1. Nkumbu miayingi, aweyi Yave kevaninanga e mvutu za sambu ya selo yandi?

 NGA ozeye wo vo Yave olenda kusadila muna vana e mvutu za sambu ya selo yandi? Kiakala vo, u nkuluntu, selo kia salu, mviti a nzila, nteleki muna nkutakani, nleke yovo mbuta, yakala yovo nkento, Yave olenda kusadila muna vana e mvutu za sambu ya selo yandi. Vava muntu ozolanga Yave kekunlombanga lusadisu, nkumbu miayingi Nzambi osadilanga akuluntu ye selo yandi yankaka ya kwikizi mu kala se “nto a lufiaulwisu” kwa muntu ndioyo. (Kol. 4:11) Ekwe lau diampwena tuna diau mu sadila Yave ye mpangi zeto mu mpila yayi! Tulenda vana lusadisu kwa mpangi zeto, vava vebundumukanga vuku, vava vebwanga sumbula yovo lumbangu.

2. Ekuma dilenda kadila diampasi mu sadisa akaka vava vebundumukanga e vuku?

² Vava vebundukumanga e vuku, dilenda kala diampasi mu sadisa akaka. Kasikil’owu, tulenda kala ye luzolo lwa kingula akundi eto, kansi ke tufwete wo vanga ko. Tulenda kala mpe yo luzolo lwa bokelesa ampangi bena nuana ye mpasi za kondwa nzimbu muna kwiza dia yeto kumosi, kansi dilenda kala diavonza mu vanga wo. Tulenda kala mpe ye luzolo lwa sadisa akaka, kansi dilenda kala diampasi avo mosi muna yitu kieto mpe una nuana ye diambu diampasi. Kana una vo i wau, tuzolele kwamanana sadisa mpangi zeto. Vava tuvanganga mawonso tulenda muna sadisa, tuyangidikanga Yave. (Nga. 3:27; 19:17) Adieyi tufwete vanga muna sadisa mpangi zeto?

3. Adieyi tulenda longoka muna mbandu ya akuluntu a nkutakani a mpangi Desi? (Yeremiya 23:4)

³ Adieyi akuluntu balenda vanga? Avo u nkuluntu, vanga e ngolo muna toma zaya mameme una ufwene. (Tanga Yeremiya  23:4.) Mpangi Desi ona twayikidi kala muna longi diaviokele, wavova vo: “Akuluntu a buka kiame kia salu kia umbangi, bavaikanga yame mu salu kia umbangi kumosi ye mpangi zankaka ye twaviokesanga e ntangwa kumosi.” b Muna kuma kiaki, diasazu diakala kwa akuluntu muna sadisa mpangi Desi muna kolo kia vuku kia COVID-19 vava akaka muna yitu yandi bafwa mu kuma kia kimbevo kiaki.

4. Nki kiasadisa akuluntu muna lenda sadisa mpangi Desi? Adieyi akuluntu balenda longoka?

⁴ Mpangi Desi wavova vo: “Wau vo yakikadila kala nkundi a akuluntu, diasazu diakala muna kubazayisa una yamonanga ye mana mantokanesanga.” Adeiyi akuluntu balenda longoka? Akuluntu, nuvungulanga awana bena kuna nsi a wisa kieno, vitila vabwa diambu diampasi. Nuvanga yau kikundi. Avo vabundumukini vuku kilenda kunukakidila muna mokena yau mantalani, nuvava mpila yankaka nulenda wo vangila. Mpangi Desi wavova vo: “Ezak’e ntangwa, nkumbu miayingi muna lumbu, akuluntu bambokelanga yo kuntwikila mensagem. E sono ya Bibila bantangilanga, yatoma simbanga kikilu o ntim’ame kana una vo yatoma yo zaya kala.”

