1. Nkia mambu Yave kemonanga muna nkangu andi?

YAVE WA NZAMBI “oyangalelanga nkangu andi.” (Nku. 149:4) O zaya e diambu diadi, kiese kiayingi dikututwasilanga. Yave omonanga e fu yeto yambote, ozeye nkia mpila muntu tulenda kituka ye okutusadisanga mu kala akundi andi. Muna kuma kiaki, avo tusikidi ye kwikizi muna yandi, okala se nkundi eto yakwele mvu.—Yoa. 6:44.

2. Ekuma akaka ke bekwikidilanga ko vo Yave zola kekubazolanga?

² Nanga vena ye mpangi olenda kukiyuvula: ‘Nzeye wo vo Yave ozolanga nkangu andi nze buka, kansi aweyi ndenda kadila ye ziku vo Yave okunzolanga?’ Nki kilenda fila mpangi mu kukiyuvula e kiuvu kiaki? Mpangi ankento Oksana * ona wamweswa e mpasi zayingi vava kakala nleke, wavova vo: “Vava yavubwa yo yantika sala se mviti a nzila, kiese kiayingi yakala kiau. Kansi vava vavioka mvu 15, yayantika yindula diaka e mambu mampasi mambwila vava yakala nleke. Yayindula vo kiakala diaka ye dienga dia Yave ko ye kiafwanukinua diaka o zola kwandi ko.” Mpangi ankento Yua, ona wamweswa mpe e mpasi vava kakala nleke, wavova vo: “Yayekola e zingu kiame kwa Yave kadi yazola kunyangidika. Kansi, yakala ye ziku vo kesinga kunzola ko.”

3. Nkia mambu tulongoka mu longi diadi?

³ Nze mpangi zole zazi tuyikidi, ongeye mpe otoma zolanga Yave, kansi olenda kala ye lukatikisu kana vo Yave zola kekuzolanga. Ekuma ofwete kadila ye ziku vo Yave zola kikilu kekuzolanga? Adieyi dilenda kusadisa mu sunda e ngindu zazi? Mu longi diadi, tuzaya e mvutu za yuvu yayi.

4. Ekuma dinina diavonza mu yindula vo Yave ke kutuzolanga ko?

⁴ Avo tuna ye ziku vo Yave okutuzolanga, tuvanga mawonso tulenda muna kunsadila kana nkutu vava dikalanga diampasi. Kuna diak’e sambu, avo tukedi ye lukatikisu vo Nzambi zola kekutuzolanga ‘e ngolo zeto zikuluka.’ (Nga. 24:10) Muna kuma kiaki, avo tuyoyele yo yindula vo Nzambi ke kutuzolanga ko ke tulenda zizidila e ntonta za Satana ko.—Efe. 6:16.

5. Adieyi diabwila ampangi ana bayindulanga vo Nzambi ke kubazolanga ko?

⁵ Akaka muna mpangi zeto bayantika yindula vo Yave ke kubazolanga ko. Muna kuma kiaki, bayoya muna mwanda. Mpangi James una vo nkuluntu, wavova vo: “Kana una vo isadilanga kuna Betele yo yangalela e salu kiame kia umbangi muna nkutakani a nding’a kinzenza, yayantika katikisa kana vo Yave wayangalelanga e salu kiame. Yalwaka nkutu mu tezo kia kukiyuvula: ‘Nga Yave owanga e sambu yame?’” Mpangi Eva una mpe mu salu kia ntangwa ke ntangwa, wavova vo: “Yalongoka vo diavonza mu yindula vo Yave ke kunzolanga ko kadi o vanga wo dilenda kakidila mawonso ovanganga muna salu kia Yave. Dilenda kufila mpe mu lembi yangalela diaka madia ma mwanda yo vidisa e kiese kiaku muna salu kia Yave.” Mpangi Michael una vo nkuluntu ye mviti a nzila a ngonde ke ngonde, wavova vo: “Avo kukwikilanga ko vo Nzambi zola kekuzolanga, zaya dio vo vengomoka ovengomoka muna nzil’a moyo.”

