NGA fu kia vutula matondo una kiau? Ekiaki i kiuvu kina konso muntu mu yeto kafwete kukiyuvula. Diambu dia Nzambi diasakula vo muna lumbu yeto, wantu ayingi bekala “ntokozi,” i sia vo, muntu olembi tondanga. (2 Tim. 3:2) Nanga wamona kala wantu bezolanga vo akaka babavangila e mambu yo kubakayila e lekwa. Bemonanga vo ke dina mfunu ko mu vutula matondo muna lekwa betambulanga. Ke tuzolanga kala va fulu kimosi ko ye wantu a mpila yayi.

Nswaswani ye wantu awaya, e selo ya Yave bevoveswanga vo: “Nuvutulanga matondo.” Oyeto ‘tuvutulanga matondo muna mambu mawonso.’ (Kol. 3:15; 1 Tes. 5:18) Kieleka, diambote kikilu mu songa e fu kia vutula matondo. Vena ye kuma yayingi ifwete kutufila mu songa e fu kiaki.

Kimosi muna kuma kisundidi o mfunu tufwete songela e fu kia vutula matondo i kutusadisa mu zaya e mpila tufwete kuyibadikilanga. Vava muntu kevutulanga matondo mu kuma kia lekwa katambwidi, oyangalalanga. Ndiona mpe kavutwidi matondo oyangalalanga. Ekuma yau awole beyangalelanga? Badika e nona eki: Avo muntu ovawidi e ntangw’andi mu vanga diambu muna wete diaku, disongele vo wete diaku ketokanenanga. Avo obakwidi diambu diadi, kiese kiayingi omona. I una mpe kamona o Rute. Boaze wasonga ntim’amvevo kwa Rute. Kieleka, Rute kiese kiayingi kamona vava kabakula vo Boaze wete diandi katokanenanga.—Rute 2:10-13.

E diambu disundidi o mfunu i vutulanga matondo kwa Nzambi. Nanga ezak’e ntangwa oyindulanga ulolo wa nsambu za mwanda ye za kinsuni watambula kala ye zina otambulanga. (Nsi. 8:17, 18; Mav. 14:17) Kansi, vana fulu kia yindula kaka una Nzambi kekusambulwilanga, ekuma olembi vaulwila e ntangwa ya toma badikanga una Nzambi kekusambulwilanga kumosi ye azolw’aku? O badika muna lekwa yawonso Nzambi kekuvananga diwokesa luyangalalu lwaku muna yandi yo bakula vo Yave otoma kuzolanga.—1 Yoa. 4:9.

Tufwete badikanga e lekwa kekutuvananga o Yave yo kumvutulanga mpe matondo. (Nku. 100:4, 5) Wantu bevovanga vo “ovutula matondo kiese dikututwasilanga.”

E kuma kiankaka tufwete vutulwilanga matondo i kia sia vo, yikundi kikumikanga. Yeto awonso tuzolanga vo akaka batusonga o zola. Vava ovutulanga matondo kwa muntu mu kuma kia diambu diambote kavangidi, e kikundi kieno kikumamanga. (Roma 16:3, 4) Kuna diak’e sambu, awana bevutulanga matondo bakubama bekalanga muna sadisa akaka. Vava bemonanga una akaka bekubasongelanga e ngemba ediadi dikubafilanga mu vanga diau dimosi. Dialudi, o sadisa akaka kiese kiayingi ditwasanga. Yesu ndungidi kakala yau vava kavova vo: “E diambu disundidi e kiese i vana, ke mu tambula ko.”—Mav. 20:35.

Mosi muna afidi a Universidade ya Califórnia una ye nkumbu a Robert Emmons walongoka e fu kia vutula matondo, wavova vo: “Muna songa e fu kia vutula matondo, divavanga vo twazaya wo vo lusadisu lwa akaka tuvuidi o mfunu. Vena ye ntangwa tusadisa akaka, vena mpe ye ntangwa akaka bekutusadisa.” E ziku kia diambu i kiaki: Muna kwamanana zinga yo kala ye kiese muna zingu kieto, lusadisu lwa akaka tuvuanga o mfunu mu mpila zayingi. Muna bonga e nona, akaka balenda kutuvana madia yovo lusadisu lwa mawuku. (1 Kor. 12:21) O muntu ovutulanga matondo osonganga vo oyangalelanga mana akaka bevanganga muna wete diandi. Ozevo, nga olenda yima e fu kia vutula  matondo mu kuma kia mana akaka bevanganga muna wete diaku?

