Aleke—“Nusiamanana Sala Muna Diambu dia Luvuluzu Lweno”
“Nukwamanana songa o nlemvo, . . . nusiamanana sala muna diambu dia luvuluzu lweno.”—FILIPI 2:12.
1. Ekuma luvubu lwina o mfunu? (Tala fwaniswa va ntandu.)
KONSO mvu, mazunda ye mazunda ma alongoki a Nkand’a Nzambi bevubwanga. Ayingi muna yau aleke yovo yingiana-ngiana. Nanga aleke awaya mu ludi basansukila. Nga u mosi muna yau? Avo i wau, nzengo zambote wabaka. Akristu awonso bafwete vubwa. O luvubu mfunu lwina muna vuluzwa yo zinga yakwele mvu.—Matai 28:19, 20; 1 Petelo 3:21.
2. Ekuma kufwete kadila yo wonga ko wa kukiyekola kwa Yave?
2 Vava wavubwa, Yave wayantika kusambula mu mpila zayingi. Kansi o luvubu mbebe mpe lutwasanga. Mu nkia mpila? Muna lumbu kia luvubu, o mpangi ona wafila longi dia luvubu wayuvula vo: “Muna kuma kia lukwikilu lwaku muna kimenga kia Yesu Kristu, nga ovilukidi o ntima muna masumu maku yo kukiyekola kwa Yave mu vanga luzolo lwandi?” Wavutula vo, ingeta. Wasia nsilu wa zola Yave yo sia salu
kiandi vana fulu kiantete muna zingu kiaku. Nga ofwete kuyibanzanga mu kuma kia nzengo wabaka? Ve kikilu! Kusinga kuyibanza ko wau wayambula vo Yave kafila e zingu kiaku. Awana ke bazeye Yave ko, ku sambu dia nza ya Satana bena. Nkadi ampemba ke tokanenanga wete diau ko ngatu wete diaku. Kieleka, Satana otoma yangalala avo ovidisi e vuvu kiaku kia zinga yakwele mvu wau vo uyisidi kuna sambu diandi yo bembola Yave.3. Aweyi Yave kekusambulwilanga wau wakiyekola kwa yandi?
3 Yindula una Yave kekusambulwilanga wau wakiyekola kwa yandi yo vubwa. Wayekeka e zingu kiaku vana moko mandi. Muna kuma kiaki, olenda vova ye ziku kiawonso vo: ‘O Yave wina yame, kimona wonga ko: O muntu adieyi kekumpanga?’ (Nkunga 118:6) Ke vena lau disundidi ko olenda vua avo ke kala kuna sambu dia Nzambi ko yo zaya vo otoma kuzolanga.
MBEBE YA NGEYE KIBENI
4, 5. (a) Ekuma tulenda vovela vo o kukiyekola kwa Yave i mbebe ya muntu yandi kibeni? (b) Nkia ntonta benuananga zau Akristu a ntela zawonso?
4 E ngwizani aku yo Yave ke ina nze telefone ko ina wasumbilwa kwa mase maku. Kana una vo wakinu muna nzo a mase maku, o kala ye ngwizani ambote yo Yave i mbebe ya ngeye kibeni. Ekuma ofwete sungamenanga e diambu diadi? Ke mosi ko mu yeto ozeye una lukwikilu lwandi lusinga tontelwa kuna sentu. Kasikil’owu, nanga wavubwa vitila wakituka toko yovo ndumba. Kansi wau vo watuluka, kuna diaka ye ngindu za kinsedia ko, e ntonta onuananga zau mpe zaswaswana. Dumbelele kimosi wavova vo: “O mwan’akete ke tina kala Mbangi a Yave ko mu kuma kia sia vo kaveno bolo ko kuna sikola muna lumbu kia luwutuku lwandi. Kansi, muna mvu milanda vava e nsatu za vukana ziwokelanga, o toko yovo ndumba kafwete kuyikwikidisa vo o lemvokela e nsiku mia Yave nluta kaka ditwasanga.”
5 Ke aleke kaka ko benuananga ye ntonta. Kana nkutu ana bevubwanga muna kimbuta, balenda wanana ye ntonta za lukwikilu zina ke bavingilanga ko. E ntonta zilenda kwizila muna longo, mavimpi yovo salu. Kiakala vo tu ambuta yovo aleke, divavanga vo yeto awonso twasikila ye kwikizi muna Yave vava tuwanananga ye ntonta za mpila mu mpila.—Yakobo 1:12-14.