6. Adieyi tufwete vanga avo tuyindulanga vo Nzambi ke kutuzolanga ko?

⁶ E nona yayi isonganga vo diavonza mu yindula vo Yave ke kutuzolanga ko, kadi ediadi dilenda yoyesa lukwikilu lweto. Kansi, adieyi tufwete vanga avo tuyantikidi yindula vo Yave ke kutuzolanga ko? Tufwete vanga mawonso mu katula e ngindu zazi vana vau. Lomba kwa Yave kimana vana fulu ‘kia telamw’o moyo’ kavana ‘o luvuvamu lwa Nzambi luna luyingila ntim’aku ye makani maku.’ (Nku. 139:23; mvovo vana yand’a lukaya; Fili. 4:6, 7) Sungamena dio vo kuna ngeye mosi. Vena ye mpangi zankaka benuananga ye ngindu zazi zabendomoka za sia vo, Yave ke kubazolanga ko. Kana nkutu selo ya Yave yakwikizi kuna nz’ankulu banuana mpe ye ngindu zazi. Mosi muna yau i Paulu wa ntumwa, tala dina tulenda longoka muna mbandu andi.

7. Nkia mambu Paulu kanuananga mau?

⁷ Nga ezak’e ntangwa omonanga vo salu yayingi una yau ye diampasi mu lungisa e salu yayi yawonso? Avo i wau, otoma bakula una Paulu kamonanga. Katokanenanga kaka mpangi za nkutakani mosi ko, kansi za “nkutakani zawonso.” (2 Kor. 11:23-28) Nga kimbevo kilembi sasukanga una kiau kikufilanga mu vidisa e kiese kiaku? Paulu wanuananga ye ‘lusende muna nitu,’ i sia vo, kimbevo kina kiantokanesanga. Edi kazola vo kiafokoka. (2 Kor. 12:7-10) Nga okendalalanga mu kuma kia usumuki waku? Ezak’e ntangwa i wau mpe Paulu kamonanga. Wakiyikila vo “fwafwala kia muntu” mu kuma kia vita kanuananga mu vanga edi diambote.—Roma 7:21-24.

8. Nki kiasadisa Paulu mu zizidila e mpasi zandi?

⁸ Kana una vo Paulu wanuananga ye mambu mampasi, wakwamanana sadila Yave. Nki kiansadisa mu zizidila? Kana una vo Paulu wanuananga ye usumuki wandi, lukwikilu lwasikila kakala lwau muna lukûlu. Wazaya mpe nsilu a Yesu vo “konso ona osonga lukwikilu muna [Yesu] . . . moyo a mvu ya mvu kevua.” (Yoa. 3:16; Roma 6:23) Kieleka, Paulu wakwikilanga muna lukûlu. Wakala ye ziku vo Yave wakubama kena muna loloka awonso besumukanga avo bavilukidi o ntima.—Nku. 86:5.

9. Adieyi tulenda longoka muna mvovo mia Paulu miasonama muna Ngalatia 2:20?

⁹ Paulu wakwikilanga vo Nzambi watoma kunzolanga wau katuma Yesu kafwa mu kuma kiandi. (Tanga Ngalatia 2:20.) Tala e ziku kia diambu diadi muna mvovo miansuka mia sono kiaki. Paulu wavova vo: “Mwan’a Nzambi . . . wanzola yo kukiyekola muna wete diame.” Paulu kayindulanga ko vo Nzambi kalendi kunzola ko wau vo kakala muntu ambote ko. Kayindulanga mpe ko vo: ‘Diasazu mu bakula vo Yave ozolanga mpangi zame, kansi vo i mono kalendi kunzola ko.’ Paulu wasungamesa ampangi kuna Roma vo: “Kristu wafwa muna wete dieto ekolo twakala asumuki.” (Roma 5:8) Ke vena diambu ko dilenda kakidila Nzambi muna kutuzola.

