1. Vitila Yesu kafwa, nkia diambu kavovesa kwa kimpumbulu ona wakala vana ndambu andi? (Luka 23:39-43)

 YESU ye yimpumbulu yole bakala vana ndambu andi, banuananga ye mpasi za lufwa. (Luka 23:32, 33) E yimpumbulu yole yayi bayantika tianguna Yesu, ediadi diasonga vo ke bakala alongoki a Yesu ko. (Mat. 27:44; Maku 15:32) Kansi mosi muna yau, wasoba ntima. Wavova vo: “E Yesu, unsungamena vava okota muna Kintinu kiaku.” Yesu wamvutula vo: “Kieleka, o unu ivovese wo vo, okala yame muna Paradiso.” (Tanga Luka 23:39-43.) Ke vena diambu ko disonganga vo e kimpumbulu kiaki watambulwila e nsangu za “Kintinu kia zulu,” zina Yesu kasamunanga muna salu kiandi kia umbangi. Yesu mpe kavova ko vo muntu ndioyo okota muna Kintinu. (Mat. 4:17) Yesu Paradiso eyi yikala ova ntoto kavovevela. Ekuma tuvovele e diadi?

2. Nkia ziku kisonganga vo e kimpumbulu ona waviluka o ntima Nyuda kakala?

² E kimpumbulu ona waviluka o ntima nanga Nyuda kakala. Kadi wazayisa nkwadi vo: “Nga kuvumina Nzambi ko wau otumbilu tumbu kiau kimosi?” (Luka 23:40) Ayuda, Nzambi mosi kaka basambilanga, kansi o nkangu mu nzambi zayingi bakwikilanga. (Luv. 20:2, 3; 1 Kor. 8:5, 6) Kele vo kimpumbulu ndioyo kakadi nyuda ko, nanga wadi vanga e kiuvu mu mpila eyi: “Nga kuvumina zinzambi ko?” Vana ntandu, Yesu katumwa kwa wantu ankaka ko, kansi “kwa mameme mavila ma nzo a Isaele kaka.” (Mat. 15:24) Nzambi wavovesa Isaele vo ofutumuna mafwa. Nanga e kimpumbulu ona waviluka o ntima wazaya e diambu diadi, kadi e mvovo miandi miasonga vo  Yave ofutumuna Yesu mu yala se ntinu muna Kintinu kia Nzambi. E kimpumbulu kiaki nanga wakala ye vuvu vo Nzambi mpe okumfutumuna.

3. Nkia diambu kayindula e kimpumbulu ona waviluka o ntima vava Yesu kanzayisa oma ma Paradiso? Sasila. (Tuku 2:15)

³ Wau vo kimpumbulu ona waviluka o ntima Nyuda kakala, wazaya o lusansu lwa Adami yo Eva ye Paradiso ina Yave kabavana. Muna kuma kiaki, e kimpumbulu watoma zaya e Paradiso ina Yesu kavovela, i sia vo, mpatu ambote-mbote ikala ova ntoto.—Tanga Tuku 2:15.

4. Dina Yesu kavovesa kwa kimpumbulu, adieyi difwete kutufila mu vanga?

⁴ Dina Yesu kavovesa kwa kimpumbulu difwete kutufilanga mu yindula una ukala e zingu muna Paradiso. O unu, tulenda longoka mayingi mu kuma kia Paradiso, avo tuyindwidi luvamu lwakala muna Kintinu kia Solomo. Muna kuma kiaki, tulenda vingila vo Yesu ona osundidi Solomo osala kumosi ye awana keyala yau mu kitula o ntoto se fulu kiambote-mbote. (Mat. 12:42) Ozevo, “mameme mankaka” bafwete vanga diambu muna kuyifwanisa kimana bazinga muna Paradiso yakwele mvu.—Yoa. 10:16.

