Nanga ke wau ko. Kadi Nkadi ampemba kavovesa Eva ko vo, avo odidi e bundu kiasimwa kwa Nzambi, nitu andi kaka ifwa kansi vekala ye lekwa kikwamanana zinga ku fulu kiankaka (kina wantu ayingi beyikilanga o unu vo mwanda ulembi fwanga). Vava kasadila nioka, Satana wavovesa Eva vo, avo odidi e bundu kia nti wau, ‘ke fwa kwandi ko.’ Edi kazola vova vo Eva okwamanana zinga ova ntoto yo yangalela e zingu, lembi filwa kwa Nzambi.—Tuku 2:17; 3:3-5.

Avo e longi dialuvunu dia moyo ulembi fwanga dilongwanga o unu ke diatuka muna mpatu a Edene ko, nkia ntangwa o wantu bayantika kwikila muna longi diadi? Ke tuna ye ziku ko. Tuzeye wo vo e nsambil’aluvunu muna Kizalu kia lumbu ya Noa yafokokela. Ke vakala diaka malongi ma nsambil’aluvunu ko kadi Noa kaka ye esi nzo andi, bakala vo asambidi aludi, bavuluzwa.

Muna kuma kiaki, e longi dia moyo ulembi fwanga kuna nim’a Kizalu diayantika. Vava Nzambi kabindakesa e ndinga kuna Babele, o wantu bamwangana yo kwenda “mu nza yawonso,” kalukatikisu ko vo bayenda ye ngindu za sia vo o wantu moyo ulembi fwanga bena wau. (Tuku 11:8, 9) Kana una vo ke tuzeye ko e ntangwa o wantu bayantika kwikila mu luvunu lwalu, tulenda kala ye ziku vo Satana wa Nkadi ampemba una vo i “se dia luvunu” yandi ovitanga o ntu muna diambu diadi yo yangalala vava luvunu lwalu lusayananga mu nz’amvimba.—Yoa. 8:44.