1. Ekuma Yave kasemena o wantu?

VAKALA ye ntangwa ina o Yave kakala yandi mosi kaka. Kansi, kamonanga kinsona ko. Muna kala ye kiese, ke diavavanga ko vo kakala ye vangwa yankaka yamoyo. Kansi, Nzambi wazola vo wantu bayangalela mpe e zingu. Muna kuma kiaki, o zola kwafila Yave mu yantika vanga e lekwa.—Nku. 36:9; 1 Yoa. 4:19.

2. Aweyi Yesu ye ambasi bamona vava Yave kasema lekwa yankaka?

² Entete, Yave wasema Mwan’andi Yesu. I bosi, yandi yo Mwan’andi, basema “lekwa yawonso,” kumosi ye ulolo wa mafunda ma ambasi. (Kol. 1:16) Yesu wayangalela e lau dia sala kumosi yo Se diandi. (Nga. 8:30) Ambasi mpe bayangalala. Bamona vava Yave yo Yesu wa Nsadi a Ngangu bavanga zulu yo ntoto. Adieyi ambasi bavanga? Bakembelela Yave vava o ntoto wavangwa. Kalukatikisu ko vo bakwamanana wo vanga muna konso lekwa Yave kavanganga, musungula o wantu. (Yobi 38:7; Nga. 8:31) Konso lekwa Yave kavanga, kisonganga zola ye ngangu zandi.—Nku. 104:24; Roma 1:20.

3. Nze una wasonama muna 1 Korinto 15:21, 22, e kimenga kia lukûlu kia Yesu nkia lau kiavana kwa wantu?

³ Yave wazola vo wantu bazinga yakwele mvu ova ntoto una katoma kubika. Kansi, vava Adami yo Eva bakolamena Se diau dia nzodi, bavidisa e lau dia zinga yakwele mvu. (Roma 5:12) Adieyi o Yave kavanga? Vana vau, wavanga nkubika mu kûla o wantu. (Tuku 3:15) Yave wabaka e nzengo za vana  Mwan’andi se lukûlu, kimana o wan’a Adami yo Eva bavevoka muna sumu yo lufwa. Muna mpila yayi, wavana e lau dia vua moyo a mvu ya mvu kwa konso muntu osola kunsadila.—Yoa. 3:16; Roma 6:23; tanga 1 Korinto 15:21, 22.

4. Nkia yuvu tubadika mu longi diadi?

⁴ O nsilu wa Nzambi mu kuma kia lufuluku yuvu yayingi uvaikisanga. Kasikil’owu, aweyi lufuluku luvangamena? Nga tuzayidila azolw’eto ana befuluka? Aweyi o lufuluku lukututwasila e kiese? Adieyi lufuluku lulenda kutulonga mu kuma kia zola, ngangu ye luzindalalu lwa Yave? Yambula twabadika e yuvu yayi.

5. Ekuma tunina ye ziku vo awana befulwa ke befuluka nkumbu mosi ko?

⁵ Vava Yave kesadila Mwan’andi mu fula ulolo wa wantu, tuna ye ziku vo yau awonso ke befuluka nkumbu mosi ko. Ekuma? Kadi avo bafulukidi nkumbu mosi yau awonso, dilenda twasa mvuanga. Yave ke vangilanga mambu mu mvuanga ko. Ozeye wo vo e mambu mafwete vangamena mu mpila yambote kimana o wantu bazingila muna luvuvamu. (1 Kor. 14:33) Ekolo Yave wa Nzambi kasalanga yo Yesu mu vanga o ntoto, wasonga ngangu yo luzindalalu kadi vitila kavanga o wantu, kakubika e lekwa yawonso ko mu nkumbu mosi. O Yesu mpe osonga e fu yayi muna Luyalu lwa Funda dia Mvu vava kesala kumosi ye awana bevuluka muna Armangedo ekolo bekubika o ntoto mu tambula awana befuluka.

