KIESE tumonanga vava akaka bekutusongelanga o walakazi. Dia lufiaulwisu kikilu mu zaya vo akaka betokanenanga e wete dieto. Wau vo tuyangalalanga vava akaka bekutusonganga o walakazi, aweyi tulenda longokela songa walakazi?

O nkwa walakazi i ndiona otokanenanga e wete dia wantu ankaka yo songela wo muna mvovo ye mavangu mandi. Ke mpasi songa kaka luzitu ko. Kansi, okadilanga ye akaka kuna walakazi kadi zola kena kwa muna yau, obakulanga mpe una bemonanga muna ntima. Edi disundidi o mfunu, o walakazi kimosi muna fu ya mbongo a mwand’avelela. (Ngalatia 5:22, 23) Yave ozolele vo twakala akwa walakazi. Muna kuma kiaki, yambula twazaya una Yave yo Mwan’andi besongelanga o walakazi ye una tulenda landila e mbandu au.

Yave osonganga walakazi kwa wantu awonso, kana nkutu kw’awana bena vo ‘mintokozi ye wantu ambi.’ (Luka 6:35) Kasikil’owu, Yave “ovaikisanga ntangw’andi vana vena wantu ambi yo wantu ambote yo nokesa e mvula vana vena wantu ansongi ye awana balembi songa.” (Matai 5:45) Kana nkutu awana ke bekwikilanga ko vo Yave i Mvangi, balenda vua nluta muna walakazi wandi yo kala ye kiese muna zingu.

E diambu diankaka disonganga vo Yave nkwa walakazi i dina kavanga kwa Adami yo Eva. Vava basumuka, ‘batunga makaya ma nsanda yo kuyivangila lenga.’ Yave wazaya vo kuna sambu diankaka dia mpatu a Edene, Adami yo Eva mvuatu badi vua o mfunu wau vo ntoto wasibwa yo zala ye “mvanga ye nkeka za mfinda.” Muna kuma kiaki, Yave wabavangila “yinkutu ya nkanda.”—Etuku 3:7, 17, 18, 21.

Kana una vo Yave osonganga walakazi kwa “wantu ambi yo wantu ambote,” otoma songanga walakazi kwa selo yandi yakwikizi. Kasikil’owu, muna lumbu ya Zakariya wa ngunza, mbasi mosi watokana kwayingi wau vo Aneyisaele bayambula tunga e tempelo muna Yerusaleme. Yave wawá e ntokani za mbasi ndioyu yo kumvutulwila ‘muna mvovo mia ngemba ye mia lufiaulwisu.’ (Zakariya 1:12, 13) Diau dimosi kavanga o Yave kwa Eleya wa ngunza. Vakala ye ntangwa ina o ngunza kakala wakendalala yo mona e kinsona. Muna kuma kiaki, walomba kwa Yave kimana kafwa kwandi. Yave wasonga vo watokanenanga e wete dia Eleya, watuma e mbasi kimana kankumika. Wansadisa mpe kimana kabakula vo kakala yandi mosi ko. O walakazi wa Yave wakumika Eleya kimana kakwamanana muna salu kiandi. (1 Ntinu 19:1-18) Muna selo yawonso ya Yave, nani obenze watanginina o walakazi wa Yave mu mpila yalunga?

Vava Yesu kakala ova ntoto, wantu bamonanga una kasongelanga o walakazi. Kakala nkwa ntim’ambadi ko ngatu komekena akaka kimana bavanga mana kazolanga. Watokanenanga e wete dia wantu ankaka yo vova vo: “Nwiza kwa  mono, yeno awonso nufuntukanga yo bimuka yo mazitu, ikunuvundisa. . . . Kadi vangu kiame kiambote.” (Matai 11:28-30) Muna kuma kia walakazi wandi, wantu ayingi balandanga Yesu konso fulu kayendanga. Wau vo wabafwila e nkenda, Yesu wabavana madia, wabawuka yo kubalonga “mambu mayingi” mu kuma kia Se diandi.—Maku 6:34; Matai 14:14; 15:32-38.

