MPANGI Diana una ye kimbuta kia mvu 80, onuananga ye mpasi se mvu miayingi. O nkaz’andi wabakama kimbevo kifwasanga o tomfo (Alzheimer) yo siwa mu nzo ilunga-lunganga anunu yavana kafwa. Wafwilwa mpe wana wole. Kuna kwalanda, mpangi Diana wabakama kimbevo kia câncer ya ntulu. Kansi, vava ampangi bemonanga mpangi Diana muna tukutakanu yovo mu salu kia umbangi, mu kiese kaka kekalanga.

Mpangi John mu salu kia kinkengi a zunga kakala vioka 43 dia mvu. Watoma zolanga e kiyekwa kiaki, kayindulanga diaka salu kiankaka ko. Kansi, wayambula e salu kia kinkengi a zunga yo kwenda lunga-lunga e yitu kiandi wabakama kimbevo. Vava ampangi ana banzeye bewanananga yandi muna tukutakanu twa zunga yovo twa mvivu bemonanga vo kasoba kwandi ko. Kavidisa kiese kiandi ko.

Ekuma mpangi Diana yo mpangi John bekadilanga ye kiese? Aweyi o muntu onuananga ye mpasi kalenda kadila ye kiese? Aweyi o muntu kalenda kadila ye kiese avo oyambwidi e kiyekwa kena kiau? O Nkand’a Nzambi ukutuvananga e mvutu. Uvovanga vo: “O nsongi omwena Yave e kiese.” (Nkunga 64:10) Tulenda toma bakula e ziku kia diambu diadi avo tuzeye mana mekututwasilanga e kiese kiasikila ye mana ke malendi kututwasila kiese kiasikila ko.

Vena ye mambu mankaka mekututwasilanga kiese. Kasikil’owu, yindula e nzitikila ana bazolele sompana. Yovo muntu okitukidi se yovo ngudi yovo ndiona otambwidi kiyekwa kiampa muna salu kia Yave. E mambu mama kiese mekututwasilanga kadi e i tukau tutukanga kwa Yave. Yandi wasikidisa o longo, watuvana e lau dia wuta wana ye salu muna nkubik’andi.—Etuku 2:18, 22; Nkunga 127:3; 1 Timoteo 3:1.

Kansi, mambu mankaka kiese kia kolo kiandwelo metwasanga. Diankenda vo muna longo, yakala yovo nkento olenda tá zumba yovo fwa. (Yezekele 24:18; Osea 3:1) O wana balenda kolamena mase mau yo Nzambi, balenda nkutu vaikiswa muna nkutakani. Kasikil’owu, o wan’a Samuele wa ngunza ke basadilanga Yave mu mpila  yambote ko. Davidi wa ntinu wawanana ye mpasi zayingi mu kuma kia sumu kavola yo Bate-seba. (1 Samuele 8:1-3; 2 Samuele 12:11) Avo mambu ma mpila yayi mavangamene, ke metwasa kiese ko, kansi ntantu ye mpasi.

Ezak’e ntangwa, tuyambulanga kiyekwa kieto muna salu kia Yave mu kuma kia kimbevo, lunga-lunga yitu yeto yovo mu kuma kia nsobani zivangamanga muna nkubik’a Yave. Ayingi ana bayambula kiyekwa kiau bevovanga vo ke bakinu yindula kiese bakalanga kiau.

Tulenda bakula vo e mambu mankaka ke metwasanga kiese kiasikila ko. Muna kuma kiaki, nga vena ye kiese ke kifokokanga ko kana nkutu vava e zingu kieto kikitukanga se kiampasi? Elo. Kadi Samuele, Davidi ye wantu ankaka ke bavidisa kiese kiau ko vava bawanana ye mambu mampasi.

Yesu wazaya kikilu kana nki i kiese kiasikila. Vitila keza ova ntoto, Nkand’a Nzambi uvovanga vo ‘wakembelang’oku ndose a [Yave] ntangwa zawonso.’ (Ngana 8:30) Kansi, vava kayiza ova ntoto, ezak’e ntangwa wawanananga ye mambu mampasi. Kana una vo i wau, Yesu wasolola e kiese muna vanga luzolo lwa Se diandi. (Yoane 4:34) Adieyi tuvova mu kuma kia ola zansuka za zingu kiandi? Muna Nkand’a Nzambi tutanganga vo: “Kadi muna kiese kasidilwa i kazizidila nti a mpasi.” (Ayibere 12:2) Muna kuma kiaki, tulenda longoka mayingi muna mambu mole kavova o Yesu mu kuma kia kiese kiasikila.

Entete, vava alongoki andi 70 bavutuka muna salu kia samuna e nsangu zambote, kiese kiayingi bakala kiau mu kuma kia mambu mawonso bavanga, bavaikisa nkutu e nkuya. Kansi Yesu wabavovesa vo: “Ke numoni kiese ko wau vo e mianda minusakalele, kansi numon’e kiese wau vo e nkumbu zeno zisonamene kuna zulu.” (Luka 10:1-9, 17, 20) Elo, o tondakana kwa Yave i diambu disundidi o mfunu. I diau dikututwasilanga kiese kiasikila ke mu konso kiyekwa ko.

