1. Nkia lau diampwena tuna diau?

LAU diampwena kikilu tuna diau diakala mu nkutakani a Yave! Tuna ye luvuvamu ye kiese kiayingi ekolo tusambilanga Yave kumosi ye mpangi zeto muna nkutakani. Akieyi i fulu kiaku muna nkutakani?

2. Nkia nona Paulu wa ntumwa katoma sadila muna nkanda miandi miavumunuinua?

² Paulu wa ntumwa nkumbu miayingi kasadila nona kimosi muna nkanda miandi miavumunuinua. E nona kiaki kilenda kutulonga mayingi mu kuma kia fulu kieto muna nkutakani. Muna konso nkanda, Paulu watezanesa e nkutakani ye nitu a muntu. Watezanesa mpe konso muntu muna nkutakani ye yîkwa ya nitu.—Roma 12:4-8; 1 Kor. 12:12-27; Efe. 4:16.

3. Nkia mambu matatu tubadika mu longi diadi?

³ Mu longi diadi, tubadika mambu matatu mamfunu tulenda longoka muna nona kia Paulu. Diantete, tulongoka vo konso muntu mu yeto una ye fulu * kiandi muna nkutakani a Yave. Diazole, tubadika dina tufwete vanga avo diampasi dikalanga mu bakula e fulu kieto muna nkutakani. Diatatu, tubadika e  kuma tufwete kuyivanina emvimba muna lungisa salu kieto muna nkutakani a Nzambi.

4. Adieyi tulongokele muna sono kia Roma 12:4, 5?

⁴ E longi diantete tulenda longoka muna nona kia Paulu i diadi, konso muntu mu yeto fulu kiamfunu kena kiau vana vena nkangu a Yave. Paulu wayantika nona kiandi mu mvovo emi: “Wauna tunina ye yîkwa yayingi mu nitu mosi, kansi konso kîkwa kina yo mfunu andi, i wau mpe tuna oyeto, kana una vo ayingi tuna, tu nitu mosi kaka muna Kristu, kadi tu yîkwa yayikakiana muntu yo nkwandi.” (Roma 12:4, 5) Adieyi Paulu kazola vova? Edi kazola vova vo konso muntu mu yeto salu kiaswaswana kesalanga muna nkutakani, kansi yeto awonso mfunu twina.

5. Nkia “tukau” Yave kavana muna nkutakani?

⁵ Vava oyindulanga awana bena ye fulu muna nkutakani, nanga vana vau e ngindu zaku zikwendanga kwa awana bevitanga o ntu. (1 Tes. 5:12; Ayib. 13:17) Dialudi vo, muna nzil’a Kristu, Yave wavana “wantu se tukau” muna nkutakani andi. (Efe. 4:8) O “tukau” twatu i ampangi ana bena muna Buka kia Selo Yambuta, asadisi a Buka kia Selo Yambuta, Afidi a Mavula, akengi a zunga, alongi a sikola za Kintinu, akuluntu a nkutakani ye selo ya salu. Mpangi zazi zawonso basolwa muna lusadisu lwa mwand’avelela kimana balunga-lunga mameme ma Yave yo sala muna wete dia nkutakani.—1 Pet. 5:2, 3.

6. Mun’owu wa 1 Tesalonika 2:6-8, adieyi bevanganga ampangi ana besolwanga muna lusadisu lwa mwand’avelela?

⁶ E mpangi zazi besolwanga muna lusadisu lwa mwand’avelela mu sala e salu ya mpila mu mpila. Wauna e yikwa ya nitu nze koko yo kulu, isadilanga muna wete dia nitu yawonso, e mpangi zazi besolwanga muna lusadisu lwa mwand’avelela befuntukanga muna wete dia nkutakani. Ke bevavanga nkembo a yau kibeni ko. Kansi, bevanganga e ngolo mu siamisa yo kumika e mpangi zau. (Tanga 1 Tesalonika 2:6-8.) Tuvutulanga matondo kwa Yave muna kutuvana mpangi zazi za zikuka ana besianga e nsatu za akaka va fulu kiantete.

