Nga olenda vana e mvutu za yuvu ya malongi mena muna Eyingidilu, mavaikiswa muna mvu wa 2019?

O nsilu wa Nzambi vo: “Ke vena nuaninua ko kiavangwa mu kuma kiaku kisikila,” aweyi usongele? (Yes. 54:17)

Tulenda kala ye vuvu vo Nzambi okututanina muna konso mpasi zina nze “mpemok’abangiki.” (Yes. 25:4, 5) E mpasi tumweswanga kwa mbeni zeto ke zakwele mvu ko.—Eyingidilu 01/19, luk. 6-7.

Aweyi Yave kasongela unsongi wandi muna mpila kakadilanga ye Anekenani ye Aneyisaele akolami?

Yave watumbanga awana bayivananga muna mavangu ma zumba ye awana babangikanga akento ye yingiana-ngiana. Wasambulanga nkangu andi vava basikilanga ye kwikizi muna yandi yo kadila yo muntu yo nkwandi kuna unsongi.—Eyingidilu 02/19, luk. 22-23.

Adieyi tufwete vanga avo vamosi twina yo muntu osambanga una vo ke Mbangi a Yave?

Tulenda kala twabutama yo songa luzitu. Kansi, ke tufwete vova “amen” ko ngatu simba moko ma wantu akaka ekolo besambanga. Tulenda kweto vanga e sambu kia yeto kibeni muna nsi a ntima.—Eyingidilu 03/19, luk. 31.

E vangu dia vukana yo wan’akete ekuma dinina diavonza?

O vukana ye yingiana-ngiana sumu kwa wan’akete ana belekwanga mu kingolo, sumu kwa nkutakani, nkanu kwa ayadi ye mpe sumu kwa Nzambi. Muna nsi zina yo nsiku wa zayisa kwa ayadi e nsangu za muntu ofundilu vo mwan’akete kavukane yandi, akuluntu bevanganga mawonso muna lemvokela e nsiku miami.—Eyingidilu 05/19, luk. 9-10.

Adieyi dilenda kusadisa mu soba yovo vangulula e ngindu zaku?

Tala e mambu malenda kusadisa: Mokenanga yo Yave muna sambu. Badikanga ye kani dia kuyifimpa. Toma solanga akundi aku.—Eyingidilu 06/19, luk. 11.

Aweyi tulenda kubamena owau muna zizidila lubangamu?

Tufwete kumika e kikundi kieto yo Yave. Kala ye ziku vo Yave otoma kutuzolanga ye kesinga kutubembola ko. Tanganga e Bibila lumbu yawonso yo kwamanana samba. Kala ye ziku vo e nsilu mu kuma kia Kintinu kia Nzambi lungana kikilu milungana. Tufwete lundanga muna ntu e sono ya Bibila tutoma zolanga yo sungamena e nkunga mikembelelanga Yave.—Eyingidilu 07/19, luk. 2-4.

Adieyi tulenda vanga muna sadisa yitu yeto bavuluka?

Diambote muna kuyisianga vana fulu kia muntu ankaka, songanga mbandu ambote, kala ye luzindalalu yo kala nkwa ngemba.—Eyingidilu 08/19, luk. 15-17.

Mun’owu wa nsilu a Yesu muna Matai 11:28, aweyi tulenda kumikinua?

Tuvuidi akengi anzodi, akundi ambote ye salu kiambote.—Eyingidilu 09/19, luk. 23.

Aweyi Nzambi kalenda kutuvanina o luzolo yo nkuma wa sala? (Fili. 2:13)

Vava tutanganga e Diambu dia Nzambi yo badika mana tutanganga, Nzambi olenda kutukumika yo kutuvana e tima dia vanga luzolo lwandi yo nkuma wa sala. O mwand’avelela ulenda tomesa e fu yeto.—Eyingidilu 10/19, luk. 21.

Nkia mambu tufwete vanga vitila twabaka e nzengo?

Mambu tanu tufwete vanga: Toma vavulula. Lomba ngangu muna sambu. Toma fimpa e kuma kifididi mu baka e nzengo. Kala ye makani masikididi yo kala ye ngindu zasikila.—Eyingidilu 11/19, luk. 27-29.

Vava Satana kamokena yo Eva, nga ngindu za moyo ulembi fwanga kazola sia muna ntu andi?

Nanga ke wau ko. Kadi Satana wavovesa Eva vo ke fwa kwandi ko, kansi kamvovesa ko vo vekala ye lekwa kikwamanana zinga ku fulu kiankaka. E malongi ma nsambil’aluvunu muna Kizalu mafokokela. E longi dia moyo ulembi fwanga nanga diayantika vitila Nzambi kamwanganesa nkangu watunganga e nzo yandá kuna Babele.—Eyingidilu 12/19, luk. 15.