1. Adieyi Davidi kavova mu kuma kia lulembamu lwa Yave?

NGA tulenda vova ye ziku kiawonso vo Yave nlembami? Ingeta. Lumbu kimosi, Davidi wavova vo: “Umpene ngubu aku ya luvuluzu, lulembamu lwaku luntundidikidi.” (2 Sam. 22:36; Nku. 18:35) Vava Davidi kasoneka e mvovo miami, nanga wasungamena e ntangwa ina Samuele wa ngunza kayenda kuna nzo a se diandi muna kusa ndiona wadi kituka se ntinu a Isaele. Davidi mwana wansuka kakala muna wana nana, kansi wasolwa kwa Yave muna vinga vana fulu kia Saulu wa Ntinu.—1 Sam. 16:1, 10-13.

2. Adieyi tulongoka mu longi diadi?

² Davidi wakwikila kikilu muna mvovo mia ntozi a Nkunga wa 113, ona wavova mu kuma kia Yave vo: “Oyenzamanga katala e zulu ye ntoto, ozangula munkondwa nsadisi vana ntoto. Otelamesa nsukami . . . kamvuandisa vamosi ye azitu.” (Nku. 113:6-8) Mu longi diadi, entete tulongoka e mpila ina Yave kasongela lulembamu ye una tulenda tanginina e mbandu andi. Tulongoka mpe mayingi mu kuma kia lulembamu ekolo tufimpa e mbandu ya Saulu wa Ntinu, Daniele wa ngunza yo Yesu.

3. Aweyi o Yave kekadilanga yeto? Ediadi adieyi disonganga?

³ Yave osonganga vo nlembami muna mpila kekadilanga ye selo yandi yalembi lunga. Ke tondanga kaka nsambil’eto ko, kansi okutubadikilanga mpe vo tu akundi andi. (Nku. 25:14) Muna kutusadisa twakala akundi andi, Yave wavita o ntu  muna vana o Mwan’andi se kimenga mu kuma kia masumu meto. Kieleka, Yave nkwa nkenda ye nloloki.

4. O Yave nki katuvana? Ekuma?

⁴ Badika e diambu diankaka disonganga vo Yave nlembami. Nze Mvangi eto, Yave wafwana kutuvanga kondwa kwa nswa wa sola dina tuzolele vanga muna zingu kieto. Kansi kavanga wo ko. Watuvanga muna fwaniswa kiandi yo kutuvana o nswa wa sola mana tuzolele. Yave ozolele vo oyeto wantu atovoka twansadila yo ntim’eto wawonso kadi zola tukunzolanga ye tuzeye e nluta tuvuanga muna kunlemvokela. (Nsi. 10:12; Yes. 48:17, 18) Kieleka, tuvutulanga matondo wau vo Yave nlembami.

5. Aweyi o Yave kekutulongelanga mu kala alembami? (Tala e fwaniswa kia fukwa.)

⁵ Yave okutulonganga lulembamu muna mpila ina kekadilanga yeto. Yave i Muntu osundidi ngangu muna nsema wawonso. Kana una vo i wau, ozolanga tambulwila e ngindu za wantu ankaka. Kasikil’owu, Yave wayambula vo o Mwan’andi kansadisa muna vanga e lekwa yawonso. (Nga. 8:27-30; Kol. 1:15, 16) Kana una vo Yave i Mpungu-ngolo, ovananga mpe yiyekwa kwa wantu ankaka. Kasikil’owu, watumbika Yesu se Ntinu a Kintinu kia Nzambi, ovana mpe e wisa kwa 144.000 ma wantu ana beyala kumosi yo Yesu. (Luka 12:32) Kieleka, Yave walonga Yesu mu kala se Ntinu ye Ngang’ambuta. (Ayib. 5:8, 9) Olonganga mpe awana beyala kumosi yo Yesu kimana balungisa e mbebe au, kansi ke vavanga zaya mawonso ko muna mpila besadilanga e salu kiau. Kansi, Yave okalanga ye vuvu vo bevanga o luzolo lwandi.—Lus. 5:10.