7. Ateleki bena muna salu kia ntangwa ke ntangwa, nkia nsambu betambulanga?

⁷ Akaka muna nkutakani besalanga se misionario, aviti a nzila a espesiale yovo aviti a nzila a ngonde ke ngonde. Kieleka, mpangi zayingi mu nza yawonso bebakanga nzengo za kuyivana emvimba muna salu kia longa yo kitula wantu se alongoki. Muna kuma kiaki, besadisanga wantu ayingi mu kituka alongoki a Yesu Kristu. Kanele vo ateleki bena muna salu kia ntangwa ke ntangwa ke bekalanga ye mavua mayingi ko, Yave okubasendanga ye zingu kiazala ye nsambu. (Maku 10:29, 30) Tutoma zolanga mpangi zazi yo vutula matondo muna salu besalanga muna nkutakani.

8. Ekuma ateleki awonso a nsangu zambote benena o mfunu kwa Yave?

⁸ Nga ampangi ana bevitang’o ntu ye awana bena muna salu kia ntangwa ke ntangwa, yau kaka bena o mfunu muna nkutakani? Ve! Konso nteleki a nsangu zambote mfunu kena kwa Nzambi ye muna nkutakani. (Roma 10:15; 1 Kor. 3:6-9) Kadi muna nkutakani e salu kisundidi o mfunu i kitula wantu se alongoki a Mfumu eto Yesu Kristu. (Mat. 28:19, 20; 1 Tim. 2:4) Awonso besamunanga e nsangu zambote, kiakala nteleki wavubwa yovo lembi vubwa, bevanganga mawonso mu sia e salu kiaki va fulu kiantete muna zingu kiau.—Mat. 24:14.

9. Ekuma tuyangalelanga mpangi zeto zamakento muna nkutakani?

⁹ Yave wavana salu kiamfunu kwa mpangi  zamakento muna nkutakani. Ovuanga mpangi zazi o mfunu kiakala akento ana basompa, angudi, akento ansona ye ampumpa ana bekunsadilanga ye kwikizi kiawonso. Bibila kivovelanga akento ayingi ana bayangidika Nzambi. Basanisinua mu kuma kia fu yambote basonga nze ngangu, lukwikilu, vema, unkabu, ntim’a mvevo ye mavangu mambote. (Luka 8:2, 3; Mav. 16:14, 15; Roma 16:3, 6; Fili. 4:3; Ayib. 11:11, 31, 35) Tuvutulanga matondo kwa Yave muna kutuvana mpangi zamakento muna nkutakani ana besonganga mpe fu yambote nze yayi.

10. Ekuma mpangi zanunu benena o mfunu kwa yeto?

¹⁰ Tuyangalelanga mpe mu kala ye mpangi zayingi bena vo anunu muna nkutakani. Muna nkutakani zankaka muna ye mpangi zanunu ana besadilanga Yave ye kwikizi muna zingu kiau kiawonso. Akaka nanga ke kolo ko bayantikidi longoka e ludi. Ayingi muna mpangi zazi zanunu, benuananga ye mpasi za mayela mu kuma kia kinunu. E mpasi zazi zilenda kubakakidila mu vanga mayingi muna nkutakani ye muna salu kia umbangi. Kansi, mpangi zazi bevanganga mana balenda muna salu kia umbangi ye besadilanga e ngolo zau muna kasakesa yo longa akaka. Tuvuanga e nluta miayingi mu mana bazeye muna zingu. Mfunu kikilu bena kwa Yave ye kwa yeto.—Nga. 16:31.

11-12. Aweyi aleke a nkutakani aku bekukasakeselanga?

¹¹ Yindula mpe aleke eto. Benuananga ye mambu mayingi mampasi kadi besansukilanga mu nza iyalwanga kwa Satana wa Nkadi Ampemba yo vukumunua kwa ngindu zabendomoka. (1 Yoa. 5:19) Kansi, yeto awonso tukasakeswanga vava aleke bevananga e mvutu muna tukutakanu, bevaikanga mu salu kia umbangi yo tanina lukwikilu lwau kuna unkabu wawonso. Kieleka, aleke fulu kiamfunu luna kiau muna nkutakani a Yave.—Nku. 8:2.

¹² Diampasi dikalanga kwa mpangi zankaka mu kwikila vo mfunu bena muna nkutakani. Nki kilenda kutusadisa mu kwikila vo konso muntu mu yeto mfunu kena muna nkutakani? Yambula twazaya.

13-14. Ekuma mpangi zankaka balenda kuyimwena vo ke bena mfunu ko muna nkutakani?

