Ve. Kiakala muna Bibila yovo muna lusansu lwa wantu ke vena ye fulu ko tutanganga vo Akristu bakala ye fu kiaki.

E mpila yasekolwelwa e sono kiaki muna nsekola zayingi za Bibila, ifilanga wantu mu yindula vo, muna lumbu ya Paulu Akristu fu kia vuba wantu muna wete dia awana bafwa bakala kiau. Kasikil’owu, nsekola ya Nova Versão Internacional isekolanga e sono kiaki mu mpil’eyi: “Owau, avo mafwa ke mefulwa ko, adieyi bevanga awana bevubilwanga mu diambu dia mafwa?”

Tala dina bavova akwa ngangu wole befimpanga e Bibila. Mosi muna yau, i sia vo, Dr. Gregory Lockwood wavova vo, e ngindu za sia vo o luvubu lwalu lwavangamanga “muna wete dia awana bafwa kala” i “mpil’a luvubu luna ke lusidi vangama ko, kiakala muna lusansu lwa wantu yovo muna Bibila.” I diau mpe o Nlongi Gordon Donald Fee kasoneka: “Ke vena ye fulu ko muna Bibila yovo muna lusansu lwa wantu luvovelanga luvubu lwalu. O Luwawanu Lwampa ke luvovelanga e diambu diadi ko. Ke vena mpe ye ziku ko kisonganga vo Akristu a tandu kiantete yovo mabundu mankaka mana mavaika muna tandu yalanda mavanganga o luvubu lwalu.”

E Bibila kivovanga vo alandi a Yesu bafwete ‘kitula wantu a zula yawonso se alongoki, kubavuba . . . , kubalonga balunda o mambu mawonso’ kakanikina. (Mat. 28:19, 20) O muntu muna kituka nlongoki yo vubwa, entete kafwete longoka mu kuma kia Yave ye Mwan’andi, kwikila muna yau yo kubalemvokela. O muntu ona ofwidi kala yo zikwa, kalendi vanga mambu mama ko. Muna kuma kiaki, o Nkristu una o moyo kalendi vubwa ko muna wete dia awana bafwa.—Kim. 9:5, 10; Yoa. 4:1; 1 Kor. 1:14-16.

Ozevo, adieyi Paulu kazola vova?

Akaka muna esi Korinto ke bakwikilanga muna lufuluku ko. (1 Kor. 15:12) Muna kuma kiaki, Paulu wabasonga vo e ngindu zazi zabendomoka. Mu nkia mpila? Wasasila vo ‘lumbu yawonso vonza kia lufwa kianlwakilanga.’ Kana una vo mu vonza kakalanga, wakala ye ziku vo vava kefwa ofulwa yo kwenda kuna zulu, nze una diavangama kwa Yesu.—1 Kor. 15:30-32, 42-44.

Diavavanga vo esi Korinto babakula vo o kala Nkristu akuswa disongele vo o muntu kafwete zizidila e mpasi lumbu yawonso yo fwa vitila kafulwa. Ozevo, o muntu muna ‘vubilwa muna Kristu Yesu,’ divavanga vo ‘kavubilwa mpe muna lufwa lwandi.’ (Roma 6:3) Ediadi disongele vo nze Yesu, akuswa bemona mpe e mpasi yo fwa kimana bafulwa yo kwenda kuna zulu.

Vioka mvu miole vava Yesu kavubwa muna maza, wavovesa ntumwa zandi zole vo: “E mvubwa mpe ina ivubwa, nulenda yo vubwa.” (Maku 10:38, 39) Yesu kadi vubwa diaka mu maza ko. Muna mvovo miami, edi kazola vova vo o songa e kwikizi kiandi muna Nzambi dikumfila muna lufwa. Paulu wasoneka vo akuswa ‘bemona yandi e mpasi kumosi, ozevo, bekembeswa mpe kumosi.’ (Roma 8:16, 17; 2 Kor. 4:17) Muna kuma kiaki, oyau mpe bafwete fwa kimana bafulwa yo kwenda zingila kuna zulu.

Mu kuma kia mawonso mama tuvovele, e mpila yambote yasekolwela e mvovo mia Paulu i yau yiyi: ‘Ozevo, adieyi bevanga awana bevubwanga ye kani dia fwa? Avo mafwa ke mefuluka ko, ekuma bevubilwanga ye kani dia fwa?’