5. Aweyi akuluntu balenda zayila mana ampangi bavuidi o muntu? Aweyi balenda kubasadisila?

⁵ I mosi muna mpila akuluntu balenda zayila mana ampangi bavuidi o mfunu, i kubavanga e yuvu kuna ndekwa lembi kuyisia muna mambu ma zingu kiau. (Nga. 20:5) Nga bena ye madia mafwana, nlongo yovo lekwa yankaka? Nga balenda vidisa e salu kiau vana vau yo lembi kala ye nzimbu zafwana mu futila e nzo? Lusadisu lweto bavuidi o mfunu muna tambula lusadisu kwa ayadi? Mpangi Desi wasadiswa kwa mpangi zandi muna nitu. Kansi, e diambu kikilu diatoma sadisa mpangi Desi mu zizidila e mpasi zandi, i lufiaulwisu ye lusadisu lwamwanda akuluntu bamvana. Wavova vo: “Akuluntu basambanga yame. Kana una vo kisungamenanga ko mana bampovesa, kansi i sungamenanga una yamona. Diakala nze Yave wanzayisanga vo: ‘Kuna ngeye mosi ko.’”—Yes. 41:10, 13.

6. Adieyi ampangi mu nkutakani balenda vanga muna sadisa akaka? (Tala e foto.)

⁶ Adieyi akaka balenda vanga? Tuvingilanga vo akuluntu bavitanga o ntu muna lunga-lunganga ampangi muna nkutakani. Kansi, Yave ozolele vo yeto awonso twakasakesanga yo sadisa akaka. (Ngal. 6:10) Kana nkutu vo diambu diakete kaka tuvangidi muna sadisa o muntu  una wayela, e diadi dilenda toma kunkasakesa. Mwan’a kete olenda kasakesa mpangi muna kuntwikila e fwaniswa kina kabandwidi. Avo mpangi lusadisu kavuidi o mfunu, o nleke olenda kala wakubama muna sumbila mpangi e lekwa kavuidi o mfunu yovo kumvana lusadisu mu mpila yankaka. Akaka balenda lamba madia mu kuma kia mpangi una wayela yo kunatina mo kuna nzo andi. Kansi muna kolo kia vuku, ampangi zawonso muna nkutakani, lukasakeso bevuanga o mfunu. Nanga kuna mfoko a lukutakanu, olenda sala fioti muna mokena ye ampangi, dilenda kala mu mantalani yovo muna videoconferência. Akuluntu mpe lukasakeso bevuanga o mfunu. Mpangi zankaka betwikanga kalati kwa akuluntu muna kubavutula matondo, kadi muna kolo kia vuku, salu kiayingi kikilu bekalanga kiau. Kieleka, diambote kikilu vava tuvanganga mawonso tulelenda mu kwamanananga kasakesa yo kumika muntu yo nkwandi.—1 Tes. 5:11.

7. Nkia mpasi e sumbula kilenda twasa kwa muntu?

⁷ E sumbula kilenda soba e zingu kia muntu muna ndaya meso. Olenda vidisa mavua mandi, nzo andi yovo nkutu fwilwa muntu ona ketoma zolanga. Diankenda vo, e mpangi zeto mpe bebwilwanga ediambu diadi. Nkia diambu tulenda vanga muna kubasadisa?