¹³ Tala longi diazole tulenda longoka muna nona kia Paulu. Wayika diambu dimosi ditokanesanga mpangi zayingi o unu. Diampasi dikalanga kwa mpangi zazi mu kwikila vo mfunu bena muna nkutakani. Paulu wasoneka vo: “Avo kulu kuvovele vo: “Wau vo ki koko ko, ki kîkwa kia nitu ko,” muna diadi nga ke kîkwa kia nitu ko e? Avo kutu kuvovele vo: “Wau vo ki disu ko, ki kîkwa kia nitu ko,” muna diadi nga ke kîkwa kia nitu ko e?” (1 Kor. 12:15, 16) Nkia diambu Paulu kazola kutulonga?

¹⁴ Avo oyantikidi kuyitezanesa ye akaka muna nkutakani, olenda yindula vo kuna kwaku mfunu ko. Mpangi zankaka muna nkutakani bena ye ndekwa za longa, akubiki ambote yovo bazeye toma fiaulwisa yo kasakesa akaka. Nanga olenda mona vo e ndekwa zaku ke zafwanana ye ndekwa zau ko. Ediadi disongele vo u nlembami. (Fili. 2:3) Kansi, uyikenga. Avo okuyitezanesanga ntangwa zawonso ye mpangi ana bena ye ndekwa zina ongeye kuna zau ko, olenda kendalala. Adieyi dilenda kusadisa mu sunda e ngindu zazi?

15. Landila e sono kia 1 Korinto 12:4-11, adieyi tufwete sungamena mu kuma kia konso tukau tulenda tambula?

¹⁵ Badika e diambu edi: Muna tandu kiantete, Yave wavana Akristu akaka tukau twa mwand’avelela mu mpil’a sivi, kansi yau awonso ke batambula lukau lumosi ko. (Tanga 1 Korinto 12:4-11.) Yave wabavana tukau twaswaswana, kansi konso Nkristu mfunu kakala. O unu, ke tutambulanga diaka tukau twa mwand’avelela mu mpil’a sivi ko. Kansi, e longi diadi mpe mfunu dina kwa yeto. Kanele vo ke tuna ye ndekwa zimosi ko, yeto awonso mfunu twina kwa Yave.

16. Nkia luludiku lwa Paulu wa ntumwa tufwete lemvokela?

¹⁶ Vana fulu kia kuyitezanesa ye Akristu ankaka, diambote twalemvokela luludiku lwa Paulu wa ntumwa: “Yambula konso muntu kafimpa mavangu mandi, ozevo okala ye kuma  kia yangalala, ke mu kuyitezanesa ye ankaka ko.”—Ngal. 6:4.

17. Nkia nluta tulenda tambula muna lemvokela luludiku lwa Paulu?

¹⁷ Avo tulemvokele luludiku lwa Paulu yo fimpa mavangu ma yeto kibeni, tumona vo yeto mpe tuna ye tukau tuna akaka ke bena twau ko. Muna bonga e nona, dilenda kala vo nkuluntu mosi kazeye toma fila malongi ko muna nkutakani, kansi otoma salanga e salu kia kitula wantu se alongoki. Yovo kazeye toma kubika mambu ko nze akuluntu ankaka muna nkutakani, kansi ozayakene vo mvungudi anzodi ona ateleki bekwenda lombanga luludiku lwa Bibila. Yovo ozayakene vo ovuidi fu kiambote kia tambula nzenza. (Ayib. 13:2, 16) Avo tusidi e sungididi muna tukau twatambula, dikutusadisa mu kala ye kiese muna konso lusadisu tuvananga mu nkutakani. Dikutusadisa mpe mu lembi mona kimpala mu kuma kia tukau twa mpangi zeto tuna vo twaswaswana ye tukau tweto.

18. Aweyi tulenda tomesena e mpil’eto ya longela?

¹⁸ Kana nkutu nkia fulu tuna kiau muna nkutakani, yeto awonso tufwete kala ye luzolo lwa tomesa e salu kieto yo wokesa ndekwa zeto. Muna kutusadisa, Yave okutuvananga malongi mamfunu muna nkubik’andi. Muna bonga e nona, muna tukutakanu twa kati kwa lumingu, tutambulanga malongi mekutusadisanga mu sala e salu kia umbangi una ufwene. Nga otoma sadilanga malongi otambulanga?