6-7. Adieyi tulenda longoka muna mbandu a Yave mu kuma kia vana e yiyekwa kwa akaka?

⁶ Kieleka, avo Se dieto dia zulu ona ke  vuanga lusadisu lwa wantu ankaka mfunu ko, ovananga yiyekwa kwa akaka, nga oyeto ke tufwete luta vanga diau dimosi ko? Kasikil’owu, nga ngeye ovitang’o ntu muna nzo? Yovo u nkuluntu muna nkutakani? Avo i wau, tanginina e mbandu a Yave muna vananga e yiyekwa kwa akaka yo lembi vava zaya mawonso bevanganga muna lungisa e yiyekwa yau. Avo otanginini Yave, e salu ke kitoma salwa kaka ko, kansi mpe olonga akaka yo kubasadisa bayibunda e vuvu. (Yes. 41:10) Adieyi diaka awana bena ye wisa balenda longoka muna mbandu a Yave?

⁷ E Bibila kisonganga vo Yave ovavanga mpe zaya e ngindu za mbasi zandi. (1 Nti. 22:19-22) Mase, aweyi nulenda tanginina e mbandu a Yave? Avo dilendakana, nuvavanga zaya e ngindu za wan’eno mu kuma kia una e salu kingandi kilenda sadilwa. Avo e ngindu zau zambote, nusadila zo.

8. Aweyi Yave kasongela luzindalalu muna mpila kakadila ye Abarayama yo Sara?

⁸ E mpila yankaka ina Yave kesongelanga lulembamu i luzindalalu lwandi. Kasikil’owu, Yave osonganga luzindalalu vava selo yandi bekatikisanga e nzengo zandi kuna luzitu lwawonso. Wawunikina ekolo Abarayama kasonganga e ntokani zandi muna nzengo za Yave za fwasa e mbanz’a Sodoma ye Ngomora. (Tuku 18:22-33) Badika mpe e mpila ina Yave kakadila yo Sara wa nkaz’a Abarayama. Yave kafunga makasi ko vava Sara kaseva o nsilu una kansila vo owuta mwana muna kinunu kiandi. (Tuku 18:10-14) Kansi, Yave wakadila yo Sara kuna luzitu.

9. Adieyi mase ye akuluntu balenda longoka muna mbandu a Yave?

⁹ Mase ye akuluntu, adieyi nulenda longoka muna mbandu a Yave? Adieyi nuvanganga avo wan’eno yovo akaka muna nkutakani bakatikisi e nzengo zeno? Nga nuvavanga tanina e nzengo zeno vana vau? Yovo nuvavanga bakula e ngindu zau? Esi nzo ye ampangi muna nkutakani nluta miayingi bevuanga vava awana bena ye wisa betangininanga Yave. Yamu wau, tumwene mana tulenda longoka muna tanginina lulembamu lwa Yave. Owau, yambula twalongoka una tulenda songela lulembamu muna fimpa e mbandu ya wantu akaka beyikwanga muna Diambu dia Nzambi.

10. Aweyi Yave kekutulongelanga?

¹⁰ O Yave wa ‘Nlongi eto Anene,’ wasonekesa e mbandu ya wantu ankaka muna Diambu diandi muna kutulonga. (Yes. 30:20, 21) Tulenda longoka mambu mayingi muna badikanga e mbandu ya wantu beyikwanga muna Bibila ana basonga e fu yambote nze lusakalalu. Tulenda mpe longoka mayingi muna fimpa mana mabwila awana ke basonga e fu yayi yambote ko.—Nku. 37:37; 1 Kor. 10:11.

