LONGI DIA 29
Yikama Yesu wa Mfidi Eto
“E wisa kiawonso kia zulu ye nza kiveno kwa mono.”—MAT. 28:18.
NKUNGA WA 13 Kristu i Mbandu Eto
MANA TULONGOKA *
1. Alweyi i luzolo lwa Yave o unu?
O UNU Yave ozolele vo, e nsangu zambote za Kintinu za samunua omu nza yawonso. (Maku 13:10; 1 Tim. 2:3, 4) Ekiaki salu kia Yave ye kiamfunu kikilu, dianu kasolela Mwan’andi anzolwa kafila e salu kiaki. Tulenda kala ye ziku vo Yesu wafwana kikilu kena muna fila e salu kia samuna e nsangu zambote kimana kiavangilwa mun’owu wa luzolo lwa Yave vitila e mbaninu iza.—Mat. 24:14.
2. Nkia mambu tulongoka mu longi diadi?
2 Mu longi diadi, tumona una Yesu kesadilanga “ntaudi akwikizi yo lulungalalu” muna vana madia ma mwanda yo kubika alandi andi muna salu kiaki kiampwena kia samuna e nsangu zambote eki ke kisidi salwa ko mu lusansu lwawonso lwa wantu. (Mat. 24:45) Tulongoka mpe dina konso muntu mu yeto kalenda vanga muna yikama Yesu yo ntaudi akwikizi.
YESU OFILANGA E SALU KIA SAMUNA E NSANGU ZAMBOTE
3. Nkia wisa Yesu kavewa?
3 Aweyi tulenda kadila ye ziku vo Yesu yandi kikilu ofilanga e salu kia samuna e nsangu zambote? Lumbu yakete vitila kavutuka kuna zulu, Yesu wakutakana ye alandi andi akwikizi vana mongo a Ngalili. Tala dina kabavovesa: “E wisa kiawonso kia zulu ye nza kiveno kwa mono.” I bosi wakudikila vo: “Dianu vo, nuenda, nuakitula wantu a zula yawonso se alongoki.” (Mat. 28:18, 19) Ozevo, vana ntandu a mambu mankaka, Yesu wavewa e wisa kia fila e salu kia samuna e nsangu zambote.
4. Ekuma tulenda kadila ye ziku vo Yesu wakinu fila e salu kia samuna e nsangu zambote yamu lumbu yeto?
4 Yesu wavova vo e salu kia samuna e nsangu zambote yo kitula wantu se alongoki kisalwa muna “zula yawonso.” Wasikidisa mpe alandi andi vo okala yau e “lumbu yawonso yakuna mbaninu a tandu.” (Mat. 28:20) E mvovo miami misonganga e ziku vo Yesu okwamanana fila e salu kia samuna e nsangu zambote yamu lumbu yeto.
5. Aweyi tulenda yikamena e ndungan’a ungunza wa Nkunga 110:3?
5 Yesu wakala ye ziku vo muna lumbu yambaninu mu kala ye asadi afwana muna sala e salu kia samuna e nsangu zambote. Wazaya wo vo o ungunza wasonama muna Nkunga lungana ulungana. Uvovanga vo: “Nkangu aku ukuyivana kuna mvevo muna lumbu kia nkum’a makesa maku.” (Nku. 110:3) Avo ngeye mpe osalanga e salu kia samuna e nsangu zambote, zaya wo vo oyikamanga Yesu yo ntaudi akwikizi yo sadisa kimana ungunza wau walungana. Kansi, ekolo e salu kiaki kinungunukanga, tuwanananga mpe ye mambu mampasi.
6. Nkia mambu mampasi tuwanananga mau o unu?
6 Dimosi muna mambu mampasi ateleki a Kintinu bewanananga mau i siwa kitantu. Avengomoki, afidi a mabundu ye ayadi besayanesanga e nsangu zaluvunu mu kuma kia salu kieto. Vava yitu yeto, akweto a salu ye wantu ankaka bekwikilanga muna nsangu zazi zaluvunu, balenda kutukomekena vo twayambula sadila Yave yo yambula samuna e nsangu zambote. Muna nsi zankaka, e mbeni zeto bebangikanga mpangi zeto muna kubavumisa, kubawanda yo kubasia mu pelezo. E diambu diadi ke dikutusivikisanga ko. Yesu watulukisa vo: “Numengwa kwa zula yawonso mu kuma kia nkumbu ame.” (Mat. 24:9) Kieleka, mambu mama i ziku kisonganga vo tutondakananga kwa Yave. (Mat. 5:11, 12) Nkadi ampemba yandi ofilanga wantu awaya muna kutubangika. Kansi, Yesu osundidi Satana o nkuma. Muna lusadisu lwa Yesu, e nsangu zambote zisamunuanga muna zula yawonso.
