O lusansu lwasonama muna nkand’a Nsiku 22:25-27 ke lusonganga kaka ngielele a mwan’ayakala ko kadi dizayakene vo yandi kikilu i nkwa kuma. Kansi, o nsiku wau ukiesesanga o kondwa-kuma kwa mwan’a ndumba. Tufimpa e tini ivitidi lusansu lwalu.

E tini ivitidi iyikanga o mwan’ayakala “muna mbanza” ovukane yo mwan’a ndumba wazitikilwa. Avo ovangidi wo, o mwan’ayakala zumba katele wau vo mwan’a ndumba wazitikilwa wabadikilwanga nze nkento wasompwa. Adieyi tuvova mu kuma kia mwan’a ndumba? O lusansu lusonganga vo ‘kakazidi ko muna mbanza.’ Kadi kele vo kakaza, wantu ankaka badi wá e kazu kiandi yo kwiza kuntanina. Kansi, kakazidi kwandi ko. Muna kuma kiaki, yandi mpe zumba katele. Yau awole bafwete tumbwa.—Nsi. 22:23, 24.

I bosi, o Nsiku uyikanga diambu diankaka diaswaswana: “Kansi, avo yakala mu kiana kawene o mwan’a ndumba wazitikilwa, o yakala kambaka mu kingolo yo vukana yandi, ozevo, yakala ona ovukane yo ndumba yandi kaka ovondwa, kansi kuvangi diambu ko kwa ndumba. O ndumba kavolele sumu ko difwanukini tumbu kia lufwa. E diambu diadi dina nze muntu onuanisi nkwandi yo kumvonda. Kadi oyandi mu kiana kanwene, o ndumba wazitikilwa okazidi, kansi ke vakele muntu ko kamvuluza.”—Nsi. 22:25-27.

Muna diambu diadi, afundisi bakwikilanga vo mwan’a ndumba wakaza kwandi “kansi ke vakele muntu ko kamvuluza.” Ozevo, katele kwandi zumba ko. Kansi, o mwan’ayakala watumbwanga wau ‘kavukane mu kingolo’ yo mwan’a ndumba wazitikilwa yo tá yandi e zumba.

Kana una vo nsiku wau ukiesesanga o kondwa-kuma kwa mwan’a ndumba, o lusansu luyikanga e ngielele ya mwan’ayakala wau kavukane yandi mu kingolo yo tá yandi e zumba. Tulenda kala ye ziku vo afundisi ‘batoma fimpululanga’ e diambu yo baka e nzengo zina ngwizani ye nsiku mia Nzambi miatoma kiá mina kavutukilanga nkumbu miayingi.—Nsi. 13:14; 17:4; Luv. 20:14.