6. Mun’owu wa sono kia Mavangu 24:15, aki nani bekala muna buka kia awana befuluka?

⁶ E diambu disundidi o mfunu bevanga awana bevuluka muna Armangedo i longa oma ma Kintinu kia Nzambi ye nkanikinu mia  Yave kwa awana befuluka. Ekuma? Kadi ayingi muna awana befuluka bekala muna buka kia “awana bena vo ke ansongi ko.” (Tanga Mavangu 24:15.) Divava vo bavanga nsobani kimana batambula e nsambu za kimenga kia lukûlu kia Kristu. Yindula e salu kiampwena bekala kiau kia longa e ludi mu kuma kia Nzambi kwa ulolo wa wantu ana ke bazeye Yave ko. Nga konso muntu olongwa nze una tulongokelanga e Bibila yo wantu o unu? O wantu antete befuluka, nga befilwa muna nkutakani kimana balongwa una balenda longela awana befuluka kuna nim’au? Ke tuzeye ko. Kansi, edi kaka tuzeye vo kuna mfoko a Luyalu lwa Kristu lwa Funda dia Mvu, “e nza izala kieleka yo zayi wa Yave.” (Yes. 11:9) Kieleka, muna funda dia mvu salu kiayingi tukala kiau, kansi salu kiakiese.

7. Ekuma selo ya Yave besongela e ngemba vava belonga awana befuluka?

⁷ Muna Luyalu lwa Kristu lwa Funda dia Mvu, e selo yawonso ya Yave ova ntoto, bekwamanana vanga e nsobani muna yangidika Yave. Muna kuma kiaki, yau awonso besonga e ngemba ekolo besadisa awana befuluka mu vanga e nsobani mu venga ngindu ye zolela yambi yo zingila e ngwizani ye nkanikinu mia Yave. (1 Pet. 3:8) Kalukatikisu ko vo awana befuluka beyangalela kala vamosi yo nkangu a Yave ana bekwamanana ‘sala muna diambu dia luvuluzu lwau.’—Fili. 2:12.

8. Ekuma tulenda vovela vo awana betambula ana befuluka, bezayidila azolw’au?

⁸ Vena ye kuma yayingi ilenda kutufila mu kwikila vo awana betambula ana befuluka, bezayidila azolw’au. Kasikil’owu, mun’owu wa lufuluku lwavangama kuna nz’ankulu, Yave osinga vangulula awana kefula kimana bakala ye mpwa, ngindu ye zú dia nding’au wauna bakadila vitila bafwa. Sungamena vo Yesu watezanesa o lufwa yo tulu, o lufuluku yo sikama kuna tulu. (Mat. 9:18, 24; Yoa. 11:11-13) O muntu avo osikamene kuna tulu, ke sobanga mpwa ko yovo ngindu, okalanga kaka una kakedi vitila kaleka. Badika e nona kia Lazaro. Lumbu yá yavioka tuka kafwila, e nitu andi yayantika tá e nsudi. Kansi, vava Yesu kafula Lazaro, e nsanga zandi banzayidila vana vau, oyandi mpe wabazayidila.—Yoa. 11:38-44; 12:1, 2.

9. Awana befuluka ke bekituka wantu alunga ko vana vau. Ekuma?

⁹ Yave wasia nsilu vo ana bezingila muna luyalu lwa Kristu ke bevova ko vo: “Yayela ngina.” (Yes. 33:24; Roma 6:7) Ozevo, awana befuluka bekala ye mavimpi mambote. Kansi, ke bekituka wantu alunga ko vana vau. Kadi ediadi avo divangamene, e yitu ye akundi au ke bekubazayidila ko. Nanga o wantu awonso malembe-malembe bekituka alunga muna Luyalu lwa Kristu lwa Funda dia Mvu. Kuna mfoko a funda dia mvu, Yesu ovutula Kintinu kwa Se diandi. Muna kolo kiokio, Kintinu kifokola e salu kiandi kiawonso, kumosi ye salu kiakitula o wantu se alunga.—1 Kor. 15:24-28; Lus. 20:1-3.

10. Aweyi omona mu kuma kia lufuluku?

¹⁰ Aweyi omona vava owanana ye azolw’aku ana bafwa? Nga kiese kikufila mu seva, dila yovo yimbila nkunga mu kembelela Yave? Tuna ye ziku vo o zola kwaku muna Yave yo Mwan’andi kuwokela mu kuma kia lukau lwamfunu lwa lufuluku.