7. Nkia ziku kisonganga vo e sono kia Lusengomono 14:6, 7 mu lungana kina?
7 E diambu diankaka ateleki a Kintinu bewanananga diau i ndinga. Wau vo omu nza o wantu ndinga zayingi bevovanga, dilenda kala diampasi kwa yeto mu samuna e nsangu zambote kwa wantu awonso. Kansi muna mona-meso kina Yoane wa ntumwa kamona, Yesu wavova vo e nsangu zambote zisunda nkaku wau omu lumbu yeto. (Tanga Lusengomono 14:6, 7.) Aweyi e sono kiaki kilunganenanga? O unu, e salu kieto kisalwanga mu nsi zayingi ye ndinga zayingi. Kasikil’owu, muna nzil’eto jw.org o wantu mu nza yawonso balenda tanga e nkanda misasilanga e Bibila mu vioka 1.000 dia ndinga. O nkanda Zinga ye Kiese Yakwele Mvu! i nkanda tutoma sadilanga muna longa o wantu yo kubakitula se alongoki, wasekolwa mu vioka 700 za ndinga. Vana ntandu, vena mpe ye video mu kuma kia awana bafwa o matu ye nkanda mia braile mu kuma kia ampofo. O wantu “muna ndinga zawonso za zula” mu longoka bena vova e “nding’avelela,” i sia vo, mu zaya bena e ludi kia Bibila. (Zak. 8:23; Sef. 3:9) Kieleka, tuna ye lau dia mona e ndungan’a ungunza wau wa Bibila. Mambu mama mawonso mevangamenanga muna lusadisu lwa Yesu Kristu wa mfidi eto.
8. Nkia nluta tuvuanga muna salu kieto kia samuna e nsangu zambote?
8 O unu, vioka 8 milhões dia wantu bezingilanga mu nsi 240 bena muna nkubik’a Yave ye konso mvu mafunda ye mafunda ma wantu bevubwanga se Mbangi za Yave. Edi disundidi o mfunu ke lutangu lwa wantu ko, kansi i “kiwuntu kiampa” bevuatanga, i sia vo, fu ya Kikristu besonganga alongoki awaya ampa. (Kol. 3:8-10) Ayingi muna yau bayambula mavangu ma zumba, mansoki, sia mpambula yo zola kwasaka bakala kwau muna nsi au. O ungunza wa Yesaya 2:4 ulungananga muna wantu awaya kadi ‘ke belongokanga diaka nuana vita ko.’ Vava tusianga e ngolo za songa e fu ya Kikristu, tusadisanga o wantu muna kota mu nkubik’a Yave yo songa e ziku vo Kristu Yesu wa mfidi eto tulandanga. (Yoa. 13:35; 1 Pet. 2:12) Ekuma e diambu diadi divangamenanga? Kadi Yesu okutuvananga lusadisu lwawonso tuvuidi o mfunu.
YESU WATUMBIKA NTAUDI AKWIKIZI
9. Landila e sono kia Matai 24:45-47, adieyi Yesu kavova divangama mu lumbu yambaninu?
9 Tanga Matai 24:45-47. Yesu wavova vo muna lumbu yambaninu otumbika “ntaudi akwikizi yo lulungalalu” kimana kalonga nkangu a Nzambi e Diambu dia Nzambi. Diavingilwanga vo ntaudi ndioyo kafuntuka kwayingi muna sala. I diau kikilu divangamanga omu lumbu yeto. O Yesu wa mfidi eto osadilanga buka kiakete kia mpangi zakuswa muna vana nkangu a Nzambi ye awana besonganga luzolo lwambote o madia ma mwanda “muna ntangwa ifwene.” Mpangi zazi ke beyindulanga ko vo yau i mfumu za lukwikilu lwa akaka. (2 Kor. 1:24) Kansi, edi bazeye vo Yesu Kristu i “mfidi ye nyadi” a nkangu andi.—Yes. 55:4.
