1. Ekuma tuvaninanga e mvutu muna tukutakanu?

 EKUMA tukwendelanga muna tukutakanu? Ekuma kiantete, i kembelela Yave. (Nku. 26:12; 111:1) Tukwendanga mpe muna tukutakanu muna kasakesa muntu yo nkwandi omu lumbu yayi yambaninu tuzingilanga. (1 Tes. 5:11) Vava tuzangulanga o koko mu vana e mvutu muna tukutakanu, tulungisanga e mambu mole mama.

2. Nkia malau tuna mau mu vana e mvutu muna tukutakanu?

² Konso lumingu, tukalanga ye lau diavana e mvutu muna tukutakanu tweto. Kasikil’owu, muna lukutakanu lwa nsuk’a lumingu, tulenda vana e mvutu muna Longi dia Eyingidilu. Muna lukutakanu lwa kati kwa lumingu, tulenda vana e mvutu muna Tusalu twa Mwanda, muna Longi dia Bibila dia Nkutakani ye muna nkunku yankaka.

3. Nkia nkakalakani tulenda wanana zau? Aweyi e sono kia Ayibere 10:24, 25 kilenda kutusadisila?

³ Yeto awonso tuzolele kembelela Yave yo kasakesa mpangi zeto. Kansi vava tuvananga e mvutu, tulenda wanana ye nkakalakani. Tulenda mona o wonga mu kuma kia mvutu tuvana yovo tulenda kala ye tima dia vana e mvutu zayingi, kansi ke tusolelo ko. Aweyi tulenda sundila e nkakalakani zazi? Tulenda solola e mvutu muna nkanda una Paulu wa ntumwa katwika kwa Ayibere. Vava kavovela o mfunu walungananga kumosi, wavova vo tufwete sianga e sungididi  muna “kasakesanga muntu yo nkwandi.” (Tanga Ayibere 10:24, 25.) Vava tusungamenanga vo akaka balenda vua lukasakeso muna mvutu zeto kana nkutu vo zankufi, dikutufila mu vananga e mvutu. Avo ke tusolelo nkumbu miayingi ko, tufwete mona e kiese muna zaya vo akaka mpe bakedi ye lau dia vana e mvutu.—1 Pet. 3:8.

4. Nkia mambu tatu tulongoka mu longi diadi?

⁴ Mu longi diadi mambu tatu tuvovela, entete, una tulenda kasakesela muntu yo nkwandi muna nkutakani yakete ina vo wantu akete kaka bezangulanga e moko. I bosi, tuvovela una tulenda kasakesela muntu yo nkwandi muna nkutakani yampwena ina vo wantu ayingi bezangulanga e moko. Kuna mfoko, tuvovela una tulenda kasakesela akaka muna mpila ina tuvovelanga vava tuvananga e mvutu.

5. Aweyi tulenda kasakesela muntu yo nkwandi avo e nkutakani yakete?

⁵ Muna nkutakani yakete yovo buka, ezak’e ntangwa ke vekalanga wantu ayingi ko bezangulanga e moko kimana o mfidi kabasola. Nkumbu miayingi divavanga vo o mfidi kavingila yavana o muntu mosi kezangula o koko muna vana e mvutu. Muna mpila yayi, o lukutakanu lulenda monekena vo mu zingila lwina ye lulenda kutuyoyesa. Adieyi olenda vanga? Kala yo luzolo lwa zangula o moko nkumbu miayingi. Ovanga wo, okasakesa mpe akaka muna vana mpe e mvutu.

6-7. Aweyi tulenda kululwila o wonga wa vana e mvutu muna tukutakanu?

⁶ Adieyi olenda vanga avo wonga wayingi omonanga muna vana e mvutu? Wantu ayingi wonga bemonanga mu vana e mvutu. Kansi, aweyi olenda kululwila o wonga muna vana e mvutu zilenda kasakesa mpangi zaku?

⁷ E diambu dilenda kusadisa i fimpulula e malongi mavayikiswa kala muna Eyingidilu. b Kasikil’owu, toma kubama. (Nga. 21:5) Avo otomene kubama, ovana e mvutu muna lukutakanu. Kubikanga mpe mvutu zankufi. (Nga. 15:23; 17:27) Okubika e mvutu zankufi dilenda kulula o wonga waku. Ediadi disongele vo, olenda kubika nlonga umosi yovo miole, muna mpila yayi, disadisa ampangi mu bakula e mvutu zaku vana vau. Kansi avo ovovele kwayingi diampasi dikala muna bakula e mbuta diambu. Okubika e mvutu zankufi muna mvovo mia ngeye kibeni, disonga vo otomene kubama ye obakwidi e longi.

