LONGI DIA 14
Nga Olungisanga Uselo Waku una Ufwene?
“Kwamanana samuna e nsangu zambote, lungisa uselo waku una ufwene.”—2 TIM. 4:5.
NKUNGA WA 57 Samuna kwa Wantu a Mpila Zawonso
MANA TULONGOKA *
Kuna nim’a lufuluku lwandi, Yesu wawanana ye alongoki andi yo kubakanikina vo: “Nwenda, nwakitula wantu a zula yawonso s’alongoki” (Tala tini kia 1)
1. Nkia salu bafwete lungisa e selo yawonso ya Nzambi? Ekuma? (Tala e fwaniswa kia fukwa.)
YESU KRISTU wakanikina alandi andi vo: “Nwenda, nwakitula wantu a zula yawonso se alongoki.” (Mat. 28:19) Selo yawonso yakwikizi ya Nzambi bafwete longoka una balenda ‘lungisila’ e salu kina bavewa. (2 Tim. 4:5) E salu kiaki kiamfunu kikilu ye nluta miayingi kitwasanga. E salu kiaki kifwete salwa mu nzaki lutila salu yankaka tusalanga. Kansi, dilenda kala diampasi mu vaula e ntangwa yafwana muna sala e salu kia umbangi nze una twadi zola.
2. Nkia mambu malenda kutukakidila muna lungisa uselo weto?
2 Vena ye salu yankaka yamfunu ivavanga ntangwa ye ngolo zeto. Dilenda vava vo twasalanga ola zayingi muna vua nzimbu kimana twalungisa e nsatu zeto ye za esi nzo eto. Dilenda kala mpe vo mbebe tuna yau ya lunga-lunga esi nzo yovo tunuananga ye mayela, lukendalalu lwasaka ye mpasi zankaka mu kuma kia kinunu. Aweyi tulenda lungisila uselo weto kana una vo tunuananga ye mpasi zazi?
3. Adieyi tulenda longoka muna mvovo mia Yesu mina muna Matai 13:23?
3 Avo mambu onuananga mau ke mekuvananga ntangwa yafwana ko muna kuyivana emvimba muna salu kia Yave, kufwete kendalala ko. Yesu wazaya wo vo yeto awonso ke tulendi yima mbongo a Kintinu mu tezo kiau kimosi ko. (Tanga Matai 13:23.) Yave oyangalelanga mawonso tuvanganga muna salu kiandi. (Ayib. 6:10-12) Kuna diak’e sambu, tulenda mona vo e mpil’a zingu kieto kilenda kutusadisa mu vanga mayingi muna salu kia Yave. Mu longi diadi, tufimpa una tulenda sila e salu kia umbangi vana fulu kiantete muna zingu kieto, una tulenda vevolwela e zingu kieto yo tomesa e ndekwa zeto za sila umbangi yo longa. Diantete, o lungisa uselo weto una ufwene aweyi disongele?
4. O lungisa uselo weto una ufwene aweyi disongele?
4 O lungisa uselo weto una ufwene disongele vo kuyivana muna salu kia samuna e nsangu zambote yo longa. Kansi, mayingi mevavuanga muna lungisa uselo wete, ke vaula kaka ntangwa ko. E kani dikutufilanga muna sala e salu kiaki mfunu dina kwa Yave. Wau vo tuzolanga Yave ye mfinangani zeto, tusalanga ye nsi a ntima yawonso muna lungisa uselo weto. * (Maku 12:30, 31; Kol. 3:23) O sadila Nzambi ye nsi a ntima yawonso disongele vo kuyivana emvimba yo sadila ngolo, nkuma ye ngangu zeto muna salu kiandi. Avo tubadikidi e salu kia umbangi vo lau diampwena, tuvanga mawonso tulenda muna samuna e nsangu zambote kwa wantu ayingi.