6. (a) Aweyi olenda songela vo e nzengo wabaka vava wakiyekola kwa Yave za ngeye kibeni? (b) Adieyi olenda longoka muna sono kia Filipi 4:11-13?
6 Muna sikila ye kwikizi, ofwete sungamenanga vo o nsilu wasia kwa Yave vava wakiyekola, nzengo za ngeye kibeni. Wasia nsilu kwa Mpungu-Ngolo vo okunsadila muna zingu kiaku kiawonso kiakala nkia diambu dikubwila, kana nkutu vo akundi yovo mase maku bayambwidi kunsadila. (Nkunga 27:10) Muna mambu mawonso, lombanga vo Yave kasadisa mu kwamanana lungisa o nsilu wasia kwa yandi.—Tanga Filipi 4:11-13.
7. O siamanana sala muna diambu dia luvuluzu lwaku “kuna vumi ye zakamu” aweyi disongele?
7 Yave ozolele vo wakala nkundi andi. Kansi, ngolo divavanga mu kumika kikundi kiaki yo siamanana sala muna diambu dia luvuluzu lwaku. E sono kia Filipi 2:12 kivovanga vo: “Nusiamanana sala kuna vumi ye zakamu muna diambu dia luvuluzu lweno.” Ediadi disongele vo tufwete toma yindulanga una tulenda siamisina e ngwizani eto yo Yave yo sikilanga ye kwikizi muna yandi kana nkutu nkia diambu dilenda kutubwila. Ke tufwete vova kwankatu ko vo i diau tuzolele vanga. Sungamena vo ayingi basadila Yave mu mvu miayingi, kuna kwalanda bavidisa e kwikizi kiau. Nkia mambu malenda kusadisa mu kwamanana sala muna diambu dia luvuluzu lwaku?
O LONGOKA O NKAND’A NZAMBI MFUNU DINA
8. Nkia mambu mevavuanga muna longoka o Nkand’a Nzambi? Ekuma dinina o mfunu?
8 Muna kala nkundi a Yave, tufwete wanga e nding’andi yo mokena yandi. I mosi muna mpila tulenda wila e nding’a Yave i longokanga Nkand’a Nzambi. Ediadi divavanga vo twatanganga yo badika e Diambu dia Nzambi ye nkanda mieto. O longoka o Nkand’a Nzambi, ke mpasi sungamena kaka ko mana otanganga, nze una ovanganga muna kizame. Dina nze ngeye una mu nkangalu wa kiese, ozolele zaya mambu mampa mu kuma kia Yave. Avo ofinamene Nzambi, oyandi mpe okufinama.—Yakobo 4:8.
Aweyi omokenenanga yo Yave? (Tala tini kia 8-11)
9. Nkia salanganu olenda sadila muna longi dia ngeye kibeni?
9 E nkubik’a Yave ivaikisanga salanganu yayingi ilenda kusadisa muna longoka o Nkand’a Nzambi. Kasikil’owu, muna kunku kina yo ntu a diambu “Adolescentes” muna jw.org, vena ye malongi meyikilwanga vo “Exercícios Bíblicos” malenda kusadisa mu sadila mana olongokanga muna tusansu twa Nkand’a Nzambi. Muna nzil’eto ya jw.org, muna mpe ye kunku kiyikilwanga vo guias de estudo kina ye babu ya longokela nkanda “O Nkand’a Nzambi Adieyi Kieleka Kelonganga?” E babu yayi ilenda kusadisa mu kumika lukwikilu lwaku yo sasila oma ma lukwikilu lwaku kwa akaka. Olenda solola luludiku lwankaka mu kuma kia longi dia ngeye kibeni muna longi dina yo ntu a diambu “Os Jovens Perguntam . . . Como tornar a leitura da Bíblia agradável?” muna Despertai! ya Abidi 2009. O longoka yo badika mfunu kikilu kwina muna vuluka.—Tanga Nkunga 119:105.
E SAMBU MFUNU KINA
10. Ekuma Akristu bafwete sambilanga?
Avo diambu dikutokanesanga, “yekeka e zitu diaku kwa Yave”
10 Vava tulongokanga Nkand’a Nzambi dina nze yeto tuwanga nding’a Yave. Vava tusambanga, dina nze yeto tumokenanga yo Yave. Ke tufwete badikilanga sambu ko nze mpasi fu tufwete kala kiau yovo nze ‘nlongo’ milenda kutusasula. O samba disongele vo mokena yo Mvangi eto. Yindula e diambu edi: Yave ozolele vo wanzayisa mana mena muna ntim’aku. (Tanga Filipi 4:6.) Muna kuma kiaki, avo diambu dikutokanesanga, Nkand’a Nzambi uvovanga vo: “Yekeka e zitu diaku kwa Yave.” (Nkunga 55:22) Mpangi zayingi z’akala ye z’akento balenda kuzayisa una luludiku lwalu lukubasadisilanga. Lulenda kusadisa mpe.
