Kuna zulu, Yesu walongoka e fu yambote ina muntu kafwete kala yau muna sala kiambote ye akaka. I bosi, vava kayiza ova ntoto, walonga e fu yayi yambote kwa alongoki andi. Oyeto mpe tulenda longoka mayingi muna mbandu a Yesu. Muna kuma kiaki, muna badika e mbandu a Yesu, tulenda solola nkanikinu tatu milenda kutusadisa mu salanga kiambote ye akaka. E nkanikinu miami mikutusadisa mu kala mu kintwadi ye mpangi zeto.

Avo tuzolele sala kiambote ye akaka, tufwete kala alembami. O nlembami ozitisanga akwandi a salu ye ke vavanga kubakomekena ngindu zandi ko. Yesu lulembamu lwa mpila yayi kasonga kadi kwa Se diandi kalongokela e fu kiaki. Dialudi vo Yave kaka olenda yikilwa vo Mvangi. Kansi, wayambula vo wantu bazaya wo vo Mwan’andi mpe wansadisa muna salu kia nsema. Tumonanga e ziku kia diambu diadi mu kuma kia dina Yave kavova muna Tuku 1:26. Wavova vo: “Yambula twavanga o muntu muna fwaniswa kieto.” E mvovo miami miasonga kwa Yesu vo Yave nlembami.—Nku. 18:35.

Vava Yesu kakala ova ntoto, wasonga mpe lulembamu lwa mpila yayi. Kasikil’owu, vava Yesu kasanisinuanga mu kuma kia mana kavanganga, wavananga nkembo kwa Yave. (Maku 10:17, 18; Yoa. 7:15, 16) Wavanganga mawonso kimana kakala mu luvuvamu ye alongoki andi. Kuna kwa Yesu, alongoki andi, akundi andi bakala, ke ntaudi  zandi ko. (Yoa. 15:15) Yesu wasukula nkutu malu ma alongoki andi muna kubalonga o mfunu wakala alembami. (Yoa. 13:5, 12-14) Nze Yesu, tuzolanga awana tusalanga yau muna sianga e zolela yau va fulu kiantete, ke mu zolela yeto ko. Salu kiayingi tulenda sala avo ‘tuzitisi muntu yo nkwandi’ yo lembi tokana kana vo tusanisinua mu kuma kia salu kieto yovo ve.—Roma 12:10.

O nlembami ozeye wo vo “vana vena aludiki ayingi o makani mesikilanga.” (Nga. 15:22) Kana nkutu nkia umbangu yovo ngangu tukala zau, tufwete sungamenanga vo ke vena muntu ko ozeye mawonso. Kana nkutu Yesu watambulwila dio vo kazaya mawonso ko. (Mat. 24:36) Yesu mpe wazolanga zaya e ngindu za alongoki andi kana una vo wantu alembi lunga bakala. (Mat. 16:13-16) Kiaki i kuma alongoki andi ke bakadilanga yo wonga ko mu mokena yandi. Oyeto mpe tuzolele kala alembami muna tambulwilanga vo ke tuzeye mawonso ko yo zitisanga e ngindu za akaka. Muna mpila yayi, tusiamisa luvuvamu, ‘makani meto mesikila.’

Musungula akuluntu, bafwete tangininanga Yesu muna songanga lulembamu vava besalanga kumosi. Bafwete sungamenanga vo mwand’avelela ulenda sadisa konso nkuluntu kavova diambu disadisa e buka kia akuluntu mu baka nzengo zambote. Avo muna lukutakanu lwa akuluntu konso muntu ovananga e ngindu zandi lembi mona wonga, diasazu dikala mu baka nzengo zambote, muna mpila yayi e nkutakani ikala mu luvuvamu.

Avo tuzolele sala kiambote ye akweto, ke tufwete siandamanga ko vo mambu mavangamena kaka muna mpila eto. Nkumbu miayingi, Yesu wakala ye lau dia mona una Yave kasongelanga ntim’anleka yo lembi siandama vo mawonso mavangamena kaka una kazolele. Kasikil’owu, wamona una Yave kasongela nkenda kwa wantu muna kuntwika keza katula o wantu muna sibu kia lufwa.—Yoa. 3:16.

Yesu mpe kasiandamanga kaka ko vo mambu mavangamena kaka una kazolanga. Sungamena una kasadisila nkento wa Mfenisia, kana una vo watumwa mu kwiza sadisa mameme mavila ma nzo a Isaele. (Mat. 15:22-28) Yesu mpe kakomekenanga alongoki andi ko vo bavangila o mambu mu mpila yalunga. Kana nkutu vava Petelo wa nkundi andi kamvakulwila o nkalu vana meso ma ndonga, Yesu wanloloka. Kuna kwalanda, Yesu wavana nkutu yiyekwa yamfunu kwa Petelo. (Luka 22:32; Yoa. 21:17; Mav. 2:14; 8:14-17; 10:44, 45) E mbandu a Yesu ikutulonganga vo muna lembi  siandamanga kaka muna mana tuzolele, ‘o ntim’eto anleka uzayakana kw’awonso.’—Fili. 4:5.