19. Aweyi olenda lungisila e kani dia kota muna Sikola ya Ateleki a Kintinu?

¹⁹ E Sikola ya Ateleki a Kintinu, i mpila yankaka kesadilanga o Yave muna kutulonga. E sikola yayi yakubikwa mu kuma kia ampangi bena mu salu kia ntangwa ke ntangwa, ana bena ye kimbuta kia mvu 23 yakuna 65. Olenda yindula vo kulenda kota sikola yayi ko. Vana fulu kia soneka e kuma kulendi kotela sikola yayi ko, soneka e kuma ozolele kotela sikola yayi. Vanga nkubika zilenda kusadisa muna kuyifwanisa. Avo osidi e ngolo, muna lusadisu lwa Yave olenda vanga dina wayindulanga vo ke dilendakana ko.

20. Adieyi tulenda longoka muna sono kia Roma 12:6-8?

²⁰ E longi diatatu tulenda longoka muna nona kia Paulu dina muna Roma 12:6-8. (Tanga.) Muna sono kiaki, Paulu wasonga diaka vo ampangi muna nkutakani tukau twaswaswana bena twau. Kansi owau, watoma dio kiesesa vo konso lukau twatambula tufwete lo sadila muna kumika yo siamisa e nkutakani.

21-22. Adieyi tulenda longoka muna nona kia mpangi Robert yo mpangi Felice?

²¹ Badika nona kia mpangi mosi una ye nkumbu Robert. * Ekolo kasadilanga ku nsi ya kinzenza, wabokelwa kenda sadila ku Betele dia nsi andi. Kanele vo ampangi banzayisa vo kavanga kwandi diambu diambi ko, wavova vo: “Vioka ngonde zayingi kiakala ye kiese ko kadi yayindulanga vo diambu diambi yavanga muna kiyekwa kiame. Ezak’e ntangwa yamonanga vo diambote yayambula e salu kia Betele.” Adieyi diasadisa mpangi Robert mu vutukila e kiese kiandi? Nkuluntu mosi wansungamesa vo Yave watulonga muna konso kiyekwa twakala kiau kimana twatoma lungisa e kiyekwa tuna kiau owau. Mpangi Robert wabakula vo diamfunu mu lembi yindula mana kavanga yo yantika sia e sungididi kiandi muna mambu mambote kalenda vanga owau.

²² Mpangi Felice Episcopo diambu diadi  mpe kawanana diau. Oyandi yo nkaz’andi bakota e Sikola ya Ngiladi muna mvu wa 1956 yo filwa muna salu kia kinkengi a zunga kuna Bolívia. Muna mvu wa 1964, bawuta mwana mosi. Mpangi Felice wavova vo: “Diampasi diakala kwa yeto mu yambula e kiyekwa kina twatoma zolanga. Ndenda vova vo yakendalala kikilu mu mvu wamvimba. Kansi, muna lusadisu lwa Yave, yasoba e ngindu zame yo yantika sia e sungididi muna kiyekwa kiame kiampa kia lunga-lunga o mwana.” Nga wabwilwa kala e diambu nze dina diabwila mpangi Robert yovo Felice? Nga wakendalala wau wavidisa kiyekwa kiaku? Avo i wau, okala ye kiese avo osobele e ngindu zaku yo sia e sungididi muna dina olenda vanga owau muna sadila Yave ye mpangi zaku. Avo ukivene emvimba muna salu yo sadila tukau watambula muna sadisa akaka, okala ye kiese ekolo okumikanga e nkutakani.

23. Tufwete vaulanga e ntangwa mu vanga nkia diambu? Nkia mambu tubadika muna longi dilanda?

²³ Konso muntu mu yeto mfunu kena kwa Yave. Ozolele vo twakala muna kanda diandi. Avo tuvawidi e ntangwa mu badika mambu tulenda vanga mu kumika mpangi zeto yo vanga e ngolo mu lungisa mambu mama, tukuyimwena vo mfunu twina muna nkutakani. Kansi, adieyi tuvova mu kuma kia mpila ina tubadikilanga akaka muna nkutakani? Aweyi tulenda songela vo tuzolanga yo zitisa e mpangi zeto? Muna longi dilanda tubadika mambu mama.