11. Ekuma ofwete vutulwilanga matondo kwa Yave?
11 Kansi, ke tufwete sambanga kaka ko vava tuvuanga lusadisu lwa Yave o mfunu. Nkand’a Nzambi ukutuvovesanga vo: “Nuvutulanga o matondo.” (Kolosai 3:15) Ezak’e ntangwa tutokananga kwayingi mu kuma kia mpasi zeto yo vilakana mambu mambote mekutubwilanga. Teza vanga diambu edi: Konso lumbu, yindulanga kana mambu matatu mambote mavangamene muna zingu kiaku, i bosi vutula matondo kwa Yave. Dumbelele kimosi kina ye nkumbu a Abigail ona wavubwa vava kakala ye kimbuta kia mvu 12 wavova vo: “Kuna kwa mono Yave ofwene tambula nkembo lutila konso muntu mu nsema wawonso. Tufwete kumvutulanga matondo muna tukau twawonso kekutuvananga.” Ezak’e ntangwa, Abigail okukiyuvulanga vo: “Avo mbazi nsikamene ye lekwa kaka ina mvutulwidi matondo kwa Yave o unu, nkia lekwa isala yau?” * (Tala e mvovo vana yand’a lukaya.)
O MONA UNA YAVE KEKUTUSADISILANGA MFUNU KIKILU KWINA
12, 13. Aweyi omwenanga vo Yave wambote? O yindula una Yave kekusadisilanga ekuma dinina o mfunu?
12 Yave wasadisa Davidi wa Ntinu mu zizidila mpasi za mpila mu mpila. Muna kuma kia mana kawanana mau muna zingu, Davidi wavova vo: “Numika, nwamona wo vo Yave wambote; kiese kwa muntu otinina kwa yandi.” (Nkunga 34:8) E sono kiaki kikutusonganga vo yeto kibeni tufwete mikanga o wete wa Yave. Vava otanganga Nkand’a Nzambi ye nkanda mieto yovo vava okwendanga muna tukutakanu, olongokanga una Nzambi kesadisilanga akaka mu sikila ye kwikizi. Kansi, muna kumika e ngwizani aku yo Yave, ofwete mona ngeye kibeni una Yave kekusadisilanga. Aweyi omwenanga muna zingu kiaku vo Yave wambote?
Yangalelanga e fulu kavana o Yave muna nkubik’andi
13 Konso Nkristu wamona kala muna zingu kiandi o wete wa Yave. Okutuvovesanga vo twamfinama kumosi yo mwan’andi. Yesu wavova vo: “Ke vena muntu ko olenda kwiza kwa mono, avo o Se, ona wantuma, kalembi kuntunta.” (Yoane 6:44) Nga okwikilanga vo Yave watunta kimana wamfinama? Nga oyindulanga vo: ‘Yave mase mame kaka katunta, omono landa kaka ikubalandanga?’ Sungamena vo vava wakiyekola kwa Yave yo vubwa, kikundi kiaku yo yandi kiayantika wokela. Nkand’a Nzambi ukutuvovesanga vo: “Avo muntu ozolele Nzambi, i yandi ozayakene kwa Nzambi.” (1 Korinto 8:3) Yangalelanga e fulu kavana o Yave muna nkubik’andi.
14, 15. Aweyi e salu kia umbangi kilenda kusadisila mu kala ye lukwikilu lwasikila?
14 Olenda mona mpe o wete wa Yave vava kekuvananga unkabu wa vovela oma ma lukwikilu lwaku kw’akaka, kiakala mu salu kia umbangi yovo kuna sikola. Dilenda kala diampasi mu sila umbangi kwa akw’aku a sikola. Olenda mona wonga wa dina bevova. Olenda mpe mona wonga wa sasila mana okwikilanga vana vena wantu ayingi. Adieyi dilenda kusadisa?
15 Yindula mana okwikilanga ye kuma okwikidilanga mo. Avo e kunku guias de estudo kina muna jw.org kina muna nding’eno, sadilanga kio. E kunku kiaki kilenda kusadisa mu yindula mana okwikilanga, ekuma okwikidilanga mo ye aweyi olenda mo sasila kw’akaka. Avo ngeye kibeni okwikilanga muna mambu mama yo toma kubama, okala yo luzolo lwa vovela oma ma Yave.—Yeremiya 20:8, 9.