O ntim’anleka mpe ukutusadisa mu kulukilwa osala yo wantu a mpila zawonso kuna luvuvamu. Yesu mu mpila yambote kakadilanga yo wantu ana batambulwilanga e nsangu zandi, kiaki i kuma e mbeni zandi bamvunina mambu vo “nkundi avakulwisi a mpaku ye asumuki” kakala. (Mat. 11:19) Ozevo, aweyi oyeto mpe tulenda tanginina Yesu muna mpila tukadilanga ye akaka? Mpangi Louis ona wasala kala mu mvu miayingi ye mpangi za mpila mu mpila muna salu kia kinkengi a zunga ye kuna Betele, wavova vo: “Kuna kwa mono, osala ye mpangi zaswaswana dina nze mono itunganga e yaka kia matadi manene ye makete. Muna kuma kiaki, ngolo zayingi zivavuanga muna tunga e yaka kia mpila yayi. Kansi, tulenda kio tunga kweto avo tusidi konso tadi vana fulu kiandi. Muna kuma kiaki, ivanganga e nsobani kimana yasala kuna luvuvamu ye mpangi zame.” Ekwe mbandu ambote tuzolele tanginina!

Nkia malau tuna mau muna songa o ntim’anleka kwa mpangi muna nkutakani eto? Tukalanga ye lau diavaika kumosi ye mpangi za buka kieto kia salu kia umbangi. Tulenda vaika ye ateleki aswaswana, kumosi mpe ye ateleki antela zaswaswana. Tulenda songa ntim’anleka muna tambulwilanga sadila yovo soba e mpila ya sila umbangi mun’owu wa nsatu za mpangi tuvaikidi yandi. Muna mpila yayi, mpangi ndioyo okala ye kiese muna salu kia umbangi.

Ndiona osalanga kiambote ye akwandi, wazola ‘kayila akaka.’ (1 Tim. 6:18) Muna kolo kiawonso kasalanga kumosi yo Se diandi kuna zulu, Yesu wabakula vo Yave kanswekelanga mambu ko. Vava Yave “kakubika e zulu,” Yesu ‘wakala vana’ yo longoka mambu mayingi. (Nga. 8:27) I bosi, vava kayiza ova ntoto, Yesu wazayisa alongoki andi “mawonso kawa” kwa Se diandi. (Yoa. 15:15) Tulenda tanginina mbandu a Yave muna zayisanga mawonso tuzeye kwa akweto a salu. Kieleka, ndiona osalanga kiambote ye akaka, ke kalanga yo wonga ko wazayisa mana kazeye kwa akaka yo kubalonga ngatu yindula vo ke kala diaka mfunu ko. Kansi, okalanga ye kiese kia zayisa mambu mambote kazeye kwa akaka.

Tulenda mpe kasakesa awana tusalanga yau. Aweyi omonanga avo muntu ankaka usanisini yovo uvutwidi matondo mu kuma kia salu kiambote osadidi? Kieleka, otoma yangalalanga. Yesu mpe wavaulanga e ntangwa mu sanisina alongoki andi muna mambu mambote bavanganga. (Tezanesa ye Matai 25:19-23; Luka 10:17-20.) Yesu wavovesa alongoki andi vo, oyau ‘bevanga nkutu mana masundidi.’ (Yoa. 14:12) Muna fuku wa vitila lufwa lwandi, Yesu wasanisina alongoki andi akwikizi oku vo: “Yeno nukedi yame muna ntonta zame.” (Luka 22:28) Yindula una e mvovo miami miakasakesela alongoki awaya yo kubafila mu vanga diambu. Kieleka, avo tukala ye fu kia sanisina awana tusalanga yau, bekala ye kiese yo sala kiambote.

Mpangi mosi una ye nkumbu Kayode wavova vo: “Ke divavanga ko vo wakala muntu alunga muna lenda sala kiambote ye akaka. Edi kaka ofwete vanga i yambula vo awana besalanga yaku bakala ye kiese yo lebola e salu kiau.” Nga osalanga kiambote ye akaka? Nga olenda yuvula kwa mpangi osalanga yau kimana bazayisa una bekubadikilanga muna diambu diadi? Avo bekalanga ye kiese kia sala yaku, wauna alongoki a Yesu bakadilanga ye kiese kia sala yo Yesu, ongeye mpe ovova dina Paulu wa ntumwa kavova: “Kumosi tusalanga muna kiese kieno.”—2 Kor. 1:24.