Lusansu lwasoneka Matai mu kuma kia luwutuku lwa Yesu ye mvu miantete mia zingu kiandi, lwaswaswana ye lusansu lwasoneka Luka kadi konso nsoneki wasia e sungididi muna ngindu ye mambu ma muntu ankaka.

O lusansu lwa Matai lutoma vovelanga mambu matadidi e zingu kia Yosefe. Luyikanga dina Yosefe kavanga vava kazaya vo Maria oyimiti ye vava kalota e ndozi ina mbasi kansasila e diambu diadi ye una kalandila luludiku lwa mbasi. (Matai 1:19-25) Lusansu lwa Matai lusonganga mpe una mbasi kalukisila Yosefe muna ndozi kimana katinina kuna Engipito ye esi nzo andi ye una kalemvokela luludiku lwalu. Matai okutuvovesanga vo Yosefe walota ndozi yankaka. Muna ndozi yayi, mbasi wanzayisa vo kavutuka kuna Isaele. Yosefe wavutuka ye esi nzo andi yo kwenda zingila muna mbanz’a Nazarete. (Matai 2:13, 14, 19-23) Muna kapu yole yantete ya nsangu kasoneka, Matai wayika nkumbu a Yosefe nkumbu nana, kansi Maria nkumbu yá kaka.

Kansi, o lusansu lwa Luka lutoma vovelanga Maria. Luyikanga lusansu lwa Maria vava kakingulwa kwa mbasi Ngambiele, vava kayenda kingula yitu kiandi Elisabete ye mana kavova mu kembelela Yave. (Luka 1:26-56) Luyikanga mpe dina Simone kavovesa Maria mu kuma kia mpasi zadi bwila Yesu kuna sentu. I bosi, Luka wayika e kolo kina Yesu kakingula e tempelo kumosi ye yitu yandi vava kakala ye mvu 12. Muna lusansu lwalu, Luka wayika e mvovo mia Maria, ke mia Yosefe ko. Okutuzayisanga mpe una kamona o Maria mu kuma kia mambu mama. (Luka 2:19, 34, 35, 48, 51) Muna kapu yole yantete ya nsangu kasoneka, Luka wayika nkumbu a Maria nkumbu 12, kansi Yosefe nkumbu 3 kaka. Muna kuma kiaki, Matai watoma vovela mana Yosefe kayindulanga yo vanga. Kansi, Luka watoma vovela e ngindu za Maria ye mana mambwila.

O luvila lwa Yesu mu mpila yaswaswana mpe luyikilwanga muna nsangu zasoneka Matai yo Luka. Matai wayika luvila lwawutukila Yosefe yo songa vo wau vo Yesu mwana ansansi a Yosefe, wakala yo nswa wa vuanda vana kunda kia kintinu kia Davidi. Ekuma? E kuma kadi Yosefe mu luvila lwa Davidi wa ntinu kawutukila, muna nzil’a Solomo wa mwan’a Davidi. (Matai 1:6, 16) Kansi, Luka wayika luvila lwawutukila Maria yo songa vo Yesu wakala yo nswa wa vuanda vana kunda kia kintinu kia Davidi “mun’owu wa nitu.” (Roma 1:3) Ekuma? E kuma kadi Maria mu luvila lwa Davidi wa ntinu kawutukila muna nzil’a Natani wa mwan’a Davidi. (Luka 3:31) Kansi, ekuma Luka kayikila Maria ko vo mwan’a Eli wa se diandi? E kuma kadi nkanda miayingi mia lusansu lwa nz’ankulu nkumbu za wan’amakala kaka mitoma vovelanga. Muna kuma kiaki, vava Luka kavovela Yosefe yo kunyikila vo mwan’a Eli, wantu babakulanga vo Yosefe nzitu a Eli kakala.—Luka 3:23.

O lusansu lwa luvila lwawutukila Yesu lwasoneka Matai ye Luka, lusonganga vo Yesu i Masia ona Nzambi kasia o nsilu. E diambu dia sia vo Yesu mu luvila lwa Davidi kawutukila, diatoma zayakana kw’awonso, kana nkutu Afarisi ye Asaduki ke bafidisanga dio mpaka ko. O lusansu lwasoneka Matai ye Luka mu kuma kia luvila lwawutukila Yesu, lukumikanga lukwikilu lweto yo kutukwikidisa vo e nsilu miawonso mia Nzambi lungana milungana.