5. Kuna kwa ngeye, aweyi ukala e zingu muna Paradiso?

⁵ Muna ngindu zaku, aweyi ukala e zingu muna Paradiso? Nanga oyindulanga fulu kiambote-mbote, nze una wakala mpatu a Edene. (Tuku 2:7-9) Nanga osungamenanga ungunza una Mika kasoneka uvovanga vo nkangu a Nzambi uvuanda “konso muntu kuna nsi a nsing’andi a vinyu ye kuna nsi a nsand’andi.” (Mika 4:3, 4) Nanga osungamenanga mpe dina Bibila kivovanga vo, vekala ye ulolo wa madia. (Nku. 72:16; Yes. 65:21, 22) Ozevo, olenda kukiyindula vo mu mpantu ambote-mbote wina, ovuende vana meza mazala ye madia mambote-mbote. Olenda mpe yindula vo mu baka wina mu pepe una ye nsunga za mvuma, nti ye una wá e ndinga yo tusevo twa yitu yaku, akundi kumosi ye awana bafulukidi ye mu yangalala nuina mu kala vamosi. Mawonso mama ke ndozi ankatu ko. Ke lutatikisu ko vo, e zingu i wau kikilu kikala ova ntoto. Vana ntandu, salu kiambote mpe tukala kiau muna Paradiso.

6. Nkia mambu tuvanga muna Paradiso? (Tala e fwaniswa)

⁶ Yave watuvanga kimana twayangalelanga e salu yeto. (Kim. 2:24) Muna kolo kia Luyalu lwa Kristu lwa Funda dia Mvu, salu kiayingi tukala kiau. Awana bevuluka muna mpasi zayingi ye mafunda ma wantu ana befuluka, ke lukatikisu ko vo mvuatu bevua o mfunu, madia ye fulu kia zingila. Muna lungisa mambu mama mawonso, divava vo twasala  kwayingi. Nze una Adami yo Eva balunga-lungila e mpatu a Edeni, o yeto mpe tukala ye lau dia kitula o ntoto se Paradiso. Yindula mpe e kiese tukala kiau kia longa mafunda ma wantu ana befuluka ye ke bazaya Yave ko, nsilu andi yo sadisa selo yakwikizi ya Yave ana bazinga vitila tandu kia Yesu yo kubazayisa mana mavangama kuna nima lufwa lwau.

7. Nkia ziku tulenda kala kiau? Ekuma?

⁷ Tulenda kala ye ziku vo, e zingu muna Paradisi, kia luvuvamu kikala, kiambote ye mambu mawonso matoma kubikwa. Ekuma? Kadi Yave okutuzayisanga kala una ukala e zingu muna luyalu lwa Mwan’andi. Tulenda mona e ziku kia diambu diadi muna lusansu lwa Luyalu lwa Solomo wa Ntinu.

8. Aweyi e mvovo mia Nkunga 37:10, 11, 29, mialunganena kuna nz’akulu? (Tala “Yuvu Y’atangi” omu Eyingidilu diadi.)

⁸ Davidi wa Ntinu wavumunuinua mu soneka una ukala e zingu muna Paradiso vava ntinu a ngangu ye kwikizi kevuanda vana kunda kia kimfumu. (Tanga Nkunga 37:10, 11, 29.) Vava tuzayisanga kwa wantu mu kuma kia mana mevangama kuna sentu, nkumbu miayingi tutanganga e sono kia Nkunga 37:11. Tuna ye kuma kia sikila tuvangilanga wo. Kadi Yesu wayika e sono kiaki muna longi diandi vana mongo muna songa vo e diambu diadi dilungana kuna sentu. (Mat. 5:5) E mvovo mia Davidi mpe miasonga una wadi kala e zingu muna lumbu ya Solomo wa Ntinu. Vava Solomo wa ntinu kayala Isaele, o nkangu a Nzambi mu luvuvamu wakala muna nsi ina “ifwamfumukanga kimvumina yo wiki.” Nzambi wavova vo: “Avo nukwamanana kangalela muna mîna miame . . . , Isikidisa luvuvamu muna nsi, nuleka lembi mweswa wonga kwa muntu.” (Lev. 20:24; 26:3, 6) O nsilu wau walungana muna luyalu lwa Solomo. (1 Tus. 22:9; 29:26-28) O Yave wasia nsilu vo wantu ambi “ke bekala diaka ko.” (Nku. 37:10) Muna kuma kiaki, e mvovo mia Nkunga 37:10, 11, 29, mialungana kuna nz’ankulu, lungana mpe milungana kuna sentu.

