1, 2. (a) Nkia ngwizani ina vana vena zola ye lukwikilu? (b) Nkia yuvu tubadika?

YAVE wa Se dieto, wasia nsilu vo osambula selo yandi yakwikizi. Eyayi imosi muna mpila o Yave kesongelanga zola kwandi muna yeto. Tukunzolanga “kadi yandi wateka kutuzola.” (1 Yoane 4:19) Ekolo zola kweto muna Yave kuwokelanga, o lukwikilu lweto muna yandi lusikilanga, tukalanga ye ziku vo Yave osendanga awana kezolanga.—Tanga Ayibere 11:6.

² Yave i nsendi! Ediadi disonganga kiwuntu kiandi ye mana kevanganga. Muna kuma kiaki, o lukwikilu lweto muna Nzambi ke lukala lwasikila ko avo katukwikidi ko vo osinga senda awana bekumvavanga ye ziku kiawonso. Ekuma tuvovele wo? E kuma kadi “lukwikilu i lusikidisu lwa mana mesiwanga e vuvu.” (Ayibere 11:1) O kala ye lukwikilu disongele vo kala kikilu ye ziku vo Nzambi osinga sambula selo  yandi yakwikizi. Aweyi e vuvu kia vua nsendo kikututwasilanga nluta? Aweyi Yave kasendelanga selo yandi tuka kuna nz’ankulu ye mu lumbu yeto? Yambula twazaya.

3. Nkia nsilu tutanganga muna Malaki 3:10?

³ Yave wa Nzambi wasia nsilu vo osambula selo yandi yakwikizi. Okutubokelanga vo twamvana kina kisundidi o wete yo kala ye vuvu vo okutusambula. Yave okuvovesanga vo: ‘Nuntonta dodokolo, ovo ndembi kunuziulwila zianela za zulu, yanupongwela nsambu, yavana ke vekal’ova vafwana zo ko.’ (Malaki 3:10) Tusonganga vo tuvutulanga matondo muna lukau lwalu vava tutambulwilanga e mbok’a Yave ya kuntonta.

4. Ekuma tulenda bundila e vuvu muna nsilu a Yesu una muna Matai 6:33?

⁴ Yesu wasia nsilu kwa alongoki andi vo avo basidi Kintinu vana fulu kiantete, Nzambi okubalunga-lunga. (Tanga Matai 6:33.) Yesu wavova e mvovo miami kadi wazaya wo vo e nsilu mia Nzambi ke mifunganga ko. (Yesaya 55:11) Muna kuma kiaki, yeto mpe tulenda kala ye ziku vo avo tukedi ye lukwikilu lwasikila muna Yave, olungisa o nsilu kasia vo: “Kikuyambula nkutu ko, ngatu kubembola.” (Ayibere 13:5) O nsilu wau wa Yave ukutusadisanga mu bunda e vuvu muna mvovo mia Yesu mina muna Matai 6:33.

5. Ekuma e mvutu kavana o Yesu kwa Petelo zikutukumikinanga?

 ⁵ Lumbu kimosi, Petelo wa ntumwa wayuvula Yesu vo: “Oyeto tusisidi yawonso yo kulanda; ozevo, nki tutambula?” (Matai 19:27) Yesu katumba Petelo ko wau kavanga kiuvu kiaki. Kansi, Yesu wavovesa alongoki andi vo nsendo betambula wau bayivana kuna mvevo. Antumwa ye akaka akwa akwikizi besinga yala yo Yesu kuna zulu. Kansi, Yesu wavova mpe vo kana nkutu owau vena ye nsendo tulenda tambula. Wavova vo: “Konso ona wasisa nzo yovo mpangi yovo nsanga yovo se yovo ngudi yovo wana yovo mpatu mu kuma kia nkumbu ame, nkama-nkama ketambula yo vua o moyo a mvu ya mvu.” (Matai 19:29) Alongoki awonso a Yesu o unu, balenda solola mase, ngudi, mpangi z’akala ye z’akento yo wana muna nkutakani. Ediadi disundidi konso lekwa twabembola mu kuma kia yikama Kintinu kia Nzambi.