Yesu wabakulanga una wantu bamonanga muna ntima yo kubasonga walakazi. Kana nkutu vava ke diakalanga diasazu ko kwa yandi, wasadisanga ana bayizanga kwa yandi. (Luka 9:10, 11) Yindula dina diabwila nkento mosi ona wavaikanga menga. Wau vo nkento ndioyu wazola vo kawukwa, wasimba e mvuatu a Yesu. Kansi, mun’owu wa Nsiku a Mose, kafwete wo vanga ko kadi wafunzuka kakala. (Fuka 15:25-28) Adieyi Yesu kavanga? Kamvovesela ku makasi ko. Yesu wabakula vo nkento ndioyu wonga kakala wau, wamfwila e nkenda kadi mvu 12 miavioka tuka kayantikila mona e mpasi zazi. Wamvovesa vo: “E mwan’ame, lukwikilu lwaku lusaswidi. Wendela kuna luvuvamu, sasuka muna kimbevo kiaku kiampasi.” (Maku 5:25-34) Ekwe walakazi kasonga o Yesu!

Muna nona tuvovele kala, tulongokele vo avo tukedi akwa walakazi, tuvanga mawonso muna sadisa akaka. Yesu watoma kiesesa e diambu diadi vava katá e kingana kia Nsamaria wambote. Nyuda mosi wayiwa, wandwa yo bembolwa vana ndambu a nzila. Nsamaria mosi waviokanga wafwila muntu ndioyu e nkenda, kana una vo esi Samaria ke bawizananga ko ye Ayuda. O walakazi wafila Nsamaria mu sadisa muntu ndioyu. Wasukula e mputa zandi yo kunata kuna nzo ya luakilanga e nzenza. O Nsamaria wafuta e nzimbu kwa ntambudi a nzenza kimana katoma kunlunga-lunga, wasia o nsilu vo konso nzimbu zankaka zisadilwa, vutula kadi zo vutula.—Luka 10:29-37.

Walakazi ukutufilanga mu songa fu yambote yo kasakesa akaka muna mvovo ye mavangu. Nkand’a Nzambi uvovanga vo: ‘E ntokani zikendelekanga o ntim’a muntu. E diambu diambote dimwesa wo e kiese.’ (Ngana 12:25) Avo tuyambwidi vo walakazi yo wete watufila mu sadila mvovo mia lukasakeso, tulenda sadisa akaka mu kala ye kiese. * (Tala e mvovo vana yand’a lukaya.) E mvovo mieto miangemba misonga vo wete diau tutokanenanga ye diasazu dikala kwa yau mu zizidila e mpasi za zingu.—Ngana 16:24.

Yeto awonso tulenda songa walakazi kadi Nzambi watuvangila muna mpw’andi. (Etuku 1:27) Kasikil’owu, Yulio wa mfumu a makesa ma Roma ona wanata Paulu wa ntumwa kuna Roma, “wasonga Paulu e ngemba, wamvana nswa kenda kw’akundi andi kimana bansadisa” kuna mbanz’a Sidone. (Mavangu 27:3) Vava Paulu ye akaka ana kakangalanga yau bavuluka muna nzaza yadimuka, o wantu kuna sanga kia Melita ‘batoma kubasonga e ngemba’ yo kubalungila e tiya kimana bayotela. (Mavangu 28:1, 2) Diambote kikilu bavanga o wantu awaya. Kansi, muna mwesa Yave e kiese, o muntu kafwete songanga walakazi ntangwa zawonso, ke nkumbu mosi kaka ko.

Yave ozolele vo e fu kia walakazi kiakala se mpil’a zingu kieto. Kiaki i kuma kekutuvoveselanga vo ‘twavuata walakazi.’ (Kolosai 3:12) Kansi, ke ntangwa zawonso ko dikalanga dia sazu mu songa walakazi. Ekuma? Nanga ke tusonganga walakazi ko wau vo tu akwa nsoni, wonga yovo mu kuma kia loko. Dilenda kala diampasi mu songa walakazi kw’awana batuvangidi e mbi. Kansi, avo tulombele mwand’avelela yo sia e ngolo za tanginina Yave, olenda kutusadisa mu kala akwa walakazi.—1 Korinto 2:12.

