Nga oyangalele tanga malongi mavaikisu mu mvu wau muna Eyingidilu? Avo i wau, teza van’e mvutu za yuvu yilende:

Aweyi tufwete badikilanga akuswa?

Tuyangalalanga vava tumonanga o lukwikilu lwau. Kansi, ke tusianga e sungididi kiasaka ko muna lukwikilu lwau. Tuvenganga ‘sivika akaka.’ (Yuda 16, yl.) Ke tukubayuvulanga ko oma ma vuvu kiau.—Eyingidilu 01/20, luk. 29.

Adieyi dikukwikidisanga vo Yave otomene kuzaya?

E Bibila kisonganga vo Yave wamona vitila nkutu wawutuka. Owinikinanga e sambu yaku. Ozeye mana mena muna ntim’aku. Mana ovanganga malenda kunyangidika yovo kunkendeleka. (1 Tus. 28:9; Nga. 27:11) Yave yandi kibeni watunta kwa yandi.—Eyingidilu 02/20, luk. 12.

Nkia ntangwa tufwete vova ye nkia ntangwa tufwete kala e pi-i?

Tukalanga ye kiese kia vovela oma ma Yave. Tuvovanga avo tumwene muntu ozolele vengomoka mu nzila yambi. Akuluntu ke bafwete butamanga ko avo bamwene vo mpangi mosi longi kavuidi o mfunu. Ke tufwete vova ko mu kuma kia una e salu kieto kisadilwanga mu nsi zina zisimanga kio yovo mu nsi zibangikanga e mpangi zeto ngatu sengomona e mambu ma mbumba tuzeye.—Eyingidilu 03/20, luk. 20-21.

Nkia mambu maswaswana mena muna makonko meyikwanga muna Yoele kapu kia 2 ye mana meyikwanga muna Lusengomono kapu kia 9?

Yoele 2:20-29 kivovanga vo Nzambi ovavula e makonko yo kubasenda mu kuma kia mfwilu betwasa. I bosi, Nzambi obungula mwand’andi. E mambu mama malungana vava e vu kia makesa ma Babele bafwasa Yerusaleme ye muna mvu mialanda. E makonko meyikwanga muna Lusengomono 9:1-11, mesunzulanga e selo yakuswa ya Yave, ana besamunanga e mfundisa za Nzambi kuna unkabu wawonso. Muna kuma kiaki, awana beyikamanga e nza yayi ke beyangalalanga ko. —Eyingidilu 04/20, luk. 3-6.

Nani i ntinu a node o unu?

Rússia ye akwandi. Besianga o nkangu a Nzambi e kitantu kadi besimanga e salu kia samuna e nsangu zambote. Besonganga mpe vo bemenganga e Mbangi za Yave. O ntinu a node onuanisanga o ntinu a sude.—Eyingidilu 05/20, luk. 13.

E fu iyikwanga muna Ngalatia 5:22, 23, nga i yau kaka i fu ya “mbongo a mwanda”?

Ve. O mwand’avelela ukutusadisanga mu yima e fu yankaka yambote nze unsongi. (Efe. 5:8, 9)​—Eyingidilu 06/20, luk. 17.

Nkia vonza olenda bwilwa ekolo osianga e mafoto ma ngeye kibeni muna internete?

E nkomena, mafoto ye video osianga muna internete zilenda fila akaka mu yindula vo kuna ye fu kia lulembamu ko, kansi sana okuyisananga.—Eyingidilu 07/20, luk. 6-7.

Adieyi Akristu balenda longoka muna mbandu ya abaki ambote a mbizi za maza?

Abaki ambote a mbizi za maza besalanga kuna fulu ye ntangwa ina balenda solola e mbizi. Belongwanga una balenda sadila e salanganu yambote. Kuna unkabu wawonso, besalanga muna nsungi zampasi. Oyeto mpe, tulenda vanga diau dimosi muna salu kia umbangi.—Eyingidilu 09/20, luk. 5.

Aweyi tulenda sadisila alongoki eto a Bibila batoma zola Yave?

Tulenda kubakasakesa batanganga e Bibila yo yindula mana betanganga. Tulenda mpe kubalonga o samba.—Eyingidilu 11/20, luk. 4.

Aki nani beyikwanga muna mvovo: “Awonso muna Kristu mpe i bevuila moyo”?—1 Kor. 15:22.

Paulu kazola vova ko vo wantu awonso fulwa befulwa. Akristu akuswa kavovela ana ‘bavaulwa se alongoki a [i sia vo, kumosi yo] Kristu Yesu.’ (1 Kor. 1:2; 15:18)​—Eyingidilu 12/20, luk. 5-6.

Nkia salu akuswa besala kuna zulu ekolo ‘bekitulwa muna nday’a meso vava kisikwa mpungi yansuka’?—1 Kor. 15:51-53.

Belanda Yesu wa Mfumu au yo vungula e zula muna mvuala ya sengwa. (Lus. 2:26, 27)​—Eyingidilu 12/20, luk. 12-13.