Yesu walonga wantu vo bakadilanga kuna luvuvamu muntu yo nkwandi. Kansi, lumbu kimosi Yesu wavovesa alongoki andi vo: “Ke nuyindula ko vo luvuvamu ngizidi sia ova nza; kizidi sia luvuvamu ko, kansi nsosolo kaka. Kadi, kimbeni ngizidi sia vana vena mwan’ayakala yo se diandi, mwan’ankento yo ngudi andi, mwan’a longo yo kô wandi wa nkento.” (Mat. 10:34, 35) Adieyi Yesu kazola vova muna mvovo miami?

Yesu kazola vambanesa wantu ko ye yitu yau, kansi wazaya wo vo malongi mandi yitu mevambanesa. Muna kuma kiaki, awana bazolele kituka alongoki a Kristu yo vubwa, bafwete bakula vo ezak’e ntangwa akaka muna yitu yau ke beyangalela nzengo zau ko. Avo basilu kitantu kwa akazi au yovo kwa yitu yau bena vo ke Akristu ko, diampasi dikala kwa yau mu sikila muna ludi.

Bibila kikasakesanga Akristu mu kadila kuna “luvuvamu yo wantu awonso.” (Roma 12:18) Kansi, malongi ma Yesu malenda kala nze “nsosolo” kwa yitu yankaka. Ediadi divangamanga vava mosi muna yitu kieto ketambulwilanga e ludi ekolo akaka ke betambulwilanga kio ko yovo kunsia e kitantu. Vava ediadi divangamanga, e yitu yayi bekitukanga se “mbeni” a ndiona otambulwidi e ludi.—Mat. 10:36.

Alongoki a Kristu ana bezingilanga muna nzo yavambana mu nsambila, ezak’e ntangwa benuananga ye mambu mampasi metontanga e kwikizi kiau muna Yave yo Yesu. Kasikil’owu, e yitu bena vo ke Mbangi za Yave ko balenda kubakomekena bakembelela e nkinzi mia nsambil’au. Muna diambu diadi, Akristu awaya bafwete baka e nzengo kana nani beyangidika. Yesu wavova vo: “Konso ona oluta zola se yovo ngudi andi ke mu mono ko, kafwene kala nlongoki ame ko.” (Mat. 10:37) Ozevo, Yesu kazola vova ko vo, awana bekituka alongoki andi ke bafwete toma zola yitu yau ko. Kansi, wabalonga una bafwete bakila e nzengo za sia mambu masundidi o mfunu va fulu kiantete muna zingu kiau. Avo yitu yeto bena vo ke Mbangi za Yave ko batusidi kitantu mu kuma kia ngolo tuvanganga muna sambila Yave, tufwete kwamanana kubazola, kansi tufwete sungamena vo o zola kweto muna Nzambi i kwau tusianga va fulu kiantete.

O lubangamu lwa yitu lulenda kutukendeleka kikilu. Kansi alongoki a Yesu bafwete sungamenanga e mvovo emi: “Konso ona olembi nata nti andi ampasi yo kwiz’andandi, kafwene kala nlongoki ame ko.” (Mat. 10:38) Muna mvovo miankaka, Akristu bebadikilanga lubangamu lwa yitu vo i dimosi muna mambu mampasi mana alongoki a Kristu bafwete zizidila. Ezak’e ntangwa bekalanga ye vuvu vo e kadilu kiau kiambote kilenda fila e yitu yau bena vo ke Mbangi za Yave ko mu soba e ngindu yo tambulwila longoka e Bibila.—1 Pet. 3:1, 2.