O Nsiku a Mose wayikanga dina diafunzulanga o muntu, nze vaika menga yovo maza muna nitu, kimbevo kia wazi yovo simba vimbu dia muntu yovo bulu kiafwa. O Nsiku wayikanga mpe dina muntu kafwete vanga mu kala diaka wavelela. Diavavanga vo kakela kimenga, yowela yovo zazilwa maza.—Fuka, kapu kia 11-15; Ntalu, kapu kia 19.

Alongi a Kiyuda, ana bayikilwanga vo rabi, bakudilanga diaka nsiku mia yau kibeni vana ntandu a nsiku miami. Nkanda mosi uvovanga vo alongi awaya mambu mayingi bakudikilanga mu kuma kia dina dilenda funzula muntu ye una kalenda funzulwila akaka. Alongi basianga nsiku mu kuma kia salanganu yovo lekwa ilenda funzuka ye ina ke ilendi funzuka ko ye mana o wantu bafwete vanga muna kuyivelelesa.

Atantu a Yesu banyuvula vo: “Ekuma alongoki aku ke bezitisilanga lusansu lwa akulu ko, kadi bedianga muna moko mafunzuka?” (Maku 7:5) Afarisi awaya ke bayika diambu dia kala wavelela ko, i sia vo, sukula moko vitila muntu kadia. Bakudikila nsiku vo vitila muntu kadia, kafwete yazilwa maza muna moko. O nkanda tuyikidi kala uvovanga vo alongi “bafilananga e mpaka kana nkia kinzu kifwete sadilwa muna yazila maza, nkia mpil’a maza, nani ofwete mo yazila ye vana mafwete lwaka e maza muna koko.”

Aweyi Yesu kabadikilanga nsiku miami miasokwanga kwa wantu? Wavovesa afidi a nsambil’a Kiyuda vo: “Yesaya watoma sakula mu kuma kieno, yeno akwa kivunina, una diasonama vo, ‘Wantu awaya muna nua kaka bekunzitisilanga, kansi e ntima miau miavavuka oku ngina [Yave]. Mu nkatu bekunsambilanga, kadi malongi mau mu nkanikinu mia wantu metukanga.’ Nubembwele nkanikinu mia Nzambi yo lunda nkanikinu mia wantu.”—Maku 7:6-8.