8. Aweyi Yave kemonanga muna ngolo tuvanganga?

⁸ Adieyi tuvova avo ovangidi mawonso mama kansi wakinu mona o wonga muna vana e mvutu? Kala ye ziku vo Yave oyangalelanga e ngolo ovanganga. (Luka 21:1-4) Yave ke kutulombanga ko vo twavanga mayingi lutila mama tulenda vanga. (Fili. 4:5) Muna kuma kiaki, kala ye kani diavanga mana olenda yo samba kwa Yave kimana kavana o ntima avuvama. Kuna lubantiku olenda kukisila e kani dia vana e mvutu zankufi.

9. Nkia nkakalakani tulenda wanana zau muna nkutakani yampwena?

⁹ Avo muna nkutakani ateleki ayingi bena mo, dilenda kala diampasi muna vana e  mvutu. Dilenda kala vo mpangi zayingi betoma solwanga mu vana e mvutu, kansi o ngeye kutoma solwanga ko. Kasikil’owu, mpangi ankento una ye nkumbu Danielle, otoma yangalelanga vana e mvutu muna tukutakanu. c Obadikilanga e diambu diadi vo diamfunu muna nsambila andi ye mpila yakasakesela akaka, dikunsadisanga mpe mu sungamena e ludi kia Bibila. Kansi vava kasoba muna nkutakani yampwena, nkumbu miayingi kasolwanga ko, ezak’e ntangwa nkutu kavananga kana mvutu zimosi ko muna lukutakanu. Wavova vo: “Yatoma kendalalanga yo mona vo nze kiyekwa yavidisa. Avo e diambu diadi nkumbu miayingi divangamanga, o muntu olenda yindula vo o mfidi kulukanu kevangilanga wo.”

10. Aweyi olenda kadila ye lau diavana e mvutu zayingi muna tukutakanu?

¹⁰ Nga ngeye mpe omonanga nze una mpangi Danielle kamona? Avo i wau, ediadi dilenda kuyoyesa yo yambula vana e mvutu muna tukutakanu. Kansi, kuyoyi ko. Adieyi olenda vanga? E diambu dilenda kusadisa, i kubikanga mvutu zayingi muna tukutakanu. Avo kusolelo ko kuna lubantiku, olenda kala ye lau dia vana e mvutu muna kunku yankaka ya lukutakanu. Vava okubikanga e longi dia Eyingidilu yindula una konso tini kinina e ngwizani yo ntu a diambu wa longi. Avo ovangidi wo, okala kaka ye diambu ovova muna vana e mvutu. Vana ntandu, olenda toma kubika e tini ivovelanga e mambu masina ma Bibila mena vo mampasi mu sasila. (1 Kor. 2:10) Ekuma? Kadi muna tini yayi, mpangi zayingi ke bezolanga vana mvutu ko. Kansi, adieyi tuvova avo osadidi e ndekwa zazi kansi kuvewanga kaka lau ko dia vana e mvutu? Olenda mokena yo mfidi vitila lukutakanu yo kunzayisa e tini kina ozolele vanina e mvutu.

11. E sono kia Filipi 2:4, nkia diambu kikutukasakesanga mu vanga?

¹¹ Tanga Filipi 2:4. Paulu wa ntumwa wakasakesa ampangi vo bavavanga e wete dia akaka. Aweyi tulenda sadila e longi diadi ekolo tukalanga muna tukutakanu? Muna  sungamenanga vo, nze yeto, mpangi zeto mpe bezolanga vana e mvutu muna tukutakanu.

12. Nkia mpila yambote tulenda kasakesela akaka muna tukutakanu? (Tala mpe e foto.)

¹² Yindula e diambu edi: Nga vava omokenanga ye akundi aku ozolanga vova kwayingi yo lembi kubavana e lau dia vova? Dialudi vo ke wau ko ovanganga, kansi ovingilanga vo yau mpe bavova. Diau dimosi mpe, tuzolanga vo akaka mpe bavana e mvutu muna tukutakanu avo dilendakana. Kieleka, imosi muna mpila yambote tulenda kasakesela mpangi zeto, i kubavananga e lau dia vovela lukwikilu lwau muna tukutakanu. (1 Kor. 10:24) O wau yambula twazaya una tulenda wo vangila.

13. Aweyi tulenda yambulwila vo wantu ayingi bavana e mvutu muna tukutakanu?

¹³ I mosi muna mpila tulenda wo vangila, i vananga e mvutu zankufi, e diadi divana e lau kwa wantu ayingi mpe mu vova. Akuluntu ye ateleki azikuka balenda songanga e mbandu muna diambu diadi. Kana nkutu vo mvutu zankufi ovana, venganga e fu kia vova mambu mawonso. Kadi avo ovovele mambu mawonso muna tini, akaka ke bekala ye mana bevova ko. Kasikil’owu, mu tini kiaki, mambu mole kitulongele: Vananga e mvutu zankufi yo venga e fu kia vova mambu mwonso mena muna tini. Avo ngeye i muntu antete osolelo mu vana e mvutu mu tini kiaki, vova kaka diambu dimosi muna mambu mole mama.