5-6. Yika e nona kisonganga una muntu kena ye ntangwa yayingi ko kalenda sila e salu kia umbangi vana fulu kiantete.
5 Yindula toko dimosi ona ozolanga sika nsambi (guitarra). Okalanga ye kiese kia sika miziki konso ntangwa. Kuna kulanda, obakidi e salu kia sika miziki vana fulu kitekelwanga kafe kuna nsuk’a lumingu. Kansi, e nzimbu kefutwanga ke zilungisanga nsatu zandi ko. Muna kuma kiaki, tuka kina Kiantete yakuna Kiatanu, osadilanga muna nzo itekelwanga e lekwa. Kana una vo oviokesanga ola zayingi muna salu kiaki, o ntim’andi mu miziki ukalanga. Ozolele vo katomesa e ndekwa zandi za sika miziki yo kuyivana emvimba muna salu kiaki. Kana una vo i wau, oyangalelanga konso lau kekalanga diau dia sika miziki kana nkutu vo ntangwa yakete.
6 Diau dimosi mpe, dilenda kala vo kuna ye ntangwa yayingi ko mu kuyivana emvimba muna salu kia umbangi. Kansi, kiaki i salu otoma zolanga. Ovanganga e ngolo za tomesa ndekwa zaku za sila umbangi yo kotesa e ludi muna ntima mia wantu. Wau vo salu yayingi osalanga ikudianga e ntangwa, olenda kukiyuvula kana adieyi olenda vanga mu sia e salu kia umbangi vana fulu kiantete.
AWEYI OLENDA SILA USELO WAKU VANA FULU KIANTETE?
7-8. Aweyi tulenda tanginina e mpila ina Yesu kabadikilanga e salu kia samuna e nsangu zambote?
7 E mpila o Yesu kabadikilanga e salu kia samuna e nsangu zambote ina se mbandu ambote kwa yeto. Wasianga e salu kia samuna e Kintinu kia Nzambi vana fulu kiantete muna zingu kiandi. (Yoa. 4:34, 35) Wakangala mafunda ye mafunda ma kilometa mu sila umbangi kwa wantu ayingi. Wasadilanga konso lau muna sila umbangi kwa wantu, kiakala va fulu kia ndonga yovo muna nzo zau. Yesu wasianga e salu kia samuna e nsangu zambote vana fulu kiantete muna zingu kiandi.
8 Imosi muna mpila tulenda tanginina Kristu i vavanga e lau dia samuna e nsangu zambote konso fulu ye konso ntangwa. Vana ntandu, tuyambulanga e maka mambu ma zingu kieto muna kuyivana emvimba muna salu kia samuna e nsangu zambote. (Maku 6:31-34; 1 Pet. 2:21) Akaka muna nkutakani besalanga nze aviti a nzila a espesiale, aviti a nzila a ngonde ke ngonde yovo aviti a nzila ansadisi. Akaka belongokanga ndinga zankaka yovo kwenda kuna kuvuilu ateleki ayingi o mfunu. Kansi, kiayingi muna salu kia samuna e nsangu zambote kisalwanga kwa ateleki ana bevanganga dina balenda. Kiakala vo tulenda vanga mayingi yovo ve, Yave ke kutulombanga ko vo twavanga mana ke tulendi vanga ko. Ozolele vo twayangalela e salu kieto kiavauka ekolo tusamunanga e “nsangu zambote za Nzambi a kiese.”—1 Tim. 1:11; Nsi. 30:11.
9. (a) Aweyi Paulu kasila e salu kia samuna e nsangu zambote vana fulu kiantete, kana una vo diavavanga vo kasala muna kuyilunga-lunga? (b) Landila e sono kia Mavangu 28:16, 30, 31, aweyi Paulu kabadikilanga e salu kia samuna e nsangu zambote?
