1. Aweyi tufwete badikilanga e sambu?

 O MVANGI a zulu yo ntoto watuvana lau diampwena. Oyambulanga vo twamokena yandi muna sambu. Wau yindula e diambu edi: Tulenda ziula e ntim’eto kwa Yave konso ntangwa tuzolele ye muna konso ndinga, lembi teka kunlomba o nswa. Kana nkutu vo va mfulu a lupitalu twina yovo mu pelezo, tulenda kala ye ziku vo Se dieto dianzodi wá kekutuwa. Kieleka, tutoma yangalelanga e lau tuna diau dia samba.

2. Aweyi Davidi wa Ntinu kasongela vo wayangalelanga e lau kakala diau dia samba kwa Nzambi?

² Davidi wa Ntinu watoma yangalelanga e lau kakala diau dia samba kwa Nzambi. Wayimbidila Yave vo: “Yambula e sambu kiame kiakala vana ndose aku nze ndumbu yatoma kubikwa.” (Nku. 141:1, 2) Muna lumbu ya Davidi, e ndumbu yavauka ina anganga basadilanga muna nsambil’a ludi, yakubikwanga kuna umbangu wawonso. (Luv. 30:34, 35) Wauna awana bakubikanga e ndumbu bavangilanga wo kuna umbangu, Davidi mpe watoma kubikanga mana kavovanga muna sambu kwa Se diandi dia zulu. Yeto mpe tuzolele tanginina Davidi. Tuzolele vo e sambu yeto yayangidika Yave.

3. Nkia fu tufwete songanga vava tusambanga kwa Yave? Ekuma?

³ Vava tusambanga kwa Yave tufwete songanga luzitu. Yindula e mona-meso yasivi o Yave kasonga kwa Yesaya, Yezekele, Daniele yo Yoane. E mona-meso yayi yaswaswana, kansi vena ye diambu diafwanana mo. Yawonso iyikilanga Yave vo Ntinu osundidi tundalala. Yesaya wamona “Yave ovuende  vana kunda kia kimfumu kiazangama yo tundalala.” (Yes. 6:1-3) Yezekele wamona Yave ovuende vana kalu diandi dia zulu, ozungilu kwa “ntemo wakezimanga . . . nze ntemo a nkongolo.” (Yez. 1:26-28) Daniele wamona “Munkulu-nkulu a Lumbu” ovuete mvuatu miampembe ye kunda kiandi kia kimfumu kia nlaku a tiya. (Dan. 7:9, 10) Yoane wamona Yave ovuende vana kunda kiandi kia kimfumu kia zungwa e nkongolo ikezimanga nze tadi dia emeraude. (Lus. 4:2-4) E mona-meso yayi ikutusungamesanga vo Yave osundidi o nkuma yo tundalala. Ekwe lau diampwena tuna diau dia samba kwa yandi! Muna kuma kiaki, tuzolele samba kwa Yave kuna luzitu lwawonso. Kansi, nkia mambu tufwete yikanga muna sambu?

4. Adieyi tulongokele muna mvovo miantete mia sambu kina Yesu kalongoka muna Matai 6:9, 10?

⁴ Tanga Matai 6:9, 10. Muna Longi diandi vana Mongo, Yesu walonga alongoki andi una balenda sambila kwa Nzambi muna mpila ikunyangidika. Vava kavova vo “i wau wuwu nufwete sambila,” Yesu wayantikila mu yika mambu mamfunu tufwete lombanga muna sambu. Wasamba mu kuma kia luveleleso lwa nkumbu a Yave, ngiz’a Kintinu kiandi, kina kifwaswa mbeni zawonso za Nzambi ye mambu mawonso mambote kazolele vanga mu kuma kia wantu. Vava tuyikanga mambu mama muna sambu yeto, tusonganga vo luzolo lwa Nzambi mfunu kikilu lwina kwa yeto.