8. Aweyi akuluntu ye awana bevitanga o ntu muna nzo balenda kubamena vitila e sumbula kiabwa?

⁸ Adieyi akuluntu balenda vanga? Akuluntu, nusadisa mpangi zeno kimana bakala bakubama vitila e sumbula kiabwa. Nukala ye ziku vo ampangi zawonso muna nkutakani bazeye dina bafwete vanga mu kala mu lutaninu yo bokela akuluntu vana vau. Mpangi Margaret ona twayikidi kala muna longi diaviokele wavova vo: “Akuluntu bafila e longi muna mana mavuilu o mfunu mu nkutakani muna kutulukisa vo vakala diaka ye sumbula yadi bwa muna mbanza. Bavova vo, avo ayadi batuzayisi vo twasisa e nzo zeto mu kuma kia vonza kibwa, tufwete vaika vana vau.” Kieleka, ampangi bavana luludiku lwalu muna ntangwa yafwana, kadi, tumingu tanu kaka twavioka, e sumbula kia tiya kiabwa. Muna kuma kiaki, awana bevitanga o ntu muna nzo, diambote mu sadilanga e nsambila ya esi nzo muna fimpululanga dina konso muntu kafwete vanga. Avo ngeye yo wan’aku nutekele kubama vitila e sumbula kiabwa, nukala nuavuvama.

9. Aweyi akuluntu balenda kubamena vitila e sumbula kiabwa ye kuna nima sumbula?

⁹ Avo u mfidi muna buka kia salu kia umbangi, kala ye ziku vo una ye numero zina ampangi a buka kiaku bena sadila owau vitila e sumbula kiabwa. Ntangwa ke ntangwa vanganga lufimpu muna zaya kana vo e numero i zau kikilu bena sadila. I bosi, avo vabwidi e sumbula, vava bokela ateleki muna zaya dina bavuidi o mfunu muna kolo kiakina. I bosi, vana vau, twika e nsangu kwa nkuluntu a mfidi a buka kia akuluntu, o yandi obokela nkengi a zunga. Vava mpangi zazi zawonso besalanga kumosi, dialusadisu kikilu dikalanga. Vava e sumbula kia tiya kiavioka, o nkengi a zunga a mpangi Margaret kaleka ko mu ola 36 muna sadisa akuluntu kimana babokela yo lunga-lunga vioka 450 dia ampangi ana batinina mu fulu yankaka. (2 Kor. 11:27) Muna mpila yayi, mpangi zawonso batambula lusadisu bavuanga o mfunu.

10. Ekuma akuluntu bebadikilanga e salu kia vungula ampangi vo kiamfunu kikilu? (Yoane 21:15)

¹⁰ Akuluntu bena ye mbebe muna sadila e Bibila mu sadisa ampangi yo kasakesa awana bakendalele. (1 Pet. 5:2) Vava vebwanga e sumbula e diambu diantete akuluntu bafwete vanga, i kala ye ziku kana vo konso mpangi una mu lutaninu, una ye madia, mvuatu ye fulu kia leka. Kansi, kuna kulandanga, ampangi lusadisu lwamwanda bevuanga o mfunu ye muna ngindu.  (Tanga Yoane 21:15.) Mpangi Harold ona osadilanga muna Buka kia Afidi a Vula ye wawanana kala ye mpangi zayingi babwilwa sumbula wavova vo: “Ntangwa yayingi iviokanga muna vilakana ina bavidisi. Malembe-malembe ampangi bekulukwilwanga e zingu. Kansi, bekwamanananga mona e viangi kia muntu ona betoma zolanga bafwidilu, yindula e lekwa yau yovo lekwa ya yitu kiau yivididi yo yindula una badi fwila muna sumbula. O sungamena e mambu mama malenda fila muntu mu kendalalanga ntangwa ke ntangwa. O mona e mpila yayi, ke disongele ko vo o muntu kena ye lukwikilu ko. Kansi, i mpila ina o wantu bavangilwa.”

11. Nkia lusadisu esi nzo balenda vua o mfunu kuna nima sumbula?

¹¹ Akuluntu, nusadilanga e longi divovanga vo: “Nudila ye awana bedilanga.” (Roma 12:15) Nufiaulwisa yo sungamesa ampangi babwidilu e sumbula vo Yave ye ampangi betoma kubazolanga. Nubakasakesanga mpe vo bakwamanana kuyivana muna salu yamwanda nze, samba, longoka, kwendanga mu tukutakanu yo kuyivana muna salu kia samuna e nsangu zambote. Akuluntu, nukasakesanga mpe mase vo basadisanga wan’awu muna sia e sungididi muna lekwa ina ke ilendi fwasuka ko muna sumbula. Mase, nukwamanana sungamesa wana eno vo Yave okwamanana kala se nkundi au ye kesinga kubabembola nkutu ko. Nubakasakesanga mpe vo bena muna kintwadi kia ampangi zamakala ye zamakento mu nza yawonso bena vo bakubama muna kubasadisa.—1 Pet. 2:17.

