E ndofi “i nsilu una muntu kesianga vo ovanga diambu kingandi, nkumbu miayingi oyikanga Nzambi se . . . mbangi.” E ndofi ilenda diwa muna mvovo yovo muna masono.

Akaka beyindulanga vo diambi mu dia e ndofi kadi Yesu wavova vo: “Ke nudie nkutu ndofi ko, . . . Yambula e mpov’eno ‘Elo’ yakala elo, e ‘Ve’ dieno, ve, kadi konso dina dikulamene, kwa ndiona wambi ditukidi.” (Mat. 5:33-37) Kieleka, Yesu wazaya wo vo o Nsiku a Mose wasikidisanga vo Aneyisaele badia e ndofi muna maka mambu. Muna kuma kiaki, e selo yayi yakwikizi ya Nzambi badianga e ndofi. (Tuku 14:22, 23; Luv. 22:10, 11) Yesu wazaya wo mpe vo Yave wadia e ndofi mu kuma kia yandi kibeni. (Ayib. 6:13-17) Ozevo, Yesu kavova ko vo ke tufwete dia ndofi ko. Kansi, walukisa vo ke tulendi dia ndofi ko muna mambu makondwa mfunu ngatu dia e ndofi mu nkatu-nkatu. Tufwete lungisanga e nsilu mieto kadi i diau Yave kevavanga vo twavanga.

Ozevo, adieyi ofwete vanga avo olombelo vo wadia e ndofi? Diantete, kala ye ziku kia mana ozolele dila e ndofi. Avo kuna ye ziku ko, diambote walembi dia e ndofi. E Diambu dia Nzambi dikutulukisanga vo: “Diambote walembi sia nsilu, ke mu sia nsilu ko yo lembi wo lungisa.” (Kim. 5:5) Diazole, fimpa e nkanikinu mia Bibila mivovelanga dia e ndofi, i bosi vanga diambu muna lungisa e ndofi aku mun’owu wa ntona zaku zatoma longwa. Nkia nkanikinu miankaka mia Bibila olenda badika?

E ndofi zankaka ngwizani zikalanga ye luzolo lwa Nzambi. Kasikil’owu, Mbangi za Yave besilananga o nsilu vava bekazalanga. O nsilu wau una se ndofi. Vana meso ma Nzambi yo wantu, awana bekazalanga besilananga o nsilu wa zolana, lunga-lunga yo zitisa muntu yo nkwandi ‘ekolo bezinga vamosi ova nza’. (Akazi akaka nanga ke bevovanga mvovo miami ko. Kana una vo i wau, ndofi bedianga vana ntadisi a Nzambi.) Vava bedianga e ndofi yayi, bekitukanga yakala yo nkento ye bafwete kwamanana zitisa e ndofi yayi muna zingu kiau kiawonso. (Tuku 2:24; 1 Kor. 7:39) Diamfunu kikilu mu dia e ndofi muna longo vava wantu bekazalanga kadi ngwizani ina yo luzolo lwa Nzambi.

E ndofi zankaka ke zikalanga ngwizani ko yo luzolo lwa Nzambi. Akristu akieleka ke balendi dia ndofi ko muna sadila nkele mu tanina e nsi au yovo kulula e kwikizi kiau muna Nzambi. Avo bavangidi wo, nkanikinu mia Nzambi bekulula. Wau vo Akristu ke ba “nza ko,” ke bafwete kuyisianga mu mambu ma mbumba ma nza yayi ko ngatu yikama e vita.—Yoa. 15:19; Yes. 2:4; Yak. 1:27.

E ndofi zankaka zidiwanga mun’owu wa ntona za muntu. Ezak’e ntangwa, vitila twabaka e nzengo za dia ndofi, tufwete toma fimpa luludiku lwa  Yesu luvovanga vo, “nuvana kwa Kaisa ina ya Kaisa, kwa Nzambi ina ya Nzambi.”—Luka 20:25.

Muna bonga e nona, yindula vo Nkristu ozolele vua e kisi nsi kia nsi yankaka yovo baka passaporte ye obakwidi vo kafwete teka dia e ndofi vitila kabaka e nkanda miami. Avo muna dia e ndofi yayi divava vo o Nkristu kakulula o nsiku a Nzambi, e ntona zandi zalongwa mun’owu wa Bibila, zikunsadisa mu lembi dia e ndofi yayi. Kansi, o luyalu olenda kunyambula vo kasoba e miaka mvovo muna nkanda wa ndofi kimana kakala ye ntona zavuvama.

O soba e miaka mvovo muna nkanda wa ndofi, ngwizani dina ye nkanikinu una muna Roma 13:1 uvovanga vo: “Wantu awonso yambula basakalela akwa wisa.” Muna kuma kiaki, o Nkristu olenda mona vo ke diambi ko mu dia e ndofi muna diambu dina Nzambi kevingilanga vo Akristu bavanga.

Diamfunu mpe muna lemvokelanga e ntona zaku zalongwa mun’owu wa Bibila, avo olombelo vo wasadila e lekwa yovo vanga e sinsu ekolo odianga e ndofi. Muna tandu kiantete esi Roma ye Nsekutia (i sia vo, wantu balembi temoka), badianga e ndofi muna sadila e nsosolo miau mu lomba lusadisu kwa nzambi a vita muna songa vo kimbangi kasianga o muntu wafwana bundwa e vuvu. Esi Ngerekia bazangulanga o koko muna zulu ekolo badianga e ndofi. E sinsu kiaki, kiasadisanga o muntu mu sungamena vo vena yo nzambi ankuma ona omonanga dina o muntu kavovele yo vanga, ona o wantu betel’e mbalu.

Dialudi vo e selo ya Yave ke bedianga ndofi ko muna sadila konso lekwa kisunzulanga e nsi ye kina e ngwizani ye nsambil’aluvunu. Kansi, adieyi ovanga avo kuna mbazi a nkanu balombele vo wasia o koko kwaku vana Bibila yo dia e ndofi vo ludi kaka ovova? Muna diambu diadi, nanga olenda baka e nzengo zavanga wo kadi Bibila kiyikanga mpe wantu akwikizi ana bavanga e sinsu ekolo badianga e ndofi. (Tuku 24:2, 3, 9; 47:29-31) Kansi, diamfunu mpe mu sungamenanga vo avo odidi e ndofi yayi, disonga vo osia kimbangi vana ntadisi a Nzambi vo ludi kaka ovova. Ofwete kala wakubama muna vana e mvutu za ziku muna konso kiuvu bekuvanga.

Wau vo e ngwizani eto yo Yave mfunu kikilu ina kwa yeto, tufwete teka samba vitila twadia konso ndofi. Tufwete mpe kala ye ziku vo e ndofi yayi ke itokanesa ntona zeto ko ngatu kulula nkanikinu mia Bibila. Muna kuma kiaki, avo obakidi e nzengo za dia e ndofi ofwete kaka ye ziku vo kusinga yo kulula ko.—1 Pet. 2:12.