WANTU awonso bezolanga kala ye kiese. Kansi, wau vo mu lumbu yambaninu tuzingilanga, konso muntu una ye ‘diambu diampasi’ kenuananga diau. (2 Timoteo 3:1) Akaka bevidisanga kiese kiau mu kuma kia diambu diambi bavangwa, mu kuma kia mayela, katulwa mu salu yovo fwilwa muntu ona bazolanga. Akaka bevidisanga kiese kiau mu kuma kia diambu diankaka diababwila dikubatokanesanga yovo kubakendeleka. Kana nkutu selo ya Yave balenda mpe kendalala yo vidisa kiese kiau. Avo ediadi dibwididi, aweyi olenda vutulwisila kiese kiaku?

Muna vana e mvutu za kiuvu kiaki, entete tufwete bakula kana nki i kiese ye una akaka betatidilanga kiese kiau kana nkutu muna ntangw’a mpasi. I bosi, tubadika una tulenda tatidila yovo wokesela e kiese kieto.

O kala ye kiese ke diau dimosi ko yo seva. Yindula nona eki: O muntu okolelo malavu olenda seva kwayingi. Kansi vava e nkolwa ifokoka, o tusevo mpe tufokokele kadi obakula vo wakinu muna mpasi. O tusevo twandi twa kolo kiandwelo kwandi, ke kiese kiakieleka ko.—Ngana 14:13.

Kuna diak’e sambu, e kiese i una tumonanga muna ntima vava tubwilwanga diambu diambote. Tulenda kala ye kiese kiakala vo diambu diambote ditubwididi yovo diambi. (1 Tesalonika 1:6) Kieleka, tulenda kwamanana kala ye kiese kana nkutu vo tubwidilu diambu ditukendelekele. Muna bong’e nona, antumwa bawandwa wau basila umbangi mu kuma kia Yesu. Kansi, “bavaika muna Mbazi a Nkanu, bayangalele wau babadikilu vo bafwanwa vezwa mu kuma kia nkumbu a Yesu.” (Mavangu 5:41) Ke bayangalala mu kuma kia wandwa ko, kansi mu kuma kia sia vo basikila ye kwikizi muna Nzambi.

Ke tuwutukanga ye kiese ko ngatu yima e fu kiaki kuna kinsalukisa. Ekuma? E kuma kadi e kiese kiakieleka kimosi muna fu ya mbongo a mwand’avelela a Nzambi. O mwand’a Nzambi ukutusadisanga mu yima fu ya “kiwuntu kiampa.” Kimosi muna fu yayi i kiese. (Efeso 4:24; Ngalatia 5:22) Avo mu kiese twina, diasazu dikala mu zizidila e mpasi tuwanananga zau.

Yave mambu mambote kaka kakana ova ntoto, ke mambu mambi ko tumonanga o unu. Kansi, kana una vo wantu bevanganga oma mambi, Yave kevidisanga kiese kiandi ko. Nkand’a Nzambi uvovanga vo: “O nkuma ye kiese wina vana kalu kiandi.” (1 Tusansu 16:27) Vana ntandu, Yave kiese kemonanga vava selo yandi bevanganga oma mambote.—Ngana 27:11.

Tutangininanga Yave yovo kala nze yandi vava tusianga e ngolo za lembi vidisa kiese kieto kana nkutu vo mambu ke mavangamene nze una twavingilanga ko. Vana fulu kia tokana kwayingi, tulenda sia e sungididi muna mambu mambote mekutubwilanga o unu yo vingila kuna luzindalalu e  zingu kiakiese tuvua kuna sentu. *—Tala e mvovo vana yand’a lukaya.

Muna Nkand’a Nzambi, muna ye nona yayingi ya wantu batatidila e kiese kiau kana una vo bawanana ye mambu mayingi mampasi. Abarayama kavidisa kiese kiandi ko kana nkutu vava nkaz’andi kakala mu vonza yovo vava kamweswanga e mpasi kwa wantu ankaka. (Etuku 12:10-20; 14:8-16; 16:4, 5; 20:1-18; 21:8, 9) Adieyi diansadisa? Abarayama wayindulanga e vuvu kiandi kia zingila muna nz’ampa isinga yalwa kwa Masia. (Etuku 22:15-18; Ayibere 11:10) Yesu wavova vo: “O s’eno Abarayama wayangalala wau kamona lumbu kiame.” (Yoane 8:56) Tulenda tanginina Abarayama muna yindulanga e kiese tukala kiau kuna sentu.—Roma 8:21.

Paulu yo Sila mpe lukwikilu lwasikila bakala lwau, ke bavidisa kiese kiau ko kana una vo banuananga ye mambu mayingi mampasi. Kasikil’owu, vava bawandwa yo siwa muna pelezo, ‘basamba yo sanisina Nzambi muna nkunga.’ (Mavangu 16:23-25) Bazizidila e mpasi bawanana zau kadi bayindulanga e nsilu mia Nzambi. Edi diabavananga e kiese i zaya vo e mpasi bamweswanga i mu kuma kia sia vo alandi a Kristu. Tulenda tanginina Paulu yo Sila muna yindulanga e nluta tuvua avo tusadidi Nzambi ye kwikizi kiawonso.—Filipi 1:12-14.

O unu, vena mpe ye mpangi zayingi z’akala ye z’akento betatidilanga e kiese kiau kana una vo benuanga ye mpasi. Kasikil’owu, muna ngonde ya Novemba 2013, tembwa kiangolo kiayikilwa vo Haiyan, kiafwasa vioka 1000 dia nzo za mpangi zeto kuna Filipinas. Mpangi George, una vo e nzo andi yabanguka emvimba wavova vo: “Kana una vo twabwilwa e mpasi zazi, ampangi ke bavidisa kiese kiau ko. Diampasi mu yika e kiese tuna kiau muna ntima.” Avo tuyindwidi mana Yave kevanganga muna wete dieto yo kumvutula matondo, ke tuvidisa kiese kieto ko kana nkutu muna ntangw’a mpasi. Nkia mambu mankaka kevanganga o Yave oma mekututwasilanga kiese?