11. Landila e mvovo mia Yesu miasonama muna Yoane 5:28, 29, adieyi divangama kwa awana belemvokela Nzambi?

¹¹ Yindula e kiese bemona awana befuluka  vava bekatula kiwuntu kiankulu yo zingila e ngwizani ye nkanikinu miansongi mia Nzambi. Awana bevanga e nsobani bevua e lau dia zinga yakwele mvu muna Paradiso. Kansi, Yave ke yambula ko vo awana bekunkolamena bakwamanana zingila muna Paradiso yo twasa e mvuanga.—Yes. 65:20; tanga Yoane 5:28, 29.

12. Aweyi Yave kesambulwila awonso ana bezinga ova ntoto?

¹² Muna luyalu lwa Kintinu, nkangu a Nzambi bemona e ndungana a sono kia Ngana 10:22 kivovanga vo: “E nsambu za Yave i zau zivuamisanga, ke tesekanga zo mpasi ko.” Muna lusadisu lwa mwand’a Yave, nkangu a Nzambi bevuama muna mwanda, i sia vo, malembe-malembe bekala nze Kristu yo kituka se wantu alunga. (Yoa. 13:15-17; Efe. 4:23, 24) Konso lumbu, e nitu zau zikumama yo kituka se wantu ambote. Zingu kiakiese kikilu kikala. (Yobi 33:25) Ozevo, obadika oma ma lufuluku aweyi dilenda kusadisila owau?

13. Landila e sono kia Nkunga 139:1-4, aweyi o lufuluku lusongelanga vo Yave otomene kutuzaya?

¹³ Nze una tuvovele kala, vava Yave kefula wantu, ovutulwisa ngindu ye kiwuntu kiau, i sia vo, bevutuka wauna bakala vitila bafwa. Yindula e diambu edi: Yave otoma kuzolanga yamu tezo kia sungamena mawonso oyindulanga, una omonanga, mana ovovanga yo vanga. Dianu vo, avo ufutumwini ke dikala diampasi ko kwa yandi mu vutulwisa e ngindu, fu ye kiwuntu kiaku. Davidi wa Ntinu wazaya wo vo Yave otomene kutuzaya. (Tanga Nkunga 139:1-4.) Aweyi tumonanga vava tubakulanga vo Yave otomene kutuzaya?

14. Aweyi tumonanga vava tubadikanga e mpila ina Yave katomene kutuzayila?

¹⁴ Vava tubadikanga una o Yave katomene kutuzayila, dikutufilanga mu lembi tokana. Ekuma? Kadi Yave okutulunga-lunganga. Obadikilanga konso muntu mu yeto vo mfunu kena. Osianga e sungididi muna mawonso mevangamanga muna zingu kieto. Ediadi dikutufiaulwisanga kibeni. Ke tufwete monanga kinsona ko. Kadi e lumbu yawonso, konso miniti, Yave okalanga yeto ye ozolele kutusadisa.—2 Tus. 16:9.

15. Aweyi o lufuluku lusongelanga e ngangu za Yave?

¹⁵ O wonga wa lufwa, ntambu wampwena kibeni. Awana befilwanga kwa Satana, besadilanga ntambu wau mu vumisa wantu kimana bayekola akundi au yovo kubafila mu bembola mana bekwikilanga. Kansi, ke belendanga sadila ntambu wau ko muna kutuvumisa. Kadi tuzeye wo vo avo mbeni zeto batuvondele, Yave okutufutumuna. (Lus. 2:10) Tuna ye ziku vo ke balendi vanga diambu ko dilenda kutufila mu yambula sadila Yave. (Roma 8:35-39) Yave wasonga vo nkwa ngangu kikilu wau katuvana e vuvu kia lufuluku. Muna kuma kia vuvu kiaki, ke tumonanga wonga wa ntambu a Satana ko. E vuvu kiaki kikutusadisanga mpe mu tatidila e kwikizi kieto muna Yave.

16. Nkia yuvu tufwete kukiyuvulanga? Aweyi e mvutu zaku zilenda kusadisila mu zaya kana vo obundanga e vuvu kwa Yave?

¹⁶ Avo mbeni za Yave bavovese vo vonda bekuvonda, nga obunda e vuvu vo Yave okufula? Aweyi olenda wo zayila? Entete, ukiyuvula: ‘Nga e nzengo ibakanga konso lumbu zisonganga vo ibundanga Yave e vuvu?’ (Luka 16:10) E kiuvu kiankaka i kiaki: ‘Nga mpila  zingu kiame isonganga vo ibundanga e vuvu muna nsilu mia Yave wa lungisa e nsatu zame avo nsidi Kintinu kiandi va fulu kiantete?’ (Mat. 6:31-33) Avo e mvutu zaku muna yuvu yayi, elo, disongele vo obundanga Yave e vuvu ye una wakubama muna lubangamu lulenda kwiza kuna ntwala.—Nga. 3:5, 6.