12. Adieyi akaka balenda vanga muna sadisa vava e sumbula kibwanga? (Tala e foto.)

¹² Adieyi akaka balenda vanga? Avo sumbula kibwidi lukufi ye zunga kieno, olenda yuvula akuluntu dina olenda vanga muna sadisa. Nanga olenda tambula ampangi muna nzo aku ana babwidilu e sumbula, yovo buka kia ampangi ana besadisa mu tungulula e nzo zifwasukidi. Olenda mpe vana madia ye lekwa yankaka kwa ampangi bavuidi lusadisu o mfunu. Avo e sumbula kwanda kibwididi olenda kwaku mpe vana lusadisu. Mu nkia mpila? Muna sambanga muna wete dia ampangi ana babwidilu e sumbula. (2 Kor. 1:8-11) Olenda sadisa mpe muna vananga tukau twamvevo mu kuma kia salu kia nz’amvimba. (2 Kor. 8:2-5) Avo mwene vo wafwana wina muna kwenda sadisa kuna kubwididi e sumbula, olenda yuvula kwa akuluntu dina olenda vanga. Avo osolelo muna kwenda, ovewa luludiku kimana watoma sadilwa una ufwene.

13. Nkia mpasi bewanananga zau e mpangi zeto ana bezingilanga muna nsi zina vo e salu kieto kiasimwa?

¹³ Muna nsi zina vo e salu kieto kiasimwa, o lubangamu lukitulanga e zingu kia mpangi zeto se kia mpasi kikilu. Vana ntandu a lubangamu, ampangi mu nsi zazi, benuananga mpe ye mambu nze, kondwa kwa nzimbu, mayela yovo fwilwa muntu ona betoma zolanga. Mu kuma kia lubangamu, nkumbu miayingi, diampasi dikalanga kwa akuluntu mu mokena ye ampangi mantalani ngatu kubakingula muna nzo zau yo kubavana lukasakeso bavuidi o mfunu. I diau diabwila mpangi Andrei ona tuyikidi kala muna longi diviokele. Mpangi a nkento a buka kiandi kia salu kia umbangi mpasi za kondwa nzimbu kanuananga zau. Muna wokesa o mambu wabwilwa sumbula kia kalu. Diavava vo kapasulwa nkumbu miayingi ye kalendanga sala ko. Kana una vo e salu kieto kiasimwa muna nsi au ye vuku kiabundumuka, ampangi bavanga mawonso muna kunsadisa. Kieleka, o Yave wamonanga mawonso mavangamanga.

14. Aweyi akuluntu balenda songela e mbandu muna bundanga e vuvu kwa Yave?

¹⁴ Adieyi akuluntu balenda vanga? Mpangi Andrei wasamba yo vanga mana kalenda. Aweyi Yave kavanina e mvutu za sambu yandi? Wasadila ampangi ana bakala yo luvevoko lwa kangala. Akaka banata mpangi a nkento kuna lupitalu, vo i akaka bankayila e nzimbu muna kunsadisa. Yave wasadila e mpangi zazi muna vana lusadisu kwa mpangi ankento ye wasambula e kintwadi kiau ye unkabu basonga muna sadisa mpangi ndioyo. (Ayib. 13:16) Akuluntu, avo e salu kieto kisiminu muna nsi ina nuzingilanga, nulomba lusadisu kwa mpangi zankaka. (Yer. 36:5, 6) Vana ntandu, nubunda e vuvu kwa Yave, yandi okunusadisa kimana nuavana lusadisu kwa ampangi. O olenda kunusadisa mu lungisa e nsantu za ampangi ana bavuidi lusadisu o mfunu.