14. Nki kilenda kutusadisa mu zaya kana nkumbu kwa tulenda zangula o koko? (Tala mpe e foto.)

¹⁴ Sadila umbakuzi mu zaya kana nkumbu kwa olenda vana e mvutu. Kadi avo tuzangwidi o koko nkumbu miayingi, tulenda fila o mfidi muna kutusola kana nkutu vo vena ye mpangi ke bavena ntete mvutu ko. Ovanga wo dilenda yoyesa akaka muna lembi zangula diaka o moko.—Kim. 3:7.

15. (a) Aweyi tulenda mona avo ke tusolelo ko muna vana e mvutu? (b) Aweyi afidi a malongi balenda songela vo awonso mfunu bena? (Tala e babu, “ Avo Ngeye Ofila e Longi.”)

 ¹⁵ Vava ateleki ayingi bezangulanga o moko mu vana e mvutu, dilenda kala vo ke tuvana mvutu ko nkumbu miayingi ze una tuzolele. Ezak’e ntangwa nkutu, o mfidi ke kutusola ko, ediadi dilenda kutukendeleka. Kansi ke tufwete funga makasi ko yo yindula vo nanga mpangi ndioyo ke kutuzolanga ko.—Kim. 7:9.

16. Aweyi tulenda kasakesela awana bevananga e mvutu?

¹⁶ Avo kuvananga mvutu ko nkumbu miayingi nze una ozolele, ekuma olembi sila e sungididi muna mvutu za mpangi kimana kuna mfoko a lukutakanu wabasanisina? E mpangi zaku betoma kasakeswa avo ubasanisini muna mvutu zau nze una badi kasakeselwa kele vo wavana e mvutu. (Nga. 10:21) Kieleka, osanisina e mpangi zeto, i mpila yankakaka tukasakeselanga muntu yo nkwandi.

17. (a) Aweyi mase balenda sadisila wan’au mu kubika e mvutu? (b) Landila e video, nkia mambu yá balenda sadila muna kubika e mvutu? (Tala mpe mvovo vana yanda a lukaya.)

¹⁷ Nkia mpila yankaka tulenda kasakesela muntu yo nkwandi muna tukutakanu? Avo u se, sadisa wan’aku bakubikanga e mvutu mun’owu wa ntela au. (Mat. 21:16) Ezak’e  ntangwa, mambu nze, lukazalu ye fu yankala ambote metoma vovelwanga mu longi, kansi valenda kala ye tini yankaka ina wan’aku balenda vanina e mvutu. Sadisanga mpe wan’aku babakula vo ke ntangwa zawonso ko bezangula o moko besolwa mu vana e mvutu. Obakula e diambu diadi, dikubasadisa mu lembi kendalala avo ke basolelo ko mu vana e mvutu.—1 Tim. 6:18. d

18. Aweyi tulenda vengela tuntila e sungididi kwa yeto kibeni vava tuvananga e mvutu? (Ngana 27:2)

¹⁸ Yeto awonso tulenda kubika e mvutu zina zilenda kumika mpangi zeto yo twasa nkembo kwa Yave. (Nga. 25:11) Ekolo tuvananga e mvutu, ezak’e ntangwa tulenda yika nona kiankufi kia diambu diatubwila kala, kansi tufwete venga e fu kia vova kwayingi mu kuma kia yeto kibeni. (Tanga Ngana 27:2; 2 Kor. 10:18) Tuzolele vanga mawonso muna fila akaka basia e sungididi muna Yave, muna Diambu diandi ye muna nkangu andi. (Lus. 4:11) Dialudi vo, avo e kiuvu kia tini kivava vo twayika e diambu diatubwila kala muna zingu, ke diambi kwandi ko mu vova mu kuma kia yeto kibeni. Nze una usonga e tini kilende kia longi diadi.

19. (a) Nkia nluta tuvua avo tuyindwidi vo awonso muna lukutakanu mfunu bena? (Roma 1:11, 12) (b) Nkia diambu otoma yangalelanga mu kuma kia vana e mvutu muna tukutakanu?

¹⁹ Dialudi vo ke vena nsiku wasikididi ko uyikanga una tulenda vanina e mvutu, kansi yeto awonso tulenda kasakesa muntu yo nkwandi muna mvutu zeto. E diadi disongele vo tufwete kubikanga mvutu zayingi, yangalelanga e lau dia solwa nkana nkutu nkumbu umosi kaka mu vana e mvutu yo yangalalanga mpe vava akaka bevewanga e lau diadi. Kieleka, vava tutokanenanga e wete dia akaka muna tukutakanu, yeto awonso ‘tukasakesanga muntu yo nkwandi.’—Tanga Roma 1:11, 12.