11. Adieyi tulenda longoka muna mbandu ambi ya Saulu wa Ntinu?

¹¹ Yindula dina diabwila Saulu wa Ntinu. Kuna lubantiku, nlembami kakala. Vava kakala toko, wazayanga e tezo kiandi yo kala nkutu ye lukatikisu lwa tambula e kiyekwa. (1 Sam. 9:21; 10:20-22) Kansi, kuna kwalanda Saulu wakituka se nkwa lulendo. Wayantika songa e fu kiaki vava kakituka ntinu. Lumbu kimosi, kasonga luzindalalu ko ekolo kavingilanga Samuele wa ngunza. Vana fulu kia songa lulembamu yo bunda e vuvu vo Yave ovanga diambu muna wete dia nkangu andi, Saulu wakela kimenga kana una vo kavewa nswa ko wavanga wo. Kuna kwalanda, Saulu wavidisa e dienga dia Yave yo  bembolwa se ntinu. (1 Sam. 13:8-14) Tukala akwa ngangu avo tulongokele e diambu muna mbandu yayi ya lulukisu yo lembi vanga mambu mana ke tunina yo nswa ko mu vanga.

12. Aweyi Daniele kasongela lulembamu?

¹² Nswaswani ye mbandu ambi ya Saulu, badika e mbandu ambote ya Daniele wa ngunza. Muna zingu kiandi kiawonso, Daniele wakwamanana songa lulembamu yo zaya e tezo kiandi muna lombanga luludiku lwa Yave vitila kavanga konso diambu. Kasikil’owu, vava kasadilwa kwa Yave muna sasila e ndozi ya Nebukandesa, Daniele kavova ko vo yandi kibeni wasasila e ndozi yayina. Kansi, wavana o nkembo yo zitu wawonso kwa Yave. (Dan. 2:26-28) Adieyi tulongokele? Vava ampangi bekutusanisinanga mu kuma kia malongi tufilanga yovo mu kuma kia mambu mambote tuwananene mau muna salu kia umbangi, tufwete sungamenanga vo nkembo wawonso kwa Yave ufwanukinu. Tufwete wo zayanga vo ke tulendi vanga mambu mama ko kondwa kwa lusadisu lwa Yave. (Fili. 4:13) Avo tuvangidi wo, tutanginina mpe e mbandu ambote a Yesu. Mu nkia mpila?

13. Adieyi tulenda longoka muna mvovo mia Yesu miasonama muna Yoane 5:19, 30?

¹³ Kana una vo Yesu wa Mwan’a Nzambi walunga kakala, wabundanga e vuvu kwa Yave. (Tanga Yoane 5:19, 30.) Kasidi nkutu vava kutumuna e wisa kia Se diandi dia zulu ko. E sono kia Filipi 2:6 kivovanga vo Yesu “kasidi yindula ko vo kakutumuna e kimfumu, i sia vo, kafwanana yo Nzambi.” Nze Mwana osonganga lusakalalu, Yesu wazayanga e tezo kiandi yo zitisa e wisa kia Se diandi.

14. Vava Yesu kalombwa vo kavanga diambu ke diakala muna wisa kiandi ko, adieyi kavanga?

¹⁴ Badika dina Yesu kavova vava alongoki andi Yakobo yo Yoane kumosi ye ngudi au banlomba kavanga dina kakadila ye nswa ko mu vanga. Vana vau, Yesu wavova vo Se diandi kaka dia zulu olenda baka e nzengo kana nani ovuanda kuna koko kwandi kwalunene yovo kwalumonso muna Kintinu. (Mat. 20:20-23) Yesu wasonga vo wazayanga e tezo kiandi. Nlembami kikilu kakala. Kasidi vanga konso diambu ko dina Yave kamvanina o nswa ko. (Yoa. 12:49) Aweyi tulenda tanginina e mbandu ambote a Yesu?

15-16. Aweyi tulenda sadila o luludiku lwasonama muna 1 Korinto 4:6?