5. Nga diambi mu yika mambu ma yeto kibeni muna sambu?

⁵ Muna sambu kiandi, Yesu wasonga mpe vo ke diambi ko mu yikanga mambu ma yeto kibeni muna sambu. Tulenda samba kwa Yave vo katuvana madia ma lumbu ke lumbu, katuloloka masumu, katusadisa twalembi bwa muna tonta yo kutuvuluza muna ndiona wambi. (Mat. 6:11-13) Vava tulombanga mambu mama muna sambu, tusonganga kwa Yave vo lusadisu lwandi tuvuidi o mfunu ye tuzolele kala ye dienga diandi.

6. Nga tufwete sambanga kaka mu kuma kia mambu Yesu kalonga muna sambu kiandi? Sasila.

⁶ Yesu kazola ko vo alandi andi bavutukilanga e mvovo mia sambu kina kabalonga. Kadi  muna sambu yankaka kasamba, Yesu wayika mambu maswaswana makala vo mamfunu kwa yandi muna kolo kiakina. (Mat. 26:39, 42; Yoa. 17:1-26) Nze Yesu, tulenda samba mu kuma kia konso diambu tumwene vo diamfunu kwa yeto. Kasikil’owu, avo nzengo tuzolele baka, tulenda samba kwa Nzambi mu lomba e ngangu ye umbakuzi. (Nku. 119:33, 34) Avo kiyekwa kiampasi tutambwidi, tulenda samba mu lomba lusadisu kimana twazaya una tulenda kio lungisila. (Nga. 2:6) Mase balenda samba mu kuma kia wan’au, o wana mpe balenda samba mu kuma kia mase mau. Yeto awonso tufwete sambanga mu kuma kia alongoki eto a Bibila ye awana tusilanga umbangi. Kansi, ke tufwete sambanga kaka ko ye kani dia lomba e lekwa kwa Yave.

7. Ekuma tufwete kembelelanga Yave muna sambu yeto?

⁷ Ke tufwete vilakananga kembelela Yave ko muna sambu yeto. Ke vena muntu ko ofwanukini kikilu kembelelwa ke mu Nzambi eto ko. Kadi Nzambi “wambote, wakubama muna loloka.” Nkwa “nkenda ye ngemba.” ‘Ke funganga makasi mu nzaki ko, ozele yo walakazi ye ziku.’ (Nku. 86:5, 15) Kieleka, kuma yayingi tuna yau mu kembelela Yave mu kuma kia fu yandi ye mana kevanganga.

8. Mu nkia mambu tulenda vutulwilanga matondo kwa Yave? (Nkunga 104:12-15, 24)

⁸ Vana ntandu a kembelela Yave muna sambu yeto, tuzolele mpe kumvutula matondo mu kuma kia lekwa yawonso kekutuvananga. Kasikil’owu, tulenda kumvutula matondo kuma kia mvuma zambote-mbote tumonanga, madia mambote ma mpila mu mpila ye kiese kiakala ye akundi ambote. Yave wa Se dieto dianzodi okutuvananga lekwa yayi yawonso ye yankaka mpe kadi ozolele vo twakala ye kiese. (Tanga Nkunga 104:12-15, 24.) Edi disundidi o mfunu, tuvutulanga matondo kwa Yave mu kuma kia madia ma mwanda kekutuvananga ye vuvu kiasikila tuna kiau mu kuma kia kusentu.

9. Nki kilenda kutusadisa mu sungamenanga vutula matondo kwa Yave? (1 Tesalonika 5:17, 18)

⁹ Ezak’e ntangwa diasazu mu vilakana vutula matondo kwa Yave mu kuma kia mambu mawonso kevanganga muna wete dieto. Ozevo,  adieyi olenda vanga kimana walembi vilakananga vutula matondo kwa Yave? Olenda soneka e mambu masikididi olombele muna sambu ye ntangwa ke ntangwa olenda fimpa mambu mama kimana wazaya una Yave kavanini mo e mvutu. I bosi, samba kwa Yave muna kumvutula matondo muna mpila kasadisidi. (Tanga 1 Tesalonika 5:17, 18.) Yindula e diambu edi: Tutoma yangalalanga vava wantu bekutuvutulanga matondo. Diau dimosi mpe, vava tusungamenanga vutula matondo kwa Yave mu kuma kia mvutu za sambu yeto, yandi mpe otoma yangalalanga. (Kol. 3:15) Kansi, vena ye diambu diankaka diamfunu tufwete vutulwilanga matondo kwa Nzambi.