10. Adieyi tulenda longoka muna sono kia Roma 8:38, 39?

¹⁰ Tanga Roma 8:38, 39. Paulu wakala kikilu ye ziku vo Nzambi zola kanzolanga. Wasoneka vo ke vena diambu ko “dilenda kutuvambula muna zola kwa Nzambi.” Paulu wazaya una Yave kasongela luzindalalu kwa nkangu a Isaele. Wazaya wo mpe vo Yave wamfwil’e nkenda. Muna mvovo miankaka, Paulu wazola  vova vo: ‘Wau vo Yave wavana o Mwan’andi kafwa mu kuma kiame, nga mfwete katikisa vo zola kekunzolanga?’—Roma 8:32.

11. Kana una vo Paulu wavola masumu meyikwanga muna 1 Timoteo 1:12-15, ekuma kakadila ye ziku vo Nzambi wanzolanga?

¹¹ Tanga 1 Timoteo 1:12-15. Nanga Paulu wakendalalanga kikilu vava kayindulanga mambu mawonso mambi kavanga vitila kakituka Nkristu. Kadi yandi kibeni wavova vo ‘osundidi’ asumuki awonso. Vitila Paulu kazaya e ludi, wabangikanga Akristu muna mbanza zayingi, wasianga nkutu ankaka muna pelezo yo tonda vo ankaka bavondwa. (Mav. 26:10, 11) Nga olenda yindula una Paulu kamonanga avo muna lukutakanu owananene yo nleke una vo Nkristu ona wafwilwa mase mu kuma kia lubangamu lwandi? Dialudi vo wakendalalanga kikilu. Paulu wakibanzanga mu kuma kia mambu mambi kavanga, kansi wazaya wo vo kalendi mo soba ko. Paulu watambulwila vo Kristu wafwa mu kuma kiandi, i dianu kasonekena ye ziku kiawonso vo: “Muna nkenda za Nzambi i nginina owu ngina.” (1 Kor. 15:3, 10) Adieyi tulenda longoka? Uyikwikidisa vo Kristu wafwa mu kuma kiaku yo ziula e nzila kimana wakala ye ngwizani ambote yo Yave. (Mav. 3:19) Kuna kwa Nzambi edi disundidi o mfunu i mana tuvanganga owau ye mana tuvanga kuna ntwala, ke mu masumu twavola ko mu lumbu yavioka, kiakala vo muna kolo kiakina Mbangi za Yave twakala yovo ve.—Yes. 1:18.

12. Vava tumonanga vo ke tuna mfunu ko yovo ke twafwanua zolwa ko, aweyi e sono kia 1 Yoane 3:19, 20 kilenda kutusadisila?

¹² Vava oyindulanga dina Yesu kavanga muna loloka masumu maku, nanga olenda vova vo: ‘Kifwanukinu lukau lwalu ko.’ Ekuma olenda kadila ye ngindu zazi? O ntim’eto walembi lunga, ulenda kutuvuna yo kutufila  mu yindula vo ke tuna mfunu ko yovo ke tufwanukinu zolwa ko. (Tanga 1 Yoane 3:19, 20.) Vava tulwakilwanga kwa ngindu zazi, tufwete sungamenanga vo “Nzambi osundidi ntima mieto.” Kana nkutu vava tuyindulanga vo Yave ke kutuzolanga ko yovo ke kutuloloka ko, Se dieto dia zulu okwamanana kutuzola yo kutuloloka. Tufwete kiyikwikidisa vo Yave zola kekutuzolanga. Muna kiyikwikidisa, tufwete longokanga e Diambu dia Nzambi ntangwa zawonso, sambanga yo kalanga kumosi ye mpangi zeto. Ekuma dinina diamfunu mu vanga e mambu mama?

13. O longoka e Diambu dia Nzambi, aweyi dilenda kutusadisila? (Tala e babu “ Una e Diambu dia Nzambi Diabasadisila.”)

¹³ O longoka e Diambu dia Nzambi konso lumbu, dikusadisa mu toma bakula e fu ya Yave. Obakula una ketoma kuzolelanga. Vava obadikanga e Diambu dia Nzambi konso lumbu, dilenda kusadisa mu yindula mu mpila yakiá yo “singika mambu” muna nyindu aku yo ntim’aku. (2 Tim. 3:16) Mpangi Kevin una vo nkuluntu ona wanuana ye ngindu za sia vo kena mfunu ko, wavova vo: “O tanga yo badika o Nkunga 103 diansadisa mu singika e ngindu zame mu bakula vo Yave otomene kunzaya.” Mpangi Eva ona tuyikidi kala, wavova vo: “Kuna mfoko a konso lumbu, ivaulanga e ntangwa mu badika e ngindu za Yave. Ediadi dikumpananga luvuvamu lwa ntima yo kumika lukwikilu lwame.”