9. Adieyi ntinu ankento wa Seba kavova mu kuma kia luyalu lwa Solomo wa Ntinu?

 ⁹ Ntinu ankento a Seba wawa e nsangu vo luyalu lwa Solomo luvuvamu lwatwasanga muna nkangu wawonso wa Isaele. Dianu, wavanga nkangalu wandá muna kwenda kuna Yerusaleme kima kayimwena yandi kibeni. (1 Nti. 10:1) Vava kamona mawonso muna kintinu kia Solomo wavova vo: “Kana nkutu ndambu ke bansamunuina yo ko. . . . Kiese kwa wantu aku, kiese kwa selo yaku ana betelamanga ova ndose aku ntangwa zawonso yo wá e ngangu zaku!” (1 Nti. 10:6-8) Kansi, mana mavangama muna luyalu lwa Solomo, ndambu kaka muna mana Yave kesinga vanga kwa wantu muna luyalu lwa mwan’andi Yesu.

10. Mu nkia mpila Yesu kasundidi Solomo?

¹⁰ Yesu osundidi Solomo mu mpila zawonso. Solomo muntu a lembi lunga kakala ona wavola masumu mayingi mampwena matwasa e mpasi kwa nkangu a Nzambi. Kuna diak’e sambu, nswaswani yo Solomo, Yesu i Ntinu a lunga ona kasidi vola sumu ko. (Luka 1:32; Ayib. 4:14, 15) Yesu wakwamanana ye kwikizi muna Nzambi kana una vo watontwa mu mpila zayingi kwa Satana. Kristu wasonga mpe e ziku vo kasidi sumuka ko ngatu vanga diambu dina diakulula e kwikizi kiandi. Kieleka, yandi i ntinu osundidi tulenda kala yandi.

11. Aki nani besadisa Yesu?

¹¹ Yesu okala ye 144.000 ma akuswa besala yandi kumosi muna lunga-lunga o nkangu yo lungisa e kani dia Yave ova ntoto. (Lus. 14:1-3) Akuswa awaya mpe mambu mayingi ma mpasi bawanana mau ekolo bakala ova ntoto. Muna kuma kiaki, o yau betoma bakula e mpasi za awana bezingila ova ntoto. Kansi, nkia salu kikilu besala akuswa awaya?

12. Nkia salu besala akuswa?

¹² E salu kina Yesu ye akuswa besala, kisundidi kina Solomo kasala. Solomo wa ntinu walunga-lunga mafunda ma wantu muna nsi imosi kaka. Kansi awana beyala muna Kintinu kia Nzambi, besadisa mu lunga-lunga mafunda ye mafunda ma wantu omu nza yawonso. Kieleka, lau diampwena kikilu o Yave kavana kwa 144.000 ma akuswa.

13. Nkia salu kiankaka kiamfunu akuswa besala?

¹³ Nze Yesu, e 144.000 ma akuswa besala se atinu ye anganga. (Lus. 5:10) Muna nsiku a Mose, e mbebe antete anganga bakala yau, i lunga-lunga o vimpi wa nitu wa nkangu yo kubasadisa bakala ye ngwizani ambote yo Nzambi. O Nsiku wakala se “kini kia mambu mambote mekwiza.” Muna kuma kiaki, tulenda vova vo awana keyala yau o Yesu, salu kiamfunu bekala kiau kia lunga-lunga o vimpi wa ntinu wa nkangu a Nzambi yo kubasadisa bakala ye ngwizani yambote yo Nzambi. (Ayib. 10:1) Ke tuzeye ko una atinu ye anganga awaya bemokenena yeto ova ntoto. Kansi tuna ye ziku vo Yave ovanga e nkubika kimana awonso bezingila mu Paradiso ova ntoto batambula luludiku bevua o mfunu.—Lus. 21:3, 4.

14. Nkia ngwizani bena yau e “mameme mankaka” ye “fikambi-kambi”?

¹⁴ Yesu wayikila awana keyala yau vo “fikambi-kambi.” (Luka 12:32) Wayikila mpe e buka kiazole vo “mameme mankaka.” E buka yole yayi ina se kambi dimosi. (Yoa. 10:16) E buka yole yayi isalanga kumosi ye ikwamanana sala kumosi yavana o ntoto  ukituka se Paradiso. Ozevo, e “fikambi-kambi” ku zulu bekwenda, o mameme mankaka, bena ye vuvu kia vua moyo ova ntoto yakwele mvu. Kansi, mayingi diaka bafwete vanga owau muna kuyifwanisa kimana bazingila muna Paradiso.

15. (a) Aweyi “mameme mankaka” mesadilanga kumosi ye mpangi za Kristu? (b) Aweyi tulenda tanginina e mbandu a mpangi una muna loja? (Tala e foto.)