10. Landila e sono kia 1 Petelo 2:21, ekuma tufwete vutulwilanga matondo kwa Yave?

¹⁰ Tanga 1 Petelo 2:21. Tufwete vutulanga kikilu matondo kwa Yave wau kafila Mwan’andi ova ntoto muna kutulonga. Kieleka, vava tutanganga oma ma zingu kia Yesu, mayingi tulongokanga mu kuma kia Yave ye una tulenda kunyangidikila. Avo tukwikidi muna kimenga kia Kristu, tulenda kala ye ngwizani ambote yo Yave wa Nzambi yo kala mu luvuvamu yo yandi.—Roma 5:1.

11. Ekuma tufwete sambilanga muna nkumbu a Yesu?

¹¹ Tuvutulanga matondo kwa Yave wau vo tulenda samba muna nkumbu a Mwan’andi. Kadi Yesu i nzila ina Yave kesadilanga muna kutuvana ina tukunlombanga. Yave owanga ye ovananga e mvutu za sambu ivangilwanga muna nkumbu a Yesu. Ekiaki i kuma o Yesu kavovela vo: “Konso dina nulomba muna nkumbu ame, ivanga dio, kimana o Se kakembeselwa muna Mwana.”—Yoa. 14:13, 14.

12. Nkia kuma kiankaka tuvutulwilanga matondo kwa Yave mu kuma kia Mwan’andi?

¹² Yave ololokanga masumu meto mu kuma kia kimenga kia lukûlu kia Yesu. E Bibila kivovanga vo Yesu una se ‘ngang’ambuta kwa yeto, ona ovuende kuna koko kwalunene kwa kunda kia ndiona Wanene kuna zulu.’ (Ayib. 8:1) Yesu una se ‘nsadisi eto kuna kwa Se.’ (1 Yoa. 2:1) Kieleka, tutoma vutulanga matondo kwa Yave wau katuvana e Ngang’ambuta ona toma bakulanga lutovoko lweto ye yandi mpe “ododokelanga mu kuma kieto.” (Roma 8:34; Ayib. 4:15) Wau vo tu wantu alembi lunga, kondwa kwa kimenga kia Yesu, ke twadi lenda finama Yave ko muna sambu. Kieleka, ke tuna nkutu ye mvovo ko tulenda sadila mu vutula matondo muna lukau lwantalu luna Yave katuvana, i sia vo, Mwan’andi anzolwa.

13. Muna fuku wavitila lufwa lwandi, aweyi Yesu kasongela vo wazolanga alongoki andi?

¹³ Muna fuku wavitila lufwa lwandi, Yesu wasamba kwayingi mu kuma kia alongoki andi, walomba kwa Se diandi vo ‘kabatanina mu kuma kia ndiona wambi.’ (Yoa. 17:15) Muna vanga e diambu diadi, Yesu wasonga vo watoma zolanga alongoki andi. Yesu wazaya wo vo ke kolo ko owanana ye mpasi zayingi, kana una vo i wau, watokanena e wete dia alongoki andi.

14. Aweyi tulenda songela vo tuzolanga mpangi zeto?

¹⁴ Nze Yesu, vava tusambanga ke tutokanenanga kaka mambu ma yeto kibeni ko. Muna kuma kiaki, tusambanga mpe mu kuma kia mpangi zeto. Vava tuvanganga wo, tusonganga vo tulemvokelanga e nkanikinu a Yesu wa songa o zola kwa muntu yo nkwandi yo songa kwa Yave vo tutoma zolanga mpangi zeto. (Yoa. 13:34) O samba mu kuma kia mpangi zeto ke disongele ko vo ntangwa eto  tufwasanga. E Diambu dia Nzambi divovanga vo: “E ndodokela za muntu ansongi zivuidi nkuma.”—Yak. 5:16.