14. Aweyi e sambu kilenda kutusadisila?

¹⁴ Sambanga ntangwa zawonso. (1 Tes. 5:17) Avo ozolele vanga kikundi yo muntu, ofwete mokenanga yandi ntangwa zawonso yo kumvovesa una omonanga. I diau mpe divavuanga muna vanga kikundi yo Yave. Vava tusambanga muna kunzayisa una tumonanga muna ntima, mana tuyindulanga ye mana mekututokanesanga, tusonganga vo tukumbundanga e vuvu yo zaya vo zola kekutuzolanga. (Nku. 94:17-19; 1 Yoa. 5:14, 15) Mpangi Yua ona tuyikidi kala, wavova vo: “Vava isambanga kwa Yave, kikunzayisanga kaka ko e mambu mana mambwididi muna lumbu. Kansi, ikunzayisanga mpe mana iyindulanga ye mana imonanga muna ntima. Ediadi dikunsadisanga mu badikila Yave ke nze mfumu a salu ko, kansi nze Se ona otoma zolanga wan’andi.”—Tala e babu “ Nga Watanga Kala Nkanda Wau?”

15. Aweyi Yave kesongelanga vo ozolanga konso muntu mu yeto?

¹⁵ Kalanga kumosi ye mpangi zaku; kadi oyau i lukau katuvana o Yave. (Yak. 1:17) O Se dieto dia zulu osonganga vo okutuzolanga muna kutuvana e mpangi zamakala ye mpangi zamakento muna nkutakani, ana ‘bekutuzolanga ntangwa zawonso.’ (Nga. 17:17) Muna  nkand’andi kasonekena esi Kolosai, Paulu wayikila Akristu ana bansadisa vo “nto a lufiaulwisu.” (Kol. 4:10, 11) Kana nkutu Kristu Yesu lusadisu lwa akundi andi kavuanga o mfunu, kiakala ambasi yovo wantu. Wavutulanga mpe matondo muna lusadisu lwau.—Luka 22:28, 43.

16. Aweyi akundi ambote bekutusadisilanga mu finama Yave?

¹⁶ Nga ovavanga yo tambulwila o lusadisu luna ampangi muna nkutakani bekuvananga? O zayisa e ntokani zeto kwa mpangi azikuka ke sinsu kia lutovoko ko, kadi ediadi dilenda kututanina. Tala dina kavova mpangi James, ona tuyikidi kala: “O vanga kikundi ye mpangi zazikuka ditoma kunsadisanga. Vava ilwakilwanga kwa ngindu zabendomoka, akundi awaya bekungwinikinanga kuna luzindalalu lwawonso yo kunsungamesa vo zola bekunzolanga. Muna lusadisu lwau, ibakulanga vo Yave okunzolanga ye okundunga-ndunganga.” Kieleka, diamfunu kikilu mu vanga kikundi ye mpangi zeto muna nkutakani.

17-18. Nani tufwete kwikila? Ekuma?

¹⁷ Satana ozolele vo walembi sia e ngolo za vanga edi diambote. Ozolele kukwikidisa vo Yave ke kuzolanga ko ye kufwanukinu vuluzwa ko. Kansi, nze una tumwene, ediadi ke dialudi ko.

¹⁸ Yave otoma kuzolanga. Mfunu kikilu wina vana meso mandi. Nze Yesu, avo unlemvokele ‘osikila muna zola kwandi yakwele mvu.’ (Yoa. 15:10) Muna kuma kiaki, kukwikila muna mvovo mia Satana ko ngatu muna ntim’aku. Kansi kwikila muna Yave, ona omonanga e fu yambote ina konso muntu mu yeto kesonganga. Ozevo, kala ye ziku vo Yave “oyangalelanga nkangu andi” kumosi yo ngeye.