¹⁵ Vitila kafwa, e kimpumbulu tuyikidi kala, kakala ye lau ko dia songa luyangalalu lwandi muna Kristu. Kansi, o mameme mankaka mena ye lau dia songa luyangalau lwau muna Yesu. Kasikil’owu, tusonganga luyangalalu lweto muna mpila tukadilanga ye mpangi za Kristu. Yesu wavova vo ofundisa mameme mankaka muna mpila bekadilanga ye mpangi zandi. (Mat. 25:31-40) Tulenda sadisa mpangi za Kristu muna kukivananga muna salu kia samuna e nsangu zambote yo kitula wantu se alongoki. (Mat. 28:18-20) Muna sadisa alongoki eto a Bibila, tufwete sadilanga o nkanda Zinga ye Kiese Yakwele Mvu! Avo kuna ye alongoki a Bibila ko, olenda kuyisila e kani dia vana e lau kwa wantu ayingi dia longoka e Bibila.

16. Adieyi tufwete vanga mu zingila muna Paradiso?

¹⁶ Vitila twakota muna Paradiso, eyayi i ntangwa tufwete kuyifwanisa kimana twakituka e mpila wantu ana Yave kazolele vo twakala. Tuka owau, tufwete vanga e ngolo muna kala akwa ziku, muna mana tuvanganga, tuvovanga yo kala akwa volo muna mambu mawonso. Tulenda mpe sikila ye kwikizi kwa Yave, kwa nkaz’eto ye kwa mpangi zeto. Avo tuvangidi e ngolo mu lemvokela Yave omu nza yayi yambi, diasazu dikala muna kunlemvokela muna Paradiso. Tulenda mpe longoka e salu ya moko yo yima e fu yambote muna songa vo twakubama twina muna zingila muna Paradiso. Tala e longi dina yo ntu a diambu, “Nga Wakubama Wina mu ‘Vua e Nza’?” omu Eyingidilu diadi.

17. Nga tufwete kendalalanga kwayingi mu kuma kia masumu twavola? Sasila.

¹⁷ Ke tufwete kuyitumbanga ko mu kuma kia masumu mana twavola kala. Kuna diaka e sambu, ke tufwete ‘sumukinanga kuna lukanu  ko’ wau vo Yesu wafwa mu kuma kieto. (Ayib. 10:26-31) Kansi, tulekala ye ziku vo avo tuvilukidi kikilu o ntima muna masumu meto yo lomba lusadisu kwa Yave yo soba mavangu meto, oyandi okutuloloka e mvimba. (Yes. 55:7; Mav. 3:19) Diambote twasungamenanga e mvovo mina Yesu kazayisa kwa Afarisi: “Kizidi bokela ansongi ko, kansi asumuki.” (Mat. 9:13) Ozevo, e kimenga kia lukûlu kiafwana kikilu muna loloka masumu meto mawonso.

18. Nkia diambu ozolele mokenena yo kimpumbulu ona wafwa vana ndambu a Yesu?

¹⁸ Yindula vo muna Paradiso wina, omokenanga yo kimpumbulu ona wafwa vana ndambu a Yesu. Kalukatikisu ko vo yeno awole nusonga luyangalalu muna kimenga kia Yesu. Olenda yuvula kwa kimpumbulu kimana kazayisa mana mavanga muna ola zakete kakala yo Yesu vitila kafwa ye una kamona vava Yesu kanzayisa vo okala muna Paradiso. Kuna diak’esambu, oyandi mpe olenda kuyuvula una wakala e zingu mu lumbu yansuka ya nza ya Satana. Ekwe lau diampwena tukala diau dia longa o wantu e Diambu dia Nzambi nze muntu ndioyo!—Efe. 4:22-24.

19. E zingu muna Paradisu kekikutubayisa ko ekuma? (Tala e fwaniswa kia fukwa.)

¹⁹ E zingu muna Paradiso ke kisinga nkutu kutubayisa ko. Ntangwa zawonso tukala ye salu yambote yo zayana ye wantu ayingi. Edi disundidi o mfunu, konso lumbu tukala ye lau dia toma zaya e Se dieto dia zulu yo yangalela ina kekutuvana. Tukwamana zaya mayingi mu kuma kia Yave yo longoka mayingi mu kuma kia nsem’andi. Ekolo tukwamanana zinga, o zola kweto muna Nzambi kuwokela. Kieleka, tuvutulanga kikilu matondo kwa Yave yo Yesu wau batuvana o nsilu wa zinga yakwele mvu muna Paradiso ova ntoto.