9 Paulu wa ntumwa watusisila mbandu ambote muna diambu ditadidi sia e salu kia umbangi va fulu kiantete. Vava kakala kuna mbanz’a Korinto muna nkangalu andi wazole wa salu kia kimisionario, kakala ye nzimbu zayingi ko. Diavavanga vo kasala e salu kia tunga nzo za ngoto. Kana una vo i wau, Paulu kabadikilanga salu kiaki ko vo i kiau kiasunda o mfunu muna zingu kiandi. Wasalanga e salu kiaki muna kuyilunga-lunga muna salu kia samuna e nsangu zambote lembi vava vo ‘kafutwa’ kwa esi Korinto. (2 Kor. 11:7) Kana una vo Paulu wasalanga salu yankaka muna kuyilunga-lunga, wakwamanana sia uselo wandi vana fulu kiantete yo samuna e nsangu zambote e lumbu yawonso ya vundu. Vava e mpil’a zingu kiandi kiasoba, Paulu wasia e sungididi kiandi muna salu kia samuna e nsangu zambote. Paulu ‘wayantika kuyivana emvimba muna samuna diambu yo sila umbangi kwa Ayuda muna kubakwikidisa vo, Yesu i Kristu.’ (Mav. 18:3-5; 2 Kor. 11:9) Kuna kwalanda, vava Paulu kakala mu pelezo muna nzo andi kuna Roma mu mvu miole, wasilanga umbangi kw’awana bankingulanga yo soneka e nkanda. (Tanga Mavangu 28:16, 30, 31.) Paulu kayambulanga ko vo konso diambu diankakidila muna lembi lungisa uselo wandi. Wasoneka vo: “Wau tuna yo uselo wau . . . , ke tuvutukidi manima ko.” (2 Kor. 4:1) Nze Paulu, kana una vo e salu yeto ya lumbu ke lumbu ilenda kutudia e ntangwa, tuzolele kwamanana sia e salu kia Kintinu vana fulu kiantete muna zingu kieto.
Vena ye mpila zayingi tulenda lungisila uselo weto una ufwene (Tala e tini kia 10-11)
10-11. Aweyi tulenda lungisila uselo weto avo ke tuna ye vimpi wambote ko?
10 Avo ke tulendanga diaka sila umbangi mu nzo ye nzo ko mu kuma kia kinunu yovo kimbevo, tulenda sila umbangi mu mpila zankaka. Akristu a tandu kiantete basamunanga e nsangu zambote kwa wantu mu fulu yawonso. Basadilanga konso lau mu sila umbangi mu fulu yawonso ‘bawananga o wantu,’ kiakala mu nzo ye nzo yovo va fulu kia ndonga. (Mav. 17:17; 20:20) Avo kulendanga kangala kwayingi ko, olenda fonga vana fulu kiviokelanga wantu ayingi yo kubasila umbangi. Olenda mpe sila umbangi mu kinsalukisa, soneka nkanda yovo sila umbangi muna telefone. Ateleki ayingi ana ke belendanga diaka vaika mu salu kia nzo ye nzo ko mu kuma kia kimbevo yovo mambu mankaka mampasi, bekalanga ye kiese kia sila umbangi mu mpila zankaka.
11 Kana nkutu vo kuna ye vimpi wambote ko, olenda kwaku lungisa uselo waku una ufwene. Badika diaka e nona kia Paulu wa ntumwa. Wavova vo: “Muna mambu mawonso ngina ye nkuma muna ndiona okunkumikanga.” (Fili. 4:13) Paulu nkuma wau kavuanga o mfunu vava kabakama kimbevo ekolo kakala mu nkangalu wa salu kia kimisionario. Paulu wavovesa esi Ngalatia vo: “Nuzeye wo vo mu kuma kia kimbevo kiame yavuila e lau diantete dia kunusamunwina e nsangu zambote.” (Ngal. 4:13) Nze Paulu, avo obakamene kimbevo, olenda sadila e lau diadi muna samuna e nsangu zambote kw’akaka, nze madotolo, afelemi ye awana bekulunga-lunganga. Ayingi muna wantu awaya ku salu bekalanga vava ateleki besilanga umbangi mu nzo ye nzo.