15. Ekuma mpangi zeto bevuilanga e sambu yeto o mfunu?

¹⁵ E mpangi zeto sambu yeto kikilu bevuanga o mfunu kadi mambu mayingi mampasi benuananga mau. Tulenda lomba kwa Yave kimana kabasadisa bakwamanana zizidila yimbevo, lubangamu, sumbula, vita ye mambu mankaka mampasi. Tulenda mpe samba muna wete dia ampangi ana befuntukanga muna sadisa mpangi zeto ana bebwilanga e sumbula. Nanga ngeye mpe ozeye mpangi onuananga ye mambu mampasi nze mama. Olenda yika nkumbu a mpangi ndioyo muna sambu yaku. Tusonganga vo tutoma zolanga mpangi zeto vava tulombanga kwa Yave vo kabasadisa bakwamanana zindalala.

16. Ekuma tufwete sambilanga muna wete dia awana bevitanga o ntu mu nkubik’a Yave?

¹⁶ Awana bevitanga o ntu mu nkubik’a Yave betoma yangalalanga vava tukubayikanga muna sambu yeto kadi ikubasadisanga. Paulu wa ntumwa walomba kwa ampangi vo basambanga muna wete diandi. Wasoneka vo: “Nusambanga mpe mu kuma kiame, yavewa dina ivova vava iziula o nua, kimana yakala ye unkabu wavova muna zayisa e mbumb’avauka ya nsangu zambote.” (Efe. 6:19) Nze Paulu, o unu mpe tuna ye mpangi zayingi besalanga kwayingi muna lunga-lunga e nkutakani. Tusonganga vo zola tukubazolanga vava tusambanga kwa Yave vo kasambula e salu kiau.

17-18. Nkia ntangwa tulenda lombwa vo twasunzula akaka muna sambu? Adieyi tufwete sungamenanga?

¹⁷ Ezak’e ntangwa, tulenda lombwa vo twasunzula akaka muna sambu. Kasikil’owu, mpangi ankento ozolele fila e longi dia Bibila, olenda lomba kwa mpangi ankaka ankento bena kumosi vo kasamba. Avo o mpangi ndioyo katomene zaya nlongoki ko, olenda lomba kimana kavanga e sambu kiansuka. Muna mpila yayi, diasazu dikala kwa yandi mu bakula e nsatu za nlongoki yo sia zo muna sambu.

¹⁸ Mpangi ayakala olenda lombwa vo kavanga e sambu muna lukutakanu lwa salu kia umbangi yovo muna lukutakanu lwa nkutakani.  O mpangi una ye lau diadi kafwete sungamena e kani dia lukutakanu. E sambu ke ola yavana longi ko yovo luzayisu muna nkutakani. Muna tukutakanu tweto, mu vaulwanga miniti tanu mu kuma kia nkunga ye sambu, muna kuma kiaki, o mpangi o samba kafwete “vova kwayingi” ko, musungula muna sambu kiantete.—Mat. 6:7.

19. Nki kikutusadisa mu kala twakubama muna lumbu kia Yave?

¹⁹ Tufwete kitula e sambu se diambu diamfunu muna zingu kieto, kadi e lumbu kia Yave kifinamene. Ekiaki i kuma Yesu kavovela vo: “Dianu vo, nuyingilanga, yo dodokela ntangwa zawonso, kimana nuavua owu nutinina mambu mawonso mevangama.” (Luka 21:36) Muna kuma kiaki, avo tusambanga ntangwa zawonso twakubama tukala vava e lumbu kia Nzambi kilwaka.

20. Aweyi e sambu yeto ilenda kadila nze ndumbu yansunga?

²⁰ Nkia mambu tulongokele mu longi diadi? Tulongokele vo tufwete yangalelanga e lau tuna diau dia samba kwa Yave. E mambu masundidi o mfunu tufwete lombanga muna sambu yeto i mambu matadidi e kani dia Yave. Tuvutulanga mpe matondo kwa Nzambi mu kuma kia Mwan’andi ye Kintinu kiandi ye tusambanga muna wete dia mpangi zeto. Kansi, tusambanga mpe mu kuma kia nsatu zeto za nitu ye za mwanda. Kieleka, tusonganga vo tuvutulanga matondo muna lau tuna diau dia samba kwa Yave vava tutoma solanga e mvovo tuyika muna sambu. Muna mpila yayi, e mvovo mieto mikala nze ndumbu yansunga kuna kwa Yave ye “luyangalalu kwa yandi.”—Nga. 15:8.