 ¹⁵ Tutangininanga e mbandu a Yesu muna lemvokela o luludiku lwasonama muna 1 Korinto 4:6 vo: “Ke nulutakana mana masonama ko.” Muna kuma kiaki, avo mpangi utulombele luludiku, ke tufwete kunkomekena ko katambulwila e ngindu zeto ngatu vova e diambu diantete tuyindwidi. Kansi, tufwete sadila e Bibila ye nkanda mieto muna kumvana o luludiku. Muna mpila yayi, tusonga vo ke tuzeye mambu mawonso ko. Tusonga mpe vo tu alembami kadi tubakulanga vo tuludiku twa Yave tusundidi e ngindu zeto.—Lus. 15:3, 4.

¹⁶ Vava tusonganga lulembamu, Yave tukembelelanga. Kansi, vena ye kuma yankaka ikutufilanga mu songa e fu kiaki. O kala nlembami, aweyi dikutusadisilanga mu kala ye kiese yo kala ye ngwizani ambote ye akaka? I diau tubadika owau.

17. Ekuma alembami bekadilanga ye kiese?

¹⁷ Vava tusonganga lulembamu, e kiese kieto kiwokelanga. Ekuma? E kuma kadi vava tutambulwilanga vo ke tuzeye mawonso ko, tuvutula matondo muna konso lusadisu tutambula. Kasikil’owu, yindula vava Yesu kawuka wantu kumi akwa wazi. Mosi kaka muna yau wavutuka muna vutula matondo kwa Yesu wau kawuka kimbevo kiandi kiampasi, kadi yandi kibeni kalenda vanga diambu ko muna kuyiwuka. O muntu ndioyo wa nlembami, wavutula matondo mu kuma kia lusadisu katambula yo kembelela Nzambi.—Luka 17:11-19.

18. Aweyi lulembamu lukutusadisilanga muna kala ye ngwizani ambote ye akaka? (Roma 12:10)

¹⁸ Alembami ngwizani ambote bekalanga yau ye akaka yo kala ye akundi ambote. Ekuma? E kuma kadi bekalanga ye kiese kiazaya  vo wantu akaka mpe fu yambote bena yau yo kubabunda e vuvu. Alembami beyangalalanga vava akaka betoma lungisanga e yiyekwa betambulanga, bekubasanisina vana vau yo kubazitisa.—Tanga Roma 12:10.

19. Nkia kuma ikutufilanga mu venga e fu kia lulendo?

¹⁹ Nswaswani ye alembami, akwa lulendo bemonanga vo diampasi mu sanisina akaka, bezolanga vo yau kaka bafwete sanisinua. Bezolanga kuyitezanesa ye akaka yo vava kuyisonga vo yau basundidi. Vana fulu kia longa akaka yo kubavana yiyekwa, edi beyindulanga vo “avo ozolele vo e salu kiatoma salwa, ngeye kibeni ofwete kio sala.” Kuna kwa wantu awaya, e salu kitoma salwa kaka, avo mawonso mavangamene muna mpila ina bazolele. Kuna diak’e sambu, akwa lulendo nkumbu miayingi akwa loko ye kimpala mpe bekalanga. (Ngal. 5:26) Diampasi dikalanga kwa wantu awaya mu vanga yikundi yakola. Avo tubakwidi vo tu akwa lulendo, tufwete lomba lusadisu lwa Yave muna sambu kimana twasoba ‘nyindu mieto.’ Ediadi dikutusadisa kimana e fu kiaki kialembi yima e mianzi muna ntima mieto.—Roma 12:2.

20. Ekuma tufwete kadila alembami?

²⁰ Kieleka, tuvutulanga kikilu matondo muna mbandu Yave kekutusonganga. Tumonanga lulembamu lwandi muna mpila kekadilanga ye selo yandi ye ozolele vo twantanginina. Vana ntandu, tuzolele tanginina e mbandu ambote ya wantu alembami beyikwanga muna Bibila ana bakala ye lau dia kangala yo Nzambi. Ntangwa zawonso tufwete vananga e nkembo yo zitu una Yave kafwanukini. (Lus. 4:11) Avo tuvangidi wo, yeto mpe tukangala yo Se dieto dia zulu ona ozolanga alembami ye awana bezayanga e tezo kiau.