilanga muna mambu ma luyalu, nze sola ayadi, muna teza singika mambu?” Ezak’e ntangwa, o se kafwete venga e fu kia zayisa kwa mwana dina kafwete kwikila. Thomas ozeye wo vo dina dikwikidisanga o muntu e ludi, ke kunzayisa ulolo wa mambu ko, kansi kunsonga e ziku kia diambu.

⁸ Thomas ozeye wo mpe vo kafwete kala ye luzindalalu vava kelonganga mwan’andi. Divavanga vo Akristu awonso bakala ye luzindalalu. (Kolosai 3:12) Thomas wabakula vo ntangwa ye mbokena zayingi divavanga mu sadisa mwan’andi mu kumika lukwikilu lwandi. Kafwete kunsonganga o mfunu wa mambu kelongokanga muna Nkand’a Nzambi. Thomas wavova vo: “Musungula muna mambu mamfunu, mono yo nkaz’ame, tuvavanga zaya kana vo mwan’eto okwikilanga mana kelongokanga yo yangalela mo. Diambote kikilu dikalanga vava keyuvulanga yuvu. Muna vova e ludi, yadi tokana kikilu kele vo katambulwilanga mawonso lembi yuvula yuvu.”

9. Aweyi olenda sadisila wan’aku bakwikila muna Diambu dia Nzambi?

⁹ Vava mase belonganga wan’au kuna luzindalalu, kuna kulanda o wana beyantika bakula “o yalumuka, lambuka, lá yo sina” kwa lukwikilu. (Efeso 3:18) Tufwete longanga wana mun’owu wa ntela ye umbakuzi wau. Ekolo lukwikilu mu mana belongokanga luwokelanga, diasazu dikala kwa yau mu zayisa kw’akaka mana bekwikilanga, kumosi ye akwau a sikola. (1 Petelo 3:15) Kasikil’owu, nga wan’aku balenda sadila Nkand’a Nzambi mu sasila dina divangamanga kwa muntu avo ofwidi? Nga bekwikilanga kikilu dina Nkand’a Nzambi uvovanga? * (Tala e mvovo vana yanda lukaya.) Sungamena vo luzindalalu divavanga mu sadisa mwan’aku kakala yo lukwikila muna Diambu dia Nzambi. Kansi, o vanga wo mfunu kikilu dina.​—Nsiku 6:6, 7.

10. Ayeyi i mpila yambote ya longela wan’aku?

¹⁰ Kansi, e mpila yambote olenda longela wan’aku mu kala ye lukwikilu lwasikila i kubasonganga mbandu ambote. Stephanie, una ye wana tatu amakento wavova  vo: “Vava wan’ame bakala yingiana-ngiana, yakiyuvulanga vo: ‘Nga izayisanga wan’ame e kuma ikwikidilanga vo Yave una kieleka? Ekuma ikwikidilanga vo Yave nkwa zola ye unsongi muna mawonso? Nga wan’ame bemonanga vo Yave kikilu izolanga? Kilendi vingila ko vo wan’ame bakala ye ziku muna mambu mama avo mono kibeni kina ye ziku ko.”

11, 12. Nki i ngangu? Aweyi tuzayidi wo vo e ngangu ke zikwizilanga mu kimbuta ko?

¹¹ Tulongokele vo Timoteo (1)  wazaya e Sono yavelela ye (2) wakala ye ziku kia mana kakwikilanga. Kansi, adieyi Paulu kazola vova vava kavova vo e sono yavelela ivana Timoteo e “ngangu yamuna luvuluku”?

¹² O nkanda Estudo Perspicaz das Escrituras, Volume 3, usasilanga vo muna Nkand’a Nzambi o mvovo “ngangu” ulenda kala ye nsasa zayingi nze, “toma sadila zayi ye umbakuzi mu singika mambu, venga e vonza, lungisa makani yo sadisa akaka mu vanga wo. Nkwa ngangu waswaswana ye zowa.” Nkand’a Nzambi uvovanga vo “uzowa ukangamene muna ntim’a mwana.” (Ngana 22:15) Wau vo nkwa ngangu waswaswana yo zowa, e ngangu i sinsu kisonganga vo muntu wazikuka kikilu muna mwanda. Muna zikuka muna mwanda, o muntu kafwete vumina Yave yo kunlemvokela, ke kala kaka mbuta ko.—Tanga Nkunga 111:10.

13. Aweyi aleke balenda songela vo bena ye ngangu zikubavuluza?

¹³ Aleke ana bazikuka muna mwanda ke ‘benatumunwanga kwa mavuku ko yo tungianiswa’ kwa zolela ya yau kibeni yovo vukumunua kwa akwau aleke. (Efeso 4:14) Kansi, o “umbakuzi wau” ukubasadisanga mu “swaswanesa wete yo bi.” (Ayibere 5:14) Muna kuma kiaki, aleke awaya bebakanga nzengo zambote kana nkutu vo ke bena vamosi ko ye mase mau yovo ye mbuta zankaka. (Filipi 2:12) E ngangu za mpila yayi mfunu zina muna vuluka. (Tanga Ngana 24:14.) Aweyi olenda sadisila wan’aku mu kala ye ngangu? Ofwete kubasadisa bazaya mana okwikilanga. Muna mvovo ye mavangu maku, o wana bafwete mona vo ngolo ovanganga za lemvokela nkanikinu mia Nkand’a Nzambi.—Roma 2:21-23.

