1. Nkia tima tukalanga diau yeto awonso mu kuma kia yitu yeto?

MPANGI mosi ankento una ye nkumbu a Pauline * wavova vo: “Vava yayantika longoka e ludi, yazola vo yitu yame yawonso twakala kumosi muna Paradiso. Yazolanga vo nkaz’ame Wayne yo mwan’eto ayakala basadila Yave.” Nga una ye yitu ana ke besadilanga Yave ko? Nze mpangi Pauline, nanga ozolanga vo e yitu yaku basadila Yave kumosi yo ngeye.

2. Nkia yuvu tubadika mu longi diadi?

² Ke tufwete komekenanga yitu yeto ko mu tambulwila e nsangu zambote. Kansi, tulenda kubakasakesa kimana baziula e ntima miau yo wá e nsangu zambote. (2 Tim. 3:14, 15) Ekuma tufwete silanga umbangi kwa yitu yeto? Ekuma tufwete kuyisilanga vana fulu kiau? Adieyi tulenda vanga muna sadisa e yitu yeto kimana bazola Yave? Aweyi mpangi zawonso muna nkutakani balenda kutusadisila?

3. Landila e sono kia 2 Petelo 3:9, ekuma tufwete silanga umbangi kwa yitu yeto?

³ Ke kolo ko, Yave ofwasa e nza yayi. Awana kaka ‘bena kikilu ye tima dia vua moyo a mvu ya mvu’ bevuluka. (Mav. 13:48) Ntangwa ye ngolo zayingi divavanga muna sila umbangi kwa wantu a zunga kieto. Muna kuma kiaki, tuzolele mpe vo yitu yeto basadila Yave kumosi yo yeto. Yave wa Se dieto dianzodi “kazolele ko vo muntu kafwa, kansi, awonso baluaka muna luviluku lua ntima.”—Tanga 2 Petelo 3:9.

4. Nkia vilwa tulenda vanga vava tusilanga umbangi kwa yitu yeto?

⁴ Tufwete sungamenanga vo vena ye mpila yambote ye mpila  yambi ya samunuina e nsangu za luvuluzu. Kasikil’owu, vava tusilanga umbangi kwa wantu ana ke tuzeye ko, nanga tukubavoveselanga kuna ngemba zawonso. Kansi vava tusilanga umbangi kwa yitu yeto, nanga ke tukubavoveselanga ku ngemba ko.

5. Adieyi tufwete sungamenanga vitila twasila umbangi kwa yitu yeto?

⁵ Ayingi muna yeto nanga tukuyibanzanga vava tuyindulanga o nkumbu wantete twateza sila umbangi kwa yitu yeto yo mona vo ke twavangila wo mu mpila yambote ko. Paulu wa ntumwa wavovesa Akristu vo: “E mpov’eno yambula yakala yangemba ntangwa zawonso, yasiwa o mungwa, kimana nwazaya una nufwete vanina e mvutu kwa konso muntu.” (Kol. 4:5, 6) Diambote mu sungamenanga o luludiku lwalu vava tumokenanga ye yitu yeto. Avo ke wau ko, tulenda kubalweka muna mvovo mieto vana fulu kia kubasadisa kimana batuwá.

6-7. Yika e nona kisonganga o mfunu wa kuyisia vana fulu kia yakala yovo nkento ona ke sambilanga Yave ko.

⁶ Uyisia vana fulu kia muntu ankaka. Mpangi Pauline ona tuyikidi kala wavova vo: “Kuna lubantiku, yazolanga kaka mokena yo nkaz’ame oma ma Nkand’a Nzambi. Ke twamokenanga mambu ma lumbu ke lumbu ko.” Kansi, Wayne wa nkaz’a mpangi Pauline kazaya mayingi ko mu kuma kia Nkand’a Nzambi. Kabakulanga ko mana o nkaz’andi kavovanga. Kuna kwa yandi, mpangi Pauline mambu ma dibundu diandi kaka kayindulanga. Watokananga kadi wabanzanga vo nkaz’andi mu dibundu dia vonza kayisidi ye vunua kavunuanga.