AWEYI OLENDA VEVOLWELA E ZINGU KIAKU?
12. O kala ye disu “dialungalala” aweyi disongele?
12 Yesu wavova vo: “E mini kia nitu i disu. Avo disu diaku dialungalala, e nitu aku yawonso itemokene.” (Mat. 6:22) Adieyi o Yesu kazola vova? Edi kazola vova vo tufwete vevola e zingu kieto, kala ye kani diasikila muna zingu yo lembi fwa e diya. I diau mpe Yesu kavanga. Wasianga e sungididi muna salu kia samuna e nsangu zambote yo vovesa alongoki andi vo bakwamanana sia e salu kia Yave ye Kintinu kiandi vana fulu kiantete. Tulenda tanginina Yesu muna sianga e salu kia samuna e nsangu zambote vana fulu kiantete muna zingu kieto. Tufwete ‘vavanga ntete Kintinu ye unsongi wa Nzambi.”—Mat. 6:33.
13. Adieyi dilenda kutusadisa mu sia e sungididi muna salu kieto kia Kikristu?
13 Imosi muna mpila tulenda sila e sungididi muna salu kieto kia Kikristu i vevola e zingu kieto. Muna mpila yayi, tusadila e ntangw’eto muna sadisa akaka bazaya Yave yo kunzola. * Kasikil’owu, nga tulenda kulula e ola za salu yeto ya lumbu ke lumbu kimana twakala ye ntangwa yafwana muna samuna e nsangu zambote mu kati kwa lumingu? Nga tulenda yambula ezaka nsaka zikutudianga ntangwa yayingi?
14. Nkia nsobani akazi mosi bavanga muna sia e salu kia umbangi vana fulu kiantete?
14 I diau nkuluntu mosi una ye nkumbu a Elias yo nkaz’andi bavanga. Wavova vo: “Kuna lubantiku, vakala ye mambu matusimbanga muna kota muna salu kia kimviti a nzila. Diavavanga vo twavanga e nsobani malembe-malembe kimana twakala ye ntangwa yafwana ya sala e salu kia umbangi. Kasikil’owu, twabaka e nzengo za lembi sumbanga lekwa yayingi. Twakulula mpe e ntangwa twaviokesanga muna nsaka ye mambu mankaka makala vo ke mamfunu kikilu ko. Twalomba mpe kwa mfumu zeto za salu mu soba e ola ya salu kimana twakala ye ntangwa yafwana. Muna mpila yayi, twayantika sila umbangi muna fuku, longoka Nkand’a Nzambi yo wantu ayingi yo vanga nkutu e nkubika ya vaika muna salu kia umbangi lumbu yole mu kati kwa lumingu muna konso ngonde. Ekwe kiese dikututwasilanga!
AWEYI OLENDA TOMESENA E MPIL’AKU YA SILA UMBANGI YO LONGA?
Avo tuvangidi e ngolo za sadila mana tulongokanga muna lukutakanu lwa kati kwa lumingu, dikutusadisa mu tomesa e salu kieto kia samuna e nsangu zambote (Tala e tini kia 15-16) *
15-16. Mun’owu wa 1 Timoteo 4:13, 15, aweyi tulenda tomesena e mpil’eto ya samunuina e nsangu zambote? (Tala mpe e babu “ Makani ma Mwanda Malenda Kunsadisa mu Lungisa Uselo Wame una Ufwene.”)
15 E mpila yankaka tulenda lungisila o uselo weto una ufwene i tomesa e mpil’eto ya samunuina e nsangu zambote. Muna konso salu, divavanga vo wantu balongwanga ntangwa ke ntangwa muna wokesa o zayi ye ngangu zau. I diau mpe divangamanga kwa ateleki a Kintinu. Tufwete kwamanana longoka una tulenda tomesena e salu kieto kia samuna e nsangu zambote.—Nga. 1:5; tanga 1 Timoteo 4:13, 15.