E kuma kisundidi tumwenanga e kiese i kala ye ngwizani ambote yo Yave. Tuzeye o Ntinu a nsema wawonso. Yandi i Se dieto, Nzambi eto ye Nkundi eto.—Nkunga 71:17, 18.

Tuna mpe ye kiese wau vo Yave watuvana moyo ye ngangu za yangalela e zingu. (Kimpovi 3:12, 13) Wau vo watutunta kwa yandi, tuzeye luzolo lwandi muna yeto ye una tufwete sadila zingu kieto. (Kolosai 1:9, 10) Kansi, wantu ayingi ke bebakulanga ko e kuma twavangilwa. Muna songa e nswaswani yayi, Paulu wasoneka vo: “‘E disu ke dimoni, o kutu ke kuwe, ngatu kota muna ntim’a muntu o mambu mana Nzambi kakubikila awana bekunzolanga.’ Kadi o Nzambi kwa yeto kasengomona mo muna mwand’andi.” (1 Korinto 2:9, 10) O zaya luzolo ye kani dia Yave kiese kiayingi dikututwasilanga.

Yave mayingi kevanganga muna wete dieto. Wavanga e nkubika kimana masumu meto malolokwa. (1 Yoane 2:12) Watuvana e vuvu kia zinga yakwele mvu muna nz’ampa eyi ikwiza ke kolo ko. (Roma 12:12) Kana nkutu owau, Yave okutuvananga ulolo wa akundi ana tukunsambila entwadi. (Nkunga 133:1) Okututaninanga mpe vana moko ma Satana ye nkuya. (Nkunga 91:11) Avo tukwamanene yindula yawonso kekutuvananga o Yave, e kiese kieto wokela kiwokela.—Filipi 4:4.

Nga o Nkristu una kala mu kiese olenda wokesa diaka e kiese kiandi? Yesu wavova vo: “Inuvovese mambu mama, kimana e kiese kiame kiakala omo yeno, e kiese kieno kialunga.” (Yoane 15:11) Ediadi disonganga vo e kiese kieto kilenda wokela. Tulenda tezanesa kiese yo tiya. Avo tuzolele vo tiya twawokela, tufwete kudikila e nkuni. Sungamena diambu edi: O mwand’avelela ukutusadisanga mu kala ye kiese. Avo tuzolele vo kiese kieto  kiawokela, tufwete kwamanana samba kwa Nzambi kimana katuvana mwand’andi. Tufwete mpe kwamanana badika mana tutanganga muna Nkand’a Nzambi owu wavumunuinua muna lusadisu lwa mwand’avelela.—Nkunga 1:1, 2; Luka 11:13.

E diambu diankaka dilenda kutuvana e kiese i vanga mana meyangidikanga Yave. (Nkunga 35:27; 112:1) Ekuma? Nkand’a Nzambi uvovanga vo e kani twavangilwa i ‘vumina Nzambi aludi yo lunda e nkanikinu miandi, kadi diadi i muntu mvimba.” (Kimpovi 12:13) O Nzambi watuvanga kimana twavanganga luzolo lwandi. Muna kuma kiaki, vava tusadilanga Yave, e kiese kieto kiwokelanga. *—Tala e mvovo va yand’a lukaya.

Avo e kiese kieto kiwokele, nluta miayingi tuvua. Kasikil’owu, Yave okutuyangalela ekolo tukunsadilanga ye kiese kiawonso kana nkutu muna ntangw’a mpasi. (Nsiku 16:15; 1 Tesalonika 5:16-18) Vana ntandu, avo tukedi ye kiese kiakieleka, ke tuyindula ko vo o kala ye mavua mayingi i diambu disundidi o mfunu muna zingu. Kansi, tukwamanana yikama e Kintinu kia Nzambi. (Matai 13:44) Vava tumonanga e nluta tuvuanga vava tukuyivananga muna salu kia Yave, e kiese kieto kiwokelanga, tukalanga ye luvuvamu muna ntima yo mwesa akaka e kiese.—Mavangu 20:35; Filipi 1:3-5.

Vana ntandu, Avo e kiese kieto kiwokele, tulenda mpe kala yo vimpi wambote muna nitu. Nkand’a Nzambi uvovanga vo: “O ntim’a kiese, nlongo miambote.” (Ngana 17:22) Nkwa ngangu mosi olongokanga oma ma vimpi wa nitu kuna Universidade ya Nebraska kuna Estados Unidos wavova diambu dina e ngwizani yo Nkand’a Nzambi. Wavova vo: “Avo una ye kiese yo yangalela zingu kiaku owau, o vimpi waku ulenda kala wambote muna lumbu ilanda.”

Muna kuma kiaki, kana una vo e lumbu tuzingilanga yazala ye mpasi, tulenda kala ye kiese kiakieleka avo tuna yo mwand’avelela owu tulenda tambula vava tusambanga kwa Nzambi, longoka Diambu dia Nzambi yo badika mana tulongokanga. E kiese kieto mpe kiwokelanga vava tuyindulanga mawonso kevanganga o Yave muna wete dieto, vava tutangininanga lukwikilu lw’akaka yo vanga luzolo lwa Nzambi. Muna mpila yayi, tumona nze una wasonama muna Nkunga 64:10, uvovanga vo: “O nsongi omwena Yave e kiese, yo kuntinina.”