6. Ekuma Yave kasila nsilu vo osambula selo yandi?

⁶ Vana ntandu a nsambu tuvuanga owau, tuvingilanga e nsambu zisundidi zina tuvua kuna sentu. (1 Timoteo 4:8) Yave wasia nsilu vo osambula e selo yandi yakwikizi. O zaya e diambu diadi dikutusadisanga mu zizidila e mpasi. Avo tuna kikilu ye ziku vo Yave i “nsendi a awana bekumvavanga ye ziku kiawonso,” tusikila ye kwikizi muna yandi.—Ayibere 11:6.

7. Aweyi e vuvu kinina nze mbw’a nzaza?

⁷ Muna Longi diandi vana Mongo, Yesu wavova vo: “Numona kiese yo yangalala, kadi o nsendo eno wanene kuna zulu, kadi i wau babangikila angunza ana banuvita.” (Matai 5:12) Selo yankaka ya Nzambi betambula nsendo kuna zulu. Akaka bevua nsendo wa moyo a mvu ya mvu muna paradiso ova ntoto. Kiaki kimosi muna kuma kifwete kutufila mu ‘mona kiese yo yangalala.’ (Nkunga 37:11; Luka 18:30) Kansi, kuna kwa yeto awonso, e vuvu kieto kilenda kala nze “mbw’a nzaza a mioyo mieto, kia ludi ye kiasikila.” (Ayibere 6:17-20) Nze una e mbw’a nzaza (âncora) itaninanga e nzaza yalembi natwa kwa tembwa kiangolo, e vuvu kieto kiasikila kilenda kutusadisa mu kala ngi-ngi. Kilenda kutuvana ngolo mu zizidila e mpasi.

8. Aweyi e vuvu kieto kilenda kululwila e ntokani?

⁸ E vuvu kieto kilenda kutusadisa mu kulula o nteleko a moyo. Nze una e mazi malenda lengolwela nkand’a nitu, e nsilu mia Nzambi milenda vuvika e ntima mieto. Dia lufiaulwisu kikilu mu zaya vo Yave okutulunga-lunga avo tuyekekele ntokani zeto kwa yandi. (Nkunga 55:22) Tulenda kala kikilu ye vuvu vo Nzambi olenda vanga “lutila nkutu mawonso tulombanga.” (Efeso 3:20) Yave kesinga vanga kaka  mayingi ko muna wete dieto, kansi ovanga “lutila nkutu mawonso tulombanga yo yindula.”

9. Adieyi tufwete vanga muna vua nsambu za Yave?

⁹ Muna vua nsendo, tufwete kala ye lukwikilu lwasikila muna Yave yo lemvokela tuludiku twandi. Mose wavovesa zula kia Isaele vo: ‘Yave sambula kekusambula muna nsi ina kekuvan’o Yave wa Nzambi aku se fwa diakuvwila; avo otoma wila nding’a Yave wa Nzambi aku, wavisa meso muna vanga nkanikinu una ikanikin’o unu. Kadi o Yave wa Nzambi aku okusambula nze una kavovesa.’ (Nsiku 15:4-6) Nga una kikilu ye ziku vo Yave okusambula avo okwamanene kunsadila ye kwikizi kiawonso? Kuma kiasikila una kiau mu kala ye vuvu kiaki.

10, 11. Aweyi Yave kasendela Yosefe?

¹⁰ O Nkand’a Nzambi wasonekwa muna wete dieto. Tulenda mo wana nona yayingi isonganga una Nzambi kasendela selo yandi yakwikizi kuna nz’ankulu. (Roma 15:4) Yosefe mbandu ambote kakala mu diambu diadi. Entete, mpangi zandi banteka muna ubundu. Kuna kwalanda, o nkaz’a mfumu andi wamvunina mambu yo siwa muna pelezo kuna Engipito. Vava Yosefe kakala muna pelezo, nga wabembolwa kwa Yave? Ve. Nkand’a Nzambi uvovanga vo: ‘Yave wakwamanana kala yo Yosefe yo kunsonga walakazi.’ Uvovanga diaka vo: “Yave okedi yandi: konso owu kavangidi, o Yave osambwidi wo.” (Etuku 39:21-23) Kana una vo wawanana ye mpasi zazi zawonso, Yosefe wabund’e vuvu muna Nzambi andi kuna luzindalalu lwawonso.