15. Aweyi tulenda tatidila kintwadi kieto vava tubangikwanga?

¹⁵ Adieyi akaka balenda vanga? Avo salu kieto kisiminu, dilenda vava vo twalunganena mu buka yakete. Muna kuma kiaki, e diambu disundidi o mfunu i kalanga ye ngwizani ambote ye mpangi zeto. Kadi e mbeni eto i Satana, ke mpangi zeto ko. Avo diambu tubakanene yo mpangi eto, tuvanga e ngolo mu singika dio vana vau. (Nga. 19:11; Efe. 4:26) Vitanga o ntu muna sadisa muntu yo nkwandi. (Tito 3:14) O lusadisu luna ampangi bavana kwa mpangi ankento, lwasadisa e buka mu kala mu kintwadi.  Batoma finama muntu yo nkwandi ye bakituka nze esi nzo mosi.—Nku. 133:1.

16. Landila Kolosai 4:3, 18, aweyi tulenda sadisila mpangi zeto ana bebangikwanga?

¹⁶ Ulolo wa mpangi zeto zamakala ye zamakento, besadilanga Yave kana una vo ayadi besimanga e salu kieto. Akaka muna yau, besiwanga mu pelezo mu kuma kia lukwikilu lwau. Muna kuma kiaki, tulenda samba mu kuma kia mpangi zazi, esi nzo zau ye mu kuma kia awana besianga luvevoko lwau mu vonza, kubavana lusadisu lwa mwanda ye lwa nitu yo kubayikama muna mfundu kuna mbazi ankanu. c (Tanga Kolosai 4:3, 18.) Kuvezi o nkuma ko wa sambu yaku.—2 Tes. 3:1, 2; 1 Tim. 2:1, 2.

17. Aweyi olenda kubamena owau mu kuma kia lubangamu?

¹⁷ Ngeye ye esi nzo aku, nukubamanga owau mu kuma kia lubangamu. (Mav. 14:22) Kuyindula mambu mawonso mambi ko malenda kubwila. Kansi, kumika e ngwizani aku yo Yave yo sadisa wan’aku bavanga diau dimosi. Avo yantikidi tokana kwayingi, ziula o ntima aku kwa Nzambi muna sambu. (Nku. 62:7, 8) Nze esi nzo, numokenenanga ekuma luna yau mu bunda Yave e vuvu. d Avo vabwidi e sumbula, oteka kubama dikusadisa kumosi yo wan’aku mu bunda e vuvu kwa Yave, kala yo unkabu yo luvuvamu.

18. Nkia mambu mekutuvingilanga kuna sentu?

¹⁸ O luvuvamu lwa Nzambi lukutusadisanga mu kala mu lutaninu yo vuvika ntima mieto. (Fili. 4:6, 7) Muna mpila yayi Yave ovuvikanga e ntima mieto, kana una vo tunuananga ye vuku, sumbula ye lubangamu. Osadilanga akuluntu ana besalanga kwayingi muna kutuvungula. Ovananga kwa yeto awonso e lau dia sadisa muntu yo nkwandi. O luvuvamu tuna lwau o unu, lukutusadisa mu zizidila e mambu masundidi e mpasi tuwanana mau diaka, kana nkutu e “mpasi zayingi” ezi zifinamene. (Mat. 24:21) Muna kolo kiakina, divava vo twatatidila luvuvamu lweto yo sadisa muntu yo nkwandi mu vanga diau dimosi. Kansi, vava e mpasi zayingi zivioka, mambu mawonso mampasi tunuananga mau o unu, ke mekala diaka ko. Kadi e kani dia Yave dilungana, dia sia vo, o wantu bazingila muna luvuvamu lwakieleka ye lwakwele mvu.—Yes. 26:3, 4.