10. Nze una usonganga e fwaniswa, nkia nkanda wakwikidisa vo osolwele e ludi?
10 Tuka muna mvu wa 1919, ntaudi akwikizi ovaikisanga nkanda miayingi muna sadisa akwa luzolo lwambote bazaya e ludi kia Bibila. Muna mvu wa 1921, ntaudi akwikizi wavaikisa o nkanda, A Harpa de Deus una wasadisa wantu mu zaya malongi mantete ma Bibila. Ekolo mvu miaviokanga, wavaikisa diaka nkanda miankaka. Ozevo, nkia nkanda wasadisa mu zaya yo zola Yave? Nga i nkanda,“Seja Deus Verdadeiro,” Kedika Kitualanga Ku Moyo Wamvu Yamvu, Poderá Viver Para Sempre no Paraíso na Terra, Zayi Ufilanga Ku Moyo a Mvu Ya Mvu, O Nkand’a Nzambi Adieyi Kieleka Kelonganga?, Adieyi Bibila Kilenda Kutulonga?, yovo Zinga ye Kiese Yakwele Mvu!, una vo i nkanda wampa? E nkanda miami miawonso miatusadisa mu kitula wantu se alongoki. Konso nkanda walungisa e kani wavaikisilwa.
11. Ekuma dinina diamfunu mu kwamanana kumika lukwikilu lweto?
11 Ke wantu ampa kaka ko bevuanga madia mangolo ma mwanda o mfunu. Yeto awonso mfunu tuvuidi mo. Paulu wa ntumwa wasoneka vo: “Madia mangolo m’awana bazikuka.” Paulu wakudikila vo osadila mana tulongokanga dikutusadisa “mu zaya swaswanesa edi diambote ye diambi.” (Ayib. 5:14) Omu lumbu yayi yampasi tuzingilanga, diampasi kikilu mu lemvokela e nkanikinu mia Yave, kadi o wantu bekuyivananga muna mavangu mazumba. Kansi, Yesu otoma kutulunga-lunganga muna kutuvana madia ma mwanda tuvuidi o mfunu muna kumika lukwikilu lweto. Yesu osadilanga ntaudi akwikizi muna kutuvana madia mama metukanga muna Diambu dia Nzambi.
12. Nze Yesu, aweyi tusongelanga vo nkumbu a Nzambi tuzitisanga?
12 Tutangininanga Yesu muna vana o nkembo ufwanukinu e nkumbu a Nzambi. (Yoa. 17:6, 26) Kasikil’owu, muna mvu wa 1931, twayantika yikilwa muna nkumbu yatuka muna Bibila vo, Mbangi za Yave. Muna mpila yayi twasonga vo e nkumbu a Nzambi mfunu kikilu ina kwa yeto. (Yes. 43:10-12) Muna ngonde a Okutoba ya mvu wauna kaka, e nkumbu a Nzambi yayantika moneka vana fukwa kia konso Eyingidilu. Ekolo mabundu ma kimpangila mekatulanga e nkumbu Yave muna nsekola zau za Bibila, e Nsekola ya Nz’ampa yavutulwisa e nkumbu a Nzambi muna fulu yawonso yakala e nkumbu yayi muna sono yankulu.
YESU WAKUBIKA ALANDI ANDI
13. Nkia diambu dikukwikidisanga vo Yesu osadilanga “ntaudi akwikizi yo lulungalalu” o unu? (Yoane 6:68)
13 Yesu osadilanga “ntaudi akwikizi yo lulungalalu” muna nungununa e nsambil’avelela ova ntoto eyi isundidi e nkubika zawonso. Aweyi omonanga wau una muna nkubika yayi? Nanga osungamen’e mvovo mia Petelo wa ntumwa ona wavova kwa Yesu vo: “E Mfumu, kwa nani tukwenda? Mambu ma moyo a mvu ya mvu, nge una mau.” (Yoa. 6:68) Kristu osadilanga nkubika yayi muna kutuvana madia ma mwanda. Okutulonganga mpe una tulenda sila umbangi una ufwene. Vana ntandu, okutusadisanga twavuata “kiwuntu kiampa,” kimana twayangidika Yave. (Efe. 4:24) Nga ozeye una wadi kala e zingu kiaku avo kukadi mu nkubik’a Yave ko?
