Muna longi diadi, twalongoka vo vena ye diambu diamfunu ditadidi wantu awonso ye mbasi: I luveleleso lwa nkumbu anene ya Yave ye diambu ditadidi kimfumu kiandi, i sia vo, e mpila Yave keyadilanga yambote yovo ve. E diambu diankaka dina muna luveleleso lwa nkumbu andi, i kwikizi kia wantu muna Yave.

Ekuma tutoma vovelanga e diambu ditadidi nkumbu a Yave yo velelesa yo? Yambula twazaya kuma tatu.

Kiantete, Satana wasafula nkumbu a Yave muna mpatu a Edene. E kiuvu kina Satana kayuvula kwa Eva kiasonga vo Yave muntu ambi ye tuludiku tuna Nzambi kabavana ke twambote ko. I bosi, Satana wayika mana Yave kavova ko yo songa vo Nzambi mvuni. Ozevo, Satana wasafula nkumbu a Yave. Muna mpila yayi wakituka se “Nkadi ampemba,” i sia vo “nkumbi.” (Yoa. 8:44) Wau vo Eva wakwikila muna luvunu lwa Satana, wakolamena Nzambi ye kimfumu kiandi. (Tuku 3:1-6) Tuka muna lumbu kiakina, Satana osafulanga nkumbu a Nzambi muna mwanganesa luvunu mu kuma kia Yave. Awana bekwikilanga muna luvunu lwalu, diasazu dikalanga mu kolamena Yave. Muna kuma kiaki, kuna kwa nkangu a Nzambi omwanganesa luvunu mu kuma kia nkumbu avelela ya Yave, i diambu disundidi o yiva. Osafula nkumbu a Yave, i mbuta diambu diatwasa e mbi ye mpasi mu nza.

Kiazole, muna wete dia nsema wawonso, Yave otundidika yo velelesa nkumbu andi muna usafu wawonso. E diadi i diambu disundidi o mfunu kwa Yave. Nzambi wavova vo: “Vaula ivaula e nkumbu ame anene.” (Yez. 36:23) Yesu wasonga vo e diambu diadi difwete kalanga va fulu kiantete muna sambu ya selo yawonso ya kwikizi ya Yave, vava kavova vo: “Yambula e nkumbu aku yazitiswa.” (Mat. 6:9) Bibila nkumbu miayingi kisonganga o mfunu wakembelela nkumbu a Yave. Badika nona yakete ilende: “Nuvana kwa Yave o nkembo ufwanukini e nkumbu andi.” (1 Tus. 16:29; Nku. 96:8) “Nuyimbidila nkumbu andi a nkembo.” (Nku. 66:2) “Ikembelela nkumbu aku yakwele mvu.” (Nku. 86:12) Yandi kibeni Yave wavova tuka kuna zulu, vava kavana mvutu kwa Yesu ona wavova muna tempelo kuna Yerusaleme vo: “E Tata, kembesa e nkumbu aku.” Yave wamvutula vo: “Nkembese yo kala, kembesa ikembesa yo diaka.”—Yoa. 12:28. a

Kiatatu, e kani dia Yave vo e nkumbu andi avelela yakwamanana kembelwa yakwele mvu. Badika o mfunu ikala e nkumbu a Yave kuna nim’a lutonto lwa nsuka, kuna mfoko a Luyalu lwa Funda dia Mvu lwa Kristu. Aweyi mbasi zawonso ye wantu bemona mu kuma kia nkumbu a Yave muna kolo kiakina? Muna baka e mvutu za kiuvu kiaki, yambula twabadika mambu mole mena ngwizani, i sia vo, kwikizi kia wantu ye kimfumu  kia nz’amvimba. O wantu ana batatidila kala e kwikizi kiau, nga diampasi dikala mu kwamanana songa kwikizi kiau? Ve. Bekituka se wantu alunga yo tontwa una ufwene. Bekala ye lau dia vua moyo a mvu ya mvu. Nga e diambu ditadidi kimfumu kia nz’amvimba dikwamanana fidiswa e mbaka yo twasa nkutu mpambani vana vena wantu? Ve. Ke dikala diaka mfunu ko mu songa kana vo e mpila Yave keyadilanga isundidi o wete yovo ve. Kuna kulanda, wantu awonso diakala kuna zulu ye ova ntoto, beyikakeswa yo lemvokela kimfumu kia Yave. Adieyi tuvova mu kuma kia nkumbu a Yave?

Wantu awonso bezaya ludi mu kuma kia Yave, e nkumbu andi iveleleswa emvimba. Kansi, e diambu ditadidi sia luzolo lwa Yave vana fulu kiantete, dikwamanana sunda o mfunu kwa selo yawonso yakwikizi tuka kuna zulu ye ova ntoto. Ekuma? Kadi Yave okwamanana vanga mambu mambote muna wete diau. Badika diambu edi: Wau vo Yesu kuna lulembamu lwawonso ovutula kintinu kwa Yave, Nzambi okala “mawonso muna awonso.” (1 Kor. 15:28) I bosi, wantu awonso bemona e kiese kia “luvevoko lwa nkembo a wan’a Nzambi.” (Roma 8:21) Yave olungisa e kani diandi dina kakana tuka kuna lubantiku, i sia vo, oyikakesa nsem’andi kuna zulu ye ova ntoto se kanda dimosi.—Efe. 1:10.

Kuna mfoko a mambu mama, aweyi kanda dia Yave kuna zulu ye ova ntoto bemona? Kieleka, tukala ye kuma kiampwena mu kwamanana kembelela Yave. Davidi wa ntozi a nkunga wavumunuinua mu soneka vo: “Yambula Yave wa Nzambi kakembelelwa . . . Yambula nkumbu andi yankembo yasanisinua yakwele mvu.” (Nku. 72:18, 19) Tukwamanana solola kuma ikutufila mu tatamana wo vanga.

Vana ntandu, e nkumbu a Yave isunzulanga mawonso mu kuma kiandi. Entete, e nkumbu andi ikutusungamesanga o zola kwandi. (1 Yoa. 4:8) Ntangwa zawonso tusungamena vo Yave watuvanga mu kuma kia zola kwandi yo vana Mwan’andi se lukûlu muna wete dieto. Tukwamanana sungamena vo Yave oyadilanga kuna zola ye mpil’andi ya yadila isundidi o wete. Ozevo, tukwamanana mona zola kwandi muna yeto, yakwele mvu. Tukwamanana kumfinama nze Se dieto yo sanisina nkumbu andi ya nkembo.—Nku. 73:28.