⁷ Mpangi Pauline wavova vo ntangwa yayingi kaviokesanga muna fuku ye nsuk’a lumingu vamosi ye mpangi zandi za mwanda muna tukutakanu, muna salu kia umbangi ye muna  nzo zau. Wavova vo: “Ezak’e ntangwa, o nkaz’ame kawananga muntu ko kuna nzo, kinsona kamonanga.” Ke diampasi ko mu bakula vo Wayne wamonanga viangi kia nkaz’andi yo mwan’andi. Wayne kazayanga ko kana nkia mpila wantu bakalanga vamosi yo nkaz’andi, wamonanga vo akundi ampa a mpangi Pauline yau basunda o mfunu ke mu yandi ko. Muna kuma kiaki, Wayne wazola nkutu vonda o longo. Nga olenda yindula dina mpangi Pauline kafwana vanga mu kuyisia vana fulu kia nkaz’andi?

8. Landila e sono kia 1 Petelo 3:1, 2, e yitu yeto mu nki betoma sianga e sungididi?

⁸ Songanga mbandu ambote. E yitu yeto betoma sianga e sungididi mu mana tuvanganga, ke mu mana tuvovanga ko. (Tanga 1 Petelo 3:1, 2.) Mpangi Pauline watoma zaya e diambu diadi. Wavova vo: “Yazaya wo vo nkaz’ame watoma kutuzolanga, kakala ye luzolo lwa vonda longo ko. Kansi, muna kuma kia mavumisa mandi ma vonda o longo, yabakula vo mfwete yantika vangila mambu mun’owu wa luzolo lwa Yave. Vana fulu kia vova kwayingi, diavavanga vo yasonga mbandu ambote muna mavangu mame.” Mpangi Pauline wayambula komekena Wayne wa nkaz’andi mu mokena oma ma Nkand’a Nzambi. Wayantika mokena yo nkaz’andi mambu ma lumbu ke lumbu. Wayne wamona vo nkaz’andi wakituka se nkwa luvuvamu, o mwan’au wayima fu yambote. (Nga. 31:18, 27, 28) Vava Wayne kamona una malongi ma Nkand’a Nzambi matwasila nluta kwa esi nzo andi, waziula o ntima yo tambulwila e nsangu za Nkand’a Nzambi.—1 Kor. 7:12-14, 16.

9. Ekuma tufwete kwamanena sadisila e yitu yeto?

⁹ Kwamanana sadisa e yitu yaku. Yave okutusonganga  mbandu ambote. Okwamanananga vana o wantu e lau dia tambulwila e nsangu zambote kimana bavua moyo a mvu ya mvu. (Yer. 44:4) Paulu wa ntumwa wavovesa Timoteo vo kakwamanana sadisa akaka. Ekuma? Kadi muna vanga wo, wadi kuyivuluza yo vuluza mpe awana bawanga e nsangu kasamunanga. (1 Tim. 4:16) Wau vo tuzolanga e yitu yeto, tuzolele vo yau mpe bazaya e ludi kia Diambu dia Nzambi. Kuna kwalanda, e mvovo ye mavangu ma mpangi Pauline matwasa nluta kwa esi nzo andi. Owau una ye kiese kia sadila Yave kumosi yo nkaz’andi. Yau awole besalanga se aviti a nzila, o mpangi Wayne watumbikwa mpe se nkuluntu.