14. O tuludiku twatambwidi mu nkubik’a Yave muna kolo kia vuku kia COVID-19, aweyi twasadisidi?
14 Yesu okutuvananga tuludiku tuvuidi o mfunu vava tubwilwanga mambu mampasi. Twamona e ziku kia diambu diadi vava e vuku kia COVID-19 kiayantika. Ekolo wantu mu nza yawonso ke bazaya ko dina bafwete vanga, Yesu watuvana tuludiku twatoma kiá muna tanina o vimpi weto. E nkubik’a Yave yatukasakesa twavuatanga máscara avo va fulu kia ndonga twina yo vavuka muntu yo nkwandi. Akuluntu bakasakeswa vo ntangwa ke ntangwa babokelanga ateleki awonso a nkutakani muna zaya una bena yo lunga-lunga e nsatu zau za mwanda ye za nitu. (Yes. 32:1, 2) Vana ntandu, twatambulanga mpe tuludiku yo lukasakeso muna nsangu zampa za Selo Yambuta.
15. Nkia tuludiku twatambwidi mu kuma kia tukutakanu ye salu kia umbangi muna kolo kia vuku? Nkia nluta diatwese?
15 Muna kolo kia vuku, twatambwidi tuludiku twasikididi mu kuma kia una tufwete vangamena tukutakanu tweto ye salu kia umbangi. Vana vau, twayantika sadila internete muna vanga tukutakanu twakete ye twampwena. Twayantika mpe soneka nkanda yo sadila e telefone muna sila umbangi. Yave watoma sambula e ngolo zeto. Mavula mayingi bazayisa vo muna nsi zau, o lutangu lwa ateleki lukulamene. Mpangi zayingi bavovela e nluta batambula muna salu kia umbangi muna kolo kia vuku.—Tala e babu, “ Yave Osambulanga e Salu Kieto kia Umbangi.”
16. Nkia ziku tulenda kala kiau?
16 Akaka nanga beyindulanga vo e nkubik’a Yave mambu yasakisanga muna tuludiku yavananga muna kolo kia vuku. Kansi ekolo e ntangwa yaviokanga, twamona e ziku vo tuludiku twatambula twangangu kikilu. (Mat. 11:19) Vava tuyindulanga e mpila yazola o Yesu kefidilanga o nkangu andi, tukalanga ye ziku vo kiakala nkia diambu dilenda kutubwila o mbazi, Yave yo Mwan’andi anzolwa bekala yeto.—Tanga Ayibere 13:5, 6.
17. Aweyi omonanga wau vo Yesu i Mfidi eto?
17 Ekwe kiese tumonanga wau vo Yesu i Mfidi eto! E nkubik’eto ke isianga mpambula ko, ivuidi wantu a zula yawonso, makanda ye ndinga zaswaswana. Tutambulanga malongi ma Bibila tuvuidi o mfunu muna kumika kimwanda kieto yo longwa una tulenda sadila e salu kia samuna e nsangu zambote una ufwene. Konso muntu mu yeto, olongwanga una kalenda vuatila kiwuntu kiampa yo zola muntu yo nkwandi. Kieleka, lau diampwena kikilu tuna diau wau vo Yesu i Mfidi eto!
NKUNGA WA 16 Kembelela Yave Muna Kuswa Kiandi
^ Mafunda ye mafunda ma akala, akento yo wana besamunanga e nsangu zambote kuna vema kwawonso. Nga ngeye mpe una muna buka kiaki? Avo i wau, kwa Yesu Kristu wa Mfumu eto ofilwanga. Mu longi diadi, tuzaya e ziku kisonganga vo Yesu yandi ofilanga e salu kia samuna e nsangu zambote o unu. O badika muna diambu diadi dikutusadisa mu siamisa e kani dieto diakwamanana sadila Yave muna lutumu lwa Kristu.