E kuma kiankaka kikutufilanga mu yima e fu kia vutula matondo i kikutusadisa mu sia e sungididi muna mambu mambote vana fulu kia sia sungididi muna mambu mambi. E ngindu zeto zilenda sala nze lukenzo. E ngindu zeto zikutufila mu sia e sungididi mu maka mambu yo bembola mankaka. Vava osonganga e fu kia vutula matondo, dikusadisa mu mona mambu mambote yo lembi sia e sungididi kiasaka muna mambu mampasi. Avo owokese e fu kia vutula matondo, mambu mayingi mpe mambote omona muna zingu. Avo osidi e sungididi muna mambu mambote, dikusadisa mu vanga dina Paulu wa ntumwa kavova: “Nuyangalalanga muna Mfumu ntangwa zawonso.”—Fili. 4:4.

E fu kia vutula matondo kikusadisa mu lembi yindula mambu mambi. Avo okedi nkwa kimpala, nkwa lukendalalu lwasaka ye nlundi a makasi, diampasi dikala mu songa e fu kia vutula matondo. Kuna diak’e sambu, awana betondanga ke bekalanga ye loko dia mavua ko. Beyangalelanga ina bena yau yo lembi vava lekwa yayingi.—Fili. 4:12.

Wau vo u Nkristu, ozeye wo vo Satana ozolele vo wabwa mu lukendalalu mu kuma kia mpasi onuananga zau mu lumbu yayi yambaninu. Satana oyangalala kikilu avo okitukidi nkwa lukendalalu lwasaka yo songa e fu kia yidima. E fu yayi ke ikusadisa ko muna salu kia umbangi, kadi ilenda fila wantu mu lembi wá e nsangu zambote. E fu kia vutula matondo ngwizani kina ye fu ya mbongo a mwand’avelela a Nzambi nze kiese yo lukwikilu. Muna bonga e nona, tukalanga ye kiese vava tumonanga e lekwa yambote ina Nzambi kekutuvananga yo kwikila muna mawonso katusila o nsilu.—Ngal. 5:22, 23.

Wau vo u mosi muna Mbangi za Yave, nanga okwikidi mawonso tuvovele mu longi diadi mu kuma kia fu kia vutula matondo. Kana una vo i wau, diampasi dikalanga mu songa e fu kia vutula matondo yo yindula kaka mambu mambote. Kansi kuyambula ko vo ediadi diayoyesa. Ongeye olenda songa e fu kiaki kia vutula matondo. Aweyi olenda wo vangila? Muna vaulanga e ntangwa konso lumbu mu yindula mambu mambote ma zingu kiaku malenda kufila mu vutula matondo. Avo okwamanene wo vanga, diasazu dikala mu songa e fu kia vutula matondo. Muna mpila yayi, e kiese kiaku kisunda kina kia awana besianga kaka e sungididi muna mambu mampasi ma zingu. Yindulanga mambu mambote mana Nzambi ye wantu akaka bevanganga muna kuyangidika yo kukasakesa. Nga olenda soneka mambu mole yovo matatu owananene mau muna konso lumbu malenda kufila mu vutula matondo?

Akaka muna awana belongokanga e fu kia vutula matondo, bevovanga vo e fu kiaki kilenda soba e mpila ina o tomfo tweto tusadilanga yo kutukitula se wantu ambote. O muntu ovutulanga matondo nkwa kiese kekalanga. Muna kuma kiaki, yindulanga e nsambu otambulanga, yangalelanga e mambu mambote mevangamanga muna zingu kiaku yo vutula matondo. Vana fulu kia yindula kaka vo ofwanukinu e mambu mambote mevangamanga muna zingu kiaku, ‘vananga matondo kwa Yave, kadi oyandi wambote.’ Ozevo, ‘vutulanga matondo muna mambu mawonso.’—1 Tus. 16:34; 1 Tes. 5:18.