10. Ekuma tufwete kadila ye luzindalalu?

¹⁰ Kala ye luzindalalu. Vava twayantika lemvokela Nzambi, twabaka e nzengo za soba e mpil’a zingu kieto ye dibundu twasambilanga. Dilenda kala diampasi kwa yitu yeto mu tambulwila e nsobani zazi. Nkumbu miayingi, e diambu diantete bemonanga i dia sia vo ke tuyikamanga diaka nkinzi mia mabundu ko ngatu kuyisia mu mambu ma luyalu. Kuna lubantiku, akaka muna yitu yeto balenda kutufungila makasi. (Mat. 10:35, 36) Kansi, ke tufwete yindula ko vo ke balendi soba ko. Avo tuyambwidi kubasadisa kimana babakula mana tukwikilanga, ediadi dina nze yeto tukubafundisanga yo kubabadikila vo ke bafwana ko muna vua moyo a mvu ya mvu. Yave kwa Yesu kavana e wisa kia fundisa wantu, ke kwa yeto ko. (Yoa. 5:22) Avo tusongele luzindalalu kwa yitu yeto, kuna kulanda balenda tambulwila e nsangu zambote.—Tala e babu “ Sadila Nzil’eto ya Internete muna Longa.”

11-13. Adieyi olongokele muna mpila ina mpangi Alice kakadila ye mase mandi?

¹¹ Kala nkwa ngemba, kansi kuyambula ko vo akaka basoba e nzengo zaku. (Nga. 15:2) Badika e nona kia mpangi Alice. Walongoka mu kuma kia Yave vava kazingilanga kwandá ye mase mandi, ana ke bakwikilanga mu Nzambi ko yo kuyivana muna mambu ma luyalu. Wabakula vo kafwete zayisa kwa mase mandi e mambu mambote kalongokanga. Mpangi Alice wavova vo: “Avo ovingidi kwayingi mu zayisa kwa yitu yaku e mambu mampa okwikilanga, balenda kendalala kwayingi.” Wasonekenanga mase mandi e nkanda, wabayuvulanga e ngindu zau mu kuma kia malongi ma Nkand’a Nzambi oma malenda tunta e sungididi kiau, nze fu kia zola. (1 Kor. 13:1-13) Wavutulanga matondo kwa mase mandi mu kuma kia mpila bansansila yo kunlunga-lunga. Wabatwikilanga mpe tukau. Vava kakingulanga mase mandi, wasadisanga ngudi andi muna salu ya nzo. Entete, mase mandi ke bayangalala ko vava mpangi Alice kabazayisa oma ma lukwikilu lwandi.

¹² Vava mpangi Alice kakalanga kuna nzo vamosi ye mase mandi, watatidila e fu kiandi kia tanga o Nkand’a Nzambi lumbu yawonso. Mpangi Alice wavova vo: “Ediadi diasadisa ngudi ame mu bakula vo Nkand’a Nzambi mfunu kikilu wina kwa mono.” Kuna kwalanda, se dia mpangi Alice wabaka e nzengo za longoka oma ma Nkand’a Nzambi mu zaya e kuma o mwan’andi kasobela. Wavavanga solola vilwa muna Nkand’a Nzambi. Mpangi Alice wavova vo: “Yankayila Nkand’a Nzambi yo soneka mo mambu mamfunu malenda simba o ntim’andi.” Nkia nluta diatwasa? Vana fulu kia solola vilwa, mana o se dia mpangi Alice katanganga muna Nkand’a Nzambi masimba kikilu o ntim’andi.

¹³ Ke tufwete yambula ko vo akaka basoba e nzengo zeto kana nkutu vava tubangikwanga. (1 Kor. 4:12b) Kasikil’owu, mpangi Alice wasiwa kitantu kwa ngudi andi. Wavova vo: “Vava yavubwa, o ngudi ame wampovesa  vo i mwan’ambi.” Adieyi mpangi Alice kavanga? Wakudikila vo: “Kiazola soba e nzengo zame ko mu kuma kia dibundu diame diampa. Muna kuma kiaki, kuna luzitu lwawonso yasonga kwa ngudi ame vo kilendi soba nzengo zame ko za kala Mbangi a Yave. Yavovesa o ngudi ame vo itoma kunzolanga. Yeto awole twadila, i bosi yanlambila madia mambote. Tuka muna lumbu kiakina, o ngudi ame wayantika bakula vo Nkand’a Nzambi ukunsadisanga mu kala ye fu yambote.”