17. (a) Aweyi o lufuluku lusongelanga vo Yave nkwa luzindalalu? (b) Aweyi tulenda songela luyangalalu lweto muna luzindalalu lwa Yave?

¹⁷ Yave wasikidisa kala e lumbu ye ola kefwasa e nza yayi yambi. (Mat. 24:36) Okwamanana songa luzindalalu yo lembi twasa lufwasu vitila ntangwa kasikidisa. Una ye luzolo lwa fula awana bafwa, kansi osonganga luzindalalu. (Yobi 14:14, 15) Ovingilanga yavana ifwana e ntangwa kasikidisa muna kubafula. (Yoa. 5:28) Tuvuidi kuma yayingi mu vutulanga matondo muna luzindalalu lwa Yave. Yindula diambu edi: Mu kuma kia luzindalalu lwa Yave, wantu ayingi kumosi yo yeto ‘twalwaka muna luviluku lwa ntima.’ (2 Pet. 3:9) Yave ozolele vo wantu ayingi bavua e lau dia zinga yakwele mvu. Ozevo, yambula twasonga vo tuyangalelanga luzindalalu lwandi. Mu nkia mpila? Muna sianga ngolo za vava awana ‘bena kikilu ye luzolo lwa vua moyo a mvu ya mvu’ yo kubasadisa bazola Yave yo kunsadila. (Mav. 13:48) Muna mpila yayi, oyau mpe bevua nluta muna luzindalalu lwa Yave nze yeto.

18. Ekuma tufwete songelanga luzindalalu kwa akaka?

¹⁸ Kuna luzindalalu lwawonso, Yave ovingila yakuna mfoko a luyalu lwa funda dia mvu kimana twakituka se wantu alunga. Yavana ntangwa yayina ifwana, Yave una ye luzolo lwa loloka masumu meto. Dianu vo, tufwete landa mbandu andi muna sianga sungididi muna fu yambote yakaka yo kubasonga luzindalalu. Badika nona kia mpangi mosi ankento. O nkaz’andi wayantika nuana ye ntokani zayingi yo yambula kwenda muna tukutakanu. Mpangi ankento wavova vo: “Ediadi diantwasila ntantu zayingi. E zingu kieto kiasoba kuna kinsalukisa, e mambu mawonso twayangalelanga ke twalendanga mo diaka vanga ko.” Kanele vo i wau, nkento ndioyo wa nzodi, wakwamanana songa luzindalalu kwa nkaz’andi. Wabunda e vuvu kwa Yave yo lembi yoya. Otangininanga Yave muna sianga e sungididi muna fu yambote ya nkaz’andi. Mpangi ankento wakudikila vo: “O nkaz’ame  fu yambote kena yau, malembe-malembe osianga e ngolo muna sunda e ntokani zandi.” Diamfunu kikilu twasonganga luzindalalu kwa yitu yeto yovo ampangi muna nkutakani ana besianga ngolo mu sunda e mambu mampasi benuananga mau.

19. Nkia nzengo ofwete baka?

¹⁹ Yesu ye ambasi bayangalala vava kiasemwa o ntoto. Kansi, yindula e kiese bemona vava o ntoto uzala ye wantu alunga ana bezola Yave yo kunsadila. Yindula e kiese kia awana beyala yo Kristu kuna zulu vava bemona una e salu kiau kitwasila e nluta kwa wantu. (Lus. 4:4, 9-11; 5:9, 10) Yindula vava e mansanga makiese mevinga vana fulu kia mansanga mankenda ye vava e yimbevo, ntantu yo lufwa ke lukala diaka ko. (Lus. 21:4) Ekolo ntangwa yayi ke yalweke ko, ofwete baka e nzengo za tanginina o zola, ngangu ye luzindalalu lwa Yave. Avo ovangidi wo, otatidila e kiese kiaku kana nkutu mu lubangamu. (Yak. 1:2-4) Kieleka, tuvutulanga matondo muna nsilu a Yave vo “vekala yo lufuluku”!—Mav. 24:15.