16 Aweyi tulenda tomesena e mpil’eto ya samunuina e nsangu zambote? Muna toma sianga e sungididi muna tuludiku tutambulanga muna lukutakanu, Zingu ye Salu Kieto kia Kikristu. O lukutakanu lwalu lukutusadisanga mu tomesa e mpil’eto ya sadila e salu kia umbangi. Kasikil’owu, vava o mfidi a lukutakanu kevananga e longi kw’awana bavangidi e kunku kia wan’a sikola, tulenda solola mambu malenda kutusadisa mu tomesa e salu kieto kia samuna e nsangu zambote. Muna lumbu ilanda, tulenda sadila e mambu mama vava tumokena yo muntu muna salu kia umbangi. Tulenda lomba lusadisu kwa mfidi a buka kieto kia salu kia umbangi yovo vaika yandi kumosi yovo yo nteleki wazikuka, mviti a nzila yovo nkengi a zunga. Avo tutomene longoka una tulenda sadila konso sadilwa ina muna Salanganu Yeto ya Longela, tutoma yangalela e salu kia samuna e nsangu zambote yo longa.
17. Nkia nluta olenda baka avo olungisi uselo waku una ufwene?
17 Ekwe lau tuna diau dia kala “asadi kumosi” yo Yave! (1 Kor. 3:9) Avo osidi e ngolo za ‘zaya oma masundidi o mfunu’ yo sia e salu kia Kikristu vana fulu kiantete, ‘osadila Yave kuna kiese.’ (Fili. 1:10; Nku. 100:2) Kana nkutu nkia mpil’a mpasi olenda wanana zau muna zingu, kala ye ziku vo Yave okuvana nkuma ovuidi o mfunu muna lungisa uselo waku. (2 Kor. 4:1, 7; 6:4) Kiakala vo kulendanga diaka vanga mayingi ko muna salu kia umbangi, olenda ‘kala ye kuma kia yangalala’ ekolo okuyivananga emvimba muna salu kia samuna e nsangu zambote. (Ngal. 6:4) Vava olungisanga uselo waku una ufwene, osonganga vo zola kikilu una kwau muna Yave ye mfinangani zaku. Avo okwamanene wo vanga, “okuyivuluza ye awana bekuwanga.”—1 Tim. 4:16.
NKUNGA WA 58 Tuvava Akwa Luvuvamu
^ tini. 5 Yesu watutuma twasamuna e nsangu zambote za Kintinu yo kitula wantu se alongoki. Mu longi diadi, tuvovela una tulenda lungisila uselo weto una ufwene kana nkutu vava tunuananga ye mambu mampasi. Tulongoka mpe dina tulenda vanga muna kala ateleki ambote yo wokesa e kiese kieto muna salu kia umbangi.
^ tini. 4 MVOVO MISASILU: O uselo weto wa Kikristu i salu kia samuna e nsangu zambote yo longa, tunga yo vangulula fulu yeto ya nsambila yo vana lusadisu kw’awana bebwilwanga e sumbula.—2 Kor. 5:18, 19; 8:4.
^ tini. 13 Tala e mambu nsambwadi mena muna babu “Aweyi Olenda Vevolwela Zingu Kiaku?” muna Eyingidilu dia Yuli 2016 lukaya lwa 8.
^ tini. 62 FWANISWA: Mpangi ankento ovanganga e nsongesela muna lukutakanu lwa kati kwa lumingu. Ekolo mfidi a lukutakanu kevananga e longi, mpangi ankento mu soneka kena mambu mamfunu kalenda sadila muna finkanda Longa. I bosi kuna nsuk’a lumingu, mpangi ankento ovaikidi muna salu kia umbangi yo sadila mana kalongokele muna lukutakanu.