Lumbu kiankaka, vava Yesu kamokenanga ye ndong’ayingi, nkento mosi wa mwisi Yuda wasivika mu kuma kia malongi mandi yo yikila ngudi a  Yesu vo nkwa nsambu wau kawuta mwan’a mpila yayi. Kansi Yesu wamvutula vo: “Ke wau ko, akwa nsambu ana bewanga e diambu dia Nzambi yo lunda dio!” (Luka 11:27, 28) Tulenda kuyisana mu kuma kia sia vo wan’eto. Kansi, e diambu dikututwasilanga e kiese kiasikila i vava belemvokelanga Yave yo kala ye ngwizani ambote yo yandi.

Kiese kiayingi tumonanga vava tuzayanga vo Yave okutuyangalelanga. Kana una vo e mpasi ke zitwasanga kiese ko, ke zilendi katula kiese kieto ko. Avo tusikidi ye kwikizi muna ntangw’ampasi, e kiese kieto kiwokela. (Roma 5:3-5) Yave ovananga mwand’andi kw’awana bekumbundanga e vuvu. E kiese i kimosi muna fu ya mbongo a mwanda. (Ngalatia 5:22) Ediadi dikutusadisanga mu zaya e kuma e sono kia Nkunga 64:10 kivovelanga vo: “O nsongi omwena Yave e kiese.”

Dikutusadisanga mpe mu zaya e kuma mpangi Diana yo Jonh batatidila e kiese kiau kana nkutu muna ntangw’a mpasi. Mpangi Diana wavova vo: “Ikitulanga Yave se tininu diame, nze una o mwana kevavilanga e tininu kwa se diandi.” Wakudikila vo: “Imonanga vo Yave okunsambulanga kadi okumpananga o nkuma wa kwamanana samuna e nsangu zambote ye kiese kiawonso.” Adieyi diasadisa mpangi John mu kwamanana kala ye kiese yo kuyivana muna salu kia umbangi vava kayambula e kiyekwa kiandi? Wavova vo: “Tuka muna mvu wa 1998, yavewa e kiyekwa kia kala nlongi muna Sikola ya Nkubama ya Uselo. Ediadi diansadisa mu tomesa e longi dia mono kibeni.” Mpangi Jonh wavova vo ke diakala diampasi ko kwa yandi yo nkaz’andi mu kulukilwa e nsobani kadi bayikadila kala ye luzolo lwa sala konso salu kina Yave kabavene. Wakudikila vo: “Ke tukuyibanzanga ko wau twabaka e nzengo za sadila Yave.”

Wantu ayingi bemonanga e ziku kia mvovo mina muna sono kia Nkunga 64:10. Kasikil’owu, yindula akazi ana basadila kuna Betele ya Estados Unidos vioka 30 ma mvu. I bosi, bafilwa muna salu kia kimviti a nzila a espesiale. Bavova vo: “Vava o muntu kevidisanga e lekwa katoma zolanga, okendalalanga. Kansi, o lukendalalu lwalu ke lwakwele mvu ko.” Vava balwaka kuna bafilwa, bayantika samuna e nsangu zambote kumosi ye mpangi za nkutakani. Bavova mpe vo: “Tulombanga mambu masikididi muna sambu. I bosi, tumonanga e mvutu za sambu yeto yo kala ye kiese. Vava twalwaka, akaka muna nkutakani bayantika sala se aviti a nzila. Twakala ye kiese kia yantika longoka ye wantu awole ana banungunuka muna mwanda.”

Dialudi vo ke ntangwa zawonso ko dikalanga diasazu mu kala ye kiese. Vekalanga ye ntangwa tukendalalanga. Kansi, Yave okutufiaulwisanga muna mvovo mina muna sono kia Nkunga 64:10. Kana nkutu vava tukalanga twakendalala, tulenda ‘mwena Yave e kiese’ avo tusikidi ye kwikizi muna yandi kiakala nkia mpasi zilenda kutubwila. Tulenda mpe vingila e ntangwa ilungana o nsilu a Yave wa ‘zulu diampa ye nz’ampa.’ Wantu awonso bekituka alunga, ‘beyangalala yo kembela yakwele mvu’ mu kuma kia mambu mawonso kesinga vanga o Yave.—Yesaya 65:17, 18.

Yindula e nsambu tusinga vua. Tusinga kala yo vimpi walunga yo sikama lumbu yawonso yo nkuma muna nitu. E mambu mawonso matutwasilanga e nkenda, ke mekutuvanga diaka mpasi ko. Yave wasia nsilu vo “oma mantete ke meyindulwa ko, ngatu kota muna ntima.” Tumonana diaka ye yitu ye akundi eto ana bafwa. Tumona nze una wamona mase ma dumbelele wakala ye kimbuta kia mvu 12 ona wafulwa kwa Yesu. Nkand’a Nzambi uvovanga vo: “Basivikidi kikilu.” (Maku 5:42) Awonso bezingila muna nz’ampa, bekituka ansongi yo ‘mwena Yave kiese’ yakwele mvu.