14, 15. (a) Nkia mambu kafwete toma fimpa o nleke ona ozolele vubwa? (b) Aweyi olenda sadisila wan’aku mu badika e nsambu bevua avo balemvokele nsiku mia Nzambi?

¹⁴ Kansi, muna sadisa wan’aku mu kala ye lukwikilu, ke divavanga kaka ko vo wabazayisa dina diambote ye dina diambi. Ofwete kubasadisa mpe mu badika e yuvu nze: ‘Ekuma Nkand’a Nzambi usiminanga maka mambu malenda moneka vo mambote? Aweyi ndenda kadila ye ziku vo e nkanikinu mia Nkand’a Nzambi nluta kaka mikuntwasila?’​—Yesaya 48:17, 18.

 ¹⁵ Avo mwan’aku ozolele vo kavubwa, unsadisa mpe katoma yindula e mbebe kekala yau vava kevubwa. Aweyi kebadikilanga e mbebe yayi? Nkia nluta dikuntwasila? Nkia nkakalakani dikuntwasila? Ekuma e nluta kevua misundidi e nkakalakani kenuana zau? (Maku 10:29, 30) Diamfunu mu toma fimpa e yuvu yayi vitila kavubwa. Sadisa mwan’aku kayindula e nsambu kevua avo olemvokele Nzambi ye mfwilu kevua avo unkolamene. Muna mpila yayi, obakula vo o lemvokela e nkanikinu mia Nkand’a Nzambi nluta kaka dikuntwasila.—Nsiku 30:19, 20.

16. Adieyi mase bafwete vanga avo lukwikilu lwa mwan’au wavubwa luyantikidi kuluka?

¹⁶ Adieyi olenda vanga avo mwan’aku wavubwa oyantikidi katikisa e ludi? Kasikil’owu, o mwan’aku olenda yantika vukumunua kwa lekwa ya nza yayi. Dilenda kala mpe vo mwan’aku oyantikidi katikisa kana vo o lemvokela nkanikinu mia Nkand’a Nzambi i diambu disundidi o mfunu muna zingu. (Nkunga 73:1-3, 12, 13) Dina o vanga dilenda kunsadisa mu baka e nzengo za kwamanana sadila Yave yovo ve. Vanga mawonso mu lembi tantana yo mwan’aku mu kuma  kia mambu mama, kiakala vo wakinu kindende yovo watulukidi. Unsadisa kazaya vo zola kikilu okunzolanga ye wete diandi otokanenanga.

17, 18. Avo mwana oyantikidi katikisa e ludi, aweyi mase balenda kunsadisila?

¹⁷ O nleke ona wavubwa, kwa Yave kakiyekola. Wasia nsilu wa kunzola yo kunsadila lutila mawonso kalenda vanga muna zingu kiandi. (Tanga Maku 12:30.) Kuna kwa Yave, o nsilu wa kukiyekola wampwena kikilu. I wau mpe tufwete wo badikilanga. (Kimpovi 5:4, 5) Sungamesanga kwa mwan’aku o nsilu kasia. Kansi, entete ofwete tanga yo longoka malongi mevaikiswanga muna nkubik’a Yave mu kuma kia mase. I bosi, kuna ngemba zawonso ye muna ntangwa ifwene, sadisa mwana kazaya vo e nzengo kabaka za kukiyekola kwa Yave yo vubwa nzengo zampwena kikilu, kansi nsambu zayingi zikuntwasila.

¹⁸ Kasikil’owu, olenda solola tuludiku twamfunu muna nkudika ina yo ntu a diambu “Os Pais Perguntam,” ina vana makaya mansuka ma nkanda, Os Jovens Perguntam—Respostas Práticas, Volume 1. Tuludiku twatu tusonganga vo mase ke bafwete kalanga ye nzaki za yindula ko vo wan’au babembwele e ludi. Kansi, bafwete vava zaya e diambu benuananga diau. Dilenda kala mu kuma kia umpukumuni wa akundi yovo mu kuma kia kinsona. Ezak’e ntangwa, o mwana olenda yindula vo e salu kina aleke ankaka besadilanga Yave kisundidi kina kesalanga. E nkudika yayi isonganga mpe vo mambu mama ke mesonganga ko vo mwan’aku ke kwikilanga ko mu mana okwikilanga. Nkumbu miayingi, ediadi divangamanga mu kuma kia nkakalakani zankaka kenuananga zau. E nkudika yayi isonganga una mase balenda sadisila mwana ona okatikisanga e ludi.

19. Aweyi mase balenda sadisila wan’au mu vua e ngangu zina zikubavuluza?

¹⁹ Amase, mbebe ye lau diampwena luna diau dia sansila o wana muna “longi ye luludiku lwa Yave.” (Efeso 6:4) Nze una tulongokele, ediadi disongele vo nufwete longanga wan’eno mana Nkand’a Nzambi uvovanga yo kubasadisa mu kala ye ziku kia mana belongokanga. Vava lukwikilu lwau lukumama, bebak’e nzengo za kukiyekola kwa Yave yo kunsadila ye nsi a ntima wawonso. Yambula Diambu dia Yave ye mwand’andi avelela kumosi ye ngolo nuvanganga zasadisa wan’eno kimana bavua e ‘ngangu zina zikubavuluza.’