¹¹ Vioka mvu miayingi, Faro wavaikisa Yosefe muna pelezo. O ntaudi ndioyo wansakaladi wakituka se nyadi anzole wasunda e wisa muna Engipito. (Etuku 41:1, 37-43) Vava Yosefe yo nkaz’andi bawuta wana wole amakala, ‘Yosefe wavana mwan’andi antete e nkumbu a Manase, kadi wavova vo, Nzambi umvilakese mfuntuk’ame yawonso, ye nzo es’ame yawonso. Kwa ndiona wezole wamvana e nkumbu a Eferaime, kadi wavova vo, Nzambi unwokese muna nsi a mpasi zame.’ (Etuku 41:51, 52) Yave wasenda kwikizi kia Yosefe. Yosefe wavuluza Aneyisaele ye esi Ngipito muna mvengele. Wazaya wo vo Yave wansenda yo kunsambula.—Etuku 45:5-9.

12. Aweyi Yesu kasikidila ye kwikizi muna ntangw’a mpasi?

¹² Yesu Kristu mpe wakwamanana lemvokela Nzambi kana nkutu muna ntangw’a mpasi. Muna kuma kiaki, Yave wansenda. Nki kiasadisa Yesu mu sikila ye kwikizi? Diambu dia Nzambi divovanga vo: “Muna kiese kasidilwa i kazizidila nti a mpasi, waveza e nsoni.” (Ayibere 12:2) Yesu wamona kikilu kiese wau vo wavelelesa e nkumbu a Nzambi. Yesu watondakana kwa Se diandi yo vewa kiyekwa  kiampwena. Nkand’a Nzambi uvovanga vo Yesu ‘wavuanda kuna koko kwalunene kwa kunda kia Nzambi.’ Tutanganga mpe vo: “Nzambi wansia vana fulu kisundidi o tundalala yo kumvana e nkumbu iviokele e nkumbu zawonso.”—Filipi 2:9.

13, 14. Aweyi Yave kemonanga mu mana tuvanganga mu kuma kiandi?

¹³ Tulenda kala ye ziku vo Yave oyangalelanga mawonso tuvanganga muna kunsadila. Obakulanga vava ke tukuyibundanga e vuvu ko yovo vava tukatikisanga e ngangu zeto. Okutulunga-lunganga vava tutokananga mu kuma kia salu yovo dikila esi nzo eto. Obakulanga mpe vava ke tulendanga diaka vanga mayingi ko muna salu kiandi mu kuma kia mayela yovo lukendalalu. Tulenda kala kikilu ye ziku vo Yave oyangalelanga kwikizi kieto kana una vo tunuananga ye mpasi zayingi.—Tanga Ayibere 6:10, 11.

¹⁴ Sungamena mpe vo Yave “owanga sambu.” Tukala ye ziku vo vava tusambanga kwa yandi, okutuwanga. (Nkunga 65:2) Yave wa “Se dia nkenda ye Nzambi a fiauzi wawonso,” okutuvana yawonso tuvuidi o mfunu kimana twanfinama. Ezak’e ntangwa, olenda sadila mpangi zeto mu kutusadisa. (2 Korinto 1:3) Yave oyangalalanga vava tusonganga nkenda kw’akaka. “On’ofwa nsukami e nkenda, Yave kesompeka, Ewete diandi, futa kekumfuta dio.” (Ngana 19:17; Matai 6:3, 4) Muna kuma kiaki, vava tukayilanga yo sadisa mpangi zeto, Yave obadikilanga e mbote tuvanganga nze yandi una ye mfuk’eto. Osianga nsilu vo okutusenda muna wete tuvanganga.

15. Nkia nsambu ovingilanga? (Tala fwaniswa kuna lubantiku lwa longi.)

¹⁵ Akristu akuswa bena ye vuvu kia tambula “kolowa kia ndungidi,” i sia vo, nsendo utuka kwa Yesu. (2 Timoteo 4:7, 8) Kansi, avo vuvu kiaswaswana una kiau, ke disongele ko vo kuna kikilu mfunu ko kwa Nzambi. Ulolo wa “mameme mankaka” ma Yesu, bevingilanga ye kiese kiawonso e nsendo wa moyo a mvu ya mvu muna paradiso ova ntoto. “Beyangalela muna mawete mayingi.”—Yoane 10:16; Nkunga 37:11.

