KUNA Gujarat, mbanza yakete kuna Índia, o se dia john wavubwa se Mbangi a Yave muna mvu wa 1950. Kansi, John ye mpangi zandi tanu z’akala ye z’akento yo ngudi au mu dibundu dia Katolika basambilanga. Muna kuma kiaki, bayantika sia kitantu kwa se diau.

Lumbu kimosi, se dia John wantuma kenda fila nkanda kwa mpangi a nkutakani. Kansi muna mene wauna, John walwala muna nlembo vava kaziulanga e fukwa kia lata. Kana una vo i wau, wazola lemvokelanga se diandi. Muna kuma kiaki, wakanga e tenda muna nlembo yo kwenda fila o nkanda.

Vava John kalwaka, kawana mpagi ko, kansi wavana o nkanda kwa nkaz’andi. Yandi mpe Mbangi a Yave. Vava katambula o nkanda, wamona vo nlembo a John walwala wakala ye wazola vo kansadisa. Wabonga e nkutu kalundilanga e nlongo, wansukula e mputa yo kunkanga o nlembo. I bosi, wavana John e kopo dia ti kia tiya. Muna kolo kiakina kiawonso, o mpangi ankento wamokenanga yandi oma ma Nkand’a Nzambi kuna ngemba zawonso.

Muna kuma kia zola kasongwa kwa mpangi ankento, John wayantika soba e mpila kabadikilanga Mbangi za Yave. Wayuvula yuvu yole mu kuma kia nswaswani vana vena malongi ma Mbangi za Yave ye ma dibundu dia Katolika. Wanyuvula kana vo Yesu i Nzambi. Wanyuvula mpe kana vo Akristu bafwete sambila Maria. Wau vo mpangi ankento walongoka e nding’a Gujarati, wavana e mvutu za yuvu ya John muna nding’andi ya kingutukila. Wasadila Nkand’a Nzambi vava kamvananga e mvutu yo kumvana finkanda “Nsangu Zazi Zambote za Kintinu.”

Kuna kwalanda, vava John katanga finkanda fiafi, wabakula vo mana katanganga maludi kikilu. Wayenda kwa tata mpelo yo kunyuvula e yuvu yole yayi. O tata mpelo wafunga makasi yo kuntuba e Bibila. Wamvovesa vo: “Okitukidi u Satana! Unsonga muna Nkand’a Nzambi vana vasonama vo Yesu ke yandi ko i Nzambi. Unsonga vana vasonama vo ke tufwete sambila Maria ko. Unsonga!” John wakendalala kikilu mu kuma kia vangu dia tata mpelo. Wamvovesa vo ke kwenda diaka mu dimbu dia Katolika ko. I diau mpe kavanga.

John wayantika longoka Nkand’a Nzambi ye Mbangi za Yave. Wantambulwila e ludi yo kituka selo kia Yave. Kuna kwalanda, ayingi muna yitu yandi bakituka mpe Mbangi za Yave. Se vioka 60 ma mvu, e fu kia mputa muna nlembo a John kikunsungamesanga e vangu dia zola kwa Kikristu diamfila mu sadila Yave muna zingu kiandi kiawonso.​—2 Korinto 6:4, 6.