Aweyi tulenda zayila mana tufwete singika mu  wokesa o walakazi weto? Ukiyuvula: ‘Nga itambanga o matu vava akaka bevovanga yo bakula una bemonanga muna ntima? Nga ibakulanga vava akaka bevuanga lusadisu o mfunu? Nkia lumbu kiansuka yasonga walakazi kwa yitu yovo nkundi ame?’ I bosi, kala ye kani dia toma zaya wantu ana okalanga yau e ntwadi, musungula mpangi za nkutakani. Muna mpila yayi, ozaya e mpasi ye nsatu zau. Kadilanga yo wantu nze una ozolele vo bakadila yaku. (Matai 7:12) I bosi, lomba lusadisu kwa Yave kimana kasambula e ngolo ovanganga za kala nkwa walakazi.—Luka 11:13.

Walakazi i kimosi muna fu kayika Paulu wa ntumwa yansadisanga mu kala selo kiambote. (2 Korinto 6:3-6) O wantu batoma zolanga Paulu kadi wavovanga yo vangila mambu kuna walakazi. Bamonanga vo wete diau katokanenanga. (Mavangu 28:30, 31) Avo yeto mpe tusongele walakazi, akaka balenda kala ye tima dia longoka e ludi. Vava tusonganga walakazi kwa wantu awonso, kana nkutu awana bekutuvanganga e mbi, dilenda simba e ntima miau yo kubafila mu soba e mpila bekutubadikilanga. (Roma 12:20) Kuna kulanda, balenda tambulwila longoka Nkand’a Nzambi.

Muna Paradiso, wantu awonso besonga walakazi kwa muntu yo nkwandi. Awana befuluka betambulwa kuna ngemba zawonso. Akaka muna yau, eyayi i nkumbu antete besongwa o walakazi. Ediadi dikubafila mu songa walakazi kwa akaka. Dialudi, o muntu ona ke songanga walakazi ko yo lembi sadisa akaka kalendi kota mu Kintinu kia Nzambi ko. Awana kaka besonganga o zola yo walakazi i bezingila yakwele mvu muna Paradiso. (Nkunga 37:9-11) Kuna mfoko, tuzingila mu nza yazala ye luvuvamu. Kansi, kana nkutu owau, tulenda vua nluta miayingi avo tukedi akwa walakazi. Mu nkia mpila?

Nkand’a Nzambi uvovanga vo: “O nkwa nkenda, wandi moyo kevanga wete.” (Ngana 11:17) O wantu betoma zolanga ana besonganga walakazi. Ediadi difilanga wantu awaya mu kunsonga mpe walakazi. Yesu wavova vo: “Muna nzongo una nuzongela i nuzongelwa mpe.” (Luka 6:38) Muna kuma kiaki, diasazu dikalanga kwa muntu una vo nkwa ngemba mu kala ye akundi ambote yo tatidila e kikundi.

Paulu wa ntumwa wavovesa ampangi muna nkutakani ya Efeso vo ‘basonganga ngemba kwa muntu yo nkw’andi, bakala yo walakazi, balolokanga muntu yo nkw’andi.’ (Efeso 4:32) Vava awonso muna nkutakani besonganga walakazi ye nkenda, ediadi dikumikanga e nkutakani yo wokesa e kintwadi. Ke tutumba mpangi zeto ko, kubakumba yovo vova diambu dilenda kubalweka kana nkutu mu nsaka. Kansi, mana tuvovanga mafwete sadisa yo kasakesa akaka. (Ngana 12:18) Kuna kulanda, awonso muna nkutakani besadila Yave ye kiese.

Nze una tulongokele, walakazi i fu kisongelwanga muna mvovo ye mavangu. Vava tusonganga o walakazi, tutangininanga Yave wa Nzambi eto una vo nkwa zola ye ntim’amvevo. (Efeso 5:1) Ediadi dikumikanga e nkutakani yo kasakesa akaka mu sadila Yave. Muna kuma kiaki, yambula yeto awonso twavanga mana tulenda kimana akaka bazaya vo e Mbangi za Yave akwa walakazi!