16. Nkia lufiaulwisu luna muna sono kia 1 Yoane 3:19, 20?

¹⁶ Ezak’e ntangwa, tulenda mona vo ke tuvanganga kikilu mayingi ko muna salu kia Yave. Nanga tukukiyuvulanga kana vo Yave oyangalelanga mana tuvanganga. Tulenda nkutu yindula vo ke twafwana ko mu tambula konso nsendo. Kansi, ke tufwete vilakana ko vo “Nzambi osundidi ntima mieto, ozeye mambu mawonso.” (Tanga 1 Yoane 3:19, 20.) Avo tusadidi Yave mu kuma kia lukwikilu yo zola kweto muna yandi, tulenda kala ye ziku vo okutusambula, kana nkutu tumwene vo mana tuvanganga ke mena mfunu ko.—Maku 12:41-44.

17. Nkia nsendo tutambulanga owau?

¹⁷ Kana nkutu mu lumbu yayi yambaninu ya nza ya Satana, Yave osambulanga nkangu andi. Okutusadisanga kimana twavua  zayi wayingi yo zingila mu luvuvamu ye mpangi zeto mu nza yawonso. (Yesaya 54:13) Kieleka, nze una Yesu kasia nsilu, Yave okutusendanga owau muna kutuvana ulolo wa mpangi zazolwa mu nza yawonso. (Maku 10:29, 30) Vana ntandu, awana bevavanga Nzambi ye ziku kiawonso, bekalanga ye luvuvamu lwa ntima, luyangalalu ye kiese.—Filipi 4:4-7.

18, 19. Aweyi selo ya Yave bemonanga mu kuma kia nsendo betambulanga?

¹⁸ E selo ya Yave mu nz’amvimba, nsambu zayingi bevuanga zitukanga kwa Se dieto. Kasikil’owu, mpangi Bianca ozingilanga kuna Alemanha wavova vo: “E mvovo ke miafwana ko mu vutula matondo kwa Yave wau kekunsadisanga muna mpasi zame yo kala vana ndambu ame konso lumbu. E nza yazala ye mvuanga ye mambu mambi. Kansi, wau vo isalanga kumosi yo Yave, luvuvamu ngina lwau vana moko mandi. Konso ntangwa ikuyivananga kuna mvevo muna salu kiandi, nsambu zayingi kekumpananga.”

¹⁹ Badika mpe nona kia mpangi Paula una ye kimbuta kia mvu 70, ozingilanga kuna Canadá. Kimbevo kiangolo kia nima keyelanga. Wavova vo kana una vo diampasi dikalanga mu kangala mu kuma kia kimbevo kiaki, ediadi ke disongele ko vo kelendanga sila umbangi ko. Wakudikila vo: “Isadilanga ndekwa zaswaswana za sila umbangi nze muna telefone ye konso fulu ngina. Muna kuyikasakesa, ilundanga nkanda isonekenanga e sono ya Nkand’a Nzambi ye mambu itanganga muna nkanda mieto mana ndenda tangulula ntangwa ke ntangwa. Iyikilanga nkanda wau vo ‘Nkanda wa Lukasakeso.’ Avo tusidi sungididi muna nsilu mia Yave, tumona vo lukendalalu lwa kolo kia ndwelo kwandi. Yave una yeto ntangwa zawonso mu kutusadisa, kiakala nkia mpasi tunuananga zau.” E zingu kiaku nanga kiaswaswana ye kia mpangi Bianca yovo Paula. Kana una vo i wau, olenda yindula una Yave kekusambulwilanga kumosi ye mfinangani zaku. Diambote kikilu mu yindulanga una Yave kekusambulwilanga owau ye una kekusambulwila kuna sentu.

20. Nkia vuvu tulenda kala kiau avo tukwamanene vanga mana tulenda mu sadila Yave ye kwikizi kiawonso?

²⁰ Kuvilakani ko vo Nzambi osinga senda e sambu yaku ya nsi a ntima. Kala ye ziku vo ‘vava omana vanga luzolo lwa Nzambi, otambula mana kasila o nsilu.’ (Ayibere 10:35, 36) Muna kuma kiaki, tukwamanana kumika lukwikilu lweto yo vanga mawonso tulenda muna sadila Yave. Tuna ye vuvu vo Yave okutusenda.—Tanga Kolosai 3:23, 24.