16. Nki kilenda kuvana unkabu wa vovela oma ma lukwikilu lwaku?
16 Kana nkutu vo otomene kubama, olenda kala ye wonga wa sasila mana okwikilanga. Mpangi mosi ankento una ye kimbuta kia mvu 18, ona wavubwa vava kakala ye kimbuta kia mvu 13, wavova vo: “Nzeye mana ikwikilanga, kansi ezak’e ntangwa diampasi dikalanga mu vovela o mambu mama.” Muna kuma kiaki, osianga e ngolo za longa e ludi lembi zakama. Wavova mpe vo: “Akwame a sikola bevovelanga mana bevanganga kondwa kwa wonga. Omono mpe mfwete vovelanga e ludi kondwa kwa wonga. Muna kuma kiaki, iyantikilanga e moko muna yika diambu diavangama kala, nze: ‘Lumbu kimosi, vava yalongokanga Nkand’a Nzambi yo muntu . . . ’ I bosi ikwamanananga ye moko kiame. Kana una vo kuna lubantiku ke tuvovelanga mambu ma Nkand’a Nzambi ko, nkumbu miayingi wantu bevavanga zaya una ilongelanga o Nkand’a Nzambi. Ezak’e ntangwa, beyuvulanga e yuvu mu kuma kia diambu diadi. Vava isadilanga e ndekwa zazi, diasazu dikalanga mu mokena ye akaka. Ediadi dikudikilanga e kiese kiame.”
17. Adieyi diaka dilenda kusadisa mu mokena ye wantu ankaka?
17 Vava akaka bemonanga vo wete diau otokanenanga ye okubazitisanga, diasazu dikalanga mu kuzitisa kumosi ye mana okwikilanga. Olivia una ye kimbuta kia mvu 17 ona wavubwa vava kakala dumbelele wavova vo: “Wonga yamonanga wa sadila o Nkand’a Nzambi muna mokena yo wantu kadi balenda kumbwena nze zowa.” Kansi, owau obadikilanga o mambu mu mpila yaswaswana. Vana fulu kia tokana mu kuma kia una akaka bekumbadikila, wavova vo: “Aleke ayingi ke bazeye diambu ko mu kuma kia Mbangi za Yave. Yeto kaka bazeye. E mpila tuvovelanga ilenda kubafila mu tambulwila yovo ve. Adieyi tuvova avo nsoni tumonanga za vovela oma ma lukwikilu lweto? Aweyi bekutubadikila avo zakama tuzakamanga vava tuvovanga? Balenda yindula vo ke tuyangalelanga kala Mbangi za Yave ko. Balenda nkutu kutuseva wau vo nsoni za vova tumonanga. Kansi, vava tuvovanga ye ziku kiawonso mu kuma kia mana tukwikilanga yo kitula kio se fu kieto, ediadi dilenda kubafila mu kutuzitisa.”
KWAMANANA SALA MUNA DIAMBU DIA LUVULUZU LWAKU
18. Adieyi ofwete vanga mu kwamanana sala muna diambu dia luvuluzu lwaku?
18 Nze una tulongokele, o kwamanana sala muna diambu dia luvuluzu lwaku ke diambu diakete ko. Muna wo vanga, divavanga vo watanganga yo badika e Diambu dia Nzambi, samba kwa Yave yo yindula una Yave kekusadisilanga. O vanga wo dikusadisa mu kala ye ziku vo Yave Nkundi aku kikilu. Ediadi dikufila mu zayisa kw’akaka mana okwikilanga.—Tanga Nkunga 73:28.
19. Ekuma ofwete siamanena sala mu diambu dia luvuluzu lwaku?
19 Yesu wavova vo: “Konso ona ozolele kwiz’andandi, yambula kayivanina o nkalu yo nata nti andi ampasi yo kwamanana kundanda.” (Matai 16:24) Elo, muna landa Yesu, konso Nkristu kafwete kukiyekola kwa Yave yo vubwa. Kansi, lwalu lubantiku kaka lwa zingu kiakiese olenda kala kiau owau. Kuna sentu, o landa Kristu dikutwasila moyo a mvu ya mvu muna nz’ampa ya Nzambi. Muna kuma kiaki, vanga mawonso olenda mu kwamanana sala muna diambu dia luvuluzu lwaku.
^ tini. 11 Muna zaya diaka mayingi, tala e longi dina yo ntu a diambu “Os Jovens Perguntam— Vale a Pena Orar?” ye babu muna jw.org.