14. Ekuma ke tufwete yambulwila ko vo e yitu yeto basoba e nzengo zeto za sadila Yave?

¹⁴ Ntangwa divavanga kwa yitu yeto mu bakula vo kuna kwa yeto, o sadila Yave diambu diamfunu kikilu. Kasikil’owu, vava mpangi Alice kabaka e nzengo za sala se mviti a nzila vana fulu kia vanga dina mase mandi bazola mu kuma kiandi, o ngudi andi wadila diaka. Kansi mpangi Alice kasoba nzengo zandi ko. Wavova vo: “Avo oyambwidi vo yitu yaku basoba e nzengo zaku mu diambu dimosi, balenda vava diaka soba e nzengo zaku muna mambu mankaka. Kansi, avo osongele ngemba kwa yitu yaku yo tatidila nzengo zaku, akaka muna yitu yaku balenda kuwila.” I diau diabwila mpangi Alice. O unu, mase mandi besalanga se aviti a nzila, o se diandi watumbikwa se nkuluntu.

15. Landila e sono kia Matai 5:14-16; ye kia 1 Petelo 2:12, aweyi ‘mavangu mambote’ ma wantu akaka malenda sadisila yitu yeto?

¹⁵ Muna lusadisu lwa ‘mavangu mambote’ ma selo yandi, Yave otuntanga wantu kimana bansadila. (Tanga Matai 5:14-16; 1 Petelo 2:12.) Avo nkaz’aku ke Mbangi a Yave ko, nga  e mpangi za nkutakani banzeye? Mpangi Pauline ona tuyikidi kala, wabokelanga ampangi kuna nzo andi kimana Wayne wa nkaz’andi kabazaya. Wayne osungamenanga una mpangi mosi kansadisila mu toma bakula aki nani i Mbangi za Yave. Wavova vo: “Wavaula lumbu kiamvimba kia salu kimana keza kuna nzo eto yo tala yame nsaka za somba. Yavova muna nsi a ntima: ‘Kinga e Mbangi za Yave mpe sakana kwau besakananga!’”

16. Ekuma tufwete bokelelanga yitu yeto beza muna tukutakanu tweto?

¹⁶ E mpila yambote tulenda sadisila e yitu yeto i kubabokela beza muna tukutakanu tweto. (1 Kor. 14:24, 25) O lukutakanu lwantete kayenda o Wayne i lwa Luyindulu, kadi mu nkokela lwavangama kuna mfoko a salu ye ke lwazingila ko. Wavova vo: “Kiabakula mawonso ko mavovua muna longi, kansi isungamenanga o wantu ana bayiza kunkayisa yo toma kuntambula. Bansimba muna koko ye kiese kiawonso. Yabakula vo wantu ambote.” Wayizayila akazi mosi basonganga e ngemba kwa Pauline yo mwan’andi yo kubasadisa mu kwenda muna tukutakanu ye mu salu kia umbangi. Muna kuma kiaki, vava Wayne kabaka e nzengo za toma bakula mana Pauline kakwikilanga, walomba kwa yakala kimana kayantika longoka yandi o Nkand’a Nzambi.

17. Mu nkia diambu ke tufwete kuyitumbilanga ko? Ekuma tufwete kwamanena sadisila yitu yeto?

¹⁷ Tuna ye vuvu vo e yitu yeto besinga kutuyikama muna sadila Yave. Kana una vo tuvanganga mawonso muna sadisa e yitu yeto bakituka selo ya Nzambi, nanga ayingi muna yau ke betambulwilanga ludi ko. Avo i wau, ke tufwete kuyitumba ko mu kuma kia nzengo zau. Ke tulendi komekena muntu ko kimana katambulwila mana tukwikilanga. Kansi, avo yitu yaku bamwene e kiese una kiau wau vo Yave osadilanga, ediadi dilenda kubafila mu soba e ngindu zau. Sambanga mu kuma kiau yo mokenanga yau kuna ndekwa zawonso. Kuyoyi ko, kwamanana kubasadisa. (Mav. 20:20) Kala ye ziku vo Yave osambula e ngolo ovanganga. Avo yitu yaku bawididi, besinga vuluzwa.